मंगलवार 2 जून 2026 की दैनिक मुरली

02-06-2026 praatahmurli om shanti "baapdaada"' madhuban

“meethe bachche - tum ho roohaani pande, tumhein grihastha vyavhaar sambhaalte hue, kamal phool samaan ban yaad ki yaatra karni aur karaani hai''

prashn:- baap bachchon ka kaun sa shrringaar karte hain? kis shrringaar ke liye mana karte hain?

uttar:- baba kehte meethe bachche - main tumhaara roohaani shrringaar karne aaya hoon, tum kabhi bhi jismaani shrringaar nahin karna। tum beggar ho, tumhein fashion ka shauk nahin hona chaahiye। duniya bahut kharaab hai isliye jara bhi shareer ka fashion nahin karo।

geet:- aakhir woh din aaya aaj…

om shanti। behad ka baap baith behad ke bachchon ko samjhaate hain। behad maana koi had nahin। kitne dher bachche hain। itne beshumaar bachchon ka ek hi baap hai jisko rachayita kaha jaata hai। woh hain had ke baabaayen, yeh hai behad ke roohon ka baap। woh hain had ke jismaani baap, yeh hai behad ke roohon ka ek hi baap। jisko bhakti maarga mein sab roohen yaad karti hain। tum bachche jaante ho bhakti maarga bhi hai, saath-saath raavan raajya bhi hai। ab manushya pukaarte hain ki hamko raavan raajya se raamraajya mein le jaao। baap samjhaate hain - dekho devi-devta jo bhaarat ke maalik the, ab nahin hain। woh kaun the, yeh bhi ab tum jaante ho। ham hi satayugi sooryavanshi gharaane ke maalik the। raaja, raani to hote hain na। tum bachchon ko ab smriti aai hai। baba aaya hua hai - ham bachchon ko raajya-bhaagya ka varsa dene, vishwa ka maalik banaane। baap kehte hain ab sab bhakti maarga mein hain, bhakti maarga ko hi raavan raajya kaha jaata hai। gyaan maarga sirf ek baap hi sikhaate hain tum bachchon ko। us behad ke baap ko bhakti maarga mein sab yaad karte hain। abhi tumko 21 janma ke liye gyaan ki raajdhaani milti hai। phir aadhaakalpa tum pukaarenge hi nahin। haay raam... haay prabhu kahne ki darkaar hi nahin rahegi। haay raam tab karte hain jab duhkhi hote hain। tumko vahaan duhkh hota hi nahin। abhi tum jaante ho yeh bhi khel bana hua hai। aadhaakalpa hai gyaan ka din, aadhaakalpa hai bhakti ki raat। bhakti hamko neeche utaarti hai। tum bachchon ki buddhi mein seedhi ka knowledge zaroor chaahiye। baap samjhaate hain ki yeh 84 janmon ka chakra hai, is chakra ko jaanne se tum chakravarti raaja banenge, isliye baba chitra bhi banva rahe hain jisse siddha ho ki ham is chakra ko jaanne se 21 janma ke liye raajya bhaagya lete hain।

abhi tum bahut ho gaye ho। badi roohaani shakti sena bani hai। tum sab pande ho। baba bhi panda hai। unko kaha jaata hai - guide। panda akshar shubh hai। yaatra par le jaane vaale pande hote hain। yaatri jaate hain to unko ek guide milta hai ki inko yeh sab dikhaao। teertha yaatra par bhi pande milte hain। baap kehte hain - janma janmaantar teertha yaatra karte aaye ho। amarnaath par jaate hain, teerthon par jaate hain। parikrama lagaate hain। vahaan jaane samay phir vahi yaad rehta hai। gharbaar dhandhe dhori sabse dil hat jaati hai। yahaan tumko samjhaaya jaata hai apne ghar grihastha mein rehte hue dhandha dhori bhi karte raho aur phir gupta yaatra par raho। yeh kitna achha hai। jitna bada dhandha karna hai utna karo। kisi ko mana bhi nahi hai। bhal apni raajaai bhi sambhaalo। raaja janak ko bhi second mein jeevanmukti mili। tumko koi baahar ki yaatra aadi taraph dhakke khaane ki darkaar nahin hai। apne gharbaar ki bhi poori sambhaal karni chaahiye। jo sensible achhe bachche hain, woh samajhte hain hamko ghar grihastha mein rehte kamal phool samaan rehna hai। grihastha vyavhaar mein tang nahin hona chaahiye। kumaar, kumaariyaan to jaise sannyaasi hain, unmein vikaar hain nahin। 5 vikaar se door hain। abhi tum bachche jaante ho hamaara shrringaar hi aur prakaar ka hai, unka aur hai। unka hai tamopradhaan shrringaar, tumhaara hai satopradhaan shrringaar, jisse tumko satopradhaan sooryavanshi raajaai mein jaana hai। baap tum bachchon ko samjhaate hain - tamopradhaan jismaani shrringaar jara bhi nahin karo। duniya bahut kharaab hai। grihastha vyavhaar mein rehte fashionable mat bano। fashion kashish karta hai। is samay khoobsoorti achhi nahin hai। kaale ho to achha hai। koi panja nahin maarega। khoobsoorat pichhaadi to phirte rehte hain। shreekrishna ko bhi saanvara dikhaate hain। tumko gora banna hai shivbaaba se। woh gore bante hain powder aadi se। kitna fashion hai, baat mat poochho। saahookaaron ki to satyaanaash hai। gareeb achhe hain। gaanvade mein jaakar gareebon ka kalyaan karna hai, parantu aavaaj karne vaale bade aadmi bhi chaahiye। tum sab gareeb ho na। koi saahookaar hai kya? tum dekho kaise saadhaaran baithe ho। bambai mein fashion dekho to kya laga pada hai। baba paas milne aate hain to kehta hoon tumne yeh jismaani shrringaar kiya hai, ab aao to tumko gyaan shrringaar karaayen, jisse tum svarga ki pari 21 janmon ke liye ban jaayengi। sada sukhi ban jaayenge। na kabhi royenge, na duhkh hoga। abhi yeh jismaani shrringaar tum chhod do। tumko ham gyaan ratnon se aisa first class shrringaar karaayenge jo baat mat poochho। agar meri mat par chalenge to tumko patraani banaaoonga। yeh to achha hai na। tum sab bhaaratvaasiyon ko is tamopradhaan aasuri duniya narka se bhagaae svarga ki mahaaraani banaata hoon।

