मंगलवार 3 मार्च 2026 की दैनिक मुरली

03-03-2026 praatahmurli om shanti "baapdaada"' madhuban

“meethe bachche - tum roop basanta ho, tumhaare mukh se sadaiv gyaan ratna hi nikalne chaahiye, jab bhi naya koi aaye to use baap ki pahchaan do''

prashn:- apni avastha ko ekras banaane ka saadhan kaun sa hai?

uttar:- sang ki sambhaal karo to avastha ekras banti jaayegi। hamesha achhe serviceable student ka sang karna chaahiye। agar koi gyaan aur yog ke sivaae ulti baaten karte hain, mukh se ratnon ke badle patthar nikaalte hain to unke sang se hamesha saavdhaan rehna chaahiye।

geet:- raat ke raahi…

om shanti। gyaan aur vigyaan। isko kahenge alpha aur be। baap gyaan dete hain alpha aur be ka। dehli mein vigyaan bhavan hai parantu woh koi arth nahin jaante। tum bachche jaante ho gyaan aur yog। yog se ham pavitra bante hain, gyaan se hamaari choli rangati hai। ham saare chakra ko jaan jaate hain। yog ki yaatra ke liye bhi yeh gyaan milta hai। woh koi yog ke liye gyaan nahin dete hain। woh to sthool mein drill aadi sikhaate hain। yeh hai sookshm aur mool baat। geet bhi unse tailuk (sambandh) rakhte hain। baap kehte hain he bachchon, he mool vatan ke raahi, patit-paavan baap hi sarva ka sadgati daata hai। vahi sabko raasta bataayenge ghar jaane ka। tumhaare paas manushya aate hain samajhne ke liye। kiske paas aate hain? prajaapita brahmaakumaar kumaariyon ke paas aate hain to tumko unse poochhna chaahiye - tum kiske paas aaye ho? manushya saadhu santa mahaatma ke paas jaate hain। unka naam bhi rehta hai - phalaane mahaatma ji। yahaan to naam hi hai prajaapita brahmaakumaar kumaari। bi.ke. to dher hain। tumko poochhna hai - kiske paas aaye ho? prajaapita brahma tumhaara kya lagta hai? woh to sabka baap thahra na। koi kehte hain aapke mahaatma ji, guru ji ka darshan karen। bolo, tum guru kaise kehte ho। naam hi rakha hua hai prajaapita brahmaakumaari to woh baap hua na, na ki guru। prajaapita brahmaakumaar kumaari maana hi inka koi baap hai। woh to tumhaara bhi baap thahra। bolo, ham bi.ke. ke baap se milne chaahte hain। prajaapita ka naam kabhi suna hai? itne bachche aur bachchiyaan hain। baap ka maaloom pade tab samjhen behad ka baap hai। prajaapita brahma ka bhi zaroor koi baap hoga। to koi bhi aate hain unse poochhna hai kiske paas aaye ho? board par kya likha hua hai? jabki itne dher centres hain। brahmaakumaar kumaari itne hain to zaroor baap hoga। guru ho na sake। pahle to yeh buddhi se nikle, samjhen ki yeh ghar hai, koi family mein aaya hoon। ham prajaapita brahma ki santaan hain to zaroor tum bhi honge। achha woh brahma phir kiska bachcha hai? brahma, vishnu, shankar ka rachayita to parampita paramatma shiv hai। woh hai hi bindi। unka naam hai shiv। woh hamaara daada hai। tumhaari aatma bhi unki santaan hai। brahma ke tum bhi santaan ho। to tum aise kaho ki ham baapdaada se milne chaahte hain। unko aise samjhaana chaahiye jo unki buddhi chali jaae baap ki taraph। samjhen main kiske paas aaya hoon। prajaapita brahma hamaara baap hai। woh hai sab aatmaon ka baap। to pahle yeh samjho ham kiske paas aaye hain। aise yukti se samjhaana hai jo unko pata pade ki yeh shivbaaba ki santaan hain। yeh ek family hai। unko baap aur daada ka parichay