मंगलवार 13 अक्टूबर 2026 की दैनिक मुरली

13-10-2026 praatahmurli om shanti "baapdaada"' madhuban

“meethe bachche - ab is mrityulok ka ant hai, amarlok ki sthaapna ho rahi hai, isliye tumhein mrityulok vaalon ko yaad nahin karna hai''

prashn:- baap apne gareeb bachchon ko kaun si smriti dilaate hain?

uttar:- bachche, jab tum viceless (pavitra) the to bahut sukhi the। tumhaare jaisa saahookaar doosra koi nahin tha, tum apaar sukhi the। dharti, aasmaan sab tumhaare haath mein tha। ab baap tumhein phir se saahookaar banaane aaye hain।

geet:- nayan heen ko raah dikhaao prabhu…

om shanti। meethe-meethe roohaani bachchon, aatmaon ne geet suna। kisne kaha? aatmaon ke roohaani baap ne। roohaani baap ko roohaani bachchon ne kaha - baba। unko eeshvar bhi kaha jaata, pita bhi kaha jaata। kaun sa pita? parampita। baap hain do। ek laukik doosra paarlaukik। laukik baap ke bachche paarlaukik baap ko pukaarte hain। he baba, baba ka naam? shiv। woh shiv niraakaari pooja jaata hai। unko kaha jaata hai supreme father। laukik baap ko supreme nahin kaha jaata। oonch te oonch sabhi aatmaon ka baap ek hi hai। sabhi jeev aatmaayen us baap ko yaad karti hain। aatmaayen yeh bhool gai hain ki hamaara baap kaun hai? pukaarte hain O god father, ham nayan heen ko nayan do to ham apne baap ko pahchaanen। bhakti maarga mein ham andhe ban thokren khaate rehte hain, ab in thokron se chhudaao। baap hi kalpa-kalpa aakar bhaarat ko heaven banaate hain। ab kaliyug hai, satayug aane vaala hai। kaliyug aur satayug ke beech ko sangam kaha jaata hai। yeh hai purushottam sangam। behad ka baap aakar jo bhrashtaachaari ban gaye hain, unhon ko shreshthaachaari, purushottam banaate hain। lakshmi-naaraayan purushottam the। lakshmi-naaraayan ki dynasty ka raajya tha। yeh baap aakar smriti dilaate hain। tum bhaaratvaasi aaj se 5 hajaar varsha pahle svargavaasi the, ab narkavaasi ho। aaj se 5 hajaar varsha pahle bhaarat heaven tha, bhaarat ki bahut mahima thi। sone heere ke mahal the। ab kuchh nahin hai। us samay aur koi dharma nahin tha, sirf sooryavanshi the। chandravanshi peechhe aate hain। baap samjhaate hain tum hi sooryavanshi the। ab tak lakshmi-naaraayan ke mandir banaate rehte hain। parantu lakshmi-naaraayan ka raajya kab tha? kaise raajya paaya? yeh kisko pata nahin, pooja karte hain parantu jaante nahin to blind faith hua na। shiv ki, lakshmi-naaraayan ki pooja karte hain, biography koi nahin jaante। bhaaratvaasi khud kehte hain ham patit hain। he patit-paavan baba aao, aakar hamko duhkhon se, raavan raajya se liberate karo। baap aakar sabko liberate karte hain। bachche jaante hain ki satayug mein ek hi raajya tha। kaangresi log athva baapu ji bhi yahi maangate the ki hamko phir se raamraajya chaahiye। ham svargavaasi banne chaahte hain। ab narkavaasiyon ka kya haal hai, dekh rahe ho? inko kaha jaata hai hell, devil world। yahi bhaarat deity world tha। ab devil world ban gaya hai।