tum bachche samajhte ho aaj ham saphed posh mein hain, doosre janma mein svarga mein sone ke chammach se doodh piyenge। yeh to bahut chhi-chhi duniya hai। svarga to svarga hai, baat mat poochho। yahaan tum beggar ho। bhaarat beggar hai। beggar tu prince gaaya hua hai। is bhaarat mein hi phir janma lenge। baap ne hamko svarga ka maalik banaaya tha, raat-din ka pharka hai। mahaan gareeb jinko khaane ke liye kuchh nahin hota hai, unko hi daan diya jaata hai। bhaarat hi mahaan gareeb hai। bichaaron ko yeh pata bhi nahin hai ki is samay sab tamopradhaan hain। din-pratidin seedhi neeche hi utarte rehte hain। abhi koi seedhi chadh nahin sakte। 16 kala se 14 kala phir 12 kala... neeche utarte hi aate hain। yeh lakshmi-naaraayan bhi pahle 16 kala sampoorn the phir 14 kala mein utarte hain na। yeh bhi achhi reeti yaad karna hai। seedhi utarte-utarte bilkul hi patit bane hain। phir svarga ke maalik kaun banaaye? yeh world ki history-geography repeat hoti hai। yeh bhi sab kehte hain parantu ab kaun si history repeat hogi, yeh koi nahin jaante। shaastron mein to likh diya satayug ki aayu laakhon karodon varsha hai। poochho satayug kab aayega? kahenge abhi 40 hajaar varsha pade hain। tum siddha kar batlaate ho kalpa ki aayu hi 5 hajaar varsha hai। woh phir sirf satayug ko hi laakhon varsha de dete hain। ghor andhiyaara hai na। to manushya kaise maanen bhagwan aaya hoga। woh samajhte hain bhagwan tab aayenge jab kaliyug ka ant hoga। abhi tum bachche in sab baaton ko samajhte ho। vinaash saamne khada hai। bachchon ko samjhaaya jaata hai ki vinaash ke pahle baap se varsa le lo, parantu kumbhakran ki neend mein soye pade hain। to bichaare haay-haay kar marenge। tumhaari jay-jaykaar ho jaayegi। vinaash mein hoti hi hai - haay-haay। vipreet buddhi haay-haay hi karenge। abhi tum ho sachche ki aulaad sachche। narka ka vinaash hone bigar svarga kaise banega। tum kahenge yeh to mahaabhaarat ladaai hai। unse hi svarga ke dvaar khulne hain। manushya to kuchh nahin jaante hain। tumhaari buddhi mein hai hamko abhi daivi svaraajya ka maakhan milta hai। woh aapas mein ladte rahenge। hain woh bhi manushya, tum bhi manushya parantu woh hain aasuri sampradaay, tum ho daivi sampradaay। baap bachchon ko sammukh samjhaate hain। tum bachchon ke andar mein khushi rehti hai। anek baar tumne aisi raajdhaani li hai, jaise abhi tum le rahe ho। woh aapas mein do bille ladte hain। maakhan tumko milta hai - saare vishwa ki baadshaahi ka। tum yahaan aate hi ho vishwa ka maalik banne। tum jaante ho ham baba se yog lagaae karmaateet avastha ko paayenge। woh aapas mein ladenge, ham vishwa ki baadshaahi pa hi lenge। yeh to common baat hai। woh baahubal vaale vishwa ki baadshaahi le na saken। tum yogbal se vishwa ke maalik bante ho। tumhaara hai hi ahinsa parmo daivi dharma। donon hinsaayen vahaan hoti nahin। kaam kataari ki hinsa sabse kharaab hai jo tumko aadi-madhya-ant duhkh deti hai। yeh kisko pata nahin, raavan raajya kab hota hai। abhi pukaarte hain - aakar hamko paavan banaao to zaroor kabhi paavan the na। bhaaratvaasi bachche hi pukaarte hain - duhkh se liberate karo, shantidham le jaao। duhkh harkar sukh do। shreekrishna ko hari bhi kehte hain। baba hamko hari ke dvaar le chalo। hari ka dvaar hai krishnapuri। yeh hai kansapuri। yeh kansapuri hamko pasanda nahin hain। maaya machchhandar ka khel dikhaate hain। yeh to tum jaante ho raavan ka raajya dvaapar se shuru hota hai। devtaayen jo paavan the woh patit hone shuru hote hain, iski bhi nishaaniyaan jagannaath puri mein hain। duniya mein bada ganda laga hua hai। ab ham to un sab baaton se nikal paristaan mein jaate hain। ismen badi himmat, mahaaveerapna chaahiye। baba ka bankar patit thode hi banna hai। woh samajhte hain stri-purush ikatthe rahen aur aag na lage, yeh ho nahin sakta isliye hi hangaama karte hain ki yahaan stri-purush ko bhaai-behen banaaya jaata hai। aisa to kahaan likha hua nahin hai। pata nahin yahaan kaunsa jaadu hai। are tum brahmaakumaariyon ke paas jaayenge aur bas tumko vahaan baandh rakhengi। aise-aise vahaan bahkaate rehte hain। yeh bhi drama mein noondh hai। jinka part hoga woh kaise bhi aa jaayenge, ismen darne ki baat hi nahin। shivbaaba to gyaan ka saagar, patit-paavan sarva ka sadgati daata hai। brahma dvaara patit se paavan banaate hain। yeh akshar aise bade likhe hon jo koi bhi aakar padhe। pavitrata par hi kitne vighna daalte hain।

