शनिवार 30 मई 2026 की दैनिक मुरली

30-05-2026 praatahmurli om shanti "baapdaada"' madhuban

“meethe bachche - apna sab kuchh eeshvareey seva mein saphal kar bhavishya bana lo kyonki maut sir par hai''

prashn:- gyaan sunte hue bhi bachchon mein uski dhaarna kyon nahin hoti hai?

uttar:- kyonki vichaar saagar manthan karna nahin aata hai। buddhiyog deh aur deh ke sambandhon mein latka hua hai। pahle jab buddhi se moh nikle, tab kuchh dhaarna bhi ho। moh aisi cheez hai, jo ekdam bandar bana deta hai isliye baap bachchon ko pahla-pahla vaayda yaad dilaate hain - deh sahit, deh ke sab sambandhon ko bhoolo aur mujhe yaad karo।

geet:- bholenaath se niraala…

om shanti। baap baith samjhaate hain, ab bachchon ko yeh to achhi tarah maaloom hai ki behad ke baap ko hi kaha jaata hai - bigdi ko banaane vaala। shreekrishna bigdi ko sudhaar nahin sakte। geeta ka bhagwan shreekrishna nahin, shiv hai। shivbaaba rachayita hai aur shreekrishna hai rachna। svarga ka varsa dene vaala, svarga ka rachayita hi ho sakta hai। yahi bhaarat ki mukhya bade te badi bhool hai। shreekrishna ko baba koi kah nahin sakta। varsa baba se hi milta hai aur bhaarat ko hi mila tha। bhaarat mein hi shreekrishna shahzaada, raadhe shahzaadi gaai hui hai। mahima oonch te oonch ek baap ki hai। shreekrishna hai oonch te oonch rachna, vishwa ka maalik। unko kaha jaata hai sooryavanshi deity dynasty। geeta aadi sanaatan devi-devta dharma ka shaastra hai। satayug mein to kisko gyaan sunaaya nahin hai। sangam par hi baap ne sunaaya hai। chitron mein bhi pahle yeh siddha karna hai। donon ke chitra dete hain, geeta ka bhagwan, yeh rachayita hai, jo punarjanma rahit hai, na ki shreekrishna, rachna। tum jaante ho - shivbaaba hi heere-tulya banaate hain। gaaya bhi jaata hai - heere-tulya, kaudi-tulya। bachchon ki buddhi mein yeh rehna chaahiye ki baap ka pharmaan hai - tum mujhe yaad karo aur varse ko yaad karo। woh hai behad ka baap। krishna to hai had ka maalik। bhal vishwa ka raaja banta hai, shivbaaba to raaja nahin hai na। geeta ki vaastav mein badi mahima hai। saath-saath bhaarat ki bhi mahima hai। bhaarat sab dharma vaalon ka bada teertha hai। sirf krishna ka naam daalne ke kaaran saara mahatva ud gaya hai। is kaaran hi bhaarat kaudi-tulya ban gaya hai। hai to drama anusaar parantu saavdhaan karna hota hai। baap samjhaate bahut achhi reeti hain। din-pratidin guhya baaten sunaate rehte hain to phir puraane chitron ko badal kar doosra banaana pade। yeh to ant tak hota hi rahega। bachchon ko buddhi mein achhi reeti rakhna chaahiye - shivbaaba hamko varsa de rahe hain। kehte hain - maamekam yaad karo to vikarma vinaash honge। krishna ko yaad karne se vikarma vinaash nahin honge। woh sarvashaktimaan to hai nahin। sarvashaktimaan baap hai, varsa bhi woh dete hain। manushya, krishna ko hi yaad karte rehte hain। achha samjho, krishna ne kaha hai। woh bhi kehte hain - deh ke sambandh chhod, maamekam yaad karo। aatma to baap ko yaad karegi na। krishna to sabhi aatmaon ka baap nahin hai। yeh sab vichaar saagar manthan kar buddhi mein dhaaran karna chaahiye। koi-koi moh mein phansane ke kaaran phir dhaarna nahin kar sakte hain। tum gaate aaye ho - aur sang tod aap sang jodenge। mera to ek, doosra na koi। parantu moh phir aisi cheez hai jo ekdam bandar bana dete hain। bandar mein moh aur lobh bahut hota hai। saahookaar logon ko bhi samjhaaya jaata hai ki abhi maut saamne khada hai। yeh sab eeshvareey seva mein lagaao, bhavishya bana lo। parantu bandar muaaphik latak padte hain, chhodte nahin hain। baap kehte hain - jo bhi deh sahit, deh ke sambandh hain unse buddhiyog hataao। baap ki shreemat par chalo। tum kehte ho - yeh dhan, baal-bachche aadi sab eeshvar ne diya hai। ab woh khud aaye hain, kehte hain - tumhaara yeh dhan-daulat aadi sab khatma ho jaana hai। kinki dabi rahi dhool mein..... earthquake aadi hogi, yeh sab khalaas ho jaayega। aeroplane girte hain va aag aadi lagti hai to pahle-pahle andar chor ghuste hain, jab tak pulis aaye। to baap samjhaate hain - bachche, dehdhaariyon se moh nikaalna chaahiye। mohjeet banna hai। deh-abhimaan hai sabse pahla number dushman। devtaayen dehi-abhimaani hain। deh-abhimaan aane se hi vikaaron mein phansate hain। tum aadhaakalpa deh-abhimaani rehte ho। ab dehi-abhimaani hone ki practice karni hai। jo bhi manushya maatra hain bilkul hi in baaton ko nahin jaante hain, na paramatma ko jaante hain। aatma kya hai, paramatma kya hai, aatma kitne janma leti hai, kaise part bajaati hai, ham actors hain - yeh kisko pata nahin hai, isliye orphan nidhanke kaha jaata hai। woh to kah dete aatma jyoti mein leen ho jaati hai। parantu aatma to avinaashi hai। aatma mein hi 84 janmon ka part noondha hua hai। kehte bhi hain aatma star hai, phir bhi samajhte nahin। aatma so paramatma kah dete hain, baap ko bilkul jaante nahin। aatma ke liye bhi kehte hain bhrakuti ke beech mein sitaara chamakta hai। paramatma ke liye to kuchh bataate nahin hain। unko param-aatma kaha jaata hai, woh bhi paramdham mein rehte hain। woh bhi bindi hai। sirf punarjanma rahit hai, aatmaayen punarjanma mein aati hain। paramatma ke liye kaha jaata hai gyaan ka saagar, aanand ka saagar, pavitrata ka saagar hai। devtaaon ko yeh varsa kisne diya? baap ne। sarvagun sampanna, 16 kala sampoorn... in devtaaon jaisa abhi koi hai nahin। unhon ko yeh varsa kaise mila, yeh koi ko pata nahin। baap hi aakar samjhaate hain, unko hi gyaan ka saagar kaha jaata hai। is samay aakar gyaan dete hain phir praayah lop ho jaata hai। phir hoti hai bhakti, unko gyaan nahin kaha ja sakta। gyaan se to sadgati hoti hai। jab durgati ho, tab sarva ka sadgatidaata, gyaan ka saagar aaye। baap hi aakar gyaan snaan karaate hain। woh to paani ka snaan hai, usse sadgati ho nahin sakti। yeh thodi baaten bhi dhaaran karni chaahiye। mukhya jo achhe-achhe chitra hain, woh bade hone chaahiye jo koi achhi reeti samajh jaaye। akshar bade achhe hon। chitra banaane vaalon ko yeh buddhi mein rakhna chaahiye। kisi ko bhi bulaana hai - nimantran dekar ki aakar parampita paramatma ka parichay lo aur bhavishya 21 janma ke liye baap se varsa lo। bhaaiyon-bahinon paarlaukik baap se behad sukh ka svaraajya kaise milta hai - so aakar samjho। behad ke baap se varsa paana seekho, ismen darne ki to baat hi nahin। bulaate rehte hain - he patit-paavan aao।

