गुरुवार 3 सितंबर 2026 की दैनिक मुरली

03-09-2026 praatahmurli om shanti "baapdaada"' madhuban

“meethe bachche - naam-roop se nyaari koi bhi cheez nahin hoti, aatma va paramatma ko bhi naam-roop se nyaara nahin kahenge, usmein bhi avinaashi part noondha hua hai''

prashn:- shivbaaba ko bholaanaath kahkar yaad karte hain, use bhola kyon kaha hai?

uttar:- kyonki baap hi ahilyaaon, ganikaaon, kubjaaon ka uddhaar karte hain। unhein vishwa ki raajaai ka varsa de dete hain। manushya to baap ke liye kah dete - duhkh bhi woh deta, sukh bhi woh deta, parantu baba kehte hain main to tum bachchon ke liye sukh ka raajya sthaapan karta hoon। mujhe duhkh harta sukh karta kaha gaya hai। vichaar karo ki main baap apne bachchon ko duhkh kaise de sakta hoon।

geet:- door desh ka rahne vaala…

om shanti। roohaani bachchon ne geet suna arthaat roohon ne is shareer ki kaan roopi karmendriy dvaara geet suna - doordesh se musaaphir aaya hai। tum sab musaaphir ho na। jo sab manushya maatra aatmaayen hain woh sabhi musaaphir hain। aatmaon ka koi bhi ghar nahin hai। aatma hai niraakaar। niraakaari duniya mein rahne vaali niraakaari aatmaayen hain। usko kaha jaata hai niraakaari aatmaon ka ghar, desh va lok। isko jeev aatmaon ka desh kaha jaata hai। woh hai aatmaon ka desh phir jab aatmaayen yahaan aakar shareer mein pravesh karti hain to niraakaar se saakaar ban jaati hain। aise nahin ki aatma ka koi roop nahin hai। roop bhi zaroor hai, naam bhi hai। itni chhoti aatma kitna part bajaati hai - is shareer dvaara। har ek aatma mein part bajaane ka kitna record bhara hua hai। record ek baar bhar jaata hai phir kitna bhi repeat karo, vahi chalega। vaise aatma is shareer ke andar record hai, usmein 84 janmon ka saara part bhara hua hai। jaise aatma niraakaar hai vaise baap bhi niraakaar hai। kahaan-kahaan shaastron mein likh diya hai woh naam-roop se nyaara hai। parantu naam-roop se nyaari koi vastu hoti nahin। aakaash bhi polaar hai, naam-roop to hai na। bigar naam ke koi bhi cheez hoti nahin। manushya samajhte hain parampita naam-roop se nyaara hai। agar naam nahin to roop bhi nahin, desh bhi nahin। phir to kuchh bhi nahin ho sakta। bulaate bhi hain doordesh ka rahne vaala parampita paramatma। ab doordesh mein aatmaayen rehti hain, yeh saakaar desh hai, ismen do ka raajya chalta hai - raamraajya aur raavan raajya। aadhaakalpa hai raamraajya, aadhaakalpa hai raavan raajya। yeh bachchon ko samjhaaya gaya hai ki satayug se eeshvareey raajya shuru hota hai, raamraajya sthaapan karne vaala parampita paramatma hai। woh kabhi raavan raajya sthaapan kar na sake। baap bachchon ke liye kabhi duhkh ka raajya thode hi banaayenge। kehte hain eeshvar hi duhkh sukh dete hain। baap kehte hain main bachchon ko duhkh kaise de sakta hoon। mera to naam hi hai duhkh harta sukhkarta। yeh to manushyon ki bhool hai। eeshvar kabhi duhkh nahin denge। is samay hai hi duhkhadhaam। aadhaakalpa raavanraajya mein duhkh hi milta hai। sukh ki ratti nahin। sukhdhaam mein kabhi duhkh hota nahin। baap svarga ka rachayita hai। abhi tum ho sangam par। inko