baba samjhaate hain tumne 84 janma liye hain, na ki 84 laakh। yeh to shaastron mein gapode laga diye hain। aaj se 5 hajaar varsha pahle sadgati maarga tha। vahaan na bhakti, na duhkh ka naamnishaan tha, unko sukhdhaam kaha jaata hai। baap samjhaate hain tum asul mein shantidham ke rahne vaale ho। tum yahaan part bajaane aaye ho। punarjanma 84 hote hain, na ki 84 laakh। ab behad ka baap aaya hai, tum bachchon ko behad ka varsa dene। baap tum aatmaon se baat karte hain। aur satsangon mein manushya, manushya ko bhakti ki baaten sunaate hain। aadhaakalpa jab bhaarat svarga tha, ek bhi patit nahin tha। ab ek bhi paavan nahin hai। yeh hai patit duniya। baap samjhaate hain - geeta mein shreekrishna bhagvaanuvaach likh diya hai। shreekrishna bhagwan nahin hai, na ki usne geeta sunaai hai। yeh log apne dharma shaastra ko bhi nahin jaante। apne dharma ko hi bhool gaye hain। dharma mukhya hain 4, pahle aadi sanaatan devi-devta dharma sooryavanshi, peechhe chandravanshi, donon ko milaakar kehte hain devi-devta dharma। vahaan duhkh ka naam nahin tha। 21 janma tum sukhdhaam mein the। phir raavanraajya, bhaktimaarga shuru hota hai। shivbaaba kab aate hain? jab raat hoti hai। bhaaratvaasi ghor andhiyaare mein aa jaate hain tab baba aate hain। gudiyon ki pooja karte rehte hain। ek ki bhi biography nahin jaante। bhakti maarga mein anek dhakke khaate hain, teertho par jaao phera lagaao। koi praapti nahin hai। baap kehte hain - main aakar tumko brahma dvaara yathaartha gyaan sunaata hoon। pukaarte hain ki hamko sukhdhaam aur shantidham ki raah bataao।

baap kehte hain - aaj se 5 hajaar varsha pahle hamne tumhein bahut saahookaar banaaya tha। itna dhan diya phir kahaan ganvaaya? tum kitne saahookaar the। bhaarat kaun kahlaave। bhaarat hi sabse oonche se ooncha khanda tha। vaastav mein sabka yeh teertha hai kyonki patit-paavan baap ka birth place hai। jo bhi dharma vaale hain sabhi ki baap aakar sadgati karte hain। ab raavan ka raajya saari srishti mein hai sirf lanka mein nahin। jab sooryavanshi raajya tha tab yeh vikaar nahin the। bhaarat viceless tha, ab vicious hai। sab narkavaasi hain। satayug mein jo daivi sampradaay the, ve phir 84 janma bhog aasuri sampradaay bane hain phir daivi sampradaay banne hain। bhaarat bahut saahookaar tha। ab gareeb bana hai isliye bheekh maang rahe hain। baap tum gareeb bachchon ko smriti dilaate hain bachche, tum kitne sukhi the। tumhaare jaisa sukh kisko mil nahin sakta। dharti, aasmaan sab tumhaare haathon mein tha। shaastron mein kalpa ki aayu lambi bataakar sabhi ko kumbhakran ki aasuri neend mein sula diya hai। yeh bhaarat shivbaaba ka sthaapan kiya hua shivaalay tha। vahaan pavitrata thi, us nai duniya mein devi-devta raajya karte the। manushya to yeh bhi nahin jaante ki raadhe-krishna ka aapas mein kya sambandh hai। donon alag-alag raajdhaani ke the phir svayanvar ke baad lakshmi-naaraayan banen। yeh gyaan koi manushya maatra mein nahin hai। spiritual knowledge sirf ek baap hi dete hain। ab baap kehte hain - aatma-abhimaani bano। mujh apne parampita ko yaad karo। yaad se tamopradhaan se satopradhaan ban jaayenge। tum yahaan aate ho manushya se devta athva patit se paavan banne। ab yeh hai raavan raajya। bhakti mein raavan raajya shuru hota hai। sab bhakti karne vaale raavan ke panje mein hain। saari duniya 5 vikaaron roopi raavan ki kaid mein hai, shok vaatika mein hai। baap aakar sabko liberate kar guide ban saath le jaate hain। uske liye yeh mahaabhaarat ladaai hai, jo 5 hajaar varsha pahle lagi thi, ab baap phir se svarga bana rahe hain। aise nahin jinko dhan bahut hai, woh svarga mein hain। abhi hai hi narka। patit-paavan baap ko kaha jaata hai, na ki nadi ko। yeh sab hai bhakti maarga। yeh baaten baba hi aakar samjhaate hain। ab yeh to jaante ho ek hai laukik baap, doosra hai paarlaukik, teesra hai alaukik। ab paarlaukik baap shivbaaba brahma dvaara brahman dharma sthaapan karte hain। braahmanon ko devta banaane ke liye raajayog sikhlaate hain। aatma hi punarjanma leti hai। aatma hi kehti hai main ek shareer chhod doosra leti hoon। baap kehte hain - apne ko aatma samajh mujh baap ko yaad karo to tum paavan banenge। koi bhi dehdhaari ko yaad nahin karo। ab mrityulok ka ant hai, amarlok ki sthaapna ho rahi hai। baaki sab anek dharma khalaas ho jaayenge। satayug mein ek hi devi-devta dharma tha phir chandravanshi raam seeta treta mein the। tum bachchon ko saare chakra ki yaad dilaate hain। shantidham aur sukhdhaam ki sthaapna baap hi karte hain। manushya, manushya ko sadgati de nahin sakte। woh sab hai bhakti maarga ke guru।

