गुरुवार 17 सितंबर 2026 की दैनिक मुरली

17-09-2026 praatahmurli om shanti "baapdaada"' madhuban

“meethe bachche - abhi is duniya ka hopeless case hai, sabhi mar jaayenge isliye isse mamatva mitaao, maamekam yaad karo''

prashn:- service ki uchhal na aane ka kaaran kya hai?

uttar:- 1- agar lakshan theek nahin hain, baap ko yaad nahin karte to service ki uchhal aa nahin sakti। koi na koi ulte karma hote rehte hain isliye service nahin kar sakte। 2- baap ka jo pahla direction hai - aap muye mar gai duniya ise amal mein nahin laate। buddhi deh aur deh ke sambandhon mein phansi hui hai to service kar nahin sakte।

geet:- om namo shivaaeh…

om shanti। ab yeh bhaktimaarga ka geet suna। shivaay namah kehte hain। shiv ka naam ghadi-ghadi lete hain। roz shiv ke mandir mein jaate hain aur jo tyohaar hain woh varsha-varsha manaate hain। purushottam maas bhi hota hai, purushottam varsha bhi hota hai। shivaay namah to roz kehte rehte hain। shiv ke pujaari bahut hain। rachayita hai shiv oonch te oonch bhagwan। kehte bhi hain - patit-paavan parampita paramatma shiv hai। roz pooja bhi karte hain। tum bachche jaante ho yeh sangamayug hai - purushottam banne ka yug। jaise jismaani padhaai se koi na koi oonch pad paate hain na। in lakshmi-naaraayan ne yeh pad kaise paaya, vishwa ke maalik kaise banen। yeh kisko bhi pata nahin। shivaay namah bhi kehte hain। tum maat-pita... roz mahima gaate hain parantu yeh nahin jaante ki woh kab aakar maat-pita bankar varsa dete hain। tumko maaloom hai ki duniya ke manushya to kuchh bhi nahin jaante hain। bhakti maarga mein kitne dhakke khaate hain। amarnaath par kitne jhunda ke jhunda jaate hain। kitne dhakke khaate hain। kisko aisa kaho to bigad pade। tum thode bachche ho jinko andar mein bahut khushi hai। likhte bhi rehte hain baba jabse aapko pahchaana hai, bas ab to hamaari khushi ka paaraavaar nahin raha hai। kuchh bhi takleeph aadi hoti hai, phir bhi khushi mein rehna chaahiye। ham baap ke bane hain, yeh kabhi bhoolna nahin chaahiye। tum bachche jabki jaante ho hamne shivbaaba ko paaya hai। to khushi ka paara chadha rehna chaahiye। maaya ghadi-ghadi bhula deti hai। bhal likhte hain hamko nishchay hai, baba ko ham jaante hain phir bhi chalte-chalte thande pad jaate hain। 6-8 maas, 2-3 varsha aate nahin to baba samajh jaate hain poora nishchaybuddhi nahin hai। poora nasha nahin chadha hai। aisa behad ka baap, jisse 21 janmon ka varsa milta hai। nishchay ho jaae to bahut khushi ka nasha rehna chaahiye। jaise kiske bachche ko raaja god mein lene chaahte hain। bachche ko maaloom pad jaata hai ki hamaare liye aisi baat-cheet ho rahi hai ki raaja chaahta hai is bachche ko ham vaaris banaayen। to bachche ko bahut khushi hogi na। main raaja ka bachcha banta hoon। jab gareeb ka bachcha saahookaar ki god lete hain to bahut khushi hoti hai na। jaan jaata hai ki mujhe phalaana adopt karte hain to gareebi ka gam bhool jaata hai। woh to hai phir bhi ek janma ki baat। yahaan bachchon ko khushi