मंगलवार 19 मई 2026 की दैनिक मुरली

19-05-2026 praatahmurli om shanti "baapdaada"' madhuban

“meethe bachche - aatma-abhimaani bhav, chalte-phirte, uthte-baithte yahi abhyaas karte raho to tumhaari bahut unnati hoti rahegi''

prashn:- baap ki accurate yaad kin bachchon ki buddhi mein rahegi?

uttar:- jin bachchon ne baap ko accurate jaana hai। kai bachche kehte hain ki bindu ko bhala kaise yaad karen। bhakti mein to akhanda jyoti samajh yaad karte aaye, abhi bindi kahkar moonjh jaate hain isliye pahle-pahle yeh nishchay ho ki baap akhanda jyoti nahin, woh to ati sookshm bindu hai tab yaad accurate rah sakti hai।

om shanti। sabhi bachche yaad mein baithe hain। manamnaabhav। yeh sanskrit akshar vaastav mein hai nahin। baap ne jab sahaj raajayog sikhaaya hai tab yeh sanskrit akshar bole nahin hain। yeh to sanskrit jaante hi nahin hain। baap to hindi mein hi samjhaate hain। bhal yeh rath hindi, sindhi tatha english jaanne vaala hai parantu baap samjhaate hindi mein hain। jo jis dharma ka hai unki apni bhaasha hai। yahaan hindi bhaasha hi chalti hai, yeh bhaasha samajhna sahaj hai aur yeh school bhi wonderful hai। ismen koi bhi kaagaj, pencil, panne aadi ki darkaar nahin rehti। yahaan to sirf ek akshar ko yaad karna hai arthaat baap ko yaad karo। god ko athva eeshvar ko athva parampita paramatma ko koi yaad na kare - yeh mushkil hai, yaad sabhi karte hain parantu unki pahchaan nahin hai। baap hi aakar apni pahchaan dete hain। shaastron mein jo kalpa ki aayu itni lambi likh di hai, woh baap aakar samjhaate hain। bahut badi baat bhi nahin hai। ahilyaayen, boodhi-boodhi maataayen kya samjhengi। yeh to bahut hi sahaj hai। koi chhote bachche bhi samajh sakte hain। baba akshar koi naya nahin hai। shiv ke mandir mein jaate hain to buddhi mein aata hai ki yeh shivbaaba hai, woh niraakaar hai। sabhi manushya-maatra baba kehte hain। ham sarva aatmaon ka baap ek hai। sab jeev ki aatmaayen, jo shareer mein nivaas karti hain, baap ko yaad karti hain। sab dharma vaale jo bhi hain, sab parampita paramatma ko yaad zaroor karte hain। woh hai paramdham mein rahne vaala baap। ham bhi vahaan ke rahne vaale hain। to ab sirf baap ko yaad karna hai। chaahte bhi hain ham paavan banen। bulaate bhi hain - he patiton ko paavan karne vaale aao। nai duniya paavan thi, ab phir puraani hui hai, inko koi naya nahin kahenge। bhaaratvaasi jaante hain - naye bhaarat mein devi-devta raajya karte the। jab naya bhaarat tha to uske aage kya tha? sangam। isse bhi sahaj kehna chaahiye। naye ke aage puraana tha। sangam ko manushya itna sahaj samajh nahin sakte। new world, old world, iske beech ko phir sangam kehte hain। baap ke liye hi kehte hain - he patit-paavan aao, aakar hamko paavan banaao। ham patit ban gaye hain। nai duniya mein koi pukaarenge nahin। abhi tumhaari samajh mein aa gaya hai ki yeh bhaarat paavan tha। he patit-paavan aao, yeh to bahut samay se bulaate aaye hain। unko yeh pata nahin ki patit duniya kab poori hogi। kehte hain - shaastron mein aise likha hua hai ki abhi 40 hajaar varsha aur kaliyug (patit duniya) chalegi। bilkul