सोमवार 17 अगस्त 2026 की दैनिक मुरली

17-08-2026 praatahmurli om shanti "baapdaada"' madhuban

“meethe bachche - baap aur daada ki bhi wonderful kahaani hai, baap jab daada mein pravesh kare tab tum brahmaakumaar-kumaari varse ke adhikaari bano''

prashn:- nishchit drama ko jaante hue bhi tum bachchon ko kaun sa lakshya avashya rakhna hai?

uttar:- purushaartha kar gallop karne ka arthaat vinaash ke pahle baap ki yaad mein rah karmaateet banne ka lakshya avashya rakhna hai। karmaateet arthaat iron aged se golden aged banna। purushaartha ka yahi thoda sa samay hai isliye vinaash ke pahle apni avastha ko achal-adol banaana hai।

om shanti। om shanti। yeh donon kaun kehte hain? ek tha baba, ek tha daada। kahaani sunaate hain na - ek tha raaja, ek thi raani। ab yeh phir hain nai baaten। ek baba ek daada tum kahenge 5 hajaar varsha pahle bhi ek tha shivbaaba, doosra tha brahma daada। ab shiv ke bachche to sab hain। sabhi aatmaayen ek baap ki santaan hain। woh to hai hi hai। brahma ke bachche brahman bhi the, prajaapita brahma ki santaan brahmaakumaar-kumaariyaan the। unhon ko kaun padhaate the? shivbaaba। prajaapita brahma ke yeh brahmaakumaar-kumaariyaan dher bachche hain na। brahmaakumaar-kumaariyaan maante hain barobar ham shivbaaba ke bachche bhi hain, potre bhi hain। bachche to hain hi ab potre bane hain। brahma dvaara daade se varsa lene। abhi tumko daade se varsa milta hai, jisko shivbaaba kehte hain। parantu brahmaakumaar-kumaariyaan hone kaaran unko ham daada kehte hain। varsa daade ka hai। brahma daada ka nahin। vaikuntha vaasi banne ka varsa us baap se milta hai। aadhaakalpa varsa paate ho phir tumko shraap milta hai - raavan se। neeche utarte aate ho। jaise ki grahchaari baithti hai, neeche utarne ki। abhi tum bachche samajhte ho - hamaari grahchaari raahu ki dasha poori hui। raahu ki dasha hai sabse buri। oonch te oonch brihaspati ki dasha phir raahu ki dasha baithi to 5 vikaaron ke kaaran ham kaale ho gaye। ab phir baap kehte hain de daan to chhoote grahan। hai tumhaari baat। unhonne phir soorya chandrama ka grahan samajh liya hai। jab grahan lagta hai to daan maangate hain। yahaan baap tumko kehte hain 5 vikaaron ka daan do to grahchaari utar jaayegi। in vikaaron se hi tum paapaatma bane ho। mukhya hai deh-abhimaan। pahle aise satopradhaan the, phir sato rajo tamo bane hain। 84 janma liye hain। yeh to pakka nishchay hai barobar devtaayen hi 84 janma lete hain। pahle unhon ko hi milna chaahiye baap se। gaaya bhi jaata hai aatmaayen paramatma alag rahe…

