मंगलवार 5 मई 2026 की दैनिक मुरली

05-05-2026 praatahmurli om shanti "baapdaada"' madhuban

“meethe bachche - sukh-shanti ka vardaan ek baap se hi milta hai, koi dehdhaari se nahin, baba aaye hain - tumhein mukti-jeevanmukti ki raah dikhaane''

prashn:- baap ke saath jaane aur satayug aadi mein aane ka purushaartha kya hai?

uttar:- baap ke saath jaana hai to poora pavitra banna hai। satayug aadi mein aane ke liye aur sang buddhiyog tod ek baap ki yaad mein rehna hai। aatma-abhimaani zaroor banna hai। ek baap ki mat par chalenge to oonch pad ka adhikaar mil jaayega।

geet:- nayan heen ko raah dikhaao…

om shanti। yeh geet kisne gaaya? bachchon ne kyonki baap to ek hi hai, usko hi rachayita kaha jaata hai। rachna, rachayita ko pukaarti hai। baba ne samjhaaya hai - bhakti maarga mein to tumko do baap hain। ek laukik, doosra hai paarlaukik। sabhi aatmaon ka baap ek hi hai। ek baap hone se sabhi aatmaayen apne ko brothers kehte hain। us baap ko pukaarte hain O god father, O parampita raham karo, kshama karo। bhakton ka rakshak ek bhagwan hi hai। pahle-pahle to yeh samjhaana chaahiye ki hamko do baap hain। ab paarlaukik baap to sabhi ka ek hai। baaki laukik baap har ek ka alag-alag hai। ab laukik baap bada va paarlaukik baap bada? laukik baap ko to kabhi bhagwan va parampita nahin kahenge। aatma ka baap ek hi parampita paramatma hai। aatma ka naam kabhi badalta nahin hai। shareer ka naam badalta hai। aatma bhinna-bhinna shareer le part bajaati hai arthaat punarjanma leti hai। aakhir bhi kitne janma milte hain। so baap hi aakar samjhaate hain। bachche tum apne janmon ko nahin jaante ho। baap aate hi bhaarat mein hain, unka naam shiv hai। samajhte bhi hain shiv paramatma hai। shiv jayanti va shivraatri bhi manaate hain। woh niraakaar hai। jaise aatma bhi niraakaar hai, niraakaar se saakaar mein aate hain part bajaane। ab niraakaar shiv to shareer bigar part baja na sake। manushya in baaton ko kuchh bhi nahin samajhte hain, nayan heen hain। yeh shareer ke do netra to sabko hain। teesra gyaan ka netra aatma ko nahin hai, jisko divya-chakshu bhi kehte hain। aatma apne baap ko bhool gai hai, isliye pukaarte hain nayan heen ko raah bataao। kahaan ki raah? shantidham aur sukhdhaam ki। sarva ka sadgati daata, satguru ek hi hai। manushya, manushya ka guru ban sadgati de nahin sakta। na khud sadgati paate hain, na auron ko dete hain। ek baap hi sarva ko sadgati dete hain। us alpha baap ko hi yaad karna hai। baap samjhaate hain - koi bhi manushya-maatra mukti-jeevanmukti, shanti aur sukh sadaakaal ke liye de nahin sakte। sukh-shanti ka vardaan to ek baap hi de sakte hain। manushya, manushya ko nahin de sakte। bhaaratvaasi satopradhaan the to satayugi svargavaasi the। aatma pavitra thi। bhaarat ko svarga kaha jaata hai jabki aatmaayen pavitra, satopradhaan theen।

