गुरुवार 16 जुलाई 2026 की दैनिक मुरली

16-07-2026 praatahmurli om shanti "baapdaada"' madhuban

“meethe bachche - yeh purushottam banne ka sangamayug hai, ismen koi bhi paap karma nahin karna hai''

prashn:- sangam par tum bachche sabse bada punya kaun sa karte ho?

uttar:- svayan ko baap ke havaale kar dena arthaat sampoorn svaaha ho jaana, yeh hai sabse bada punya। abhi tum mamatva mitaate ho। baal bachche, ghar-baar sabko bhoolte ho, yahi tumhaara vrat hai। aap muye mar gai duniya। abhi tum vikaari sambandhon se mukta hote ho।

geet:- jale na kyon parvaana…

om shanti। yeh sab bhakti maarga mein baap ki mahima karte hain। yeh hai parvaanon ki shama ke liye mahima, jabki baap aaye hain to kyon na jeete ji unke ban jaayen। jeete ji kaha hi unko jaata hai jo adopt karte hain। pahle tum aasuri parivaar ke the, ab tum eeshvareey parivaar ke bane ho। jeete ji eeshvar ne aakar tumko adopt kiya hai, jisko phir sharnaagti kaha jaata hai। gaate hain na - sharan padi main tere.... ab prabhu ki sharan tab paden, jabki woh aaye, apni taakat dikhaaye, jalva dikhaaye। vahi sarvashaktimaan hai na। barobar unmein kashish bhi hai na। sab kuchh chhuda dete hain। barobar jo baap ke bachche aur bachchiyaan bante hain woh aasuri sampradaay ke sambandh se tang ho jaate hain। kehte hain - baba kab yeh sambandh chhootenge। yahaan yeh puraana sambandh bhulaana padta hai। aatma jab deh se alag ho jaati hai to bandhan khalaas ho jaate hain। is samay tum jaante ho sabke liye maut hai aur yeh jo bandhan hain yeh sab hain vikaari। ab bachche nirvikaari sambandh chaahte hain। nirvikaari sambandh mein the phir vikaari sambandh mein pade, phir hamaara nirvikaari sambandh hoga। yeh baaten aur kiski buddhi mein nahin hoti। bachche jaante hain ham aasuri bandhan se mukta hone ka purushaartha kar rahe hain। ek baap se yog rakha jaata hai। us taraph hai ek raavan, is taraph hai ek raam। yeh baaten duniya nahin jaanti। kehte bhi hain raamraajya chaahiye, parantu saari duniya raavan raajya mein hai, yeh koi samajhte nahin hain। raamraajya mein to pavitrata sukh-shanti thi। woh ab nahin hai। parantu jo kehte hain usko mahsoos nahin karte hain। gaaya bhi jaata hai yeh aatmaayen sab seetaayen hain। ek seeta ki baat nahin। na ek arjun ki, na ek dropdi ki baat hai। yeh to anekon ki baat hai। drishtaanta ek ka dete hain। tumko bhi kaha jaata hai tum sab arjun misal ho। tum kahenge arjun to yeh bhaageerath ho gaya। baap kehte hain - main saadhaaran boodhe tan ka yeh rath leta hoon। unhonne phir chitron mein ghoda-gaadi dikhaaya hai, isko agyaan kaha jaata hai। bachche samajhte hain yeh shaastra aadi jo bhi hain sab bhakti maarga ke hain। yeh baaten koi samajh na saken, jab tak 7 roz samajhne ka course na len। bhakti alag hai। gyaan, bhakti aur vairaagya kehte hain। vaastav mein sannyaasiyon ka vairaagya koi sachcha nahin hai, woh to jangal mein jaakar phir aae shahron mein nivaas kar bade-bade makaan aadi banaate hain। sirf kehte hain hamne gharbaar chhoda hai। tumhaara hai saari puraani duniya se vairaagya। yathaartha baat yeh hai, woh hai had ki baat isliye unko hathayog, had ka vairaagya kaha jaata hai।

