सोमवार 8 जून 2026 की दैनिक मुरली

08-06-2026 praatahmurli om shanti "baapdaada"' madhuban

“meethe bachche - yeh saari vishwa eeshvareey family hai isliye gaate hain tum maat-pita ham baalak tere, tum abhi practical mein godly family ke bane ho''

prashn:- baap se 21 janmon ka poora varsa lene ki sahaj vidhi kaun si hai?

uttar:- sangam par shivbaaba ko apna vaaris banaao। tan-man-dhan se balihaar jaao to 21 janmon ke liye poora varsa praapta hoga। baba kahe jo bachche sangam par apna puraana sab kuchh insure karte hain, unhein main return mein 21 janmon tak deta hoon।

geet:- nayan heen ko raah dikhaao…

om shanti। bachchon ne geet suna। yeh bhagat bhagwan ko pukaarte hain। bhagwan ko poora na jaanne ke kaaran manushya kitne duhkhi hain। bhakti maarga mein kitna maatha maarte rehte hain। sirf is jeevan ki baat nahin। jab se bhakti shuru hui hai tab se dhakke khaate rehte hain। bhaarat mein hi devi-devtaaon ka raajya tha, jisko svarga sachkhanda kaha jaata tha। bhaarat sachkhanda hai, bhaarat ki mahima badi jabardasta hai kyonki bhaarat parampita paramatma ka birth place hai। unka asul naam shiv hai। shiv jayanti manaate hain। roodra va somnaath jayanti nahin kaha jaata। shiv jayanti va shiv raatri kaha jaata hai। svarga ki sthaapna karne vaala ek hi heavenly god father hai। ab sabhi bhakton ka bhagwan to zaroor ek hona chaahiye। sabhi nayan heen hain arthaat gyaan ke chakshu va divine insight nahin hain। bhagvaanuvaach - main tumko raajayog sikhaata hoon, shreemat bhagvat geeta hai mukhya। shri arthaat shreshtha mat। ab tumko buddhivaan banaaya jaata hai। divya chakshu arthaat gyaan ka teesra netra dikhaate hain। vaastav mein gyaan ka teesra netra tum braahmanon ko milta hai jisse tum baap ko aur baap ki rachna ke aadi-madhya-ant ko jaan jaate ho। is samay sabhi mein deh ahankaar va 5 vikaar hain isliye ghor andhiyaare mein hain। tum bachchon ke paas roshni hai। tumhaari aatma saare world ki history-geography ko jaan gai hai। aage tum sab agyaan mein the। gyaan anjan satguru diya agyaan andher vinaash। jo poojya the vahi phir pujaari ban pade hain। poojya hain roshni mein। pujaari hain andhiyaare mein। paramatma ko aapehi poojya, aapehi pujaari nahin kah sakte hain। woh to hai hi param poojya। sabko poojya banaane vaala। unko kaha jaata hai param poojya, parampita param aatma maana paramatma। shreekrishna ko thode hi aise kahenge। unko sab god father nahin kahenge। niraakaar god ko hi sab god father kehte hain। hai woh bhi aatma parantu param hai isliye unko paramatma kaha jaata hai। woh param aatma sadaiv paramdham mein rahne vaale hain। angreji mein unko supreme soul kaha jaata hai। baap kehte hain - tum gaate bhi ho aatma paramatma alag rahe bahukaal...। aise nahin paramatma, paramatma se alag rahe bahukaal...। nahin, yeh pahle number ka agyaan hai - aatma so paramatma, paramatma so aatma kehna। aatma to janma maran mein aati hai। paramatma thode hi punarjanma mein aate hain। baap baith samjhaate hain - tum bhaarat-vaasi svargavaasi poojya the। humanity ke poojya sab devi-devtaayen the। yeh saari eeshvar ki family hai। eeshvar hai rachta। gaaya jaata hai - tum maat pita ham baalak tere... to family ho gai na। achha bhala yeh to bataao tum maat-pita kisko kehte ho? yeh kaun kehte hain? aatma kehti hai tum maat-pita.... tumhaari kripa se svarga ke sukh ghanere hamko svarga mein mile hue the। tum maat-pita