hi ghor andhiyaare mein hain। abhi tum roshni mein ho। baap ne tumko ab roshni mein laaya hai। yeh 5 hajaar varsha mein srishti ka chakra poora hota hai। kal ki baat hai। tum raajya karte the, barobar in lakshmi-naaraayan ka raajya tha, svarga tha। paavan duniya mein koi upadrav aadi ho nahin sakta। upadrav hota hi hai raavan raajya mein। yahaan tumko baap samjhaate hain, tum sammukh kaanon se sunte ho। kaun sunte hain? aatma। aatma ko badi khushi hoti hai, hamko baap phir se aakar mila hai। baap se varsa liya tha, ab baap kehte hain - mujhe yaad karo। ismen koi likhne-padhne ki baat nahin। jab koi aate hain to poochha jaata hai - aapka kaise aana hua? to kahenge yahaan ke mahaatma se milne? kyon? tumko kya chaahiye? bataao koi bhiksha chaahiye? sannyaasi ho to roti tukda chaahiye। sannyaasi kiske paas jaate hain va raaste mein milte hain to religious manushya samajhte hain yeh phir bhi pavitra manushya hain, inko bhojan khilaana achha hai। abhi to pavitrata bhi nahin rahi hai। bilkul hi tamopradhaan duniya hai, ismen badi gandagi hai। manushya kitna hairaan hote hain। yahaan to hairaan hone ki koi baat nahin। baap kehte hain likhne karne ki bhi baat nahin hai। yeh points aadi bhi likhte hain - dhaarna karne ke liye। jaise doctor logon ke paas bhi kitni davaaiyaan hoti hain, itni sab davaaiyaan yaad rehti hain। barrister ki buddhi mein kitni law ki baaten yaad rehti hain। tumko yaad kya karna hai ek baat, so bhi badi sahaj hai। tum kehte ho ek shivbaaba ko yaad karo। woh kehte hain shivbaaba kaise aayenge। yeh bhi tumhaare sivaae aur kisko pata nahin hai। eeshvar kahaan hai? woh to kahenge naam-roop se nyaara hai ya phir kah dete hain sarvavyaapi hai। raat-din ka farka ho jaata hai - donon akshar mein। naam-roop se nyaari to koi cheez hai nahin। phir kah dete - kutte, billi sabmen paramatma hai। donon ek-do ke opposite baaten ho gai। to baap apna parichay de kehte hain - mujh baap ko yaad karo। gaaya bhi jaata hai - sahaj raajayog। baba kehte hain - yog ka akshar nikaal do, yaad karo। jaise chhota bachcha maa baap ko dekhne se hi jhat gale lag jaata hai। pahle soch karega kya ki hamaare maa baap hain? nahin, ismen soch karne ki baat hi nahin। tumhein bhi sirf shivbaaba ko yaad karna hai। bhakti maarga mein bhi tum shiv par phool chadhaate aaye ho। somnaath ka mandir kitna bhaari banaaya hua hai, jo baad mein muhammad gajanvi ne aakar loota tha। somnaath ka mandir bhaarat mein naameegraami hai। sabse pahle to shiv ki pooja honi chaahiye। bachchon ko yeh sab knowledge abhi buddhi mein aai hai। bhal pooja aadi karte aaye ho parantu tumko yeh pata hi nahin tha ki yeh jad chitra hain। zaroor chaitanya mein aaya hoga tab to varsha-varsha shiv jayanti bhi manaate hain। yeh bhi kehte hain - shiv paramatma niraakaar hai। aatma jaanti hai ham bhi niraakaar hain। abhi tum aatma-abhimaani bante ho, bahut sahaj hai। woh to hamaara baba hai। gyaan ka saagar, sukh ka saagar, patit-paavan hai। unki bahut mahima hai। brahma, vishnu, shankar ki itni mahima nahin hai। ek ki hi mahima gaate hain।