baap bhi kehte hain - kaam mahaashatru hai। paavan duniya mein jaana hai to pavitra zaroor banna hai। patit unko kaha jaata hai jo vikaar se janma lete hain। satayug treta mein vish hota nahin, unko kaha hi jaata hai sampoorn nirvikaari duniya। vikaar hai hi nahin। phir yeh tum kyon poochhte ho - bachche kaise paida hote hain? tum nirvikaari to bano। bachcha jaise hona hoga vaise hoga। tum yeh poochhte hi kyon ho? tum baap ko yaad karo to janma-janmaantar ke vikarma vinaash ho jaayen, yeh hai hi paap aatmaon ki duniya। woh hai punya aatmaon ki duniya। yeh achhi reeti buddhi mein bithaana hai। bhakti ka phal bhagwan aakar dete hain, baap hi sarva ki sadgati kar svarga ka maalik banaate hain। baap kehte hain - ab pavitra bano, maamekam yaad karo, yeh hai mahaamantra। baap se varsa zaroor milega। baap kehte hain - tum mujhe yaad karo to tum satopradhaan ban jaayenge। seedhi par samjhaana hai। din-pratidin har cheez sudharti jaati hai, inmen clear kar likhna hai। brahma dvaara aadi sanaatan devi-devta dharma ki sthaapna। jab aadi sanaatan devi-devta dharma tha to aur koi dharma nahin tha। jo pavitra bante hain vahi pavitra duniya mein aayenge। jitni taakat tumhaare mein bharti jaayegi, utna pahle aayenge। sab ikatthe to nahin aayenge। yeh bhi jaante ho satayug-treta mein devi-devtaayen bahut thode hote hain, peechhe vriddhi ko paate hain। praja mein to dher honge। samjhaane vaale bhi bade achhe chaahiye। bolo, behad ke baap se aakar ke varsa lo, jisko pukaarte ho he baba, unka vaastav mein naam hi shiv hai। eeshvar va prabhu, bhagwan kahne se yeh nahin samajhte ki woh baap hai, unse varsa milna hai। shivbaaba kahne se varsa yaad aata hai। unko kehte hain shiv parmaatmaae namah, paramatma ka naam to bataao। naam-roop se nyaara koi nahin hai। unka to shiv naam hai। sirf shivaae namah bhi nahin kehna hai, shiv parmaatmaae namah। har ek akshar ko bahut achhi reeti clear kar samjhaana hota hai। shivaae namah kahne se bhi baap ka maza nahin aata। manushyon ne to sab naam apne oopar rakh diye hain। tum jaante ho manushya ko kabhi bhagwan nahin kaha jaata hai। brahma, vishnu, shankar ko bhi devta kaha jaata hai। baap rachayita to ek hi niraakaar hai। jaise laukik baap bachchon ko rachte hain na, varsa dete hain, vaise behad ka baap bhi varsa dete hain। bhaarat ko vishwa ka maalik banaate hain। saari duniya ka patit-paavan ek hi baap hai। yeh thode hi koi jaante hain। hamaare dharma sthaapak bhi is samay patit hain, kabradaakhil hain। abhi sabki kayaamat ka samay hai। baap hi aakar sabko uthaayenge। kayaamat ke samay hi khuda, bhagwan aate hain। vahi gyaan ka saagar hai। likha hua hai - saagar ke bachche bhasmeebhoot ho gaye the arthaat kaam chita par baith kaale, iron aged ban gaye the, phir sundar kaise banenge? baap kehte hain yaad ki yaatra se। yog akshar kahne se manushya moonjh jaate hain। baap kehte hain - mujhe yaad karo to ant mati so gati ho। kitna sahaj samjhaate hain phir bhi yeh baaten buddhi mein kyon nahin baithti hain? deh-abhimaan bahut hai isliye dhaarna nahin hoti hai। baba badi achhi yukti bataate hain। behad ke baap ne, jisko yaad karte hain usne kya aakar kiya? bhaarat ko svarga banaaya tha। had ka varsa to janma-janmaantar lete aaye ho। ab behad ke baap se 21 janma ke liye behad ka varsa lo। satayug-treta mein devtaayen raajya karte the। sooryavanshi phir chandravanshi so vaishya vanshi phir shoodra vanshi... so akshar daalne se siddha hota hai ki vahi punarjanma lete hain, varnon mein aate hain। baap samjhaate to sabko hain, tum sammukh baithe ho to khush hote ho। koi-koi ki takdeer mein nahin hai to service karte nahin hain। service karenge to naam hoga। kahenge baba ki bachchiyaan kitni hoshiyaar hain, sab kaam karti hain। hamko svarga ki baadshaahi ka varsa deti hain, yeh vakkhar (maal) bhi deti hain। yeh chitra hain - andhon ke aage aaina, ismen jaadu aadi ki baat hi nahin hai। pavitrata ki hi mukhya baat hai। samajhte hain - yeh antim janma hai, svarga mein chalna hai to pavitra zaroor banna hai। vinaash saamne khada hai। paavan zaroor banna pade। sannyaasi gharbaar chhodte hain - paavan banne ke liye। baap kehte hain vinaash saamne khada hai, mujhe yaad karo to beda paar ho jaae। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vinaash ke pahle apna sab kuchh saphal karna hai। yeh kayaamat ka samay hai isliye paavan zaroor banna hai।

