मंगलवार 24 मार्च 2026 की दैनिक मुरली

24-03-2026 praatahmurli om shanti "baapdaada"' madhuban

“meethe bachche - tumhein grihastha vyavhaar mein rehte kamal phool samaan pavitra banna hai, ek baap ki mat par chalna hai, koi bhi disservice nahin karni hai।

prashn:- kin bachchon ko maaya zor se apna panja maarti hai? badi manzil kaun si hai?

uttar:- jo bachche deh-abhimaan mein rehte hain unhein maaya jor se panja maar deti hai, phir naam-roop mein phans padte hain। deh-abhimaan aaya aur thappad laga, isse pad bhrashta ho jaata hai। deh-abhimaan todna yahi badi manzil hai। baba kehte bachche dehi-abhimaani bano। jaise baap obedient servant hai, kitna niranhakaari hai, aise niranhakaari bano, koi bhi anhakaar na ho।

geet:- na woh hamse juda honge…

om shanti। bachchon ne geet suna। bachche kehte hain ham baba ke the aur baba hamaara tha, jab mool vatan mein the। tum bachchon ko gyaan to achhi reeti mila hai। tum jaante ho hamne chakra lagaaya hai। ab phir ham unke bane hain। woh aaya hai raajayog sikhaakar svarga ka maalik banaane। kalpa pahle muaaphik phir aaya hai। ab baap kehte hain he bachche, to bachche hokar yahaan madhuban mein nahin baith jaana hai। tum apne grihastha vyavhaar mein rehte kamal phool samaan pavitra raho। kamal ka phool paani mein rehta hai parantu paani se oopar rehta hai। un par paani lagta nahin hai। baap kehte hain tumko rehna ghar mein hi hai sirf pavitra banna hai। yeh tumhaara bahut janmon ke ant ka janma hai। jo bhi manushya-maatra hain un sabko paavan banaane main aaya hoon। patit-paavan sarva ka sadgati daata ek hi hai। unke sivaae paavan koi bana nahin sakta। tum jaante ho aadhaakalpa se ham seedhi utarte aaye hain। 84 janma tumko zaroor poore karne hain aur 84 ka chakra poora kar jab phir jadajdeebhoot avastha ko paate hain tab mujhe aana padta hai। beech mein aur koi patit se paavan bana nahin sakta। koi bhi na baap ko, na rachna ko jaante hain। drama anusaar sabko kaliyug mein patit tamopradhaan banna hi hai। baap aakar sabko paavan banaae shantidham le jaate hain। aur tum baap se sukhdhaam ka varsa paate ho। satayug mein koi duhkh hota nahin hai। abhi tum jeete ji baap ke bane ho। baap kehte hain tumko grihastha vyavhaar mein rehna hai। baba kabhi kisko kah nahin sakte ki tum gharbaar chhodo। nahin। grihastha vyavhaar mein rehte sirf antim janma pavitra banna hai। baba ne kabhi kaha hai kya ki tum gharbaar chhodo। nahin। tumne eeshvareey seva arth aapehi chhoda hai। kai bachche hain ghar grihastha mein rehte bhi eeshvareey service karte hain। chhudaaya nahin jaata hai। baba kisko bhi chhudaate nahin hain। tum to aapehi service par nikle ho। baba ne kisko chhudaaya nahin hai। tumhaare laukik baap shaadi ke liye kehte hain। tum nahin karte ho kyonki tum jaante ho ki ab mrityulok ka ant hai। shaadi barbaadi hi hogi phir ham paavan kaise banenge। ham kyon na bhaarat ko svarga banaane ki seva mein lag jaaen। bachche chaahte hain ki raamraajya ho। pukaarte hain na - he patit-paavan seetaaraam। he raam aakar bhaarat ko svarga banaao। kehte bhi hain parantu samajhte kuchh nahin hain। sannyaasi log kehte hain is samay ka sukh kaag vishta ke samaan hai। barobar hai bhi aise। yahaan sukh to hai hi nahin। kehte rehte hain parantu kiski buddhi mein nahin hai। baap koi duhkh ke liye yeh srishti thode hi rachte hain। baap kehte hain kya tum bhool gaye ho - svarga mein duhkh ka naam nishaan nahin rehta hai। vahaan kans aadi kahaan se aaye।