baap kehte hain - pahle-pahle tumko satayug mein bheja tha। phir abhi tum hi aakar mile ho। aage to sirf gaate the unka yathaartha arth abhi baap baith samjhaate hain। sabhi ved shaastra, jap, tap, slogan aadi jo bhi hain sabka saar baap baith samjhaate hain। chakra to bilkul sahaj hai। abhi kaliyug aur satayug ka sangam hai। ladaai bhi saamne khadi hai। yeh bhi tumko nishchay hai - satayug ki sthaapna hoti hai। kaliyug mein jitne bhi hain, un sabke shareer khalaas ho jaayenge, baaki aatmaayen pavitra ban hisaab-kitaab chuktu kar jaayengi। yeh sabke kayaamat ka samay hai। aatmaayen shareer chhod chali jaayengi। yeh tumhaari buddhi mein abhi hai। jab tak ham karmaateet avastha ko paayen tab tak sangam par khade hain। ek taraph hain karodon manushya, doosre taraph ho sirf tum thode se। tumhaare mein bhi kitne hain jo nishchaybuddhi hote jaate hain। nishchaybuddhi vijayanti phir jaakar vishnu ke gale ki maala banenge। ek hai roodraaksha ki maala, doosri hai roonda maala। us roonda maala mein chhoti-chhoti shakla hoti hai। yeh nishaani hai। ham aatmaayen hi aakar phir baap ke gale ki maala ke daane banenge phir yahaan aayenge nambarvaar। maala 8 ki bhi hai, 108 ki bhi hai, 16108 ki bhi hai। ab 16 hajaar hain ya 5-10 hajaar hain, unka koi hisaab nahin nikaala jaata। yeh maalaayen gaai jaati hain। baba kehte hain yeh sab tum kyon vichaar karte ho। jitne bhi raajaayen kalpa pahle satayug treta mein bane the, utne hi banenge। 100 banen ya 2-3 sau banen - yeh poochhna nahin hai।

baap kehte hain - tum jitna najdeek aate jaayenge to yeh sab samajh jaayenge। aaj ham yahaan hain kal vinaash hoga phir satayug mein thode se devi-devta honge। baad mein vriddhi ko paate hain। satayug ke aasaar bhi dikhaai padte hain। baaki laakhon jaakar rahenge phir laakh rahen va 9-10 laakh rahen, accurate nahin kah sakte। haan tum jab accurate sampoorn banne ke laayak banenge tab tumko aur jaasti saakshaatkaar ho jaayega। abhi to bahut kuchh samajhne ka samay pada hai। bahut saakshaatkaar karte rahenge। ladaai ki taiyaariyaan bhi bahut hoti rehti hain। sab cheejen mahangi hoti jaayengi। vilaayat mein bhi ab khoob tax aadi lagte rahenge। bahut-bahut mahangaai hokar phir ekdam sastaai ho jaayegi। satayug mein koi cheez par kharcha nahin hoga। sab khaaniyaan aadi bharpoor ho jaayengi। nai duniya mein vaibhav bahut hote hain। lakshmi-naaraayan ke paas bahut vaibhav the na। shreenaath dvaare mein moortiyon ke aage bhi kitne vaibhvon ka bhog lagaate hain। vahaan bahut maal banaate hain aur khaate rehte hain। kahenge ham devtaaon ko bhog chadhaate hain। kahenge devtaaon ko bhog nahin lagaayenge to woh naaraaj ho jaayenge। ab ismen naaraaj hone ki to baat hi nahi। tum koi par naaraaj nahin hote ho। jaante ho draamaanusaar yeh vinaash hona hi hai। kaliyug se badal kar satayug hoga। ham drama ko samajhte hain ki draamaanusaar abhi naya chakra shuru hona hai। tum bhi drama ke vash ho। draamaanusaar baap bhi aaya hua hai। drama mein ek minute bhi neeche oopar nahin ho sakta hai। jaise baba aaya tumne dekha kalpa baad bhi hoobhu aise hoga। shaastron mein to kalpa ki aayu lambi likh di hai। abhi tum bachchon ki buddhi mein hai barobar vinaash saamne khada hai। abhi tum gallop kar rahe ho। jaante ho baap ko yaad kar hamko karmaateet avastha ko zaroor paana hai arthaat iron ej se golden ej banna hai। abhi agar purushaartha nahin karenge to pad bhrashta ho jaayega। he aatmaayen abhi tum patit ban gai ho। yeh bhi jaante ho bahut kisam ke aayenge jo aur dharma mein badli ho gaye hain woh nikalkar aate rahenge। aakar apna purushaartha karte rahenge - baap se varsa paane। brahman dharma mein aakar phir devta dharma mein aayenge। brahman dharma mein nahin aayenge to devta dharma mein kaise aayenge। brahman din-pratidin vriddhi ko paate rahenge। dekhenge vinaash saamne aa gaya hai, yeh to theek kehte hain phir vriddhi hoti jaayegi। braahmanon ka jhaad vriddhi ko paakar full ho jaayega phir vaapas jaayenge। devtaaon ka jhaad badhega।