ho jaae। tum samjha sakte ho - sarva ka sadgati daata niraakaar baap hai। woh prajaapita brahma dvaara sarva ki sadgati karte hain। unko sab pukaarte hain। dekhte ho na - kitne bachche hain jo aakar baap se varsa lete hain। pahle unko baap ka parichay mile tab samjhen ham baapdaada se milne aaye hain। bolo, ham unko baapdaada kehte hain। knowledgeful, patit-paavan woh shivbaaba hai na। phir samjhaana chaahiye - bhagwan sarva ka sadgati daata niraakaar hai, woh gyaan ka saagar hai। brahma dvaara behad ka varsa le rahe hain। to woh samjhen yeh brahmaakumaar kumaariyaan shivbaaba ki santaan hain, vahi sabka baap hai। bhagwan ek hai। vahi aadi sanaatan devi devta dharma ki sthaapna karte hain। woh svarga ka rachayita, sarva ka baap bhi hai, teacher bhi hai, guru bhi hai। srishti ke aadi-madhya-ant ka raaz samjhaate hain arthaat trikaaldarshi banaate hain। jo bhi dekho - samajhne laayak hai to unko yeh samjhaana chaahiye। pahle to poochho - tumhaare baap kitne hain? laukik aur paarlaukik। baap to sarvavyaapi ho na sake। laukik baap se yeh varsa milta hai, paarlaukik se yeh varsa milta hai। phir unko sarvavyaapi kaise kah sakte hain। yeh akshar note kar dhaaran karo। yeh samjhaana zaroor padta hai। samjhaane vaale tum thahre। yeh ghar hai, hamaara guru nahin hai। dekhte ho yeh sab brahmaakumaar kumaariyaan hain। varsa hamko niraakaar shivbaaba hi dete hain jo sarva ka sadgati daata hai। brahma ko sarva ka sadgati daata patit-paavan liberator nahin kaha ja sakta। yeh shivbaaba ki hi mahima hai jo bhi aaye unko yahi samjhaao ki yeh sarva ka baapdaada hai। vahi baap svarga ka rachayita hai। brahma dvaara vishnupuri ki sthaapna karte hain। aise tum kisko bhi samjhaayenge to phir baap ke paas aane ki darkaar hi nahin rahegi। woh to hire hue hain (aadat padi hui hai), kahenge guru ji ka darshan karen..। bhakti maarga mein guru ki bahut mahima karte hain। ved shaastra yaatra aadi sab guru hi sikhlaate hain। tumko samjhaana hai manushya guru ho nahin sakte। ham brahma ko bhi guru nahin kehte। satguru ek hai। koi manushya gyaan ka saagar ho nahin sakta। woh sab hain bhaktimaarga ke shaastra padhne vaale। unko shaastron ka gyaan kaha jaata hai, jisko philosophy kehte hain। yahaan hamko gyaan saagar baap padhaate hain। yeh spiritual knowledge hai। gyaan saagar brahma vishnu shankar ko nahin kah sakte, to manushya ko kaise kah sakte। gyaan ki authority manushya ho na sake। shaastron ki authority bhi parampita paramatma ko kaha jaata hai। dikhaate hain, parampita paramatma brahma dvaara sabhi vedon shaastron ka saar inke dvaara samjhaate hain। baap kehte hain mujhe koi jaante hi nahin to varsa kahaan se mile। behad ka varsa behad ke baap dvaara hi milta hai। ab yeh baba kya kar rahe hain? yeh holi aur dhuriya hai na। gyaan aur vigyaan akshar sirf do hain। manamnaabhav ka bhi gyaan dete hain। mujhe yaad karo to tumhaare vikarma vinaash honge। to yeh gyaan vigyaan hai - holi aur dhuriya। manushyon mein gyaan na hone ke kaaran woh to ek do ke mukh mein dhool daalte hain। hain bhi aise। gati sadgati kiski bhi hoti nahin। dhool hi mukh mein daalte hain। gyaan ka teesra netra kisko bhi hai nahin। danta kathaayen sunte aaye hain। unko kaha jaata hai blind faith।

