सोमवार 4 मई 2026 की दैनिक मुरली

04-05-2026 praatahmurli om shanti "baapdaada"' madhuban

“meethe bachche - nishchaybuddhi ban baap ki har aagya par chalte raho, aagya par chalne se hi shreshtha banenge''

prashn:- kin bachchon ko sachcha-sachcha khudaai khidmatgaar kahenge?

uttar:- jo raajaai paane ka purushaartha karte hain aur doosron ko bhi aap samaan banaate hain। aise eeshvareey seva par lagne vaale bachche sachche-sachche khudaai khidmatgaar hain। unhein dekhkar doosre bhi sahayogi bante hain।

om shanti। tum jab yahaan baithte ho to sabko kehna hai ki shivbaaba ko yaad karo। yeh to tum jaante ho shivbaaba hai, unke mandir mein bhi jaate hain parantu yeh koi bhi nahin jaante ki shivbaaba kaun hai - sivaae tum bachchon ke। to shiv-baba ki yaad dilaani hai। yahaan baithe kaeeyon ka buddhiyog kahaan-kahaan bhatakta rahega isliye tumhaara farja hai yaad dilaana। bhaaeeyon aur bahinon baap ko yaad karo, jis baap se varsa milna hai। tum abhi sachche bhaai-behen ho। woh to sirf mel, female ke kaaran bhaai-behen kah dete hain। lectures mein bhi aise kahenge - brothers sisters… woh hain bhaai-behen shareer ke naate se। yahaan woh baat nahin hai। yahaan to aatmaon ko samjhaaya jaata hai ki apne rachayita baap ko yaad karo, usse varsa milna hai। farka hai na। bhaai-behen akshar to common hai। yahaan baap bachchon ko kehte hain mujh baap ko yaad karo। woh shivbaaba hai roohaani baap aur prajaapita brahma hai jismaani baap। to baapdaada donon kehte hain bachche, baap ko yaad karo aur kahaan bhi buddhi yog na jaaye। buddhi bahut bhatakti hai। bhakti maarga mein bhi aise hota hai। shreekrishna ke aage va kisi bhi devta ke aage baithte hain, maala pherte hain। buddhi kahaan-kahaan bhaagti rehti hai। devtaayen kaun hain? unhon ko yeh raajaai kaise mili, kab mili! yeh kisko pata nahin hai। sikkha log jaante hain - guru naanak ne sikkha panth sthaapan kiya। phir unke guru potre chalte aate hain। woh punarjanma mein aate rehte hain, yeh baaten koi jaante nahin। sadaiv thode hi guroonaanak ko yaad karenge। achha samjho, guroonaanak ko va buddha ko va koi bhi apne dharma-sthaapak ko yaad karte hain parantu yeh kisko thode hi pata hai ki abhi woh kahaan hai। woh to kah dete hain jyoti jyot samaaya। vaani se pare chale gaye ya kah dete shreekrishna haazira-hazoor hai, jidhar dekho krishna hi krishna hai। raadhe hi raadhe hai। aise kehte rehte hain। baap baith samjhaate hain - tum bhaaratvaasi devta the। tumhaari soorat manushya ki, seerat devta ki thi। devtaaon ke chitra to hain na। chitra na hote to yeh bhi samajhte nahin। raadhe-krishna ke saath phir lakshmi-naaraayan ka kya sambandh hai, yeh baap hi aakar samjhaate hain। tum koi ko bhi samjha sakte ho - yeh to niraakaar baba hamko samjhaate hain। vaastav mein niraakaar to sabhi hain। aatma niraakaar hai, phir is saakaar dvaara bolti hai। niraakaar to bol na sake। tum samjha sakte ho - hamaara baba so tumhaara baba hai। shivbaaba gyaan ka saagar, shanti ka saagar hai। behad ka baap hai। unko bhi shareer to chaahiye na। khud kehte hain - ham is brahma tan mein aata hoon, tab to is brahman dharma ki sthaapna ho। brahma dvaara rachna hoti hi hai braahmanon ki। to baap brahman bachchon ko hi samjhaate hain, doosre kisko nahin samjhaate, bachchon ko hi samjhaate hain। aise nahin ki ham shivbaaba ke bachche hain isliye bhagwan hain। nahin। baap, baap hai, bachche, bachche hain। haan, jab bachcha bada ho, baap bane, bachche paida kare tab baap kaha jaae। inke to dher bachche hain na, bachchon ko hi samjhaate hain। jo nishchaybuddhi hain, nishchaybuddhi baap ki aagya par chalenge kyonki shreemat se hi shreshtha ban sakte hain।