aakar svarga ki sthaapna karte ho। to ham aapke bachche bante hain। baap kehte hain - main sangam par hi aakar raajayog sikhaata hoon, nai duniya ke liye। manushyon ki buddhi bilkul hi bhrashta ban gai hai। svarga ko narka samajh lete hain। kehte hain vahaan bhi kans, jaraasandhi, hiranyakashyap aadi the। baap aakar samjhaate hain - kya tum bhool gaye ho। meri to shiv jayanti bhi tum bhaarat mein hi manaate ho। gaaya bhi jaata hai - shiv raatri। kaun si raatri? yeh brahma ki behad ki raatri। baap sangam par aakar raatri se din arthaat narka se svarga banaate hain। shiv raatri ke arth ka bhi koi ko pata nahin hai। bhagwan hai niraakaar। manushyon ke to janma by janma shareer ke naam badalte hain। paramatma kehte hain mera koi shareer ka naam nahin। mera naam shiv hi hai। main sirf boodhe vaanaprastha tan ka aadhaar leta hoon। yeh poojya tha, ab pujaari bana hai। shivbaaba aakar svarga rachte hain, ham unke bachche hain to zaroor ham svarga ke maalik hone chaahiye na। shivbaaba hai oonch te oonch। brahma-vishnu-shankar ka apna-apna part hai। har ek aatma mein apna sukh duhkh ka part noondha hua hai। tum jaante ho ham shivbaaba ke vaaris bane the। shivbaaba ne svargavaasi banaaya tha, tab unko sab yaad karte hain। O god raham karo। saadhu bhi saadhna karte hain kyonki yahaan duhkh hai to nirvaandhaam jaana chaahte hain। aatma, paramatma mein leen ho jaati hai va ham aatma so paramatma - yeh samajhna wrong hai। ab tum kehte ho, ham aatma paramdham mein rahne vaali hain phir devta kul mein aayenge phir 84 janma lenge। ham aatma varnon mein aati hain। shivbaaba janma maran mein nahin aate hain। sirf naaraayan ki dynasty thi। jaise Christian gharaane mein Edward di first, second, third chalta hai। vaise vahaan bhi lakshmi-naaraayan di first, lakshmi naaraayan di second, third, aise 8 dynasty chalti hain। abhi tum braahmanon ka teesra netra khula hai। baap baith aatmaon se baat karte hain। tum aise 84 ka chakra lagaae itne-itne janma lete aaye ho। varnon ka bhi ek chitra banaate hain jismen devta, kshatriy, vaishya, shoodra, brahman banaate hain। ab tum jaante ho ham so brahman choti hain। is samay ham hain eeshvareey aulaad practical mein। is sahaj raajayog aur gyaan se hamko sukh ghanere milte hain। koi to sooryavanshi raajdhaani ka varsa lete hain, koi chandravanshi ka। saari kingdom sthaapan ho rahi hai। har ek apne purushaartha se woh pad paayenge। koi agar poochhe ki abhi padhte-padhte hamaara shareer chhoot jaae to kya pad milega? to baba batla sakte hain। yog se hi aayu badhti hai, vikarma vinaash hote hain aur koi upaay patit se paavan banne ka nahin hai। patit-paavan kahne se hi bhagwan yaad aata hai। parantu bhagwan hai kaun? yeh nahin jaante hain। baap kehte hain - main aata hi bhaarat mein hoon। yeh mera birth place hai। somnaath ka mandir kitna aaleeshaan hai - yeh baap baith bachchon ko samjhaate hain। bhakti maarga mein phir yaadgaar banne shuru hote hain। jab pujaari bante hain to pahle-pahle somnaath ka mandir banaate hain। bhaarat to satayug treta mein bahut saahookaar tha। mandiron mein bhi akeechaar dhan tha। bhaarat heere tulya tha। ab to bhaarat kangaal kaudi tulya hai। phir baap aakar bhaarat ko heere tulya banaate hain। koi se bhi poochho - creator kaun hai? kahenge paramatma। woh kahaan hai? woh to sarvavyaapi hai। baap kehte hain - yeh saara jhaad jad jadeebhoot avastha ko paaya hua hai।