tum bachche jaante ho yeh puraani duniya ab khatma honi hai isliye zaroor isse vairaagya aana chaahiye। buddhi bhi kehti hai, naya ghar banta hai to puraane ko toda jaata hai। tum jaante ho abhi taiyaari ho rahi hai। kaliyug ke baad phir satayug zaroor aayega। abhi yeh hai purushottam sangamayug। purushottam maas bhi hota hai। tumhaara hai purushottam yug। purushottam maas mein daan-punya aadi karte hain। tum is purushottam yug mein sarvasva svaaha kar lete ho। jaante ho - yeh saari duniya hi svaaha honi hai। to saari duniya ka sarvasva svaaha hone ke pahle ham apne ko kyon na svaaha karen। iska tumko kitna na punya milega। woh hai had ka purushottam maas, yeh to behad ki baat hai। purushottam maas mein bahut kathaayen sunte hain, vrat niyam rakhte hain। tumhaara to bada bhaari vrat hai। tumhaare bhal baal-bachche, gharbaar aadi sab hai parantu dil se mamatva mit gaya hai। aap muye mar gai duniya। tum jaante ho yeh sab khatma ho jaayenge। ham baap ke bane hain - purushottam banne ke liye। sarva purushon mein arthaat manushyon mein uttam purush yeh lakshmi-naaraayan saamne khade hain। inse uttam koi bhi manushya ho nahin sakta। lakshmi-naaraayan vishwa ke maalik the। tum aaye ho aise purushottam banne। sabhi manushya maatra sadgati ko paate hain। manushyon ki aatma purushottam ban jaati hai to phir unke rahne ka sthaan bhi aisa uttam hona chaahiye। jaise president sabse oonch pad par hai to unko rahne ke liye raashtrapti bhavan mila hai। kitna bada mahal, bageecha aadi hai। yeh hui yahaan ki baat। raamraajya ko to tum jaante ho। tum satayugi purushottam bante ho phir yeh kaliyugi purushottam rahenge nahin। tum satayugi purushottam banne ke liye purushaartha kar rahe ho। tum jaante ho hamaare mahal kaise bane hue honge। kal raamraajya hoga। tum raamraajya mein purushottam honge। tum challenge karte ho ki ham raavan raajya ko badal raam raajya sthaapan karenge। ab challenge kiya hai to ek do ko purushottam banaana hai - bhavishya 21 janma ke liye। devtaaon ki mahima gaate hain sarvagun sampanna.... ahinsa parmo devi-devta dharma। tum jaante ho aur koi manushya nahin jaante। tum doosre janma mein purushottam banenge phir is raavan raajya ka koi nahin rahega। abhi tumko saara gyaan hai। ab raavan raajya hi khatma hona hai।