ab tum bachche jaante ho - baba aakar hamko varsa de rahe hain। jaise laukik baap bachchon ka laalan-paalan karte hain, padhaate nahin hain। padhaai ke liye school mein jaate hain phir vaanaprastha mein guru kiya jaata hai। aajkal to chhote-bade sabko guru kara dete hain। yahaan to tum bachchon ko kaha jaata hai - shivbaaba ko yaad karo, sabka hak hai। sab mere bachche hain। tumhaare mein bhi koi hain jo achhi reeti yaad karte hain। kai to kehte hain - baba, kisko yaad karen? bindi ko kaise yaad karen? badi cheez ko yaad kiya jaata hai। achha paramatma, jisko tum yaad karte ho, woh cheez kya hai? to kah dete akhanda jyoti swaroop hai। parantu aise nahin hai। akhanda jyoti ko yaad karna wrong ho jaata hai। yaad to accurate chaahiye। pahle accurate jaanna chaahiye। baap hi aakar apna parichay dete hain, aur phir bachchon ko saare srishti ke aadi-madhya-ant ka samaachaar bhi sunaate hain। detail mein bhi to nutshell mein bhi। ab baap kehte hain bachche tumko paavan banna hai to uske liye ek hi upaay hai - mujhe yaad karo, mujhe kehte hi ho patit-paavan। aatma ko paavan banaana hai। aatma hi kehti hai ham patit ban gaye hain। ham paavan the, ab patit hain। sab tamopradhaan hain। har ek cheez pahle satopradhaan phir tamopradhaan hoti hai। aatma khud kehti hai main patit bani hoon, mujhe paavan banaao। shantidham mein patit hote nahin। yahaan patit hain to duhkhi hain। jab paavan the to sukhi the। to aatma hi kehti hai - hamko paavan banaao to ham duhkh se chhoot jaayen। tum samajhte ho aatma hi sab kuchh karti hai। aatma hi judge, barrister aadi banti hai। aatma hi kehti hai - main raaja hoon, main phalaana hoon। abhi yeh shareer chhod doosra lena hai। isko kaha jaata hai aatma-abhimaani। deh hote aatma-abhimaani। raavan ke raajya mein deh-abhimaani hote hain। aatma-abhimaani abhi hi baap banaate hain। is samay aatma patit duhkhi hai to pukaarti hai he baba aao। yeh bhi tum jaante ho drama plan anusaar patit se paavan, paavan se patit bante aaye hain। chakra phirta hi rehta hai। abhi tumhaari buddhi mein baitha hai, hamaare 84 janma kaise hue hain। abhi yeh baat bhoolo mat। svadarshan chakradhaari ho raho। uthte-baithte, chalte-phirte buddhi mein hamko saari knowledge hai। tum samajhte ho behad ke baap se ham behad ka varsa le rahe hain। baap bachchon ko samjhaate hain ki tumko ek baap ko hi yaad karna hai। baap ko yaad karna, roti tukad khaana hai। bas।