abhi tum jaante ho ham un devtaaon jaise ban rahe hain। janma-janmaantar ham devtaaon ki mahima gaate aaye hain। ab hamko shreemat par aisa banna hai, raajaai sthaapan honi hai। sab to poori reeti shreemat par nahin chalenge, nambarvaar chalenge kyonki bahut badi raajaai hai। raajaai mein praja, naukar-chaakar, chandaal aadi sab chaahiye। aisi chalan vaalon ka bhi saakshaatkaar hoga ki yeh chandaal ki family mein jaayenge। chandaal ek to nahin hoga, unki bhi family hogi। chandaalon ki bhi union hoti hai। sab aapas mein milte hain। strike aadi karen to sab kaam chhod den। satayug mein to aisi baat hoti nahin। tumhaara ek chitra bhi hai, jis par tum poochhte ho ki kya banne chaahte ho - barrister banenge, devta banenge? tumhaari saari raajdhaani sthaapan ho rahi hai, kam thode hi hai। behad ka baap, behad ki baaten baith samjhaate hain। yeh buddhi mein baith jaana chaahiye। ham bhavishya ke liye purushaartha kar oonch pad paayenge। shreemat par ham shreshtha te shreshtha raajaai pad paayenge aur phir doosron ko jab aap samaan banaayen tab kaha jaae khudaai-khidmatgaar। kiska kuchh bhi chhipa nahin rah sakta hai। aage chal sab maaloom padega। isko hi gyaan ka prakaash kaha jaata hai, roshni milti jaati hai। manushyon ko kuchh bhi pata thode hi padta hai। bombs bhi andar banaate rehte hain। koi bhi cheez rakhne ke liye thode hi banaai jaati hai। pahle-pahle talvaar se ladaai chalti hai phir bandook banaai, kaam mein laane ke liye, rakhne liye nahin। samajhte bhi hain isse maut hoga। trial to ki hai na। hiroshima mein ek bomb se kitne mare the, uske baad dekho phir kitni unnati ki hai, kitne dher makaan banaaye hain। ab aisa vinaash nahin hoga jo hospital mein pade rahen। hospital aadi to rahenge nahin, isliye arth-quake aadi iktthi hongi। kudarti aapdaaon ko koi rok nahin sakta। kehte bhi hain - yeh sab eeshvar ke haath mein hai। ab tum bachche samajhte ho vinaash to hona hi hai, akaal padna hai, paani nahin milega... so to tum jaante ho। koi nai baat nahin hai। kalpa pahle bhi aise hua tha। kalpa ka gyaan to koi mein hai nahin। kehte bhi hain Christ se 3 hajaar varsha pahle paradise tha। phir shaastron mein kalpa ki aayu laakhon varsha likh di hai! koi ka bhi attention nahin jaata hai, sunkar phir apne dhandhe aadi mein lag jaate hain। to ab baap bachchon ko samjhaate hain - ab jaldi-jaldi purushaartha karo। yaad mein raho to khaad nikalti jaayegi। tumko yahaan hi satopradhaan banna hai। nahin to sajaayen khaakar phir apne-apne dharma mein chale jaayenge। shreemat bhagwan ki milti hai। shreekrishna to raajkumaar hai, woh kya kisko mat denge! in baaton ko duniya mein koi bhi nahin jaante। pyaar se samjhaana hai ki shivbaaba ko yaad karo। shivbaaba khud kehte hain ki maamekam yaad karo। woh bhi kalyaankaari hai aur sang tod ek sang jodna hai। tum ho bhaarat ka beda paar karne vaale। satya-naaraayan ki katha bhi bhaarat se hi tailuk rakhti hai। aur dharma vaale kabhi satya-naaraayan ki katha nahin sunenge। yeh sunenge woh, jo nar se naaraayan banne vaale aadi sanaatan devi-devta dharma vaale honge। vahi amar katha sunenge। amarlok mein devi-devta the to zaroor amarlok mein amar katha se yeh pad paaya hoga। ek-ek baat yaad karne laayak hai। ek baat bhi buddhi mein achhi reeti baith jaae to sab aa jaayenge। baap ko yaad karna hai aur svadarshan-chakra dhyaan mein rakhna hai। shivbaaba ke saath yahaan part baja rahe hain phir jaana hai।

