गुरुवार 30 जुलाई 2026 की दैनिक मुरली

30-07-2026 praatahmurli om shanti "baapdaada"' madhuban

“meethe bachche - baap jaisa nirhankaari aur nishkaam sevaadhaari koi nahin, saare vishwa ki baadshaahi bachchon ko dekar khud vaanaprastha mein baith jaate hain''

prashn:- baap ka kaun sa paigaam tumhein saare vishwa ko bataana hai?

uttar:- sabhi ko bataao ki tum duhkh harta sukh karta ke bachche ho। tumhein kabhi bhi kisi ko duhkh nahin dena hai। tum sukhdaata baap ko yaad karo, unhein follow karo to aadhaakalpa ke liye sukhdhaam mein chale jaayenge। yeh paigaam sabko dena hai। jo is paigaam ko jeevan mein dhaaran karenge woh 21 janmon ke liye maaya ki behoshi se chhoot jaayenge।

geet:- hamaare teertha nyaare hain…

om shanti। meethe-meethe roohaani bachche is geet ka arth to samajh gaye। ham aatmaon ka woh baap hai। mukhya hai hi aatma। abhi tum bachche jaante ho - hamaari aatma parampita paramatma ke sammukh baithi hai। tumhaari soul, supreme soul ke saamne baithi hai। tumko to apna shareer hai, inko loan liya hua shareer hai। guru log manushyon ko yaatra par le jaate hain। bhakti maarga ke dher guru hain। bhaarat mein to stri apne pati ko bhi guru, eeshvar samajhti hai। baap bachchon ko samjhaate hain - tum bachche ho na। samajhte ho ham behad ke baap ke bachche hain। behad ka varsa phir se lene aaye hain, abhi humein sadgati ko paana hai। yeh to nishchay hai na। saari duniya durgati mein hai, patit hai। paavan hone ke liye bulaate hain to bhaarat mein kitne dher ke dher guru hain। koi ko 100 followers, koi ke 500, koi ke 50 bhi hote hain। koi ke laakhon karodon bhi hote hain। jaise khojon ka aagaakhaan guru hai। kitne unke followers hain, kitna unko regard dete hain। phir bhal kuchh bhi karne vaala ho lekin unka maan kitna hai। bhakti maarga mein guru anek hain, phir woh bhi nambarvaar hote hain। koi ki kamaai padmon ki hoti hai। aagaakhaan ki kamaai bahut hai। unko heeron mein taulkar daan kiya tha, unke shishyon ne। ek taraph heere doosre taraph unka guru। heere daan karte hain, kitne heere honge। aajkal sone mein to bahuton ko vazan kar dete hain। doosra platinum hota hai, woh sone se bhi jyaada keemti hota hai। woh bhi vazan kar diya tha। guru ka martaba dekho kitna hai... aise guru log to dher hain। ab is satguru ko tum kya denge? unko vazan karenge? heere vazan kar denge? unka vazan ho sakta hai? unka khud ka hi vazan nahin hai। shiv to hai hi bindi, unka vazan tum kya kar sakenge। yeh tumhaara guru kitna wonderful hai, sabse halka। bilkul hi sookshm hai। tumhaara guru ek hai। tum jaante ho shivbaaba to daata hai। bhagwan kabhi kuchh le nahin sakte, woh to dete hain। eeshvar arth daan sab karte hain to samajhte hain - doosre janma mein iska evza milega। kaamna to rakhte hain। ab yeh to hai behad ka baap। in jaisi nishkaam seva koi kar nahin sakta। nishkaam seva bhi kaisi hai। bachchon ko vishwa ka, sukhdhaam ka maalik banaate hain। baba khud thode hi vishwa ka maalik bante hain। unko kaha jaata hai - sukh ka saagar, shanti ka saagar, pavitrata ka saagar। bachchon ko har ek baat achhi reeti samjhaai jaati hai। ek hi baap se tumko jeevanmukti mil jaati hai। baba se svarga ka varsa milta hai। nishchay kiya, bas। baba aur varse ko yaad karna hai। inko kehte hain - gyaan ka saagar। saara saagar mas (syaahi) banaao। saara jangal kalam banaao.. to bhi end nahin ho sakti। tum shuru se lekar likhte jaao to tumhaari dher pustaken ho jaaen। yeh knowledge to bahut valuable hai jo dhaaran karne ki hai। jaante ho yeh koi parampara to chalti nahin। abhi tumko tanta milta hai। baap aakar bachchon ko apna parichay dete hain, vahi kaaphi hai। baap ka parichay dene se, rachta ko jaanne se rachna ka bhi gyaan aa jaata hai। buddhi kehti hai jo satayug mein aate honge, unke punarjanma jaasti honge। chakra mein jo pahle aaye honge, wahin aayenge। is chakra ko bhi achhi reeti samajhna hai। geet mein bhi suna, hamaare teertha nyaare hain। woh to janma-janmaantar teertha yaatraayen aadi karte aaye hain। yeh sirf tumhaari ek janma ki yaatra hai। is roohaani yaatra mein jara bhi koi takleeph nahin। gyaan dene vaala ek hi satguru hai। sadgati to kisi ki bhi hoti nahin। woh hai supreme gyaan ka saagar, sarva ki sadgati ho jaati hai। baaki kya chaahiye! tatva bhi satopradhaan ho jaate hain। yahaan tamopradhaan hain to vaayu aadi bhi aisi hi tamopradhaan hoti hai। kitne earthquake aadi hote hain। satayug mein to koi bhi duhkh dene vaali cheez nahin hogi। baap hai hi duhkh harta sukh karta। tum unke bachche ho, kisko bhi duhkh nahin dena hai। sabko yeh raasta bataana hai - sukh ka varsa paane ka।