ab behad ka baap jo sunaate hain unki mat par chalna hai। apni manmat par chalne se barbaadi kar dete hain। aashcharyavat sunanti, kathanti, bhaaganti ya traitor bananti। kitni jaakar disservice karte hain। unka phir kya hoga? heere jaisa jeevan banaane badle kaudi misal bana dete hain। pichhaadi mein tumko sab apna saakshaatkaar hoga। aisi chalan ke kaaran yeh pad paaya। yahaan to tumko koi bhi paap nahin karna hai kyonki tum punya aatma bante ho। paap ka phir sauguna danda ho jaayega। bhal svarga mein to aayenge parantu bilkul hi kam pad। yahaan tum raajayog seekhne aaye ho phir praja ban jaate hain। martabe mein to bahut pharka hai na। yeh bhi samjhaaya hai - yagya mein kuchh dete hain phir vaapis le jaate hain to chandaal ka janma milta hai। kai bachche phir chalan bhi aisi chalte hain, jo pad kam ho jaata hai।

baba samjhaate hain aise karma nahin karo jo raaja raani ke badle praja mein bhi kam pad mile। yagya mein svaaha hokar bhaaganti hote to kya jaakar banenge। yeh bhi baap samjhaate hain bachche, koi bhi vikarma nahin karo, nahin to sauguna sajaayen milengi। phir kyon nuksaan karna chaahiye। yahaan rahne vaalon se bhi jo ghar grihastha mein rehte hain, service mein rehte hain ve bahut oonch pad paate hain। aise bahut gareeb hain, 8 aana va roopaya bhej dete hain aur jo bhal yahaan hajaar bhi deven to bhi gareeb ka oonch pad ho jaata hai kyonki woh koi paap karma nahin karte hain। paap karne se sauguna ban jaayega। tumko punya aatma ban sabko sukh dena hai। duhkh diya to phir tribunal baithti hai। saakshaatkaar hota hai ki tumne yeh-yeh kiya, ab khaao saja। pad bhi bhrashta ho jaayega। sunte bhi rehte hain phir bhi kai bachche ulti chalan chalte rehte hain। baap kehte hain hamesha ksheerkhanda hokar raho। agar loonpaani hokar rehte hain to bahut disservice karte hain। koi ke naam roop mein phans padte hain to yeh bhi bahut paap ho jaata hai। maaya jaise ek chooha hai, phoonk bhi deti, kaatti bhi rehti, khoon bhi nikal aata, pata bhi nahin padta। maaya bhi blood nikaal deti hai। aise karma karva deti jo pata bhi nahin padta। 5 vikaar ekdam sir mood lete hain। baba saavdhaani to denge na। aisa na ho jo phir tribunal ke saamne kahen ki hamko saavdhaan thode hi kiya। tum jaante ho eeshvar padhaate hain। khud kitna nirhankaari hai। kehte hain ham obedient servant hain। koi-koi bachchon mein kitna ahankaar rehta hai। baba ka bankar phir aise-aise karma karte hain jo baat mat poochho। isse to jo baahar grihastha vyavhaar mein rehte hain woh bahut oonch chale jaate hain। deh-abhimaan aate hi maaya jor se panja maar deti hai। deh-abhimaan todna badi manzil hai। deh-abhimaan