बुधवार 2 सितंबर 2026 की दैनिक मुरली

02-09-2026 praatahmurli om shanti "baapdaada"' madhuban

meethe bachche - baap aaye hain tumhein aise shreshtha karma sikhlaane, jisse tum 21 janma ki baadshaahi ka varsa le sako, atal akhanda raajya ke maalik ban sako

prashn:- grihasthiyon aur sannyaasiyon ke kis ek siddhaanta mein bahut bada antar hai?

uttar:- grihasthiyon ka siddhaanta hai ki bhagwan zaroor kisi na kisi roop mein aayega aur sannyaasiyon ka siddhaanta hai ki brahm ko yaad karte-karte brahm mein leen ho jaayenge। ab baap samjhaate hain brahm mein koi leen nahin hota। aatma amar hai woh leen kaise hogi। bhagwan yadi aayega to zaroor teacher bankar shiksha dega। prerna se to gyaan nahin dega na।

geet:- tumhein paake hamne…

om shanti। meethe-meethe roohaani bachchon ne yeh geet suna। roohaani bachche hi kehte hain ki baba। bachche jaante hain yeh behad ka baap behad ka sukh dene vaala hai arthaat woh sabhi ka baap hai, unko sabhi behad ke bachche aatmaayen yaad karte hain। kisi na kisi prakaar se yaad karte hain parantu unko pata nahin hai ki hamko us parampita paramatma se koi baadshaahi leni hai। tum jaante ho hamko jo baap satayugi vishwa ki baadshaahi dete hain woh atal, akhanda, adol hai। woh hamaari baadshaahi 21 janma kaayam rehti hai। saare vishwa par hamaari raajaai rehti hai, jisko koi chheen nahin sakta, loot nahin sakta hai। hamaari raajaai hai adol kyonki vahaan ek hi dharma hota hai, dvait hai nahin। woh hai advait raajya। bachche jab geet sunte hain to apni raajaai ka nasha buddhi mein aana chaahiye। aise-aise geet ghar mein rahne chaahiye, jisse baap aur varse ki jhat yaad aati hai। baap ke yaad ki masti ke geet hone chaahiye। tumhaara sab hai gupta। bade aadmiyon ke to bahut thaath hote hain, tumko koi thaath nahin hai। tum dekhte ho jismen baba ne pravesh kiya hai usmein bhi koi thaath ki baat nahin hai। kapde aadi sab vahi hain। tum buddhi se samajhte ho ki baba ne ismen pravesh kiya hai - hamko yeh raajya bhaagya dene। yeh bhi bachche jaante hain ki saari srishti mein is samay jo bhi manushya maatra hain, sab deh-abhimaan mein aakar unrighteous kaam karte hain, isliye besmajh kaha jaata hai। sabki buddhi ko taala laga hua hai। tum kitne samajhdaar, vishwa ke maalik the। abhi maaya ne bilkul besmajh bana diya hai, jo koi kaam ke nahin rahe hain। baap ke paas jaane ke liye yagya-tap bahut karte hain parantu milta kuchh nahin। aise hi dhakke khaate rehte hain। paramatma ko koi bhi jaante nahin, sarvavyaapi kah dete hain, yeh bhi kitna wrong ho jaata hai। pita akshar buddhi mein nahin aata hai। karke koi kehte bhi hain, woh bhi kahne maatra। agar parampita samjhen to buddhi ekdam chamak uthe। baap svarga ka varsa dete hain, woh hai heavenly god father phir ham kaliyugi narka mein kyon pade hain! ab ham mukti-jeevanmukti kaise pa sakte hain, yeh kiski buddhi mein nahin aata hai। abhi tumko samajh mili hai। baba ne hamko yeh smriti dilaai hai, jab nai duniya, naya bhaarat tha to hamaara raajya tha। ek hi mat, ek hi bhaasha, ek hi mahaaraaja-mahaaraani the। satayug mein mahaaraaja-mahaaraani, treta mein raaja raani kaha jaata hai। phir dvaapar mein vaam maarga shuru hota hai phir har ek ke karmon par madaar hai। karmon anusaar ek shareer chhod doosra lete hain। abhi baap kehte hain main tumko aise karma sikhaata hoon jo 21 janma baadshaahi hi paate rahenge। bhal vahaan bhi had ka baap milta hai parantu vahaan yeh gyaan nahin rehta ki yeh raajaai ka varsa behad ke baap ka diya hua hai। phir dvaapar se raavan raajya shuru hota hai to vikaari sambandh ho jaata hai। phir jaise-jaise karma vaisa phal milta hai, devta vaam maarga mein chale jaate hain। phir satayug ka sab khalaas ho jaata hai। phir karmon anusaar janma lete hain। bhaarat mein poojya raajaayen the to pujaari raajaayen bhi the। satayug mein raaja-raani aur praja sab poojya hote hain। phir jab dvaapar mein bhakti shuru hoti hai to yatha raaja-raani tatha praja pujaari ban jaate hain। bade raaja jo sooryavanshi the vahi pujaari ban jaate hain phir vaishya vanshi ban jaate hain। abhi tum viceless bante ho। uski praalabdha phir 21 janma chalti hai phir bhakti maarga shuru hota hai। jo-jo poojya devi-devta hokar gaye hain, unhon ke mandir banaakar unki pooja karte hain। yeh sirf bhaarat mein hi hota hai। yeh 84 janmon ki kahaani jo baap sunaate hain, yeh bhi bhaaratvaasiyon ke liye hai। aur dharma vaale aate hi baad mein hain phir to vriddhi hote-hote dher ke dher ho jaate hain। variety bhinna-bhinna devi-devtaaon ki rasam rivaaj thi, woh bhaarat ke gurooon ki nahin hai। aadhaakalpa baad raavanraajya shuru hone se saari-rasam rivaaj hi badal jaati hai phir poojya se pujaari ban jaate hain। pooja bhi pahle avyabhichaari ek shiv ki karte hain। unke mandir banaate hain phir lakshmi-naaraayan ke banaayenge। ek ne lakshmi-naaraayan ka mandir banaaya to doosra bhi banaayenge। phir raam seeta ke mandir banaane lag padenge phir kaliyug mein dekho ganesh, hanoomaan, chandika devi aadi-aadi ke anek deviyon ke chitra banaate rehte hain। bhakti maarga ke liye saamagri bhi chaahiye na। jaise beej kitna chhota hota hai, jhaad kitna bada hota hai vaise bhakti ka vistaar ho jaata hai। dher ke dher shaastra banaaye jaate hain। ab baap bachchon ko kehte hain - yeh bhakti maarga ki saamagri sab khatma honi hai। ab mujh baap ko yaad karo। bhakti ka prabhaav bhi bahut hai na। kitni khoobsoorat hai। naach-tamaasha, gaayan-keertan aadi kitna kharcha karte hain।