abhi tum sangam par raajayog seekh rahe ho। is sangam ko kalyaankaari yug kaha jaata hai। sangam ka hi gaayan hai - ganga saagar ka mela dikhaate hain। woh sab hai bhakti maarga ka। yeh hai gyaan saagar aur gyaan saagar se nikli hui gyaan gangaayen। gyaan saagar se patit-paavan akshar lagta hai। woh samajhte hain - patit paavni ganga hai aur phir ganga mein snaan karte hi aate hain। yeh nadiyaan to satayug se lekar chalti aati hain, aajkal to nadiyaan bhi kahaan-kahaan dubo deti hain। prakriti bhi tamopradhaan, saagar bhi tamopradhaan ho pada hai। saagar thodi si uchhal khaayega to sab kuchh khalaas kar denge। satayug mein sirf ham thode hi bhaarat mein rehte hain - yamuna ke kanthe par। dehli paristhaan thi phir banni hai। satayug mein thodi hi jeev aatmaayen rehti hain phir dheere-dheere aate jaate hain। abhi hai kaliyug ka ant। kitne dher manushya ho gaye hain, behad ka naatak hai, jisko achhi reeti samajhna hai। bhal koi apne ko actor samajhte bhi hain parantu kalpa 5 hajaar varsha ka hai, yeh kisko bhi pata nahin hai। kahaan 84 janma, kahaan 84 laakh। abhi tum roshni mein ho। tumko baap se varsa milta hai। baap kehte hain - manamnaabhav। baap ko yaad karna hai। shiv bhagvaanuvaach, bhagwan ki mahima mein aur devtaaon ki mahima mein bahut farka hai। baap jo nai rachna rachte hain, unki mahima hain sarvagun sampanna... abhi tum aise ban rahe ho। baap ki mahima aur inki mahima mein raat-din ka farka hai। yeh raajayog hai na। gaaya bhi jaata hai - bhagwan raajayog sikhlaate hain। woh hai niraakaar, to zaroor niraakaar se saakaar mein aana pade। bhagwan ki itni mahima hai to zaroor aana pade। unka janma divya alaukik hai aur kiska divya janma nahin gaaya jaata। yeh bhi bachchon ko samjhaaya hai ek hota hai laukik baap, doosra hai paarlaukik baap, jisko hi bhagwan kah yaad karte hain aur teesra hai alaukik baap, yeh phir wonderful baap hai। jab paarlaukik baap bachchon ko adopt karte hain to beech mein yeh alaukik aa jaata hai। prajaapita brahma ke kitne dher bachche hain। shivbaaba aakar brahma dvaara tumko apna banaate hain। kitne brahmaakumaar-kumaariyaan bante hain। laukik baap ko to karke 8-10 bachche honge। achha shivbaaba bhi hai paarlaukik baap। unke to anek bachche hain। sabhi aatmaayen kehti hain - ham sab brothers hain। ab is sangam par phir alaukik baap milta hai। yeh gyaan tumko vahaan nahin rahega। prajaapita brahma baap milta hi tab hai jabki baap aakar nai srishti rachte hain। to yeh alaukik janma hua na, inko koi samajh nahin sakte। woh laukik woh paarlaukik aur yeh hai sangamayugi alaukik baap। laukik baap to satayug se lekar hote aaye hain। paarlaukik baap ko vahaan koi yaad nahin karte, vahaan hota hi hai ek baap। he bhagwan, he paramatma kahkar yaad nahin karte hain phir dvaapar mein jab bhakti maarga shuru hota hai to baap do hote hain। sangam par hain 3 baap। prajaapita brahma bhi abhi milta hai, abhi tum unke bane ho। jaante ho yeh alaukik baap hai। abhi tum in baaton ko achhi reeti jaante ho aur yaad karte ho। apne ko aatma samajh baap ko yaad karo। satayug mein yaad karne ki darkaar hi nahin। duhkh mein paarlaukik baap ka sab simran karte hain। yeh to bilkul sahaj baat hai। satayug treta mein ek baap hota hai, dvaapar mein do baap hote hain। is samay tum alaukik baap ke bachche bane ho jis dvaara tum varsa lete ho। tum bachche hi brahman bante ho jo phir devta banenge। vinaash bhi tumhaare ko hi dekhna hai, jo tum in aankhon se dekhenge, bombs chhodenge। manushya to marenge na। jaapaan mein bhi bomb chhoda, dekha na kaise manushya mare। ab yahaan ladaaiyaan lagti rehti hain। khud bhi kehte hain ham tang hote jaate hain। 10-10 varsha tak bhi ladaai chalti rehti hai। bombs mein to chapti mein (second mein) sab khalaas ho jaayega। chingaari lagti hai to shahar nashta ho jaate hain। yeh to bombs hain। aag bhi lagni hai।