aaya aur thappad laga। to deh-abhimaan mein aana hi kyon chaahiye jo pad bhrashta ho jaae। aisa na ho vahaan jaakar jhaadu lagaana pade। ab agar baba se koi poochhe to baba bata sakte hain। khud bhi samajh sakte hain ki main kitni seva karta hoon। hamne kitnon ko sukh diya hai। baba, mama sabko sukh dete hain। kitna khush hote hain। baba bombe mein kitni gyaan ki dance karte the, chaatrak bahut the na। baap kehte hain bahut chaatrak ke saamne gyaan ki dance karta hoon to achhi-achhi points nikalti hain। chaatrak kheenchate hain। tumko bhi aisa banna hai tab to follow karenge। shreemat par chalna hai। apni mat par chalkar badnaami kar dete hain to bahut nuksaan ho padta hai। abhi baap tumko samajhdaar banaate hain। bhaarat svarga tha na। ab aisa koi thode hi samajhta hai। bhaarat jaisa paavan koi desh nahin। kehte hain lekin samajhte nahin hain ki ham bhaaratvaasi svargavaasi the, vahaan athaah sukh tha। guroonaanak ne bhagwan ki mahima gaai hai ki woh aakar moot paleeti kapde dhote hain। jiski hi mahima hai ekoankaar.... shivling ke badle akaaltakhta naam rakh diya hai। ab baap tumko saari srishti ka raaz samjhaate hain। bachche ek bhi paap nahin karna, nahin to sauguna ho jaayega। meri ninda karvaai to pad bhrashta ho jaayega। bahut sambhaal karni hai। apna jeevan heere jaisa banaao। nahin to bahut pachhtaayenge। jo kuchh ulta kiya hai woh andar mein khaata rahega। kya kalpa-kalpa ham aise karenge jisse neench pad paayenge। baap kehte hain maat-pita ko follow karna chaahte ho to sachchaai se service karo। maaya to kahaan na kahaan se ghuskar aayegi। centres ki heads ko bilkul nirhankaari hokar rehna hai। baap dekho kitna nirhankaari hai। kai bachche doosron se service lete hain। baap kitna nirhankaari hai। kabhi kisi par gussa nahin karte। bachche agar naapharmaanbardaar hon to baap unko samjha to sakte hain। tum kya karte ho, behad ka baap hi jaante hain। sab bachche ek samaan sapoot nahin hote, kapoot bhi hote hain। baba samjhaani dete hain। dher bachche hain। yeh to vriddhi ko paate hajaaron ki andaaj mein ho jaayenge। to baap bachchon ko saavdhaani bhi dete hain, koi gaphlat nahin karo। yahaan patit se paavan banne aaye ho to koi bhi patit kaam nahin karo। na naam roop mein phansana hai, na deh-abhimaan mein aana hai। dehi-abhimaani ho baap ko yaad karte raho। shreemat par chalte raho। maaya badi prabal hai। baba sab kuchh samjha dete hain। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan nirhankaari banna hai। kisi se seva nahin leni hai। kisi ko duhkh nahin dena hai। aisa koi paap karma na ho, jiski saja khaani pade। aapas mein ksheerkhanda hokar rehna hai।