nai duniya to koi bhi nahin kahenge। nai duniya ka naam hi hai svarga। vahi phir puraani duniya banti hai। nai cheez jab puraani, kharaab dikhaai padti hai to puraani cheej ko khalaas kiya jaata hai। manushya vish (vikaaron) ko hi sukh samajhte hain। gaaya bhi jaata hai amrit chhod vish kaahe ko khaae। granth mein guroonaanak ke bhi akshar hain। ashankh chor... baap ki mahima gaate hain, aap jo aakar karenge usse bhala hi hoga। nahin to raavanraajya mein manushya bura kaam hi karenge। baap hi aakar moot paleeti kapde dhote hain। granth mein bahut likha hua hai। sindhi log grantha rakhte hain। ab yeh to koi sikkha dharma vaale hain nahin। yeh to hain aadi sanaatan devi-devta dharma ke। sikkhon ka hai guroonaanak, unko daadhi baal the। to sab sikkhon ko daadhi baal hone chaahiye। aajkal to daadhi rakhte nahin। bahut fashionable ban gaye hain। nahin to follow karna chaahiye na। ham guroonaanak ke followers hain to guroonaanak ko follow karna chaahiye na। yeh to bachchon ko abhi pata pada hai ki guroonaanak ko 500 varsha hue phir kab aayenge? tum jhat bataayenge। koi se bhi poochho yeh to bataao ki guroonaanak kab aayenge? to kahenge unki aatma jyoti jyot sama gai। aayenge phir kaise। tum kahenge aaj se 4500 varsha baad guroonaanak phir aayenge। tumhaari buddhi mein saare world ki history-geography chakra lagaati rehti hai। buddha, Christ aadi sabke liye kahenge is samay tamopradhaan hain, kabradaakhil hain। inko kayaamat ka samay kaha jaata hai। sab manushya maatra jaise mare pade hain। sabki jyot jaise bujhi hui hai। baap aate hain sabko jagaane। bachche jo kaam-chita par baith bhasma ho gaye hain unhon ko amrit varsha se jagaakar saath le jaayenge। maaya ne kaam-chita par bithaae kabradaakhil kar diya hai। so gaye hain। ab baap amrit chhakaate (pilaate) hain। amritsar naam iseelie rakha hai। baap aakar amrit chhakaate hain। ab kahaan gyaan amrit, kahaan paani ki baat! sikkha logon ka bada din hota hai to badi dhoomdhaam se taalaab ko saaph karte hain, mitti nikaalte hain isliye naam hi rakha hai - amritsar। amrit ka taalaab। ab guroonaanak saaheb to koi gyaan saagar hai nahin, usne bhi baap ki mahima ki hai। khud kehte hain ekoankaar, satnaam, woh sadaiv sach bolne vaala hai। satya naaraayan ki katha hai na। sindhuvarti log baahar jaate hain to satya naaraayan ki katha karaate hain। samajhte hain satya naaraayan ki katha se safety se paar ho jaayenge। amraktha, teejri ki katha kitni bhakti maarga mein kathaayen sunte aaye hain। kehte hain shankar ne paarvati ko katha sunaai। woh to sookshm vatan mein rahne vaala vahaan phir katha kaun si sunaai? yeh sab baaten baap baith samjhaate hain। vaastav mein tumko amraktha sunaakar amarlok mein main le jaane aaya hoon। mrityulok se amarlok mein main le jaata hoon। baaki sookshm vatan mein paarvati ne kya dosh kiya jo aakar unko katha sunaayenge। abhi tum samajhte ho ham nar se naaraayan, naari se lakshmi bante hain। yeh hai amarlok mein jaane ke liye sachchi satya naaraayan ki katha, teejri ki katha। tum aatmaon ko ab gyaan ka teesra netra mila hai।