2) dehdhaariyon se moh nikaal mohjeet banna hai। deh-abhimaan jo pahla number dushman hai us par vijay paani hai। aur sab sang tod, baap se buddhiyog jodna hai।

vardaan:- yaad ke mantra dvaara sankalp aur karma mein avinaashi siddhi praapta karne vaale siddhi swaroop bhav

aap bachche almighty government ke messenger ho isliye koi se bhi discuss karne mein apna mind disturb nahin karna। yaad ka mantra use karna। jaise koi vaani se ya anya kisi tareeke se vash nahin hote hain to mantra-jantra karte hain, aapke paas aatmik drishti ka netra aur manamnaabhav ka mantra hai jisse apne sankalpon ko siddha kar siddhi swaroop ban sakte ho।

slogan:- action conscious ke bajaae soul conscious bano।

ye avyakt ishaare - sada achal, adol, ekras sthiti ka anubhav karo

ekras ka arth yeh nahin ki purushaartha ki raphtaar sada ek jaisi ho। ekras arthaat sada udti kala ki mahsoosta rahe। sarva sambandhon ki avinaashi taar ek se juti hui ho। ek baap doosra na koi - yeh dridh sankalp ho, ek bhi sambandh kam na ho, sarva sambandhon ki dor ek se bandhi hui ho tab ekras sthiti svatah rahegi।