aajkal to samay ka bhi koi bharosa nahin hai, akaale mrityu ho jaati hai athva kiski dushmani hui to uda dete hain। tumko to koi uda na sake। tum avinaashi purushottam ho, yeh hai vinaashi, so bhi raavan raajya mein। inko tumhaare daivi-raajya ka pata hi nahin hai। tum jaante ho - ham apna daivi svaraajya sthaapan kar rahe hain shreemat par। jinki pooja hoti hai woh zaroor achha kartavya karke gaye hain। yeh tum jaante ho। dekho jagdamba ki kitni pooja hai। ab yeh hai gyaan-gyaaneshvari। tum jagat amba ki bachchiyaan ho gyaan-gyaaneshvari aur raaj-raajeshvari। donon mein uttam kaun? gyaan-gyaaneshvari ke paas jaakar anek prakaar ki manokaamnaayen sunaate hain। anek cheejen maangate hain। jagdamba ke mandir aur lakshmi-naaraayan ke mandir mein bahut pharka hai। jagdamba ka mandir bahut chhota hai। chhoti jagah mein bheed manushya pasanda karte hain। shreenaath ke mandir mein bhi bahut bheed hoti hai, kapde ka sonta lagaate rehte hain - hataane ke liye। kalkatte mein kaali ka mandir kitna chhota hai, andar bahut tel aur paani rehta hai। andar badi khabardaari se jaana padta hai। bahut bheed rehti hai। lakshmi-naaraayan ka mandir to bahut bada hota hai। jagdamba ka chhota kyon? gareeb hai na। to mandir bhi gareebi ka hai। woh saahookaar hai, to mandir mein kab mela nahin lagta hai। jagdamba ke mandir par bahut mele lagte hain। baahar se bahut log aate hain। mahaalakshmi ka mandir bhi hai, yeh bhi tum jaante ho ismen lakshmi bhi hai to naaraayan bhi hai। unse sirf dhan maangate hain kyonki woh dhanvaan bani hai na। yahaan to hain avinaashi gyaan ratna। dhan ke liye lakshmi paas jaate hain, baaki anek aashaayen rakh jagdamba ke paas jaate hain। tum jagat amba ke bachche ho। sabki manokaamnaayen 21 janmon ke liye tum poori karte ho। ek hi mahaamantra se sab manokaamnaayen 21 janma ke liye poori ho rahi hai। doosre jo bhi mantra aadi dete hain, unmein arth kuchh nahin hai। baap samjhaate hain yeh mantra bhi tumko kyon deta hoon, kyonki tum patit ho na। maamekam yaad karenge tab hi paavan banenge। yeh sivaae baap ke, aatmaon ko koi kah na sake। isse siddha hota hai, yeh sahaj raajayog ek hi baap sikhlaate hain। mantra bhi vahi dete hain। paanch hajaar varsha pahle bhi mantra diya tha। yeh smriti aai hai। abhi tum sammukh baithe ho। Christ hokar gaya phir unka Bible padhte rehte hain। woh kya karke gaye? dharma ki sthaapna karke gaye। tum jaante ho shivbaaba kya karke gaye। shreekrishna kya karke gaye! shreekrishna to satayug ka prince tha, jo hi phir naaraayan bana phir punarjanma lete aaye hain। shivbaaba bhi kuchh karke gaye hain tab to unki itni pooja aadi hoti hai। abhi tum jaante ho raajayog sikhaakar gaye hain, bhaarat ko svarga banaakar gaye hain, jis svarga ka pahla number maalik khud nahin banen, woh to shreekrishna bana। zaroor shreekrishna ki aatma ko padhaaya, tum samajh gaye ho। shreekrishna ki vanshaavli tum baithe ho। raaja-raani ko maat-pita anna-daata kehte hain। raajasthaan mein bhi raaja ko anna-daata kaha jaata hai। raajaaon ki kitni maanyata hoti hai। aage sab shikaayten raaja ke paas aati thi, darbaar lagti thi। koi bhool karte the to bahut pachhtaate the। aajkal to jel birds bahut hain। ghadi-ghadi jel mein jaate hain। abhi tum bachchon ko garbhajel mein nahin jaana hai। tumko to garbha mahal mein aana hai, isliye baap ko yaad karo to vikarma vinaash honge phir kab garbhajel mein nahin jaayenge। vahaan paap hota nahin hai। sab garbha mahal mein rehte hain, sirf kam purushaartha ke kaaran kam pad paate hain। oonch pad vaalon ko sukh bhi bahut rehta hai। yahaan to sirf 5 varsha ke liye governor, president mukrar karte hain। tum samjha sakte ho ki bhaarat hi daivi raajasthaan bana। abhi to na raajasthaan hai aur na raaja raani hain। aage koi government ko paisa dete the to mahaaraaja mahaaraani ka title mil jaata tha। yahaan tumhaari to hai padhaai। raaja raani kab padhaai se nahin bante hain। tumhaari em object hai, is padhaai se tum vishwa ka mahaaraaja mahaaraani bante ho। raaja raani bhi nahin। raaja raani ka title treta se shuru hota hai।

