मंगलवार 9 जून 2026 की दैनिक मुरली

09-06-2026 praatahmurli om shanti "baapdaada"' madhuban

“meethe bachche - baap ke saath udne ke liye complete pure bano, sampoorn surrender ho jaao, yeh deh meri nahin - bilkul ashareeri bano''

prashn:- oonchi manzil par pahunchne ke liye kaun sa dar nikal jaana chaahiye?

uttar:- kai bachche maaya ke toofaanon se bahut darte hain। kehte hain baba toofaan bahut hairaan karte hain inko rok lo। baba kehte bachche yeh to boxing hai। us boxing mein bhi aisa nahin ek hi or se vaar hota rahe। agar ek 10 thappad maarta to doosra 5 zaroor maarega, isliye tumhein darna nahin hai। mahaaveer ban vijayi banna hai, tab oonchi manzil par pahunch sakenge।

geet:- dar par aaye hain kasam leke…

om shanti। bachchon ne geet suna। zaroor geet mein koi rahasya bhara hua hai। jo record khareed kar baap baith inka arth samjhaate hain। isko kaha jaata hai - jeete ji markar baap ka banna। baap ka banne ke baad teacher ka banna, teacher ke baad phir majority guru karte hain। Christian log ko bhi jab bachcha paida hota hai to Christianize karte hain। guru ki god mein jaakar dete hain। phir paadri ho ya koi bhi ho। paadri to Christ nahin hua। kahenge unke naam par ham Christian bante hain।

abhi tum bachche pahle baap ke bante ho, ashareeri bante ho। hamaara tan-man-dhan jo kuchh hai woh baba ko arpan karte hain। jeete ji marte hain arthaat ham aatma unke bante hain। yeh buddhi mein rehna hai। jo bhi meri vastu hai, mera shareer, mera dhan, daulat, sambandhi aadi jo kuchh hain sabko bhoolte hain। marne baad sab bhool jaata hai na। kitni badi manzil hai। ham ashareeri aatma hain। yeh pakka karna hai। aise nahin tum shareer chhod aur mar padte ho। nahin, aatma complete pavitra thode hi bani hai। bhal baap ke bane ho parantu baba kehte hain - tumhaari aatma apvitra hai। aatma ke pankh toote hue hain। abhi aatma ud nahin sakegi। tamopradhaan hone kaaran ek bhi manushya vaapis ja nahin sakte। maaya ne ekdam pankh tod diye hain। baba ne samjhaaya hai aatma sabse teekhi jaati hai। unse teekhi cheez koi hoti nahin। aatma se koi pahunch nahin sakta। pichhaadi mein machchharon sadrishya sab aatmaayen bhaagti hain। kahaan jaati hain? bahut door-door soorya chaand se bhi paar। vahaan se phir lautna nahin hai। unhon ke rocket aadi to jaakar phir laut aate hain। soorya tak to pahunch nahin sakte। tumko to unse bahut door jaana hai। sookshm vatan se oopar mool vatan mein jaana hai। aatma ko pankh mil jaate hain। hisaab-kitaab chuktu kar aatma pavitra ban jaati hai। kayaamat ke samay ki mahima bahut likhi hui hai। sabhi aatmaon ko hisaab-kitaab chuktu kar jaana hai। abhi to sab aatmaayen maili, paap aatma hain। bhal bade guru saadhu-sannyaasi aadi hain। samajhte hain ham guru hain। aham brahmasmi... aham brahmohm। ham brahm mein pahunche hue hain। ab baithe hue hain yahaan, brahm mein phir kahaan pahunche hue hain। abhi tum jaante ho ham aatmaayen brahm mein rahne vaali hain। parantu abhi vahaan koi bhi ja nahin sakte। sab aatmaayen yahaan punarjanma leti hain। yeh behad ka drama hai। sab actors ko part bajaane vahaan se aana zaroor hai। sabki aatmaayen stage par aai hain। jab vinaash ka samay hota hai to sab aa jaate hain, vahaan rahkar kya karenge! actor bigar part bajaae ghar mein thode hi baith jaayega। naatak mein zaroor aana padega। vahaan se jab sab chale aate hain tab phir baap sabko le jaate hain। baap kehte hain main bhal yahaan hoon to bhi aatmaayen aati rehti hain, vriddhi ko paati rehti hain, nambarvaar। phir tum jaayenge bhi nambarvaar। saara tumhaari avastha par madaar hai, isliye tumhein marjeeva banna hai। ham aatma hain yeh nishchay karna mehnat hai। bachche ghadi-ghadi deh-abhimaan mein aakar bhool jaate hain। dehi-abhimaani tab rahenge jab complete surrender honge, baba yeh sab aapka hai। main bhi aapka hoon। yeh deh jaise ki hamaari nahin hai, inko main chhod deta hoon। baba main aapka hoon। baba kehte hain mera ban aur sabse mamatva mita do। baaki aise nahin ki yahaan aakar baith jaana hai। tumko apna dhandhaadhori karna hai। ghar sambhaalna hai। bachche ko karja utaarna hai, maat-pita ka। unki seva kar ujoora dena hai। maa-baap ki paalna ka karz chadhta hai bachchon par। ab baap tumhaari paalna kar rahe hain। shuru mein jo bhi aaye the sabne jhat surrender kar diya। apne paas kuchh nahin rakha, surrender kiya, us dhan se tum bachche bhaarat ko paavan bana rahe ho। bhaarat hi bilkul pavitra tha। bhaaratvaasiyon jaisa pavitra sukhi koi ho nahin sakta। bhaarat sabse bada teertha hai। jahaan patit-paavan baap aakar saare srishti ko, patiton ko bhi pavitra banaate hain। abhi yeh tatva aadi sab dushman hain। earthquake hogi, toofaan lagenge kyonki tamopradhaan hain। natural calamities aayengi, bahut duhkh dengi। is samay sab duhkh ki cheezen hain। satayug mein hain sab sukh ki cheezen। vahaan yeh toofaan va garam vaayu aadi kuchh nahin hota। tumhaare mein bhi yeh baaten bahut thode hi samajhte hain। aaj hain kal nahin hain to kahenge kuchh nahin samjha। bhal yahaan aate hain parantu sab kaayam thode hi rehte hain। yahaan se gaye 10 din ke baad samaachaar likhenge - baba phalaane ko maaya kha gai। aise hota rehta hai। chhote phool bade hon to unmein phal aa jaaen। unmein phir doosron ko aap samaan banaane ki taakat rehti hai। unka phal nikalta hai।