tum jaante ho, barobar aaj se 5 hajaar varsha pahle bhaarat svarga, satopradhaan tha। in lakshmi-naaraayan ka raajya tha। abhi kaliyug ka bhi ant hai, isko narka kaha jaata hai। yahi bhaarat svarga tha to bahut dhanvaan tha। heere-javaahron ke mahal the। baap bachchon ko yaad dilaate hain। satayug aadi mein in lakshmi-naaraayan ki raajdhaani thi। usko svarga baikuntha kaha jaata hai। abhi to svarga hai nahin, yeh baap samjhaate hain। baba bhaarat mein hi aate hain। niraakaar shiv ki jayanti bhi manaate hain, parantu woh kya karte hain, yeh koi nahin jaante। ham aatmaon ka baap shiv hai, unki ham jayanti manaate hain। baap ki biography ko bhi nahin jaante। gaaya bhi jaata hai - duhkh mein simran sab karen। pukaarte hain O god father raham karo। ham bahut duhkhi hain kyonki yeh raavan raajya hai। varsha-varsha raavan ko jalaate hain na। parantu yeh kisko pata nahin ki 10 sheesh vaala raavan kya cheez hai। ham unko jalaate kyon hain, yeh kaun sa dushman hai jo unki effigy banaae jalaate hain। bhaaratvaasi bilkul nahin jaante kyonki gyaan ka teesra netra nahin hai tab to raamraajya maangate hain। 5 vikaar stri mein, 5 vikaar purush mein hain isliye inko raavan sampradaay kaha jaata hai। yeh raavan 5 vikaar hi bade se bada dushman hai, jiska effigy banaae jalaate hain। bhaaratvaasiyon ko yeh pata nahin padta ki raavan hai kaun, jisko jalaate hain। yeh raavan raajya kab se shuru hua, yeh bhi kisko pata nahin hain। baap samjhaate hain - raamraajya - satayug, treta। raavan raajya - dvaapar, kaliyug। satayug mein in lakshmi-naaraayan ka raajya tha, inhon ko yeh raajya kahaan se, kaise mila, yeh koi nahin jaante। yeh samajhne ki baaten hai। ismen attention dena padta hai। most beloved baap hai tab to unko bhakti maarga mein bhi pukaarte hain। bhaarat mein jab inhon ka (lakshmi-naaraayan ka) raajya tha to duhkh ka naam nahin tha। abhi duhkhadhaam hai, kitne anek dharma hain। satayug mein ek dharma tha, itni sab aatmaayen kahaan chali jaayengi, kisko pata nahin hai kyonki nayanheen hain। shaastron se gyaan ka teesra netra kisko nahin milta hai। gyaan netra gyaan saagar parampita paramatma hi dete hain। aatma ko teesra netra milta hai। aatma bhool gai ki hamne kitne janma liye hain। satayug mein jo devi-devtaaon ka raajya tha, woh kahaan gaya? gaate bhi hain manushya 84 janma lete hain। 84 ka chakra kehte hain। parantu kaun si aatma 84 janma leti hai? jo pahle bhaarat mein aate hain woh the devi-devta। phir 84 janma bhog ant mein patit ban jaate hain। gaate bhi hain - he patit-paavan, to siddha karte hain ham patit hain isliye pukaarte hain, he patit-paavan humein paavan banaane aao। jo khud hi patit hain woh phir auron ko paavan kaise banaayenge।