rehti hai 21 janma varsa lene ki। behad ke baap ko yaad karna hai aur phir doosron ko raasta bataana hai। shivbaaba patit-paavan aaya hua hai। samjhaate hain, tumhaara main baap hoon। aise koi manushya nahin kah sakte ki main tumhaara behad ka baap hoon। baap hi samjhaani dete hain main 5 hajaar varsha pahle aaya tha। tumko yahi akshar kaha tha ki maamekam yaad karo। mujh patit-paavan baap ko yaad karne se hi tum patit se paavan banenge aur koi bhi upaay nahin hai - patit se paavan banne ka। patit-paavan hai hi ek baap। geeta ka bhagwan ek patit-paavan punarjanma rahit hai। pahli-pahli baat yeh likhaao। bade-bade aadmiyon ki likhat dekhenge to samjhenge theek hai। koi saadhaaran aadmi ka dekhenge to kahenge brahmaakumaariyon ne inko jaadu laga diya hai tab likha hai, bade aadmi ke liye aisa nahin kahenge। tum kuchh bhi kehte ho to samajhte hain chhota mukh badi baaten banaati hain ki bhagwan aaya hua hai। aise tum bachchon ko sirf kehna nahin hai ki bhagwan aaya hua hai, isse to koi samjhenge nahin aur hi hansi karenge। yeh to samjhaana hai ki do baap hain। pahle se hi phat se seedha kehna nahin hai ki bhagwan aaya hua hai kyonki aajkal duniya mein bhi bhagwan kahlaane vaale bahut ho gaye hain। sab apne ko bhagwan ka avtaar samajhte hain to yukti se do baap ka raaz samjhaana chaahiye। ek hai had ka baap, doosra hai behad ka baap। baap ka naam hai shiv। woh sab aatmaon ka baap hai to zaroor bachchon ko varsa dete honge। shiv jayanti bhi manaate hain। vahi aakar svarga ki sthaapna karte hain, to zaroor narka ka vinaash hona hai। uski bhi nishaani - yeh mahaabhaarat ladaai hai। baaki sirf bhagwan aaya hai, yeh kahne se koi samjhenge nahin। dhindhora peette rehte hain। aisi-aisi ulti service karne se aur hi phir service mein dheelaapan aa jaata hai। ek taraph kehte bhagwan aaya hua hai, bhagwan padhaate hain phir jaakar shaadi karte hain। to log kahenge tumko phir kya hua। tum to kehte the ki bhagwan padhaate hain। kehte hain hamne jo suna tha so kah diya। anek prakaar ke vighna bhi padte hain apne bachchon se, jaise hindu dharma vaalon ne aapehi apne ko chamaat maari hai na। vaastav mein hain devi-devta dharma ke parantu kah dete ham hindu hain। apne ko chamaat maari hai na। abhi tum jaante ho ham hi poojya the to shreshtha karma, shreshtha dharma tha। aasuri mat par dharma bhrashta, karma bhrashta ban pade hain। ham hi apne dharma ki glaani shuru karte hain, aasuri maaya ki mat se isliye baba ne khud kaha hai - woh hai aasuri sampradaay। yeh hai daivi sampradaay, jinko main raajayog sikhlaata hoon। abhi hai kaliyug। jo yeh knowledge aakar sunte hain, woh asur se badal devta bante hain। yeh knowledge hai hi devta banne ke liye। 5 vikaaron par jeet paane se devta bante hain, baaki asuron aur devtaaon ki koi ladaai nahin lagi। yeh bhi bhool kar di hai phir dikhaate hain, jiski taraph saakshaat bhagwan hai unki vijay hui, usmein naam shreekrishna ka de diya hai। vaastav mein hai tumhaari maaya se yuddha।

