शुक्रवार 27 मार्च 2026 की दैनिक मुरली

27-03-2026 praatahmurli om shanti "baapdaada"' madhuban

“meethe bachche - gyaan saagar baap dvaara tum master gyaan saagar bane ho, tumhein gyaan ka teesra netra mila hai, isliye tum ho trinetri, trikaaldarshi aur trilokeenaath''

prashn:- vishwa ki roohaani seva tum bachchon ke sivaae koi nahin kar sakta hai - kyon?

uttar:- kyonki tumhein hi supreme rooh (shivbaaba) ki shakti milti hai। pahle tum aatmaon ko supreme rooh dvaara gyaan ka injection lagta hai, jisse tum 5 vikaaron par svayan bhi vijay praapta karte aur doosron ko bhi karaate ho। aisi seva aur koi kar na sake। kalpa-kalpa tum bachche hi yeh roohaani seva karte ho।

om shanti। baap ki yaad mein baithna hai aur koi bhi dehdhaari ki yaad mein nahin baithna hai। naye-naye jo aate hain baap ko to jaante hi nahin hain। unka naam to bada sahaj hai shivbaaba। baap ko bachche nahin jaante, kitna wonder hai। shivbaaba oonch te oonch, sarva ka sadgati daata hai। sarva patiton ka paavan karta, sarva ka duhkh harta bhi kehte hain parantu woh kaun hai, yeh koi nahin jaante, sivaae tum bi.ke. ke। tum ho unke potre potriyaan। so to zaroor apne baap aur unki rachna ke aadi-madhya-ant ko jaanenge। baap dvaara bachche hi sab kuchh jaan jaate hain। yeh hai hi patit duniya। sarva kaliyugi patiton ko satayugi paavan kaise banaate hain so to bi.ke. ke sivaae duniya mein koi nahin jaante। kaliyugi durgati se nikaalne vaala satayugi sadgati daata baap hi hai। shiv jayanti bhi bhaarat mein hi hoti hai। zaroor woh aate hain parantu bhaarat ko kya aakar dete hain, yeh bhaaratvaasi nahin jaante। har varsha shiv jayanti manaate hain parantu gyaan ka teesra netra nahin hai isliye baap ko nahin jaante।

geet:- nayanheen ko raah dikhaao…

yeh manushyon ka hi banaaya hua geet hai ki ham sab nayanheen hain। yeh sthool nayan to sabko hain parantu apne ko nayanheen kyon kehte hain? woh baap baith samjhaate hain ki gyaan ka teesra netra koi ko hai nahin। baap ko nahin jaanna yeh hua agyaan। baap ko baap dvaara jaanna isko kaha jaata hai gyaan। baap gyaan ka teesra netra dete hain, jisse tum saari rachna ke aadi madhya ant ko jaante ho। gyaan saagar ke bachche tum master gyaan saagar ban jaate ho। teesra netra maana hi trinetri, trikaaldarshi, trilokeenaath ban jaate ho। bhaaratvaasi yeh nahin jaante ki yeh lakshmi-naaraayan jo satayug ke maalik the, inko yeh varsa kaise mila? woh kab aaye? phir kahaan gaye? phir kaise raajya liya? kuchh bhi nahi jaante hain। yeh devtaayen paavan hain na। paavan to zaroor baap hi banaayenge।