baap samjhaate hain aadhaakalpa bhakti maarga mein raavan raajya, 5 vikaar hone kaaran bhaarat ne itna duhkh ko paaya hai। 84 janma to lete hi hain। unka bhi hisaab samjhaana chaahiye। pahle-pahle satayug mein hain satopradhaan, phir treta mein hain sato... aatma mein khaad padti hai। baap aate hi bhaarat mein hain। shiv jayanti hai na। aur sabhi aatmaayen to garbha mein janma leti hain। baap kehte hain - main saadhaaran boodhe tan mein pravesh karta hoon, jinka yeh bahut janmon ke ant ka janma hai। yeh samjhaani koi ek ko nahin di jaati। yeh geeta paathshaala hai। manushya ko devta banaane ke liye yeh raajayog sikhaaya jaata hai। tum yahaan aaye ho svarga ki baadshaahi praapta karne jo baap hi de sakte hain। geeta padhne se koi raaja bante nahin hain aur hi rank bante jaate hain। baap geeta ka gyaan sunaae raaja banaate hain, auron dvaara geeta sunne se rank ban gaye hain। bhaarat mein jab in lakshmi-naaraayan ka raajya tha to purity-pees-prosperity thi, pavitra grihastha aashram tha। vahaan hinsa ka naam nahin tha phir dvaapar se lekar hinsa shuru hui hai। kaam kataari chalaate-chalaate tumhaari yeh haalat aakar hui hai। satayug mein 100 percent solvent the, satopradhaan the। yeh raaz koi bhi manushya athva saadhu-santa aadi nahin jaante। baap jo gyaan ka saagar, patit-paavan hai vahi aakar satopradhaan banne ki yukti bataate hain। raavan ki mat par manushyon ka dekho kya haal ho gaya hai। raaje log bhi, woh jo pavitra raajaayen hokar gaye hain unhon ke charnon mein jaakar padte hain aur mahima gaate hain - aap sarvagun sampanna, ham neech paapi hain। hamaare mein koi gun nahin hain phir kehte hain, aapehi taras paroi। hamko aakar mandir laayak banaao। kiski bhi samajh mein nahin aata ki baap kaise aakar phir se devi-devta dharma ki sthaapna karaate hain। ab tum samajhte ho ham so devi-devta dharma ke the। ham so kshatriy, vaishya, shoodra banen, itne janma liye ab 84 janma poore hue hain। phir duniya ka chakra phirna chaahiye isliye phir tumko paavan yahaan banna hai। patit to sukhdhaam, shantidham mein nahin ja sakte। baap samjhaate hain tum jo satopradhaan the woh tamopradhaan bane ho। golden ez se phir iron ez mein aaye ho phir golden ezed banna hai tab muktidhaam, sukhdhaam mein ja sakenge। bhaarat sukhdhaam tha। ab duhkhadhaam hai। geet mein bhi suna - ham nayan heen ko raah bataao.... ham apne shantidham mein kaise jaayen। vo log to kah dete hain - paramatma sarvavyaapi hai, phalaana avtaar hai, parshuraam avtaar hai। ab baap parshuraam ban kisko maarte honge kya? ho nahin sakta। baap samjhaate hain tumne is chakra mein kaise 84 janma liye hain। ab mujh alf ko yaad karo। he aatmaayen dehi-abhimaani bano। deh-abhimaani ban tum bilkul hi duhkhi kangaal, narkavaasi ban pade ho। agar svargavaasi banna hai to aatma-abhimaani zaroor banna hai। aatma hi ek shareer chhod doosra leti hai। ab 84 janma poore hue hain phir satayug aadi mein jaana hai। ab mujhe yaad karo aur sang buddhiyog todo। raho bhal grihastha vyavhaar mein, apne ko aatma nishchay karo। aatma ek shareer chhod doosra leti hai। ab dehi-abhimaani banna hai, mujhe yaad karo to khaad sab jal jaayegi। tum pavitra ban jaayenge phir main sab bachchon ko le jaaoonga। agar meri mat par nahin chalenge to itna oonch pad nahin paayenge। in lakshmi-naaraayan ka oonch pad hai। jab inhon ka raajya tha to aur koi dharma nahin tha। dvaapar se phir aur dharma aate hain। satayug mein manushya bhi thode hote hain। ab to bahut dharma hone ke kaaran kitne duhkhi ho gaye hain। vahi devta dharma vaale ab phir patit hone se apne ko devta kehte nahin hain। hindu naam rakh diya hai। baap samjhaate hain tum jab laayak devi-devta the tab saare vishwa par raajya tha, sab sukhi the। ab duhkhi ban pade hain। bhaarat heaven tha vo ab hell ban gaya hai phir hell ko heaven baap bigar koi bana na sake। devtaaon ko sampoorn nirvikaari kaha jaata hai। yahaan ke manushya to sampoorn vikaari hain, inko kaha jaata hai patit। bhaarat shivaalay tha, shivbaaba ki sthaapna ki hui thi। baap svarga banaate hain phir raavan narka banaate hain। raavan shraap dete hain, baap 21 janma ke liye varsa dete hain। ab tum har ek baap ko hi yaad karo, koi bhi dehdhaari ko nahin। dehdhaari ko bhagwan nahin kaha jaata। bhagwan to ek hi hai। baap to behad ka varsa dete hain phir raavan shraapit bana dete hain। is samay bhaarat shraapit hai, bahut duhkhi hai। ab is raavan par jeet paani hai। gaaya bhi jaata hai de daan to chhoote grahan। vo grahan jo lagta hai woh to prithvi ka parchhaaya hai। ab baap kehte hain tumhaare oopar 5 vikaaron roopi raavan ka grahan hai। yeh 5 vikaar daan mein de dene hain। pahla to daan do ki ham kabhi vikaar mein nahin jaayenge। yeh kaam-kataari hi manushya ko patit banaati hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo knowledge dete hain use poora attention dekar padhna hai। gyaan ke teesre netra se apne 84 janmon ko jaan ab antim janma mein paavan banna hai।

2) raavan ke shraap se bachne ke liye ek baap ki yaad mein rehna hai। 5 vikaaron ka daan de dena hai। ek baap ki mat par chalna hai।

vardaan:- taaj aur tilak ko dhaaran kar baapdaada ke madadgaar banne vaale diltakhtansheen bhav

jab koi takhta par baithte hain to tilak aur taaj unki nishaani hoti hai। aise jo dil takhtansheen hain unke mastak par sadaiv avinaashi aatma ki sthiti ka tilak door se hi chamakta hua najar aata hai। sarva aatmaon ke kalyaan ki shubh bhaavna unke naynon se va mukhde se dikhaai deti hai। unka har sankalp, vachan aur karma baap ke samaan hota hai।

slogan:- saral yaad ke liye saralta ka gun dhaaran karo, sanskaaron ko saral banaao।

ye avyakt ishaare - sada achal, adol, ekras sthiti ka anubhav karo

jisko drama ke gyaan ki shakti practical jeevan mein dhaaran hai woh kabhi bhi halchal mein nahin aa sakte। sada ekras, achal adol banne aur banaane ki vishesh shakti yeh drama ki point hai। ise shakti ke roop mein dhaaran karne vaale kabhi haar nahin kha sakte। is kalyaankaari drama ki har scene mein koi na koi kalyaan samaaya hua hai, dhairyavat ban saakshi ho dekhne ka abhyaas karo to achal-adol rahenge।