tum bachche jaante ho baap aaye hi hain sthaapna aur vinaash karaane। to zaroor yeh sab hoga। purushaartha karne ka abhi samay hai। maaya ghadi-ghadi tumhaara buddhiyog tod deti hai। ajun tum adol sthir kahaan bane ho। kehte hain baba maaya ke toofaan bahut aate hain। koi to saare din mein ghanta aadha bhi yaad nahin karte hain। baap kehte hain - tum karmayogi ho। 8 ghanta to yeh seva karenge। 8 ghanta yaad kar sako itna purushaartha karna hai। yaad karte rahne se vikarma vinaash hote jaayenge, isko hi yog agni kaha jaata hai। yeh hai mehnat। grihastha vyavhaar mein rehte hue sirf yaad karna hai। yeh bhi baba batlaate hain ki jinhonne grihastha chhoda hai, bachche bane hain, woh bhi itna yaad nahin karte hain। ghar mein rahne vaale aur hi jaasti yaad karte hain। arjun aur bheel ka bhi misaal dete hain na। mehnat hai baap ko yaad karna aur chakra ko samajhna hai। mahaabhaarat ladaai bhi zaroor lagegi। satayug mein thode hi lagegi। to tum bachchon ko andhon ki laathi bhi banna hai। sabko raasta bataana hai ki baap ko yaad karo, chakra ko yaad karo। svadarshan chakradhaari bano। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kam se kam 8 ghanta yaad mein rahne ka purushaartha karna hai। apni avastha achal-adol rakhne ke liye yaad ka abhyaas badhaana hai। gaphlat nahin karni hai।

2) yeh drama bilkul accurate bana hua hai isliye kisi par bhi naaraaz nahin hona hai। nishchaybuddhi banna hai।

vardaan:- todna, modna aur jodna - in teen shabdon ki smriti dvaara sada vijayi bhav

saari padhaai aur shikshaaon ka saar yeh teen shabd hain:- 1-karmabandhan todne hain। 2-apne sanskaar-svabhaav ko modna hai aur 3- ek baap se sarva sambandh jodne hain - yahi teen shabd sampoorn vijayi bana denge। iske liye sada yahi smriti rahe ki jo bhi in naynon se vinaashi cheeze dekhte hain woh sab vinaash hui padi hain। unhein dekhte bhi apne naye sambandh, nai srishti ko dekhte raho to kabhi haar ho nahin sakti।

slogan:- yogi ki nishaani hai - sada clean aur clear।

ye avyakt ishaare - apvitrata ke beej ko bhi samaapta kar sampoorn svachchha (pavitra) bano

agar brahman jeevan mein sankalp mein bhi apvitrata va amaryaada aa jaati hai to takhtansheen ki bajaae girti kala mein arthaat neeche aa jaate ho। koi vikarma nahin hua lekin vyartha karma bhi hua to pashchaataap ke bajaae mahsoosta ki stage hoti hai। mahsoos hota hai ki yeh wrong hai, nahin hona chaahiye.. woh baat kaante ke samaan chubhti rahegi, isliye is vyartha se bhi mukta bano।