tum bhaaratvaasiyon ko baap baith samjhaate hain। jo devtaaon ko, shiv ko maante hain। shiv ka janma bhi bhaarat mein hua hai। oonch te oonch hai bhagwan। shiv jayanti bhi yahaan manaate hain। jagat amba, jagat pita brahma aur sarasvati ka bhi janma yahaan hi hai। lakshmi-naaraayan ka janma bhi yahaan hi hota hai, vahi raadhe-krishna hain, yeh bhi bhaaratvaasi nahin jaante। kehte hain patit-paavan aao to zaroor sab patit hain। saadhu santa rishi muni aadi sab pukaarte hain ki hamko paavan banaane aao। doosre taraph kumbha ke mele aadi mein jaate hain paap dhone। samajhte hain ganga patit-paavni hai। pukaarte hain ki patit-paavan aao to manushya kisko kaise paavan bana sakte? baap samjhaate hain tum pahle devi-devta dharma ke the to sab paavan the। abhi patit hain। kehte hain ki raah bataao prabhu। to kahaan ki raah? kehte hain baba jeevanmukti ki raah bataao। hamaare mein 5 vikaar hain। baba ham sab svarga mein the to nirvikaari the। abhi vikaari patit ban pade hain, iska kuchh raaz to samjhaao। yeh koi danta kathaayen nahin hain। baap samjhaate hain - shreemat bhagvat geeta athva paramatma ki sunaai hui geeta hai। patiton ko paavan banaane vaala hai niraakaar bhagwan। manushya ko bhagwan nahin kah sakte। baap kehte - itne bade-bade guru hote bhi bhaarat itna patit kaudi jaisa kyon bana hai। kal ki baat hai ki bhaarat khanda svarga tha। baba ne bhaaratvarsha ko svarga ki saugaat di thi। bhaaratvaasi patiton ko aakar raajayog sikhlaae paavan banaaya tha। ab phir baap bachchon ke paas aaya hai sevaadhaari ban। baap hai roohaani sevaadhaari। baaki to sab manushyamaatra hain jismaani sevaadhaari। sannyaasi bhi jismaani sevaadhaari hain। woh pustak aadi baith sunaate hain। baap kehte hain ki main niraakaar saakaar saadhaaran boodhe tan mein pravesh kar bachchon ko aakar samjhaata hoon। he bhaaratvaasi bachchon, dekho roohaani baap roohon ko baith samjhaate hain। yeh brahma nahin sunaate hain lekin woh niraakaar baap is tan ka aadhaar lete hain। shiv ko to apna shareer nahin hai। saaligraam aatmaon ko to apna-apna shareer hai। punarjanma mein aate-aate patit ban jaate hain। ab to saari duniya patit hai। paavan ek bhi nahin। tum satopradhaan the phir khaad padne se sato se rajo tamo mein aaye ho। tum bhaaratvaasiyon ke paas shivbaaba aakar shareer dhaaran karte hain jisko bhaageerath bhi kehte hain। mandiron mein shankar ka chitra dikhaate hain kyonki woh shiv shankar ikattha samajh lete hain। yeh samajhte nahin ki shiv to niraakaar hai, shankar to aakaari hai। shiv shankar ikattha kaise kehte hain। achha phir bail par savaari kaun karte hain। shiv va shankar? sookshm vatan mein bail kahaan se aaya? shiv rehta hai mool vatan mein, shankar sookshm vatan mein। mool vatan mein sab aatmaayen hain। sookshm vatan mein sirf brahma vishnu shankar hain, vahaan jaanvar hote nahin। baap kehte hain main saadhaaran boodhe tan mein pravesh kar tumko samjhaata hoon। tum bachche apne janmon ko nahin jaante ho। satayug se lekar tumne kitne janma liye hain? 84 janma liye। abhi yeh hai pichhaadi ka janma। bhaarat jo amarlok paavan tha, woh ab mrityulok patit hai। sarva ka sadgatidaata