abhi baap kehte hain mujh baap aur varse ko yaad karo। aadi sanaatan dharma ko yaad karo। anek prakaar ki bhakti tum janma-janmaantar karte aaye ho। grihastha dharma vaale hi bhakti shuru karte hain। sannyaasiyon ko to bhakti nahin karni hai, yagya-tap, daan-punya, teertha aadi yeh sab grihasthiyon ka kaam hai, na ki sannyaasiyon ka। woh hain hi nivritti maarga vaale। unhon ke liye kaayda hai - gharbaar chhod jaae jangal mein rehna aur brahm tatva ko yaad karna। woh hain hi tatva gyaani, brahm gyaani। tatva athva brahm ko hi eeshvar kah dete hain। jaise bhaaratvaasi asul mein hain aadi sanaatan devi-devta dharma ke। parantu hindustaan mein rehte hain to apna dharma hindu samajh liya hai। vaise sannyaasi bhi aatmaon ke rahne ke sthaan tatva ko paramatma samajh lete hain। brahm va tatva ko hi yaad karte hain। vaastav mein sannyaasi jab satopradhaan hain to jangal mein jaakar rehte hain, shanti mein। aise nahin ki unhon ko brahm mein jaakar leen hona hai। baap kehte hain - yeh unhon ka mithya gyaan hai। leen koi ho nahin sakte। aatma to avinaashi hai na, woh kaise leen ho sakti hai। bhakti maarga mein kitna maatha kootte rehte hain। phir kehte bhagwan koi na koi roop mein kabhi aakar milega। ab kaun right? woh kehte brahm se yog lagaakar brahm mein leen ho jaayenge। grihastha vaale kehte ki bhagwan kis na kis roop mein aayega। patiton ko paavan banaayega। aise nahin ki oopar se prerna dvaara hi sikhlaayenge। teacher ghar baithe prerna karega kya! prerna akshar hai nahin। prerna se koi kaam nahin hota। bhal shankar ki prerna se vinaash kaha jaata hai parantu hai yeh drama ki noondh। unhon ko yeh moosal aadi banaane hi hain। prerna ki baat hi nahin hai। manushya to kah dete hain ki bhagwan ki prerna se sab hota hai ya kehte hain ki shankar ki aankh khulne se pralay ho gai। yeh sab kahaaniyaan hain, arth kuchh bhi nahin samajhte hain। kiske bhi mandir mein jaayenge to kahenge achtam keshvam... arth kuchh nahin samajhte। koi bhi apne badon ki mahima nahin jaante hain। dharma sthaapak ko guru kah dete hain। vaastav mein unko guru kehna wrong hai। Christ koi guru thode hi hai। vo to sirf dharma sthaapan karte hain। guru unko kaha jaata hai jo sadgati kare। woh to dharma sthaapan karne aate hain। unke pichhaadi unki vanshaavli aati hai। sadgati to kiski karte hi nahin। to unko guru kaise kahenge। guru to ek hi hai, jisko sarva ka sadgati daata kaha jaata hai। bhagwan baap hi aakar sarva ki sadgati karte hain। mukti-jeevanmukti dete hain। unki yaad kabhi kisse chhoot nahin sakti। manushya he bhagwan, he eeshvar kah ek baap ko hi yaad karte hain kyonki woh hai sarva ka sadgati daata। baap samjhaate hain yeh saari rachna hai। rachayita baap main hi hoon - sabko sukh dene vaala, varsa dene vaala ek hi baap thahra। bhaai-bhaai ko varsa de nahin sakte। varsa hamesha baap se milta hai। main sabhi behad ke bachchon ko behad ka varsa deta hoon isliye hi mujhe yaad karte hain he paramatma kshama karo। samajhte kuchh bhi nahin।