ab tum aatmaon ko gyaan ka teesra netra mila hai। tum bachchon ko baap se varse ki praapti ke liye raay deni hai to unko pata pade। yeh varsa le rahe hain brahma dvaara aur koi dvaara mil nahin sakta। sab centres par yeh naam likha hua hai - prajaapita brahmaakumaar kumaariyaan। agar geeta paathshaala likhen to common baat ho jaati hai। ab tum bhi bi.ke. likho tab to baap ka parichay de sako। manushya bi.ke. naam sunkar dar jaate hain isliye geeta paathshaala naam likhte hain। parantu ismen darne ki koi baat nahin। bolo yeh ghar hai। tum jaante ho kiske ghar aaye hain? in sabka baap hai prajaapita brahma। bhaaratvaasi prajaapita brahma ko maante hain। Christian bhi samajhte hain aadi dev hokar gaye hain, jiske yeh manushya vanshaavli hain। baaki woh maanenge to apne Christ ko hi, Christ ko, buddha ko father samajhte hain। sijra hai na। asul mein baap ne brahma dvaara aadi sanaatan devi-devta dharma ki sthaapna ki hai। woh ho gaya great-great grand father। pahle baap ka parichay dena hai। woh kahe ham aapke baap se milne chaahte hain। bolo, varsa shivbaaba se milta hai, na ki brahma baba se। tumhaara baap kaun hai? geeta ka bhagwan kaun hai? aadi sanaatan devi devta dharma ki sthaapna kisne ki? baap naam kahne se samjhenge yeh sab brahmaakumaar kumaariyaan shivbaaba ki aulaad hain। varsa milta hai shiv se brahma dvaara gati va sadgati ka। woh is samay hamko jeevanmukti de rahe hain। baaki sab mukti mein chale jaayenge। yeh gyaan tum bachchon ki buddhi mein rehna chaahiye। koi bhi aaye to usko samjhaao, kisko milne chaahte ho? woh to hamaara bhi aur tumhaara bhi baap hai। guru gosaai to hain hi nahin। yeh to tum samajhte ho। jaise ki holi dhuriya karaate ho। nahin to holi dhuriya ka koi arth nahin nikalta। gyaan se choli rangate ho। aatma is chole ke andar hain। woh pavitra banne se shareer bhi pavitra milega। yeh to pavitra shareer nahin hai। yeh khalaas ho jaana hai। ganga snaan shareer ko karaate hain parantu patit-paavan baap ke sivaae koi hai nahin। patit aatma banti hai to aatma paani ke snaan se paavan ho nahin sakti। yeh kisko pata nahin। woh to aatma so paramatma kah dete hain। aatma nirlep hai। abhi jo sensible bane hain, ve hi dhaaran kar aur kara sakte hain। jin bachchon ke mukh se sadaiv ratna hi nikalte, unko roop-basanta kaha jaata hai। sivaae gyaan vigyaan ke baaki aapas mein kuchh bhi len-den karte hain goya patthar hi maarte hain। service badle disservice karte hain। 63 janma ek do ko patthar maarte aaye। ab baap kehte hain tumko gyaan vigyaan ki baaten kar dil ko khush karna hai। jharmui jhagmui ki baaten nahin sunni chaahiye। yeh gyaan hai na। patthar to saari duniya ek do ko maarti hai।