baap samjhaate hain tum hi gul-gul poojya the phir 84 janmon ke baad tum hi pujaari bane ho isliye gaaya hua hai - aapehi poojya aapehi pujaari। baap kehte hain - main to sadaiv poojya hoon। tumko aakar pujaari se poojya banaata hoon। kehte hain he raam aakar hamko paavan banaao। sab bhagat pukaarte hain। aatma pukaarti hai na - he patit-paavan। abhi tum samajhte ho ki geeta koi shreekrishna ne nahin sunaai hai, paavan banaane vaala ek hi parampita paramatma hai। ek hi raam। to baap samjhaate hain ki opinion lete raho ki eeshvar sarvavyaapi nahin hai। geeta ka bhagwan shiv hai, na ki shreekrishna। pahle to poochho bhagwan kisko kaha jaata hai - niraakaar ko va saakaar ko? shreekrishna to hai saakaar, shiv hai niraakaar। woh sirf is tan ka loan leta hai। baaki maata ke garbha se janma nahin lete hain। pahle number garbha mein aane vaali hai shreekrishna ki aatma। brahma, vishnu, shankar bhi sookshm shareerdhaari hain। shiv ko shareer nahin hai। yahaan is lok mein sthool shareer hai। baap ki mahima hai patit-paavan, sarva ka sadgati daata। sarva ka liberator, duhkh harta sukh karta। achha sukh kahaan ho sakta hai? sukh milega doosre janma mein। jab raavan ki duniya khatma ho svarga ki sthaapna ho jaayegi। achha liberate kisse karte hain? raavan ke duhkh se। yeh to duhkhadhaam hai na। achha phir guide bhi bante hain। yeh shareer to yahaan hi khatma ho jaate hain। baaki aatmaon ko le jaate hain। sabko duhkh se chhudaay, pavitra banaae ghar le jaate hain। manushya jab shaadi kar aate hain to pahle hota hai pati, peechhe hoti hai braaid। phir baraat hoti hai। ab tumhaari maala bhi aisi hi hai। oopar mein hai shivbaaba phool, pahle phool ko namaskaar karenge। phir yugal daana brahma-sarasvati, phir ho tum, jo baba ke madadgaar bachche ho। phool shivbaaba ki yaad se hi sooryavanshi vishnu ki maala bani hai। brahma-sarasvati so lakshmi-naaraayan bante hain। devta, kshatriy... phir shoodra se brahman ban yeh knowledge lekar lakshmi-naaraayan bante hain। yeh maala unhon ki bani hui hai। yeh brahma-sarasvati hi raaja-raani banenge। unhonne mehnat ki hai, tab pooje jaate hain। koi ko pata nahin hai ki maala kya cheez hai। aise hi maala pherte rehte hain। 16108 ki bhi maala hoti hai। bade-bade mandiron mein rakhi jaati hai। phir koi kahaan se kheenchega, koi kahaan se। baba baambe mein lakshmi-naaraayan ke mandir mein jaate the। maala jaakar pherte the, raam-raam japte the। phool shivbaaba hai na। phool ko hi raam-raam kehte hain phir saari maala par maatha tekte hain। gyaan to kuchh bhi hai nahin। paadri log bhi haath mein maala pherte rehte hain। poochho kiski maala pherte rehte ho? kahenge Christ ki yaad mein maala pherte hain। unhon ke bade pope paadri hote hain to woh phir popon ki maala hogi। un sabke chitra hain। popon ka kitna maan hai। unko khud pata nahin hai ki Christ ki aatma kahaan hai! tum jaante ho ki Christ ki aatma bhi abhi beggar roop mein hai। tum bhi abhi beggar to prince ban rahe ho। bhaarat hi prince tha, abhi beggar hai phir prince bante hain। banaane vaala hai ek roohaani baap। beggar se prince bante ho। ek prince-princess ka college bhi hai, jahaan jaakar woh padhte hain। tum yahaan padhkar 21 janmon ke liye prince-princess svarga mein bante ho। knowledge se tum manushya se devta bante ho।