apne ko dekha jaata hai ki ham laayak bane hain jo baba mama ki gaddi nasheen ban saken? yeh hai hi patit duniya। pavitrata hai mukhya। ab to no health, no wealth, no happiness hai। yeh hai roonya ke paani misal (mrigtrishna ke samaan) raajya। is par bhi duryodhan ki kahaani shaastron mein likhi hui hai। duryodhan vikaari ko kaha jaata hai। dropdiyaan kehti hain hamaari laaj rakho। sab dropdiyaan hain na। yeh bachchiyaan svarga ka dvaar hain। baba kitna achhi reeti samjhaate hain। jinka buddhiyog poori reeti laga hua hoga to dhaarna bhi hogi। knowledge brahmacharya mein hi padhi jaati hai। baap kehte hain - grihastha vyavhaar mein rehte kamal phool samaan rehna hai। donon taraph nibhaana hai। marna bhi zaroor hai। marne samay manushya ko mantra dete hain। baap kehte hain ki tum sab marne vaale ho। main kaalon ka kaal sabko vaapis le jaane vaala hoon। to khushi honi chaahiye na। phir jo achhi reeti padhenge woh svarga ke maalik banenge। nahin padhenge to praja pad paayenge। yahaan tum aaye ho raajya pad paane। yeh padhaai hai, ismen andhashraddha ki to baat hi nahin। yeh padhaai hai raajaai ke liye। jaise padhaai ki em object hai - barrister banega to yog zaroor padhaane vaale teacher se rakhna pade। yahaan tumko bhagwan padhaate hain to unse yog lagaana hai। baap kehte hain - main paramdham, bahut door se aata hoon। paramdham kitna ooncha hai। sookshm vatan se bhi oonch vahaan se aane mein mujhe second lagta hai। unse teekha aur kuchh ho nahin sakta। second mein jeevanmukti deta hoon। janak ka misaal hai na। abhi to narka puraani duniya hai। nai duniya svarga ko kaha jaata hai। baap narka ka vinaash karaae svarga ka maalik banaate hain। baaki sab aatmaayen shantidham mein chali jaati hain। aatma immortal hai। unko part bhi immortal mila hua hai। phir aatma chhoti badi kaise ho sakti hai athva jal mar kaise sakti hai? hai hi star। bada chhota ho na sake। ab tum ho god fatherly student। god father knowledgeful, blissful hai। woh tumko padha rahe hain। tum jaante ho is padhaai se ham so devi devta banenge। tum bhaarat ki seva kar rahe ho। pahle-pahle to baap ka banna hai aur jagah to guru ke paas jaate hain, unka bante hain athva unko apna guru banaate hain। yahaan to hai baap। to pahle baap ka bachcha banna pade। baap bachchon ko apni jaaydaad dete hain। baap kehte hain - bachche tum exchange karo। tumhaara kakhpan hamaara, hamaara sab kuchh tumhaara। deh sahit jo kuchh hai woh sab mere ko do। main tumhaari aatma aur shareer donon ko pavitra bana doonga aur phir raajaai pad bhi doonga। tumhaare paas jo kuchh hai tum bali chadha do to jeevanmukti milegi। baba yeh sab aapka hai। baap kehte hain - tum mujhe vaaris banaao। main 21 janma tumhein vaaris banaata hoon। sirf meri mat par chalo। bhal dhandha aadi karo। vilaayat jaao, kuchh bhi karo। sirf meri mat par chalo। khabardaar rehna maaya ghadi-ghadi pachhaadegi। koi bhi vikarma nahin karna। shreemat par chalenge to shreshtha banenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aatma aur shareer donon ko paavan banaane ke liye deh sahit jo kuchh hai use baap ke havaale kar unki shreemat par chalna hai।