ab baap kehte hain - tumko sukh hi dena hai। baba tumko aadhaakalpa ke liye aisa sukh dete hain - jo vahaan duhkh ka naam nahin rehta। tum jaante ho - baap se 21 janmon ka varsa paane ham yahaan aaye hain। tum student ho na। tumhaari dil mein hai ki shivbaaba se svarga ka sukh lete hain to sab duhkh door ho jaayenge। baba hamko sanjeevni booti dete hain - surjeet hone ke liye। phir 21 janma kabhi moorchhit nahin honge। woh sanjeevni booti hai - manamnaabhav। sarva ka sadgati daata ek hi baap hai, unko niraakaar nirhankaari kaha jaata hai। jis tan mein aate hain woh bhi saadhaaran hai। baap kehte hain - dear children, aai em your obedient father। bade aadmi hamesha aise likhte hain। aai em obedient servant। apne ko shri kabhi nahin likhenge। aajkal to likhte hain shri-shri phalaana। aapehi apne ko shri-shri likhte rehte hain। woh baap hai niraakaari, nirhankaari। ab tum unke sammukh baithe ho। jaante ho woh hamaara baap, teacher, satguru hai, baaki to sab bhakti maarga ke anek guru hain। gurooon ke bhi guru hote hain। inka koi guru nahin। yeh sat baba, sat teacher, satguru hai।