abhi tum samajhte ho jo shreekrishna satayug ka prince tha so 84 janmon ke baad beggar bana hai। 5 hajaar varsha pahle devi-devtaayen kitne saahookaar the। abhi vahi kangaal beggar bane hain। yeh baaten sirf tum hi sun sakte ho। bhagvaanuvaach - woh sabka father hai। tum god father se sunte ho। geeta mein sirf bhool yeh kar di hai jo shiv bhagvaanuvaach ke badle shreekrishna bhagvaanuvaach naam daal diya hai isliye gaaya jaata hai jhoothi duniya। is samay saari duniya kaanton ka jangal ban gai hai। baambe mein babulnaath ka mandir hai। baap aakar in kaanton ko phool banaate hain। sab ek-do ko kaanta lagaate hain arthaat kaam-kataari chalaate hain, isliye inko kaanton ka jangal kaha jaata hai। satayug ko garden oph allaah kaha jaata hai। vahi flowers, kaante bante hain phir kaanton se phool bante hain। satayug mein kabhi raavan ko nahin jalaate। raavan puraana dushman hai bhaarat ka। tumhaari ladaai hai raavan se, jisne aadhaakalpa duhkh diya hai। aakhreen badi ladaai bhi hogi। sachcha-sachcha dashahra hona hai। raavanraajya hi khalaas ho jaayega, tumko phir sone ke mahal mil jaayenge। abhi tum raavan par jeet pahan svarga ke maalik bante ho। baba saare vishwa ka raajya bhaagya dete hain isliye unko shiv bhola bhandaari kehte hain। ganikaayen, ahilyaayen, kubjaayen sabko baap vishwa ka maalik banaate hain। kitna bhola hai। aate bhi patit duniya mein, patit shareer mein hain। baaki jo svarga ke laayak nahin hain woh vikaaron ko chhod nahin sakte। baap kehte hain - bachche abhi yeh antim janma tum paavan bano। yeh vikaar pvoizan hain jo tumko aadi-madhya-ant duhkhi banaate hain। kya tum yeh ek antim janma inhen chhod nahin sakte? main tumko amrit pilaae amar banaata hoon। phir bhi tum pavitra nahin bante ho। vikaaron bigar, cigarette bigar, sharaab bigar rah nahin sakte ho। main behad ka baap kehta hoon tum ek janma pavitra bano to main svarga ka maalik banaaoonga।

tum jaante ho baap aaya hi hai saari duniya ko duhkh se liberate kar sukhdhaam, shantidham mein le chalne। abhi sab dharmon ka vinaash ho jaayega। ek aadi sanaatan devi-devta dharma ki sthaapna hoti hai। granth mein bhi parampita paramatma ko akaalmoorta kehte hain। baap hai mahaakaal। woh kaal to ek do ko le jaayenge, main to sab aatmaon ko le jaaoonga, isliye mahaakaal kehte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) is antim janma mein gyaan amrit peekar amar banna hai। svayan ko svarga mein chalne ke laayak banaana hai। buri aadton ko chhod dena hai।

2) abhi padhaai padhkar 21 janmon ke liye svarga mein prince-princess banna hai। sachchi-sachchi satyanaaraayan ki katha sun nar se naaraayan banne ka purushaartha karna hai।

vardaan:- kam shabdon dvaara gyaan ke sarva raazon ko spashta karne vaale yathaartha aur shaktishaali bhav

koi bhi cheez jitni adhik shaktishaali hoti hai utni uski quantity kam hoti hai। aise hi jab aap apni nirvaan sthiti mein sthit ho vaani mein aayenge to shabd kam lekin yathaartha aur shaktishaali honge। ek shabd mein hajaaron shabdon ka rahasya samaaya hua hoga, jisse vyartha vaani automatic samaapta ho jaayegi। ek shabd se gyaan ke sarva raajon ko spashta kar sakenge, vistaar samaapta ho jaayega।

slogan:- dil se baba kehna arthaat khushi aur shakti ki praapti karna।

avyakt ishaare - ab apne daata swaroop ko pratyaksha karo

daata ke bachche sarva ko dene ki bhaavna se bharpoor bano। kabhi yeh sankalp nahin karo ki yeh ho to main bhi yeh karoon। aisi paristhiti ho, vaayumandal ho tab main yeh karoon। daataapan ke sanskaar vaale ko sab taraph se sahayog svatah praapta hota hai isliye master daata doosron se lene ki bhaavna nahin rakh sakte।