2) maat-pita ke gaddi nasheen banne ke liye svayan ko laayak banaana hai। laayak banne ke liye mukhya pavitrata ki dhaarna karni hai।

vardaan:- sangamayug par ateendriy sukh ka anubhav karne vaale double praapti ke adhikaari bhav

jo bachche sangamayug par ateendriy sukh ka anubhav kar lete hain unhein sada shanti aur khushi ki double praapti ka nasha rehta hai kyonki ateendriy sukh mein yeh donon praaptiyaan samaai hui hain। abhi aap bachchon ko jo baap aur varse ki praapti hai yeh saare kalpa mein nahin ho sakti। is samay ki praapti ateendriy sukh aur knowledge bhi phir kabhi nahin mil sakti। to is double praapti ke adhikaari bano।

slogan:- ek do ke sanskaaron ko jaante hue unse milkar chalna - yahi unnati ka saadhan hai।

maateshvari ji ke anmol mahaavaakya - “sachche paatshaah paramatma se sachcha hokar raho''

isi samay apne ko baap paramatma dvaara yeh pharmaan mila hai nirantar meri yaad mein raho। yog ka arth hai eeshvareey yaad mein rehna, yog ka arth koi dhyaan nahin hai। apna yeh sahjayog jo chalte-phirte, kaam-kaaj karte uski yaad mein rehna, jisko hi atoot akhanda yog kaha jaata hai, parantu ismen nirantar rahne ki practice ki darkaar hai। agar uske pharmaan par pharmaandaar ho nahin rahenge, kuchh kotaai karenge (avagya karenge) to danda zaroor bhogna padega। unka pharmaan hai jaisa karma main karta hoon mujhe dekh tum bhi footstep lo, nahin to maaya ki chot khaayenge। sachche paatshaah se sachcha hokar raho, jo bhi kuchh maaya ka vighna sataave vo bhi inke aage rakhna chaahiye, to unki madad se maaya hat jaayegi, raasta clear ho jaayega, phir to jahaan bithaaye, jaisa chalaaye, jo khilaaye raasta clear ho jaayega। aisa saath dene ki bahut himmat chaahiye। aise mahaan saubhaagyashaali bilkul thode niklenge, woh vijay maala mein jaayenge। baaki bhaagyashaali hain jo thoda bahut lekar jaakar praja banenge, to thoda milne mein khush nahin ho jaana। apni ichchha to sampoorn ho, saahas rakho aage badhna hai। maaya vighna daalegi parantu uske oopar vijay paani hai, ismen agar bhool ki to nishchay ki kami hai, kuchh apni dhaarna mein kami hai yeh to apna kasoor hai, ismen lok-laaz, kul-maryaada ko todna padta hai, jab yeh todenge tab hi sachche paarlaukik daivi maryaada ko paayenge। yeh vikaari duniya to jaane vaali hai, dekho meera ne bhi loklaaz khoi tab girdhar ko paaya। agar us loklaaz ko rakhenge to is daivi lok ke bhaati ban nahin sakenge। ab kalyaan arth eeshvareey raay to di jaati hai, ab yeh apni buddhi ka phaisla karna hai। kya karna hai, kya uchit hai?

ye avyakt ishaare - sada harshit rahne ke liye apni nature ko saral banaao, sahansheel bano।

jo saralchit hain vahi sada harshit rehte hain। harshitchit hain to sabko aakarshit karte hain। harshit ka arth hi hai ateendriy sukh mein jhoomna। gyaan ka sumiran karte, avyakt sthiti ka anubhav karte ateendriy sukh mein jhoomna, isko kaha jaata hai harshit। iske liye saaksheepan ki seat par set rah maaya aur prakriti ke papetsho ko manoranjan ke roop se dekho।