tum abhi gyaan-gyaaneshvari bante ho phir raaj-raajeshvari banenge। kaun banaayenge? eeshvar। kaise? raajayog aur gyaan se। raajaai ke liye baap ko yaad karna hai। baap tumko svarga ka maalik banaate hain, yeh to bahut sahaj hai na। heaven sthaapan karne vaala hai hi god father। heaven mein to heaven ki sthaapna nahin karenge। zaroor unhon ko sangam par pad milta hai, isliye isko suhaavna kalyaankaari sangamayug kaha jaata hai। baap kitna bachchon ka kalyaan karte hain, jo svarga ka maalik banaate hain। kehte bhi hain parampita paramatma nai duniya rachte hain, parantu usmein kaun raajya karte hain, yeh kisko pata nahin। tum samajhte ho raamraajya kisko kaha jaata hai। unhonne to raamraajya ko laakhon varsha de diye hain। kaliyug ko 40 hajaar varsha de diye hain। baap kehte hain - main aata hi hoon sangam par। aakar brahma dvaara vishnupuri ki sthaapna karta hoon। satya naaraayan ki katha bhi yeh hai। satayug mein tum lakshmi-naaraayan sarvagun sampanna... bante ho। phir kala kam hoti jaati hai। naya jhaad tab kaha jaata hai jabki sthaapna hoti hai। naya makaan banta hai to naya kahenge। tum bhi satayug mein aayenge to nai raajdhaani hogi phir kala kam hoti jaati hai। sthaapna yahaan hoti hai। yeh wonderful baaten koi ki bhi buddhi mein nahin hain। to baap ne samjhaaya hai ki sabhi aatmaon ke liye yeh yug hai purushottam banne ka। jeevanmukti ko purushottam kaha jaata hai। jeevanbandha ko purushottam nahin kahenge। is samay sab jeevanbandha mein hain। baap aakar sabko jeevanmukta banaate hain। tum aadhaakalpa jeevanmukta honge phir jeevanbandha। yeh tum samajhte ho। tumhaara vrat niyam kya hai? baba ne aakar vrat rakhvaaya hai, khaan-paan ki baat nahin hai। sab kuchh karo sirf ek to baap ko yaad karo aur pavitra bano। purushottam maas mein bahut karke pavitra bhi rehte honge। vaastav mein is purushottam yug ka maan hai to tumko kitni khushi, kitna nasha hona chaahiye। ab tumse koi paap karma nahin hona chaahiye kyonki tum purushottam ban rahe ho। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is purushottam yug mein jeevanmukta banne ke liye punya karma karne hain। pavitra zaroor rehna hai। gharbaar aadi sab hote dil se mamatva mita dena hai।

2) shreemat par apne tan-man-dhan se daivi raajya sthaapan karna hai। purushottam banaane ki seva karni hai।

vardaan:- sahayog dvaara svayan ko sahaj yogi banaane vaale nirantar yogi bhav

sangamayug par baap ka sahayogi ban jaana - yahi sahajyogi banne ki vidhi hai। jinka har sankalp, shabd aur karma baap ki va apne raajya ki sthaapna ke kartavya mein sahayogi rahne ka hai, usko gyaani, yogi tu aatma nirantar sachcha sevaadhaari kaha jaata hai। man se nahin to tan se, tan se nahin to dhan se, dhan se bhi nahin to jismen sahayogi ban sakte ho usmein sahayogi bano to yeh bhi yog hai। jab ho hi baap ke, to baap aur aap - teesra koi na ho - isse nirantar yogi ban jaayenge।

slogan:- sangam par sahan karna arthaat marna hi svarga ka raajya lena hai।

ye avyakt ishaare - jvaalaasvaroop sthiti mein rah shaktishaali yaad ka anubhav karo

samay pramaan rahe hue jo bhi man ke, sambandh-samparka ke hisaab-kitaab hain use jvaala swaroop yaad mein bhasma karo। lagan hai, ismen baapdaada bhi paas karte hain lekin abhi lagan ko agni roop mein laao। vishwa mein jo chaaron or bhrashtaachaar, atyaachaar ki agni jal rahi hai woh aap bachchon ke yog agni se, jvaala roop yaad se samaapta ho jaayegi।