abhi tum ho eeshvareey santaan। baba se raajya bhaagya le rahe ho। yeh raajdhaani sthaapan ho rahi hai। praja to bahut banni hai। koton mein koi raaja bante hain। satayug ko kaha jaata hai phoolon ka bageecha। ab hai kaanton ka jangal। raavan raajya badal raha hai। vinaash hona hai। yeh gyaan ab tumko mil raha hai। lakshmi-naaraayan ko yeh gyaan nahin rehta। praayah lop ho jaata hai। bhakti maarga mein baap ko koi bhi yathaartha nahin jaante। baap hai rachayita। brahma vishnu shankar bhi rachna hai। sarvavyaapi kahne se varse ka hak khatma ho jaata hai। baba aakar sabko varsa dete hain। 84 janma vahi lete hain jo pahle-pahle satayug mein aate hain। Christian log karke 40 janma lete honge। ek bhagwan ko dhoondhane ke liye kitne dhakke khaate hain। ab tum dhakke nahi khaayenge। ek baap ko yaad karo to tamopradhaan se satopradhaan ban jaayenge। yeh hai yaatra। yeh hai god fatherly university। tumhaari aatma padhti hai। saadhu-santa kah dete - aatma nirlep hai। lekin aatma hi karmon anusaar doosra janma leti hai। aatma hi achha va bura karma karti hai। is samay (kaliyug mein) tumhaare karma vikarma hote hain, satayug mein tumhaare karma, akarma hote hain। vahaan vikarma hota nahin। woh hai punya aatmaon ki duniya। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) ek baap se behad ka varsa lena hai। shreshtha karma karne hain। jab baap mila hai to kisi bhi prakaar ke dhakke nahin khaane hain।

2) baap ne jo smriti dilaai hai, use smriti mein rakh apaar khushi mein rehna hai। koi bhi dehdhaari ko yaad nahin karna hai।

vardaan:- sneh ke peechhe sarva kamjoriyon ko kurbaan karne vaale samarthi swaroop bhav

sneh ki nishaani hai kurbaani। sneh ke peechhe kurbaan karne mein koi mushkil va asambhav baat bhi sambhav aur sahaj anubhav hoti hai। to samarthi swaroop ke vardaan dvaara sarva kamjoriyon ko majboori se nahin dil se kurbaan karo kyonki satya baap ke paas satya hi sveekaar hota hai। to sirf baap ke sneh ke geet nahin gaao lekin svayan baap samaan avyakt sthiti swaroop bano jo sab aapke geet gaayen।