to ek hai na। roodra maala hai hi parampita paramatma niraakaar shiv ki। shri shri 108 roodra maala kahi jaati hai। sab shiv ke gale ka haar hain। baap to hai patit-paavan sarva ka sadgati daata, sarva ko varsa dene vaala। laukik baap se had ka varsa milta hai jisko sannyaasi kaag vishta samaan sukh samajhte hain। baap kehte hain ki barobar yeh tumhaara sukh kaag vishta samaan hai। baap hi aakar patiton ko paavan athva kaanton ko phool banaate hain knowledge se। yeh geeta ki knowledge hai। yeh gyaan koi manushya nahin samjha sakte hain। gyaan ka saagar patit-paavan baap hi samjha sakte hain। baap se hi varsa milta hai jo tum le rahe ho। tum hi sirf sadgati taraph ja rahe ho। abhi to sangam par ho, woh to kaliyug mein hain। abhi hai kaliyug ka ant। mahaabhaarat ladaai bhi saamne khadi hai। 5 hajaar varsha pahle bhi jab tum raajayog seekhte the to bhambhor ko aag lagi thi। abhi tum raajayog seekh rahe ho, yeh lakshmi-naaraayan banne ke liye। baaki to hai bhakti maarga। baap jab aate hain to aakar svarga ke dvaar kholte hain। baap kehte hain ki yeh shiv shakti bhaarat maataayen to bhaarat ko svarga banaati hain shreemat par। tum ho shiv shakti bhaarat maataayen, jo poore vishwa ko svarga bana rahi ho। tum ho hi shiv ki aulaad, usko hi yaad karte ho। shiv se shakti lekar 5 vikaaron roopi shatruon par jeet paate ho। tum bachchon ne 5 hajaar varsha pahle bhi bhaarat ki roohaani seva ki thi। vo social workers karte hain jismaani seva। yeh hai roohaani seva। supreme rooh aakar aatma ko injection lagaate hain, padhaate hain। aatma hi sunti hai। tum aatmaayen ho। tum hi 84 janma lete ho। ek shareer chhod doosra lete ho। 84 janma le 84 maa baap banaaye hain। satayug treta mein tumne svarga ke sukh paaye, ab phir behad ke baap dvaara sukh ka varsa le rahe ho। barobar bhaarat khanda mein yeh lakshmi-naaraayan ka raajya tha। vahaan daitya aadi koi nahin the। tum jaante ho abhi is puraani duniya ko aag lagni hai। main aakar gyaan yagya rachta hoon। tum sab pavitra devta bante ho। hajaaron hain jo devta banne ka purushaartha kar rahe hain। baap aaya hai bachchon ki sadgati karne। tum bachchon ko kaanton se phool bana rahe hain। tumko gyaan ka teesra netra de rahe hain jisse tum saare drama ko, shivbaaba ka kya part bajta hai, sab jaante ho। brahma aur vishnu ka connection kya hai, woh bhi jaante ho। ve dikhaate hain ki vishnu ki naabhi se brahma nikla। brahma hi jaakar vishnu bante hain। brahman so phir devta। vishnu se brahma banne mein 5 hajaar varsha laga। yeh tumko gyaan hai। tum braahmanon ke naabhi kamal se vishnupuri pragat ho rahi hai। unhonne to chitra banaaya hai ki vishnu ki naabhi se brahma nikla। phir sabhi vedon shaastron ka saar sunaaya। ab tum brahma dvaara saara saar samajhte ho। baap kehte hain mukhya dharma-shaastra hain 4, pahle daivi dharma ka shaastra hai geeta। geeta kisne gaai? shivbaaba ne। gyaan saagar patit-paavan, sukh ka saagar shivbaaba hai। usne baith bhaaratkhanda ko svarga banaaya, na ki shreekrishna ne। shreekrishna to mere dvaara gyaan sunkar phir shreekrishna bana। to yeh gupta baat hui na। naye-naye bachche in baaton ko samajh na saken।