baap bachchon ko kitni baaten baith samjhaate hain parantu tamopradhaan aise hain jo bilkul samajhte hi nahin। baap ko yaad nahin kar sakte। samajhte bhi hain hamaari aisi tamopradhaan buddhi hai jo yaad hi nahin thaharti, isliye ulta kaam karta rehta hoon। achhe-achhe bachche bhi yaad bilkul nahin karte। lakshan sudhaarte hi nahin, isliye service ki uchhal nahin aati hai। baap kehte hain - deh sahit deh ke jo bhi sambandh hain, unko maaro athva bhoolo। ab maaro akshar vaastav mein hai nahin। kehte hain aap muye mar gai duniya। yeh baap baith samjhaate hain। buddhi se bhool jaana hai jabki tum hamaare bane ho to in sabko bhoolo, ek baap ko yaad karo। jaise koi beemaari ka hopeless case ho jaata hai to phir usse mamatva mitaana hota hai। phir unko kehte hain raam-raam kaho, baap bhi kehte hain is duniya ka case bahut hopeless hai। yeh khatma honi hi hai, sab mar jaayenge, isliye inse mamatva mitaao। woh to raam-raam ki dhun lagaate hain। yahaan to ek ki baat nahin। saari duniya vinaash honi hai isliye tumko ek hi mantra deta hoon maamekam yaad karo। kitni samjhaani dete rehte hain, bhinna-bhinna prakaar se। abhi purushottam maas aaya to purushottam yug par bhi samjhaani dete rehte hain। samjhaane ki badi hoshiyaari chaahiye। dhaarna achhi chaahiye। koi paap karma nahin karna chaahiye। bigar chhutti koi cheez uthaana, khaana yeh bhi bahut gupta paap hai। kaayde bade kade hain, paap karte hain phir bhi batlaate nahin, to phir paap vriddhi ko paate jaate hain। yahaan to tum bachchon ko punya aatma banna hai। hamko punya aatma se sneh hai, paap aatma se virodh hai। bhakti maarga mein bhi jaante hain ki achha karma karne se achha phal milega isliye daan-punya aadi achhe karma karte hain na। yeh drama hai phir bhi kehte hain bhagwan achhe karmon ka phal achha deta hai। baap kehte hain - main sirf yeh dhandha thode hi baithkar karta hoon। yeh to saari drama mein noondh hai। drama anusaar baap ko zaroor aana hai।

baap kehte hain - mujhe aakar sabko raasta bataana hai। baaki ismen kripa aadi ki koi baat hi nahin hai। koi-koi likhte hain baba aapki kripa hogi to ham aapko kabhi nahin bhoolenge। baap kehte hain - ham kabhi kripa aadi nahin karte, yeh to bhakti maarga ki baaten hain। tumko apne par kripa karni hai। baap ko yaad karenge to vikarma vinaash honge। bhakti maarga ki baaten gyaan maarga mein hoti nahin। gyaan maarga hai hi padhaai। teacher koi par kripa thode hi karega। har ek ko padhna hai। baap shreemat dete hain, us par chalna chaahiye na। parantu apni mat par chalne kaaran kuchh bhi service nahin karte। bachchon ko bilkul punya aatma banna hai। jara bhi koi paap na ho। kai bachche apna paap bataayenge kabhi nahin। baap bhi kehte hain woh oonch pad kabhi nahin paayenge। gaaya hua hai chadhe to chaakhe... bachche jaante hain bahut oonch martaba hai। girte hain to koi kaam ke nahin rehte। ashuddha ahankaar hai pahla number, phir kaam, krodh, lobh bhi kam nahin। lobh, moh bhi satyaanaash kar dete hain। bachche aadi mein moh hoga to woh yaad aate rahenge। aatma to kehti hai mera to ek shivbaaba, doosra na koi aur koi bhi yaad na pade - aisa purushaartha karna hai। yeh sab to khatma hona hai। vinaash saamne khada hai, varsa to le nahin sakenge। inmen kya moh rakhna hai। aise-aise apne saath baaten karni hai। saari duniya ko buddhi se bhoolna hai। yeh to sab khatma hona hi hai। toofaan aise lagenge jo ekdam khatma ho jaayega। aag kahaan lagti hai aur hava zor se aati hai to jhat ekdam khalaas kar deti hai। aadha ghante mein 100-150 jhopdiyon ko khatma kar deti hai। tum jaante ki is bhambhor ko aag lagni hi hai, nahin to itne sab manushya kaise marenge। jo achhe bachche hain, lakshan bhi achhe hain to service bhi achhi karte hain। tum bachchon ko nasha rehna chaahiye। poora nasha to ant mein rahega, jab karmaateet avastha ho phir bhi purushaartha karte rehte hain। banaaras mein shiv ke mandir mein to bahut jaate hain kyonki woh hai oonch te oonch bhagwan। vahaan shiv ki bhakti bahut hai। baba to kehte rehte hain vahaan unko jaakar samjhaao। yeh shiv bhagwan in lakshmi-naaraayan ko yeh varsa dete hain। sangam par hi yeh varsa unse mila hua hai। yeh samjhaane se phir brahma-sarasvati ki bhi samjhaani aati hai। chitron par bada clear samjha sakte hain। inhon ko yeh raajya kaise mila। in lakshmi-naaraayan ke raajya mein bhakti maarga tha nahin। kahenge bhakti to anaadi hai hi। abhi tumko kitni knowledge mili hai to nasha chadhna chaahiye na। hamko bhagwan padha rahe hain, 21 janmon ka raajya-bhaagya dene ke liye। tum student ho na। jisko nishchay hoga - yeh brahmaakumaariyaan jis dvaara sunkar hamko nishchay bithaati hain woh khud kya hoga! aise baap se to pahle milen। jab tak poora nishchay nahin hoga tab tak badhega nahin। nishchay vaala hi jhat bhaagega। aise baap ke paas ham jaakar milenge, chhodenge nahin। bas baba ham to aapka ban gaya, ham jaayenge nahin। geet bhi hai na chaahe pyaar karo chaahe thukraao, yeh deevaana tera dar nahin chhodega। phir bhi bitha to nahin sakte। service par bhejna padta hai। grihastha vyavhaar mein rehte kamal phool samaan banna hai। aise likhkar bhi dete hain phir baahar jaane se maaya ki chakri mein aa jaate hain। maaya itni prabal hai। maaya ke bahut vighna padte hain। chhote se deeve ko maaya ke toofaan kitne aate hain। in geeton ka bhi saar baap aakar samjhaate hain। tumhaara purushottam yug chal raha hai। bhakton ka purushottam maas chala gaya। baap kehte hain - is sangamayug par hi main aata hoon, patiton ko paavan banaane। samjhaani kitni achhi hai।