meethe-meethe sikeeldhe bachchon ko baap ghadi-ghadi kehte hain - bachche pet ke liye sirf roti tukad khaana hai। pet koi jaasti khaata nahin hai। ek paav aate ka khaata hai। daal roti bas, 10 roopaye mein bhi manushya pet bharta hai to 10 hajaar mein bhi pet paalte hain। gareeb log khaate bhi kya hain। phir bhi hatte katte rehte hain। bhinna-bhinna cheezen manushya khaate hain to aur hi beemaar pad jaate hain। doctor log bhi kehte hain - ek prakaar ka khaana khaao to beemaar nahin honge। to baap bhi samjhaate hain - roti tukad khaao। jo mile usmein khush raho। daal-roti jaisi aur koi cheez hoti nahin। jaasti laalach bhi nahin rahni chaahiye। sannyaasi log kya karte hain? gharbaar chhod jangal mein chale jaate hain। tatva ko paramatma samajh yaad karte hain, samajhte hain brahm mein leen ho jaayenge। parantu aise to hai nahin। aatma to amar hai। leen hone ki baat nahin hai। baaki aatma pavitra, apvitra banti hai। tumko kitna achha gyaan mila hai। tum hi praalabdha bhogte ho phir yeh gyaan bhool jaata hai। phir seedhi utarni hoti hai। ab tumhaari buddhi mein saara gyaan baitha hua hai। ham 84 janma kaise bhogte hain। yeh part kabhi bhi koi ka banda nahin hota hai। yeh bana banaaya drama hai jo phirta hi rehta hai। yeh kah nahin sakte ki bhagwan ne kab, kaise, kahaan baith banaaya? nahin। yeh to chala hi aata hai। world ki history-geography repeat hoti hi rehti hai। in baaton ko koi samajhte hi nahin hain। tum jaante ho - ham drama plan anusaar aaye hain। ab phir se drama anusaar raajya le rahe hain। yeh baaten aur koi samajh nahin sakte। poochha jaata hai - drama sarvashaktimaan hai va eeshvar? to kehte hain eeshvar sarvashaktimaan hain। samajhte hain woh sab kuchh kar sakte hain। baap kehte hain - main bhi drama ke bandhan mein baandha hua hoon। patiton ko paavan banaane mujhe aana padta hai। tum satayug mein sukhi ban jaate ho। main bhi jaakar vishraami hota hoon - paramdham mein। tum sirkulhe chadh jaate ho। tumhaari sher par savaari hai।

tum jaante ho second by second jo bhi chalta hai woh drama ki noondh hai। tum bachchon ko kitni achhi knowledge hai। ab sirf baap aur varse ko yaad karo। bas। kaagaj, pencil aadi ki koi darkaar nahin hai। brahma baba bhi padhte hain, yeh to kuchh rakhte hi nahin hain। sirf baap ko yaad karna hai to varsa milega। kitna sahaj hai। yaad se tum ever healthy banenge। yeh hai dhaarna ki baat। likhne se kya phaayda hoga, yeh to sab vinaash ho jaayega। parantu koi yaad rakhne ke liye likhte hain। jaise koi baat yaad karni hoti hai to gaanth baandh dete hain। tum bhi gaanth baandh lo, shivbaaba aur varse ko yaad karna hai। yeh to bahut sahaj hai - yog arthaat yaad। kehte hain - baba yaad nahin thaharti। yog mein kaise baithen? are laukik baap ki yaad uthte-baithte, chalte-phirte rehti hai, tum bhi sirf yaad karo। bas, beda paar hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svadarshan chakradhaari ban 84 ka chakra buddhi mein phiraate rehna hai। behad baap ko yaad kar behad ka varsa lena hai, paavan banna hai।

2) kisi bhi cheez ki laalach nahin karni hai, jo mile usmein khush rehna hai। roti-tukad khaana hai, baap ki yaad mein rehna hai।

vardaan:- sarva ke dilon ke raaz ko jaan sarva ko raazi karne vaale sada vijayi bhav

vijayi banne ke liye har ek ke dil ke raaz ko jaanna hai। kisi ke mukh dvaara nikalne vaale aavaaj se uske dil ke raaz ko jaan lo to vijayi ban sakte ho lekin dil ke raaz ko jaanne ke liye antarmukhta chaahiye। jitna antarmukhi rahenge utna har ek ke dil ke raaz ko jaankar use raazi kar sakenge। raazi karne vaale hi vijayi bante hain।

slogan:- vairaagya aisi yogya dharni hai jismen jo bhi phal daalenge woh phaleebhoot avashya hoga।

ye avyakt ishaare - sada achal, adol, ekras sthiti ka anubhav karo

sada umang-hullaas mein ekras rahne ke liye jo bhi sambandh mein aate hain - chaahe student, chaahe saathi sabhi ko santushta karne ki utkantha ho। jisko bhi dekho usse har samay gun uthaate raho। sarva ke gunon ka bal milne se sadaakaal ke liye utsaah ekras rahega। gunagraahi bano। avgunon ko dekhte hue bhi nahin dekho।