baap kehte hain - main koi inhon ke pukaarne se nahin aata hoon। yeh to drama mein bana hua hai। drama mein mere aane ka part bhi noondha hua hai। anek dharma vinaash, ek dharma ki sthaapna va kaliyug ka vinaash, satayug ki sthaapna karni hoti hai। main apne samay par aapehi aata hoon। yeh bhakti maarga ka bhi drama mein part hai। ab jab bhakti maarga ka part poora hota hai tab aaya hua hoon। kalpa pahle bhi baba aap brahma tan mein aaye the। yeh gyaan abhi tumko milta hai। phir kabhi nahin milega। yeh hai gyaan, woh hai bhakti। gyaan ki praalabdha hai chadhti kala। kaha jaata hai second mein jeevanmukti। janak ko second mein jeevanmukti mili thi na, lekin kya ek janak ne hi jeevanmukti paai? jeevanmukti to sab paate hain na। saari vishwa paati hai। sadgati va jeevanmukti ek hi akshar hai। jeevanmukti arthaat jeevan ko mukta karte hain - is raavan raajya se। baba jaante hain bachchon ki kitni durgati ho gai hai, bilkul duhkhi ho gaye hain। unhon ki phir sadgati honi hai। pahle mukti mein jaakar phir jeevanmukti mein aayenge। shantidham se phir sukhdhaam mein aayenge। yeh chakra ka raaz baap ne samjhaaya hai। baap kehte hain - is samay saare srishti ka jhaad jadajdeebhoot, tamopradhaan ho gaya hai isliye koi bhi apne ko aadi sanaatan devi-devta dharma ka samajhte nahin hain। aadi sanaatan devi-devta dharma ke the kyonki devtaayen pavitra the। ham apvitra patit apne ko devta kaise kahlaaye isliye kaha jaata hai - in vikaaron ko chhodte jaao। yeh vikaar aadi aadhaakalpa se rahe hain। ab ek janma mein inko chhodna, ismen mehnat lagti hai। mehnat bigar thode hi vishwa ka maalik banenge। baap ko yaad karenge tab hi tum apne ko raajaai ka tilak denge arthaat raajaai ke adhikaari banenge। jitna achhi reeti yaad karenge, shreemat par chalenge to tum raajaaon ka raaja banenge। padhaane vaala teacher to aaya hai padhaane। yeh paathshaala hai hi manushya se devta banne ki। nar se naaraayan banaane ki katha sunaate hain। yeh katha kitni naami-graami hai। inko amraktha, satya naaraayan ki katha, teejri ki katha bhi kehte hain।

dekho, geet kitna achha hai। baba hamko vishwa ka maalik banaate hain, jo maalikapna koi loot na sake। koi earthquake aadi nahin hogi। vahaan vighna ki koi baat hi nahin। aisa atal, akhanda, pavitrata, sukh-shanti ka raajya tum abhi pa rahe ho। kalpa pahle muaaphik har 5 hajaar varsha baad bhaarat svarga banta hai। tum jaante ho ham so devta the phir 84 janma lete-lete aakar yeh bante hain। phir ham so devta banenge। isko kaha jaata hai svadarshan chakradhaari। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apne aapko raajaai ka tilak dene ke liye yaad ki mehnat karni hai। sab vikaaron ko chhod dena hai।

2) brahma baap samaan saadhaaran aur gupta rehna hai। baahar ka thaath aadi nahin karna hai। apne bhavishya raajaai ke nashe mein rehna hai।

vardaan:- apni chanchal vritti ko parivartan kar satopradhaan vaayumandal banaane ke javaabdaar shreshtha aatma bhav

jo bachche apni chanchal vrittiyon ko parivartan kar lete hain vahi satopradhaan vaayumandal bana sakte hain kyonki vritti se vaayumandal banta hai। vritti chanchal tab hoti hai jab vritti mein itne bade kaarya ki smriti nahin rehti। agar koi ati chanchal bachcha busy hote bhi chanchalta nahin chhodta hai to use baandh dete hain। aise hi yadi gyaan-yog mein busy hote bhi vritti chanchal ho to ek baap ke saath sarva sambandhon ke bandhan mein vritti ko baandh do to chanchalta sahaj samaapta ho jaayegi।

slogan:- albelepan ki lahar ko samaapta karne ka saadhan hai behad ka vairaagya।

avyakt ishaare - ab apne daata swaroop ko pratyaksha karo

daataapan ke sanskaar emerge kar mansa dvaara punya ka khaata jama karo, vaani dvaara kamjor aatmaon ko khushi mein, pareshaan ko shaan ki smriti mein aur dilshikasta aatmaon ko umang-utsaah mein laao, sambandh-samparka se aatma ko apne shreshtha sang ka rang anubhav karaao to punya ka khaata jama hota jaayega।