achha - din-pratidin seva ki vriddhi ke liye nai-nai yuktiyaan nikalti rahengi। achhe-achhe chitra bante jaayenge। kehte hain na - der pade kaam durasta hote hain। taiyaar maal milta hai, jisse phat se koi samajh jaae। seedhi bahut achhi hai। is samay koi yeh nahin kah sakte ki ham paavan hain। paavan duniya satayug ko hi kaha jaata hai। paavan duniya ke maalik yeh lakshmi-naaraayan hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jara bhi koi bada athva sookshm paap na ho, iska bahut-bahut dhyaan rakhna hai। kabhi koi cheez chhipaakar nahin leni hai। lobh moh se bhi saavdhaan rehna hai।

2) ashuddha ahankaar jo satyaanaash karne vaala hai, use tyaag dena hai। ek baap ke sivaae doosra koi bhi yaad na pade, yahi purushaartha karna hai।

vardaan:- deh ke bhaan ko arpan kar samarpan hone vaale yogayukta, bandhanmukta bhav

jo deh-abhimaan ko arpan karta hai unka har karma darpan ban jaata hai। jaise koi cheez arpan ki jaati hai to woh arpan ki hui cheez apni nahin samjhi jaati hai। to deh ke bhaan ko bhi arpan karne se jab apnaapan mit jaata hai to lagaav bhi mit jaata hai। unhein hi sampoorn samarpan kaha jaata hai। aise samarpan hone vaale sada yogayukta aur bandhanmukta hote hain। unka har sankalp, har karma yuktiyukta hota hai।

slogan:- sarvashaktimaan ko saathi bana lo to saphalta aapke charnon mein aa jaayegi।

ye avyakt ishaare - ab apne daata swaroop ko pratyaksha karo

apne ko sadaiv daata athva mahaadaani samajhna hai। mahaagyaani banne ke baad mahaadaani ka kartavya chalta hai। mahaagyaani ki parakh mahaadaani banne se hoti hai। abhi aapki moorta mein aisi jhalak honi chaahiye jo koi bhi apna varsa lene se vanchit na rahe। aise apne ko daata ke bachche daata samajhna hai, dene vaalon mein jo phalak aur jhalak rehti hai, abhi un sanskaaron ko emerge karo।