गुरुवार 4 जून 2026 की दैनिक मुरली

04-06-2026 praatahmurli om shanti "baapdaada"' madhuban

“meethe bachche - tum paarlaukik baap ko yathaartha reeti jaante ho isliye tumhein hi sachche preet buddhi va aastik kahenge''

prashn:- baap ke kis kartavya se siddha hota hai ki woh bhakton ka rakshak hai?

uttar:- sab bhakton ko raavan ki jel se chhudaana, insolvent se solvent banaana, yeh ek baap ka hi kartavya hai। jo puraane bhakta hain unhein brahman banaakar devta bana dena - yahi unki raksha hai। bhakton ka rakshak aaya hai - apne sabhi bhakton ko mukti-jeevanmukti dene।

geet:- bholenaath se niraala…

om shanti। yeh kiski mahima suni bachchon ne? gaaya jaata hai oonch te oonch bhagwan aur bhagwan ko hi baap kaha jaata hai। vahi is saari rachna ka rachayita hai। jaise laukik baap bhi rachayita hai apni rachna ka। pahle kanya ko apni stri banaate hain aur phir unse rachna rachte hain। 5-7 bachche paida karte hain। unko kaha jaayega rachna। baap thahra rachayita। woh had ke rachayita thahre। yeh bhi bachche jaante hain rachna ko rachayita baap se varsa milta hai। manushya ko do baap to hote hi hain - ek laukik, doosra paarlaukik। bachchon ko samjhaaya hai gyaan aur bhakti alag-alag hai, phir hai vairaagya। is samay tum bachche sangam par baithe ho aur baaki sab kaliyug mein baithe hue hain। hain to sab bachche parantu tumne behad ke baap ko jaana hai jo saari rachna ka rachayita hai। laukik baap hote bhi us paarlaukik baap ko yaad karte hain। satayug mein laukik baap hote paarlaukik baap ko koi yaad nahin karte kyonki hai hi sukhdhaam। us paarlaukik baap ko duhkh mein yaad karte hain। yahaan padhaaya jaata hai, manushya ko samajhdaar banaaya jaata hai। bhakti maarga mein manushya baap ko bhi nahin jaante hain। kehte bhi hain parampita paramatma, he god father, he duhkh harta sukh karta। phir kah dete sarvavyaapi। patthar mein, kan-kan, kutte, billi sabmen hai। paramatma baap ko gaaliyaan dene lag padte hain।