baba kehte hain - bachche kisi bhi dehdhaari mein moh ki rag nahin chaahiye। agar kahaan moh ki rag hogi to phans padenge। yahaan to amma mare to bhi halua khaana...। baba saamne bithaakar poochhte hain kal tumhaara koi mar jaae to royenge to nahin। aasoon aaya to fail hue। ek shareer chhod doosra liya ismen rone ki baat kya hai। doosra koi sune to kahe, mukh se achha to bolo। are achha hi bolte hain। satayug mein rona hota hi nahin, yeh jeevan tumhaara unse bhi oonch hai। tum ho sabko rone se bachaane vaale phir tum kaise royenge? hamko patiyon ka pati mila jo hamko svarga mein le jaate hain। phir narka mein giraane vaale ke liye ham kyon royen! baba kitni meethi-meethi baaten sunaate hain, varsa lene ke liye। is samay bhaarat ka kitna akalyaan hua pada hai। baap aakar kalyaan karte hain। bhaarat ko magadh desh kehte hain। sindha jaise fashionable koi hote nahin। vilaayat se fashion seekhkar aate hain। baal banaane par aajkal ladkiyaan kitna kharcha karti hain। unko kaha jaata hai narka ki pariyaan। baap tumko svarga ki pariyaan banaate hain। kehte hain hamaare liye to yahaan hi svarga hai, yeh sukh to le leven। kal kya hoga - ham kya jaanen। aise anek vichaar vaale aate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sachcha-sachcha roohaani panda ban sabko ghar ka raasta bataana hai। shareer nirvaah arth dhandha karte yaad ki yaatra mein rehna hai। kaarya-vyavhaar mein tang nahin hona hai।

2) gyaan shrringaar kar svayan ko svarga ki pari banaana hai। is tamopradhaan duniya mein jismaani shrringaar nahin karna hai। kaliyugi fashion chhod dena hai।

vardaan:- baalak aur maalikpan ke balance dvaara yuktiyukta chalne vaale saphaltaamoorta bhav

jitna ho sake service ke sambandh mein baalakpan, apne purushaartha ki sthiti mein maalikpan, samparka aur service mein baalakpan, yaad ki yaatra aur manthan karne mein maalikpan, saathiyon aur sangathan mein baalakpan aur vyaktigat mein maalikpan - is balance se chalna hi yuktiyukta chalna hai। isse sahaj hi har kaarya mein saphalta praapta hoti hai, sthiti ekras rehti hai aur sahaj hi sarva ke snehi ban jaate hain।

slogan:- sochna aur karna samaan ho tab kahenge will power vaali shaktishaali aatma।

ye avyakt ishaare - sada harshit rahne ke liye apni nature ko saral banaao, sahansheel bano।

harshit rahne ka gun purushaartha mein bahut madadgaar ban sakta hai, lekin jaise soorat harshit rehti hai vaise aatma bhi sadaiv harshit rahe, is natural gun ko aatma mein laana hai। sada harshit rahenge to phir maaya ki koi aakarshan aakarshit nahin karegi, yeh baap ki guarantee hai। lekin sada harshit rahne ke liye apni roohaani shaan mein rehna aur sahansheel ban saaksheedrishta ho maaya ke khel ko dekhna।