tum jaante ho - aatma hi sanskaar dhaaran kar rahi hai। baba bhi aatma hai na, unmein bhi gun hain। tumhaare gun alag-alag ho jaate hain। is samay jo gun tumhaare mein hain vahi baap ke hain। phir satayug mein tumhaare daivi gun ho jaayenge। baap gyaan ka saagar, pyaar ka saagar hai। shreekrishna ki mahima alag hai। shivbaaba ko 16 kala sampoorn nahin kah sakte। woh to sthir hai hi। baap kehte hain - yeh title tum mujhe nahin de sakte ho। main thode hi vikaari banta hoon, jo phir sarvagun sampanna banoon। meri mahima in jaisi thode hi karenge। is knowledge ko jinhonne kalpa pahle suna hai vahi aayenge, aakar baap se sunenge aur baap ko yaad karenge। pichhaadi ko haay-haay kar rote hain phir jay-jay kaar ho jaati hai। abhi tumne yaatra ka bhi raaz samjha hai। is yaatra se phir tum kabhi mrityulok mein lautte nahin ho। un yaatraaon se phir ghar laut aate hain। kitne manushya snaan karne jaate hain। bhakti ka vistaar dekho kitna hai। jaise jhaad kitna bada athaah hota hai, beej to bilkul chhota hota hai। vaise bhakti ka bhi vistaar kitna hai। gyaan ka ek tubka bhi sadgati kar deta hai। bhakti mein utarte-utarte aadhaakalpa lag jaata hai। yahaan tumko seedhi chadhne mein ek second lagta hai - lift kitni achhi hai। neeche se ekdam oopar, apne ghar le jaati hai। isko kaha jaata hai chadhti kala sarva ka bhala। sarva ka sadgati daata ek baap hi hai। ab gyaan, bhakti ka farka dekha। gyaan, bhakti, vairaagya hai na। sannyaasiyon ka hai had ka vairaagya। baap ne samjhaaya hai - vairaagya do prakaar ka hai - ek hai had ka vairaagya jisse koi sadgati nahin hoti। doosra hai behad ka vairaagya - jisse tumhaari sadgati ho jaati hai। abhi sadgati ke liye tum bachchon ko shreemat milti hai - shreshtha te shreshtha banne ki। ab shreshtha duniya ki sthaapna ho rahi hai shreemat par। yeh bhrashta duniya raavan ki mat par bani hai। ham shreshtha ban rahe hain - yeh baaten tum hi jaano। duniya bilkul nahin jaanti hai। tumhaare liye to kehte hain yeh brahma-kumaariyaan vinaash karaane vaali hain। sachmuch vinaash to hona hi hai। isse hi to kalyaan hona hai। kalyaankaari baap aate hain to mahaabhaari ladaai lagti hai। kahenge hamne kaha tha na ki brahmaakumaariyaan vinaash karengi। barobar vinaash to hona hi hai, puraani duniya vinaash hogi। ham nai duniya sthaapan karte hain। puraani ke baad nai zaroor hai hi। kalpa-kalpa vinaash hota hai tab hi bhaarat mein svarga ke dvaar khulte hain। parantu ve log samjhen kaise? aage chalkar bahut samjhenge। baap jab aate hain to puraani duniya saari svaaha ho jaati hai। tumhaara yeh yagya to wonderful hai, jismen aahuti padni hai। yeh bhi tum jaano aur na jaane koi। vijay to paandavon ki honi hai aur sab khatma ho jaayenge। baaki tum paandav rehte ho phir nai duniya mein raajya karte ho। yeh knowledge badi wonderful hai। sabka duhkh-harta, sukh-karta, sadgati dene vaala ek hi baap hai। kitna meetha, kitna pyaara baap hai। kehte aaye ho meethe baba, aap jab aayenge to aap par ham vaari jaayenge। mera to aap doosra na koi। iska matlab yeh nahin ki gharbaar chhod yahaan aakar baithenge। nahin, grihastha vyavhaar mein bhal raho। 7 roz ka course le phir kahaan bhi jaao - manamnaabhav। baap ko yaad karna hai aur varsa paana hai। bas yaad ki yaatra mein rehna hai, isse hi beda paar hai। yeh bhi tum jaante ho - pavitra rehna hai। chhi-chhi khaana aadi nahin khaana hai। murli to milti hi hai। koi samay murli nahin bhi milengi, aaphte aayengi, hangaama aadi ho jaayega to murli mil nahin sakengi। tum in aankhon se jo kuchh dekhte ho woh nahin rahega, sab bhasma ho jaayega। pralay to hoti nahin। duniya to ek hi hai, nai so puraani hoti hai। new world, old world kaha jaata hai। ab to kahenge yeh old world hai, baaki thoda samay hai। woh kehte hain kalpa ki aayu laakhon varsha hai। kaliyug ke liye kehte 40 hajaar varsha pade hain। vaastav mein 5 hajaar varsha ka chakra hai। tumhaari buddhi mein saari knowledge hai। manushya to bilkul pattharbuddhi hain। actors hokar drama ke creator, director ko na jaanen to unko kya kahenge। world ki history-geography kaise repeat hoti hai, yeh to jaanna chaahiye na। jo achhi reeti jaante hain, buddhi mein dhaaran kar auron ko dhaaran karaate hain, woh oonch te oonch pad paate hain। baap kehte hain - jo knowledge mere mein thi woh ab tumko de raha hoon। drama plan anusaar main repeat karta hoon। mera bhi drama mein part hai। bhakti maarga mein bhi part bajaaya, ab tumko aakar apna aur rachna ke aadi-madhya-ant ka parichay deta hoon। main bhi drama ke bandhan mein hoon। main aata hi ek baar hoon। apna parichay dene aur rachna ke aadi-madhya-ant ka knowledge sunaane। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan obedient banna hai। kabhi bhi kisi baat mein apna ahankaar nahin dikhaana hai। niraakaari aur nirhankaari hokar rehna hai।

2) baap, teacher aur satguru ke contrast ko samajh nishchaybuddhi ban shreemat par chalna hai। roohaani yaatra par rehna hai।

vardaan:- purushaartha shabd ko yathaartha reeti se use kar sada aage badhne vaale shreshtha purushaarthi bhav

kai baar purushaarthi shabd bhi haar khaane mein va asphalta praapta hone mein achhi dhaal ban jaata hai, jab koi bhi galti hoti hai to kah dete ho ham to abhi purushaarthi hain। lekin yathaartha purushaarthi kabhi haar nahin kha sakte kyonki purushaartha shabd ka yathaartha arth hai svayan ko purush arthaat aatma samajhkar chalna। aise aatmik sthiti mein rahne vaale purushaarthi to sadaiv manzil ko saamne rakhte hue chalte hain, ve kabhi rukte nahin, himmat ullaas chhodte nahin।

slogan:- master sarvashaktimaan ki smriti mein raho, yeh smriti hi maalikpan ki smriti dilaati hai।

ye avyakt ishaare - jvaalaasvaroop sthiti mein rah shaktishaali yaad ka anubhav karo

koi bhi kaarya karte va baat karte beech-beech mein sankalpon ki traffic ko stop karo। ek minute ke liye bhi man ke sankalpon ko, chaahe shareer dvaara chalte hue karma ko beech mein rok kar bhi yeh practice karo tab bindu roop ki powerful stage par sthit ho sakenge। jaise avyakt sthiti mein rah kaarya karna saral hota ja raha hai vaise hi yeh bindurup ki sthiti bhi sahaj ho jaaye, to yahi yog ki jvaala swaroop sthiti hai।