tum baap ke bane ho to tum ho gaye aastik। tumhaari baap ke saath preet buddhi hai। baaki sabki baap ke saath vipreet buddhi hai। ab tum jaante ho mahaabhaari ladaai bhi saamne khadi hai। puraani duniya ke vinaash arth har 5 hajaar varsha baad kaliyugi patit duniya poori ho phir satayugi paavan duniya sthaapan hoti hai, baap ke dvaara। jisko hi yaad karte hain - he patit-paavan aao। he khivaiya hamko is vishay saagar se nikaal ksheersaagar mein le jaao। gaandhi ji bhi gaate the - patit-paavan seetaaraam... he raam sab seetaaon ko paavan banaao। tum sab ho seetaayen, bhaktiyaan। woh hai bhagwan, sab unko pukaarte hain। woh tumko patit se paavan bana rahe hain। tumko kahaan bhi dhakke nahin khilaate hain। aise nahin kehte teerthon par jaao, kumbha ke mele par jaao। nahin, yeh nadiyaan koi patit-paavni nahin hain। patit-paavan ek gyaan ka saagar baap hai। saagar va nadiyon ko koi yaad nahin karte hain। pukaarte hain baap ko, he patit-paavan baba hamko paavan banaao। baaki paani ki nadiyaan to saari duniya mein hain, woh thode hi patit-paavni hain। patit-paavan ek baap ko hi kaha jaata hai। woh jab aaye tab aakar paavan banaaye। bhaarat ki mahima bahut bhaari hai। bhaarat sab dharmon ka teertha sthaan hai। shiv jayanti bhi yahaan gaai jaati hai। satayug to hai paavan duniya, usmein devi-devta rehte hain। devtaaon ki mahima gaai jaati hai, sarvagun sampanna 16 kala sampoorn... chandravanshiyon ko 14 kala kahenge। phir seedhi neeche utarte hain। baap aakar second mein seedhi chadhaae shantidham-sukhdhaam mein le jaate hain। phir 84 ka chakra lagaae seedhi utarte hain। 84 janma koi ne to zaroor liye honge। mukhya hai sarvashaastramai shiromni geeta, shreemat bhagvat maana bhagwan ki gaai hui। parantu bhagwan kisko kaha jaata hai - yeh patit manushya nahin jaante। patit-paavan sarva ka sadgati daata ek niraakaar shiv hi hai parantu woh kab aaya, yeh koi nahin jaante। baap aapehi aakar apna parichay dete hain। ab dekho yeh bachche aur bachchiyaan donon baba kehte hain। gaaya bhi jaata hai tum maat-pita... tumhaare is raajayog seekhne se sukh ghanere milte hain। tum yahaan aate hi ho behad ke baap se svarga ke 21 janmon ka varsa paane। ab shiv jayanti bhi bhaarat mein hi manaate hain। raavan bhi bhaarat mein hi dikhaate hain। parantu arth kuchh bhi nahin jaante। shiv hamaara behad ka baap hai, yeh ek bhi nahin jaante sirf shiv ki pooja karte rehte hain। jab saara jhaad tamopradhaan ho jaata hai tab baap aate hain। nai duniya mein bhaarat svarga tha। bhaarat mein hi satayug tha। bhaarat mein hi ab kaliyug hai। baap samjhaate hain pahle-pahle tum svarga ke maalik the। ab tum 84 janma bhog narkavaasi bane ho। ab main tumko raajayog sikhlaae manushya se devta, patit se paavan banaata hoon। bhakti arthaat brahma ki raat। gyaan arthaat brahma ka din। tum brahmaakumaar kumaariyaan din mein jaate ho। is puraani duniya ko ab aag lagni hai, barobar mahaabhaarat ladaai hai। barobar is mahaabhaarat ladaai ke baad hi bhaarat svarga ban jaata hai। anek dharma vinaash ho ek dharma ki sthaapna hoti hai।