baap ke bane phir praja bhi banaani hai, vaaris bhi banaana hai। pande ban baba ke paas aayen, bas ham pahunch gaye। nahin, manzil hai badi। kehte hain maaya ke toofaan bahut aate hain। tum baap ke bane ho, toofaan to aayenge। kehte hain, baba ham aapke the। aapse varsa liya tha phir punarjanma lete 84 janma paas kiya phir aakar aapka bane hain। main to aapse varsa lekar chhodoonga। to aise baap ko itna yaad karna pade aur aap samaan banaae phal dena pade। nahin to maala kaise banegi। baap ka vaaris kaise banaayenge। praja bhi chaahiye, vaaris bhi chaahiye, jo gaddi par baithe। baap ke paas to bahut aate hain phir phaarakti de dete hain। buddhi ka yog toota, khel khatma।

kai bachche baba se aakar poochhte hain - baba avastha ko kaise jamaayen, koi toofaan na lage। iska raasta to bataate hi rehte hain, baap ko yaad karo। toofaan to lagenge। boxing mein aisa kabhi dekha jo koi ek hi thappad khaata rahe। zaroor donon mein hi himmat hogi। 5 thappad agar ek lagaayega to 10 doosra lagaata hoga। yeh bhi boxing hai। baap ko yaad karte rahenge to maaya bhaagti jaayegi parantu phat se to nahin hoga। maaya se kushti ladni hai। aise mat samjho maaya thappad nahin maaregi। bhal koi bhi ho, badi boxing hai। bahut dar jaate hain, maaya ekdam naak mein dam kar deti hai। yuddhasthal hai na। buddhiyog lagaane mein maaya bade vighna daalti hai। mehnat saari yog mein hai। bhal baba kehte hain gyaani tu aatma mujhe priy hai। parantu aise nahin sirf gyaan dene vaale priy hain। pahle to yog poora chaahiye। baap ko yaad karna hai। maaya ke vighnon se darna nahin hai। vishwa ka maalik bante ho na। sab banenge? 16108 ki maala to bahut badi hai। ant mein aakar poori hogi। treta ant tak kitne prince-princess bante hain, kuchh to nishaaniyaan hain na। 8 ki bhi nishaani hai। 108 ki bhi nishaani hai। yeh bilkul right hai। treta ant mein itne 16108 prince-princess hote hain। shuru mein to nahin honge। pahle thode hote hain phir vriddhi hoti jaati hai। woh sab bante yahaan hain। chance bahut achha hai parantu mehnat bahut hai। geet mein bhi kehte hain, kabhi nahin chhodoonga, mar jaaoonga...। baba yeh tan-man-dhan sab aapka hai। ham ashareeri ban aapko yaad karte hain। buddhiyog aapse lagaayenge। baba phir kehte hain yeh sab tum bachchon ke liye hi hai। bachche kehte hain - hamaara sab kuchh aapka hai। kehte hain na, yeh sab bhagwan ne diya hai! ab baap kehte hai - yeh sab khatma ho jaana hai। tumhaare paas kya hai? yeh shareer bhi khatma ho jaayega। ab main phir tumko badli kar deta hoon। sirf exchange karte hain na। to baap kehte hain - bachche ashareeri bano। mujhe yaad karo। buddhi se sab kuchh surrender karo। raaja harishchandra ki katha hai na। bola amaanat rakh do।