tum bachche to roop-basanta ho। tumko gyaan vigyaan ke sivaae na kuchh sunna hai, na sunaana hai। jo ulti baaten karte hain unka sang hi kharaab hai। jo bahut service karne vaale hain, unka sang taare.. koi brahman roop basanta hain, koi brahman bankar phir ulti sulti baaten karte hain। aise ka sang nahin karna chaahiye aur hi nuksaan kar denge। baba baar-baar saavdhaani dete hain। ulti sulti baaten ek do mein kabhi na karo। nahin to apni bhi satyaanaash, doosre ki bhi satyaanaash kar dete hain to phir pad bhrashta ho padta hai। baba kitna sahaj sunaate hain। shauk hona chaahiye, baba ham jaakar bahuton ko yeh knowledge dete hain। vahi baap ke sachche bachche hain। serviceable bachchon ki baap bhi mahima karte hain। unka sang karna chaahiye। kaun achhe student ka sang rakhte hain, baba se poochho to bata sakte hain, kiska sang karna chaahiye। kaun baba ke dil par chadhe hue hain, woh jhat bataayenge। service karne vaalon ka baba ko bhi regard hai। koi-koi to service bhi nahin kar sakte hain। aise bahuton ko kharaab sang milne se avastha neeche oopar ho jaati hai। haan koi sthool service mein achhe hain, woh bhi achha varsa pa lete hain। alpha aur be samajhna to bada sahaj hai। koi ko bhi sirf bolo - baap ko aur varse ko yaad karo। bas, akshar hi do hain - alpha aur be। yeh to bilkul sahaj hai। koi bhi aaye to unko sirf kaho - baba ka pharmaan hai maamekam yaad karo, bas। sabse badi khaatiri yeh hai। baap kehte hain mujhe yaad karo to tumko svarga ka varsa mil jaayega। har centre mein aise nambarvaar hain। koi to detail mein samjha sakte hain। nahin samjha sakte hain to sirf yeh bataao। kalpa pahle bhi baap ne kaha tha ki maamekam yaad karo aur koi bhi dehdhaari devta aadi ko bhi yaad na karo। baaki jharmui jhagmui, phalaana aise kehte hain, yeh karte hain... kuchh bhi nahin karo। yeh baba ne tumko holi aur dhuriya khilaaya। baaki rang aadi lagaana to aasuri manushyon ka kaam hai। koi kiski glaani baith sunaaye to nahin sunna chaahiye। baba kitni achhi baaten sunaate hain - manamnaabhav, madhyaaji bhav। koi bhi aaye to usko samjhaao - shivbaaba sabka baap hai, woh to kehte hain mujhe yaad karo to svarga ka varsa milega। geeta ka bhagwan bhi woh hai। maut saamne khada hai। to tum bachchon ka kaam hai service karna। baap ki yaad dilaana। yeh hai mahaan mantra, jisse raajdhaani ka tilak mil jaayega। kitni sahaj baat hai baap ko yaad karo aur karaao to beda paar ho jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sensible ban sabko baap ka parichay dena hai। mukh se kabhi patthar nikaal disservice nahin karni hai। gyaan-yog ke sivaae doosri koi charcha nahin karni hai।

2) jo roop-basanta hain, serviceable hain unka hi sang karna hai। jo ulti-sulti baaten sunaayen unka sang nahin karna hai।

vardaan:- knowledge dvaara raavan ke bahu roopon ko jaankar uski attraction se mukta rahne vaale himmatvaan bhav

jo bachche knowledge dvaara raavan ke bahu roopon ko achhi tarah se jaan gaye hain, unke aage woh najdeek bhi nahin aa sakta। chaahe sone ka, chaahe heere ka roop dhaaran kare lekin uski attraction mein nahin aayenge। aisi sachchi seetaayen ban lakeer ke andar rahne ka lakshya rakh, himmatvaan bano। phir yeh raavan ki bahu sena vaar karne ke bajaae aapki sahayogi ban jaayegi। prakriti ke 5 tatva aur 5 vikaar transfer hokar aapki seva ke liye aayenge।

slogan:- sevaaon mein saphalta praapta karna hai to nirmaanchit ki visheshta ko dhaaran karo।

ye avyakt ishaare - “nishchay ke foundation ko majboot kar sada nirbhay aur nishchint raho"

vijayi banne ka foundation hai “nishchay'', foundation agar pakka hai to building hil nahin sakti, nishchint rehte hain। agar foundation kachcha hai to thoda-sa bhi toofaan aayega, thodi bhi dharni hilegi to bhay hoga ki yeh building hamaari gir nahin jaae ya crack (daraar) nahin ho jaae। lekin nishchay ka foundation pakka hoga to nirbhay aur nishchint rahenge।