tum bachche baba ke madadgaar ban aadi sanaatan devi-devta dharma ki sthaapna kar rahe ho। tum svarga ke maalik banne laayak ban jaayenge to phir vinaash shuru ho jaayega। yeh hai shivbaaba ka gyaan yagya phir shiv kaho va roodra kaho। krishna gyaan yagya kabhi nahin kaha jaata। satayug treta mein yagya hota nahin। yagya tab racha jaata hai jab upadrav hota hai। anaaj nahin hoga va ladaai lagegi to yagya rachenge shanti ke liye। tum bachche jaante ho - vinaash hone bigar to bhaarat svarga ban na sake। bhaarat maata shiv shakti sena gaai hui hai। vandana pavitra ki hi ki jaati hai। tum maataaon ko vande maatram kaha jaata hai kyonki tumne shreemat par bhaarat ko svarga banaaya hai। ab baap kehte hain maut to sabke sir par khada hai isliye ab yeh ek janma pavitra bano aur baap ko yaad karo to tum tamopradhaan se satopradhaan ban jaayenge। abhi tum shoodra se brahman ban phir devta banenge, yeh koi nai baat nahin। kalpa-kalpa har 5 hajaar varsha baad yeh chakra phirta rehta hai। narka se svarga banta hai। patit duniya mein manushya jo kuchh karma karte hain woh vikarma hi banta hai। baap kehte hain - 5 hajaar varsha pahle bhi tumko karma-akarma-vikarma ki gati samjhaai thi। ab phir se tumko samjhaata hoon। main parampita paramatma niraakaar tumhaara baap hoon। yeh shareer, jiska hamne aadhaar liya hai, yeh koi bhagwan nahin hai। manushya ko devta bhi nahin kaha jaata। to manushya ko bhagwan kaise kah sakte hain। baap samjhaate hain, tum 84 janma lete-lete neeche seedhi utarte aaye ho, oopar koi ja nahin sakta hai। sabhi patit banne ka hi raasta bataate hain, khud bhi patit bante jaate hain। tab baap kehte hain unka bhi uddhaar karne mujhe aana padta hai। yeh hai raavan raajya। tum abhi raavan raajya se nikal aaye ho। dheere-dheere sabko pata padega। brahman banne bigar shivbaaba se varsa le nahin sakte। baap hain hi do। ek niraakaari baap, ek saakaari baap। varsa milta hai ek saakaari baap se saakaari bachchon ko aur phir niraakaari behad ke baap se varsa milta hai niraakaari aatmaon ko। ab tum bachche jaante ho - meethe-meethe shivbaaba se ham 21 janma ke liye sukhdhaam ka varsa lene aaye hain। vishwa ke maalik bante hain yogbal se। koi hathiyaar aadi nahin hain। to baap se yog lagaae vikarma vinaash kar vishnupuri ke maalik bante hain। ab amarlok mein jaane ke liye amar katha sun rahe hain। vahaan akaale mrityu kabhi hota nahin। duhkh ka naam-nishaan nahin। tum bachche aaye ho shreemat par chal behad ke baap se shreshtha te shreshtha devi-devta banne। yeh koi shaastron ka gyaan nahin hai। dikhaate hain vishnu ki naabhi se brahma nikla। unke haath mein phir shaastra dete hain। baap kehte hain - brahma dvaara main tumko saari rachna ke aadi-madhya-ant ka gyaan suna raha hoon। main hi gyaan ka saagar hoon। gaate bhi hain gyaan soorya pragta... agyaan andher vinaash। satayug mein agyaan hota nahin। woh sachkhanda tha to bhaarat heere jaisa tha, heere javaahron ke mahal bante the। abhi to manushyon ko poora khaane ke liye bhi nahin hai। insolvent vishwa ko phir solvent kaun banaaye! yeh baap ka hi kaam hai। baap ko hi taras padta hai। kehte hain tumko raajayog sikhaane aaya hoon। nar ko naaraayan, naari ko lakshmi banaata hoon। bhakton ka rakshak hai hi baap। tumko raavan ki jel se chhudaae sukhdhaam mein le jaata hoon। saari duniya mein jo brahman banenge vahi devta banenge। brahma ka naam bhi baala hai - prajaapita brahma। tum brahman ho sabse uttam, tum bhaarat ki sachchi roohaani seva kar rahe ho। baap ki yaad se hi vikarma vinaash honge। aur koi raasta nahin hai - patit se paavan banne ka। yaad se hi khaad bhasma hogi। sonaar log jaante hain - sachcha sona, jhootha sona kaise banta hai। usmein chaandi-taamba-loha daalte hain। tum bhi pahle satopradhaan the phir tumhaare mein khaad padti hai, tamopradhaan ban pade ho। abhi phir satopradhaan banna pade tab satayug mein ja sakenge। baap kehte hain - koi bhi dehdhaari ko yaad nahin karo। grihastha vyavhaar mein rehte ek baap ke sivaae aur koi ko yaad nahin karo to tum svargapuri ke maalik ban jaayenge। svarga athva vishnupuri thi, ab raavanpuri hai। phir vishnupuri banegi zaroor। saadhu-santa aadi sabka uddhaar karne aata hoon, tab hi kaha jaata hai yada yadaahi dharmasya... yeh bhaarat ki hi baat hai। sarva ka sadgati daata main ek baap shiv hoon। shiv, roodra sab unke hi naam hain, athaah naam rakh diye hain। baap kehte hain - mera asli naam to ek hi hai - shiv। main shiv hoon, tum saaligraam bachche ho। tum aadhaakalpa deh-abhimaani rahe ho। ab dehi-abheemaani bano। ek baap ko jaanne se baap dvaara tum sab kuchh jaan jaate ho। master gyaan saagar ban jaate ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par chalkar shreshtha te shreshtha devta banna hai। saare vishwa ki sachchi-sachchi roohaani seva karni hai। aadi sanaatan devi-devta dharma ki sthaapna mein baap ka poora madadgaar banna hai।