baap kehte hain - in sabhi shaastron aadi ka saar tumko samjhaata hoon। mainne hi tumhein brahma mukh dvaara raaja-raani banaaya tha phir ab banaata hoon। kabhi bhi manushya, manushya ko geeta sunaae, raajayog sikhlaae raaja-raani bana na saken। phir geeta sunne se kya phaayda। baap kehte hain - main khud kalpa-kalpa aakar tumko svarga ka maalik banaata hoon। hamaare banenge tab to vaaris banenge na। to jitna yog mein rahenge utna shuddh bante jaayenge। baba yeh sab aapka hai। ham to trustee hain। aapke hukm bigar ham kuchh bhi nahin karenge। shareer nirvaah kaise karna hai - woh bhi mat lete hain। aksar karke gareeb hi poora potaamel dete hain। saahookaar de na saken। surrender ho nahin sakte, koi virla nikalta hai। jaise ek janak ka naam hai। baal-bachche hain, joint property hai to woh alag kaise ho। saahookaar log apni property nikaalen kaise, jo surrender hon? baap hai hi gareeb nivaaz। sabse gareeb maataayen hain, unse jaasti kanyaayen gareeb hain। kanya ko kabhi varse ka nasha nahin hoga। bachche ko baap ki jaageer ka nasha rehta hai। to woh sabko chhod phir vaikuntha ka varsa lena pade। daan hamesha gareeb ko hi diya jaata hai। bhaarat hai sabse gareeb, America bahut saahookaar hai। unko varsa dete hain kya? bhaarat sabse saahookaar tha aur koi dharma nahin tha। sirf bhaaratvaasi hi the, ek bhaasha thi। god is one। main one sovereignty, one dharma, one bhaasha sthaapan karta hoon। one almighty, one government sthaapan karta hoon। one se phir two, three honge। abhi kitne dharma hain phir zaroor one dharma aana chaahiye। 5 hajaar varsha ki baat hai। one dharma tha। vidvaanon ne satayug ki aayu laakhon varsha laga di hai। samajhte nahin satayug kya hota hai। samajhte hain, svargavaasi hua, shaayad oopar chala gaya। delvaada mandir mein bhi svarga oopar chhat mein hai। to manushya moonjh jaate hain। vaastav mein svarga koi oopar nahin। tum abhi jaante ho baba ke paas jaakar phir yahaan hi aakar raajya karenge। yeh gyaan buddhi mein rehna chaahiye, jo koi ko samjha sako। kachche ko to maaya chidiya kha jaayegi isliye photo bhi mangaaye jaate hain। register rakha jaata hai।

baba ke paas samaachaar aata hai phalaane ne ek hi aisa gyaan ka teer maara jo main baba ka ban gaya। shaastron mein bhi likha hua hai - kumaariyon dvaara baan marvaaye। are, baap ko kyon bhoole ho? isko gyaan baan kaha jaata hai। sirf baap ki yaad dilaani hai। baaki koi hinsak baan ki baat nahin hai। baba kehte hain - main, brahma mukh se sab shaastron ka raaz tumhein samjhaata hoon। brahma to zaroor yahaan hona chaahiye। unhonne phir vishnu ke naabhi kamal se brahma dikhaaya hai। jaante kuchh bhi nahin। manushyon ko to jo aaya so likh diya। gandagi to bahut hai। riddhi-siddhi vaale bhi bahut ho gaye hain। sach jab nikalta hai to jhoothe uska saamna karte hain। ab tum samajhte ho ki shivbaaba hai niraakaar aur yeh brahma hai saakaar। baaki naabhi aadi ki to koi baat hi nahin hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ab gyaani tu aatma banna hai, sirf gyaan sunne sunaane vaala nahin। yaad ki bhi mehnat karni hai। ashareeri hokar ashareeri baap ko yaad karna hai।

2) baap ka bankar doosri sab baaton se mamatva mita dena hai। yeh deh bhi meri nahin। poora dehi-abhimaani ban complete surrender hona hai।

vardaan:- master almighty authority ki seat par set rahne vaale sahaj aur sada ke karmayogi bhav

jaise kisi machinery ko set kiya jaata hai to ek baar set karne se phir automatically chalti rehti hai, isi reeti se master almighty authority ki stage par svayan ko ek baar set kar do to kabhi kamjori ke shabd nahin niklenge। har sankalp, shabd va karma usi setting pramaan automatic chalte rahenge। yahi setting sahaj aur sada ke liye karmayogi, nirantar nirvikalp samaadhi mein rahne vaala sahajyogi bana degi।

slogan:- main ke bajaae baba-baba kehna - yahi yaad ka proof hai।

ye avyakt ishaare - sada harshit rahne ke liye apni nature ko saral banaao, sahansheel bano।

jo sahansheel hai vahi drama ki dhaal par thahar sakta hai aur harshit rah sakta hai। sahansheelta nahin to drama ki dhaal ko pakadna bhi mushkil hai। is samay jo bhi karma karte ho usmein karan-karaavanhaar ki smriti sada rahe। karaane vaala baap hai, karne vaala nimitta hai, agar yeh smriti mein rakh karma karo to anubhav hoga ki saakshi ho jaise part baja rahe hain।