2) ek baap ki shreemat par chalna hai, apni mat par nahin।

vardaan:- second mein deh roopi chole se nyaara ban karmabhog par vijay praapta karne vaale sarva shakti sampanna bhav

jab karmabhog ka jor hota hai, karmendriyaan karmabhog ke vash apni taraph aakarshit karti hain arthaat jis samay bahut darda ho raha ho, aise samay par karmabhog ko karmayog mein parivartan karne vaale, saakshi ho karmendriyon se bhogvaane vaale hi sarva shakti sampanna ashta ratna vijayi kahlaate hain। iske liye bahut samay ka deh roopi chole se nyaara banne ka abhyaas ho। yeh vastra, duniya ki va maaya ki aakarshan mein tight arthaat kheencha hua na ho tab sahaj utrega।

slogan:- sarva ka maan praapta karne ke liye nirmaanchit bano - nirmaanta mahaanta ki nishaani hai।

maateshvari ji ke anmol mahaavaakya

'eeshvar sarvavyaapi nahin hai, uska pramaan kya hai?"

shiromni geeta mein jo bhagvaanuvaach hai bachche, jahaan jeet hai vahaan main hoon, yeh bhi paramatma ke mahaavaakya hain। pahaadon mein jo himaalay pahaad hai usmein main hoon aur saampon mein kaali naag main hoon isliye parvat mein ooncha parvat kailaash parvat dikhaate hain aur saampon mein kaali naag, to isse siddha hai ki paramatma agar sarva saampon mein keval kaale naag mein hai, to sarva saampon mein uska vaas nahin hua na। agar paramatma oonche te oonche pahaad mein hai goya neeche pahaadon mein nahin hai aur phir kehte hain jahaan jeet vahaan mera janma, goya haar mein nahin hoon। ab yeh baaten siddha karti hain ki paramatma sarvavyaapi nahin hai। ek taraph aise bhi kehte hain aur doosre taraph aise bhi kehte hain ki paramatma anek roop mein aate hain, jaise paramatma ko 24 avtaaron mein dikhaaya hai, kehte hain kachchha machchha aadi sab roop paramatma ke hain। ab yeh hai unhon ka mithya gyaan, aise hi paramatma ko sarvatra samajh baithe hain jabki is samay kaliyug mein sarvatra maaya hi vyaapak hai to phir paramatma vyaapak kaise thahra? geeta mein bhi kehte hain ki main phir maaya mein vyaapak nahin hoon, isse siddha hai ki paramatma sarvatra nahin hai।

2) niraakaari duniya - aatma aur paramatma ke rahne ka sthaan

ab yeh to ham jaante hain ki jab ham niraakaari duniya kehte hain to niraakaar ka arth yeh nahin ki unka koi aakaar nahin hai, jaise ham niraakaari duniya kehte hain to iska matlab hai zaroor koi duniya hai, parantu uska sthool srishti muaaphik aakaar nahin hai, aise paramatma niraakaar hai lekin unka apna sookshm roop avashya hai। to ham aatma aur paramatma ka dhaam niraakaari duniya hai। to jab ham duniya akshar kehte hain, to isse siddha hai vo duniya hai aur vahaan rehte hain tabhi to duniya naam pada, ab duniyaavi log to samajhte hain paramatma ka roop bhi akhanda jyoti tatva hai, vo hua paramatma ke rahne ka thikaana, jisko retired hom kehte hain। to ham paramatma ke ghar ko paramatma nahin kah sakte hain। ab doosri hai aakaari duniya, jahaan brahma vishnu shankar devtaayen aakaari roop mein rehte hain aur yeh hai saakaari duniya, jinke do bhaag hai - ek hai nirvikaari svarga ki duniya jahaan aadhaakalpa sarvada sukh hai, pavitrata aur shanti hai। doosri hai vikaari kaliyugi duhkh aur ashaanti ki duniya। ab vo do duniyaayen kyon kehte hain? kyonki yeh jo manushya kehte hain svarga aur narka donon paramatma ki rachi hui duniya hai, is par paramatma ke mahaavaakya hai bachche, mainne koi duhkh ki duniya nahin rachi jo mainne duniya rachi hai vo sukh ki rachi hai। ab yeh jo duhkh aur ashaanti ki duniya hai vo manushya aatmaayen apne aapko aur mujh paramatma ko bhoolne ke kaaran yeh hisaab kitaab bhog rahe hain। baaki aise nahin jis samay sukh aur punya ki duniya hai vahaan koi srishti nahin chalti। haan, avashya jab ham kehte hain ki vahaan devtaaon ka nivaas sthaan tha, to vahaan sab pravritti chalti thi parantu itna zaroor tha vahaan vikaari paidaais nahin thi jis kaaran itna karmabandhan nahin tha। us duniya ko karmabandhan rahit svarga ki duniya kehte hain। to ek hai niraakaari duniya, doosri hai aakaari duniya, teesri hai saakaari duniya। achha - om shanti।

ye avyakt ishaare- “nishchay ke foundation ko majboot kar sada nirbhay aur nishchint raho"

saakaar mein agar koi nimitta shreshtha aatma saath mein hoti hai to unse koi bhi baat verify karaae phir karenge to nishchaybuddhi hokar karenge। nirbhayta aur nishchay donon gunon ko saamne rakh karenge। to jahaan sada nishchay aur nirbhayta hai vahaan sadaiv shreshtha sankalp ki vijay hai। jo bhi sankalp karte ho, agar sada niraakaar aur saakaar saath va sammukh hai, to verify karaane ke baad nishchay aur nirbhayta se karo, isse samay bhi vesta nahin jaayega।