slogan:- sankalp va svapna mein bhi ek dilaaraam ki yaad rahe tab kahenge sachche tapasvi।

maateshvari ji ke anmol mahaavaakya - manushya ki em object kya hai? use praapta karne ka yathaartha tareeka

harek manushya ko yeh sochna zaroor hai, apni achhi jeevan banaane ke liye kya uchit hai? manushya ki life kislie hai, usmein kya karna hai? ab apni dil se poochhen ki vo meri jeevan mein palta (parivartan) ho raha hai? manushya jeevan mein pahle to knowledge chaahiye phir is jeevan ki em object kya hai? yeh to zaroor maanenge ki is jeevan ko sarvada sukh aur shanti chaahiye। kya abhi vo mil rahi hai? is ghor kaliyug mein to duhkh ashaanti ke sivaae aur kuchh hai hi nahin, ab sochna hai sukh shanti milegi kaise? sukh aur shanti yeh do shabd jo nikle hain, vo zaroor isi duniya mein kab hue honge, tabhi to in cheezon ki maangani karte hain। agar koi manushya aise kahe ki hamne aisi duniya dekhi hi nahin to phir us duniya ko tum kaise maante ho? is par samjhaaya jaata hai ki yeh din aur raat jo do shabd hain, to jarur raat aur din chalta hoga। aise koi nahin kah sakte ki hamne dekhi hi raat hai to din ko maanoon kaise? lekin jab do naam hain, to unka part bhi hoga। vaise hamne bhi suna hai, ki is kaliyug se koi oonchi stage bhi thi jisko satayug kaha jaata hai! agar aisa hi samay chalta rahe to phir us samay ko satayug naam kyon diya gaya! to yeh srishti apni stage badalti rehti hai, jaise kishor, baal, yuva, vriddha... badalte rehte hain, vaise srishti bhi badalti rehti hai। aaj ki jeevan aur us jeevan mein kitna pharka hai। to us shreshtha jeevan ko banaane ka prayatna karna hai।

niraakaari duniya, aakaari duniya aur saakaari duniya ka vistaar

is poore brahmaanda ke andar teen duniyaayen hain - ek hai niraakaari duniya, doosri hai aakaari, teesri hai saakaari। ab yeh to jaan liya ki niraakaar srishti mein to aatmaayen nivaas karti hain aur saakaar srishti mein saakaar manushya sampradaay nivaas karte hain। baaki hai aakaari sookshm srishti, ab vichaar chalta hai kya yeh aakaari srishti sada hi hai ya kuchh samay uska part chalta hai? duniyaavi manushya to samajhte hain sookshm duniya koi oopar hai, vahaan pharishte rehte hain, usko hi svarga kehte hain। vahaan jaakar sukh bhogenge lekin ab yeh to spashta hai ki svarga aur narka is srishti par hi hota hai। baaki yeh jo sookshm aakaari srishti hai, jahaan shuddh aatmaon ka saakshaatkaar hota hai, vo to dvaapar se lekar shuru hue hain। jab bhaktimaarga shuru hota hai to isse siddha hai niraakaar srishti aur saakaar srishti sada hai hi hai। baaki sookshm duniya sada to nahin kahenge, usmein bhi khaas brahma, vishnu, shankar ka saakshaatkaar isi samay hamko hota hai kyonki isi samay paramatma teen kartavya karne ke liye teen roop rachte hain। achha, om shanti।

ye avyakt ishaare - paropkaar ki bhaavna se sampanna ban apkaari par bhi upkaar karo

baapdaada sada shreemat dete hain ki man mein har aatma ke prati shubh bhaavna aur shubh kaamna rakho - apkaari par bhi upkaar ki vritti rakho, sankalp sada sarva ke prati shreshtha ho, nihsvaartha ho, sada daataapan ki bhaavna ho। sada sva parivartan athva sva ke shreshtha karmon dvaara auron ko shreshtha karma ki prerna dene vaale karma hon, tab kahenge paropkaari।