2) aatma ko sachcha sona banaane ke liye ek baap ke sivaae kisi bhi dehdhaari ko yaad nahin karna hai। paarlaukik baap se sachchi-sachchi preet rakhni hai।

vardaan:- aatmik unnati ke saadhan dvaara sarva paristhitiyon par vijay praapta karne vaale akaalmoorta bhav

jaise shareer nirvaah ke liye anek saadhan apnaate ho aise aatmik unnati ke bhi saadhan apnaao, iske liye sada akaalmoorta sthiti mein sthiti hone ka abhyaas karo। jo svayan ko akaalmoorta (aatma) samajhkar chalte hain woh akaale mrityu se, akaal se, sarva samasyaaon se bach jaate hain। maansik chintaayen, maansik paristhitiyon ko hataane ke liye sirf apne puraane shareer ke bhaan ko mitaate jaao।

slogan:- koi bhi baat jo baar-baar feel karta hai woh final mein fail ho jaata hai।

maateshvari ji ke anmol mahaavaakya - “manushya saakshaatkaar mein kaise jaate hain?''

yeh jo saakshaatkaar mein jaana hota hai to iski philosophy bhi bahut maheen hai। yeh antahvaahak shareer se jaakar ghoom aate hain। jaise koi baahar ghoomne jaata hai na, to aise nahin ghoomne gaya to mara, vo ghoom kar phir vaapas lautkar aayega na। to yeh bhi aatma is body se nikal antahvaahak shareer se sair karne jaati hai, thode samay ke liye inki aatma udta panchhi hai, yeh bhi paramatma ka kaam hai jo unki rassi ko khainch divya drishti se unko saakshaatkaar karaata hai। jaise raat ko ham jab shareer se nyaari aatma ho sukh-path athva svapna ki avastha mein chale jaate hain, to usi samay shareer shant hai, to deh aur deh ke dharma bhool jaate parantu aise nahin koi shareer mar gaya phir jab jaagrit mein aata hai, to us raat ke sapne ki avastha ka varnan kar sunaate hain। vaise paramatma ke saath yog lagaane se paramatma phir divya drishti se aatma ko sair karaate hain। phir jab dhyaan se uthte hain to vo dekha hua saakshaatkaar, phir varnan kar sunaate hain ki ham yeh dekhkar aaye। to woh svapna rajogun, tamogun bhi hota hai, yeh dhyaan phir satogun avastha hai। to dhyaan mein koi shareer marta nahin hai, magar shareer ki bhaasna gum ho jaati hai। jaise chloroform dene se shareer ki sudh-budh bhool jaati hai, dekho, doctor jab koi ang ko dead karte hain to injection lagaakar dead kar dete hain parantu aur indriyaan to chalti hain, to dhyaan bhi isi tarah se hai ki aatma koi udkar sair kar aati hai parantu shareer mar nahin jaata, ab yeh rassi kheenchane ki smriti bhi paramatma mein hai, na ki manushya aatma mein। achha, om shanti।

ye avyakt ishaare - sada harshit rahne ke liye apni nature ko saral banaao, sahansheel bano।

sada harshit rahne vaalon ka yaadgaar vishnu ke roop mein dikhaaya hai। vishnu ksheersaagar mein aaraam se leta hua gyaan ka simran kar harshit ho raha hai। to harshit rahne ka saadhan hai gyaan ka simran। jo jitna gyaan ka simran karte hain woh utna hi harshit rehte hain। koi bhi paristhiti unki himmat, umang-hullaas ko kam nahin kar sakti। ve sahansheelta ki shakti se har paristhiti ko sahaj paar kar lete hain।