shivbaaba ne svarga ki sthaapna ki, usmein yeh lakshmi-naaraayan raajya karte the। ab tum manushya se devta ban rahe ho। baap kehte hain is mrityulok, duhkhadhaam mein tumhaara antim janma hai। bhaarat amarlok tha। vahaan duhkh ka naam nahin tha। bhaarat paristaan tha, ab kabristaan bana hai, phir paristaan hoga। yeh sab samajhne ki baaten hain। yeh hai manushya se devta banne ki paathshaala। yeh koi sannyaasiyon ka satsang nahin hai, jahaan shaastra baith sunaate hain। in baaton ko naya koi samajh na sake jab tak 7 din ka course nahin kiya hai। is samay bhakta to sab manushyamaatra hain, unhon ki aatma bhi yaad karti hai। paramatma ek maashook ke sab aashik hain।

baap aakar sachkhanda banaate hain। aadhaakalpa ke baad phir raavan aakar jhooth khanda banaate hain। abhi hai sangam। yeh sab samajhne ki baaten hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ki shreemat par chalkar sachchi-sachchi roohaani seva karni hai। sarvashaktimaan baap se shakti le 5 vikaaron roopi shatruon par vijay paani hai।

2) manushya se devta banne ke liye pavitra zaroor banna hai। knowledge ko dhaaran kar kaante se phool banna aur banaana hai।

vardaan:- vinaash ke samay paper mein paas hone vaale aakaari light roopdhaari bhav

vinaash ke samay paper mein paas hone va sarva paristhitiyon ka saamna karne ke liye aakaari light roopdhaari bano। jab chalte phirte light house ho jaayenge to aapka yeh roop (shareer) dikhaai nahin dega। jaise part bajaane samay chola dhaaran karte ho, kaarya samaapta hua chola utaara। ek second mein dhaaran karo aur ek second mein nyaare ho jaao - jab yeh abhyaas hoga to dekhne vaale anubhav karenge ki yeh light ke vastradhaari hain, light hi inhon ka shrangaar hai।

slogan:- umang-utsaah ke pankh sada saath hon to har kaarya mein saphalta sahaj milti hai।

ye avyakt ishaare - “nishchay ke foundation ko majboot kar sada nirbhay aur nishchint raho"

baap sarvashaktivaan hai to uska haath pakadne vaale pahunche ki pahunche - yeh faith rakho। chaahe khud bhale kamjor bhi ho lekin saathi to majboot hai na! isliye paar ho hi jaayenge। sada aise nishchaybuddhi vijayi ratna hain, isi smriti mein raho। beeti so beeti, bindi lagaakar aage badho।

vishesh note:- aaj pyaare baapdaada ki ati laadli, desh videsh ke sarva braahman parivaar ki jaan, ham sabke dilon par raajya karne vaali meethi daadi jaanki ji ka punya smriti divas hai। daadi ji ne 104 varsha ki aayu tak videhi va jeevanmukta sthiti mein rah, gyaan daan ke saath-saath gunon ka daan karte poore parivaar ki alaukik paalna ki hai। unki saar garbhit anek gyaan ke guhya rahasyon se bharpoor classes sabhi ka maargadarshan karti rahi hain। aaj bhi unki chhatrachhaaya aur unke dvaara mili hui anmol shikshaayen anek brahma vatson ke kaanon mein goonjati rehti hain। daadi ji sachchaai, saphaai aur saadgi ki pratimoorti thi। daadi ji dvaara mili hui anek anmol shikshaaon mein se kuchh shikshaayen likh rahe hain, sabhi inhen aatmasaat karna hi।

1) apne sookshm abhimaan ko parakhkar use jaldi se khatma karna hi apne oopar aasheervaad karna hai।

2) adhik sochne, bolne aur chinta karne se shakti kharcha hoti hai, silence mein raho to shakti jama ho।

3) kisi ki galti chitta par na ho, chitta saaph rakho to chain se rah sakenge।

4) samajh se vyartha va negative ko khatma kar do to shanti priy ban jaayenge।

5) baba se prize leni hai to niymon par chalo, thoda bhi kahaan lagaav jhukaav na ho।

6) karma aur sambandh ka pata gunon se chalta hai isliye karma mein roohaaniyat aur sambandh mein sachchaai ho।

7) namrata aur satyata ko apna saathi bana lo to har baat accurate hogi।

8) pyaar maangane ke bajaae svamaan mein raho aur sabko maan do to pyaar ke paatra ban jaayenge।

9) jo sachche, svachchha aur serviceable hain, vahi parmaatma pyaar ke paatra hain।

10) seva karte double light rehna, yahi sabse badi seva hai।

11) badi baat ko chhota kar do to sooli bhi kaanta ho jaayegi।

12) chintan saadhna mein interfere karta hai aur simran saadhna dvaara siddhi dilaata hai।

13) khushi ka khajaana sada kaayam rakhna hai to positive sochne ka tareeka seekh lo।

14) ab ki sthiti hi ant mein kaam aayegi isliye apni sthiti banaane par dhyaan do।

15) manobal aisa badha lo jo kaanton ke jangal mein khud bhi safe raho aur doosron ko bhi sahayog de sako।

16) apvitrata se mukta hona hai to aantarik vairaagya vritti dhaaran karo।