baap hi samjhaate hain - sach kya hai, jhooth kya hai। satya ek hai baaki sab hai jhooth। lanka mein raavan tha ek ki baat hai kya! satayug-treta mein to aisi baat hoti nahin hai। yeh saari manushyon ki duniya lanka hai, yeh hai hi raavan raajya। sab seetaayen ek raam ko yaad karti hain athva sab bhaktiyaan, sajniyaan ek bhagwan, saajan ko yaad karti hain kyonki raavan raajya hai। sannyaasi in baaton ko samajh na saken। sab duhkhi hain, shok vaatika mein hain, shok vaatika hai kaliyug। ashok vaatika hai satayug। yahaan to kadam-kadam par shok hai, duhkh hai। tumko baba, ashok svarga mein le jaate hain। yahaan to manushya kitna shok karte hain। koi mar jaata hai to jaise paagal ho jaate hain। svarga mein to yeh sab baaten hoti nahin। akaale mrityu kabhi hoti nahin, jo stri vidhva banen, vahaan to samay par ek chola chhod jaakar doosra lete hain। mel va female ka lenge, to yeh saakshaatkaar ho jaayega। pichhaadi mein sab maaloom pad jaayega। kaun-kaun kya banenge। phir us samay kahenge hamne itna samay mehnat nahin ki। parantu us samay kahne se kya hoga। samay to beet gaya na isliye baap kehte hain - bachche mehnat karo, service mein sachche right-hand bano to raajaai mein aa jaayenge। service mein lage raho। misaal bhi hai na, kaise kutumba ke kutumba service mein lag pade hain। kahenge is kutumba ne karma aise achhe kiye hue hain jo sab eeshvareey service mein lag gaye hain। maa baap bachche... yeh to achha hai na। service pichhaadi chakra lagaate rehte hain। tum bachchon ko bahut hullaas hona chaahiye। kaise manushyon ko raasta bataayen, jo unhon ki aatma khush ho। kitnon ko raasta bataate ho। yeh tumne praja banaai, beej boya na। jamte jaam (janmate hi raaja) to koi hota nahin। pahle praja ke adhikaari hote hain phir purushaartha karte-karte kya se kya ban sakte hain। tumko service par dekh auron ko bhi umang hoga, ham bhi kyon na aisa purushaartha karen। nahin to phir kalpa-kalpa aisa haal hoga। bahut aayenge, pachhtaayenge। us samay jaisa duhkh manushya saari aayu mein kabhi nahin dekhte। shreemat par nahin chalne ke kaaran pichhaadi mein aisa duhkh dekhenge, baat mat poochho kyonki anek vikarma kiye hain। baba raasta bhi bahut sahaj bataate hain sirf baap ko yaad karna hai। auron ko bhi yeh raasta bataao।

tum devi-devta dharma ke the, jaise Christian dharma ke manushya, islaami dharma ke manushya hain, vaise yeh hain। yeh hain sabse pavitra। in jaisa dharma koi ho nahin sakta, aadhaakalpa tum pavitra rehte ho। svarga aur narka gaaya hua hai। heaven kisko kaha jaata, yeh bhi kisko pata nahin hai। baap bhaarat mein hi aakar bachchon ko jagaate hain। 5 hajaar varsha ki baat hai। jo svarga-vaasi the vahi ab narkavaasi bane hain phir baap aakar paavan svargavaasi banaate hain। ek saajan aakar sab sajniyon ko apni ashok vaatika mein le jaate hain। to pahle-pahle sabko yeh kaho ki baap ko yaad karo। nahin to yahaan baithe-baithe buddhi kahaan-kahaan bhatakti rehti hai। bhakti maarga mein bhi yahi haal hota hai। baba anubhvi to hai na। sabse achha dhandha javaahraat ka hota hai। unmein sach aur jhooth ko bada mushkil samajhte hain। yahaan bhi sach chhipa hua hai, jhooth hi jhooth chalta rehta hai। yeh bhi drama mein noondh hai। tum jaante ho ham sab drama ke actors hain, inse koi bhi nikal nahin sakta। koi bhi moksha ko pa nahin sakta। vivek se kaam lena hota hai। part mein chalte hi jaate hain phir kalpa baad vahi part repeat karenge। tum dekhenge kaise manushya marte hain, vinaash hona hai। sab aatmaayen nirvaandhaam mein chali jaayengi। yeh buddhi mein gyaan hai। service par lage rahne se bahuton ka kalyaan hoga। saara parivaar hi is gyaan mein lag jaae to bada wonder ho jaayega। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) pichhaadi ki dardanaak scene se va duhkhon se chhootne ke liye abhi se baap ki shreemat par chalna hai। aap samaan banaane ki seva shreemat par karni hai।

2) service mein baap ka right-hand banna hai। aatma ko khush karne ka raasta bataana hai। sabka kalyaan karna hai।

vardaan:- svayan ke sankalpon ki uljhan athva sajaaon se bhi pare rahne vaale paas with honour bhav

paas with honour arthaat man mein bhi sankalpon se saja na khaayen। dharmaraaj ke sajaaon ki baat to peechhe hai parantu apne sankalpon ki bhi uljhan athva sajaaon se pare rehna - yeh paas with honour hone vaalon ki nishaani hai।। vaani, karma, sambandh-samparka ki baat to moti hai lekin sankalpon mein bhi uljhan paida na ho, aisi pratigya karo tab paas with honour banenge।

slogan:- gyaan ghrit aur yog ki batti theek ho to khushi ka deepak jagta rahega।

ye avyakt ishaare - sada achal, adol, ekras sthiti ka anubhav karo

duniya ki kisi bhi prakaar ki halchal achal adol sthiti mein vighna na daale। aise vighna-vinaashak achal adol ban har vighna ko paar kar lo, jaise yeh vighna nahin ek khel hai। pahaad raai ke samaan anubhav ho kyonki knowledgeful aatmaayen pahle se hi jaanti hain ki yeh sab to aana hi hai, hona hi hai।