गुरुवार 15 अक्टूबर 2026 की दैनिक मुरली

15-10-2026 praatahmurli om shanti "baapdaada"' madhuban

“meethe bachche - aatma aur shareer jo patit aur kaale ban gaye hain, baap ki yaad se inhen paavan banaao kyonki ab paavan duniya mein chalna hai''

prashn:- bhagwan kin bachchon ko milta hai, baap ne kaun sa hisaab batlaaya hai?

uttar:- jinhonne shuru se bhakti ki hai unhein hi bhagwan milta hai। baba ne yeh hisaab batlaaya hai ki sabse pahle tum bhakti karte ho isliye tumhein hi pahle-pahle bhagwan dvaara gyaan milta hai, jisse phir tum nai duniya mein raajya karte ho। baap kehte hain tumne aadhaakalpa mujhe yaad kiya hai ab main aaya hoon, tumhein bhakti ka phal dene।

geet:- marna teri gali mein…

om shanti। bachchon ne geet suna। jab koi marte hain to baap ke paas janma lete hain। jaante ho ham aatmaayen hain। woh ho gai shareer ki baat। ek shareer chhod phir doosre baap ke paas jaate hain। tumne kitne saakaari baap kiye hain। asul mein ho niraakaari baap ke bachche। tum aatma parampita paramatma ke bachche ho, rahne vaale bhi vahaan ke ho, jisko nirvaandhaam va shantidham kaha jaata hai। baap bhi vahaan rehte hain। yahaan tum aakar laukik baap ke bachche bante ho, to phir us baap ko bhool jaate ho। satayug mein tum sukhi ban jaate ho, to us paarlaukik baap ko bhool jaate ho। sukh mein us baap ka simran nahin karte ho। duhkh mein yaad karte ho aur aatma yaad karti hai। jab laukik baap ko yaad karti hai to buddhi shareer taraph rehti hai। us baba ko yaad karenge to kahenge O baba, hain donon baba। right akshar baap hi hai। woh bhi father, yeh bhi father। aatma roohaani baap ko yaad karti hai to buddhi vahaan chali jaati hai। yeh baap baith bachchon ko samjhaate hain। abhi tum jaante ho baba aaya hua hai, hamko apna banaaya hai। baap kehte hain - pahle-pahle hamne tumko svarga mein bheja। tum bahut saahookaar the phir 84 janma le drama plan anusaar abhi tum duhkhi ho pade ho। draamaanusaar yeh puraani duniya khatma honi hai। tumhaari aatma aur yeh shareer roopi vastra satopradhaan the phir golden ej se aatma silver ej mein aai to shareer bhi silver mein aaya phir copper ej mein aaye। abhi to tumhaari aatma bilkul hi patit ho gai hai, to shareer bhi patit hai। jaise 14 carat ka sona koi pasanda nahin karte hain, kaala pad jaata hai। tum bhi abhi kaale iron aged ban gaye ho। ab aatma aur shareer jo aise kaale ban gaye hain to phir pavitra kaise banen। aatma pavitra banen to shareer bhi pavitra mile। woh kaise hoga? kya ganga snaan karne se? nahin, pukaarte hi hain - he patit-paavan aao। yeh aatma kehti hai to buddhi paarlaukik baap taraph chali jaati hai। he baba, dekho baba akshar hi kitna meetha hai। bhaarat mein hi baba-baba kehte hain। abhi tum aatma-abhimaani ban baba ke bane ho। baba kehte hain mainne tumko svarga mein bheja tha, naya shareer dhaaran kiya tha। ab tum kya ban gaye ho। yeh baaten hamesha andar rahni chaahiye। baba ko hi yaad karna chaahiye। yaad sab karte hain na - he baba, ham aatmaayen patit ban gai hain, ab aao, aakar paavan banaao। drama mein yeh bhi part hai, tab to bulaate hain। drama plan anusaar aayenge bhi tab jab puraani duniya se nai banti hai। to zaroor sangam par hi aayenge। tum bachchon ko nishchay hai - beloved most baba hai। kehte bhi hain sweet, sweetest... ab sweet kaun hai? laukik sambandh mein pahle father hai, jo janma dete hain। phir hai teacher। teacher se padhkar tum martaba paate ho। knowledge is source oph income kaha jaata hai। gyaan hai knowledge, yog hai yaad। to behad ka kisko pata nahin hai। chitron mein clear dikhaaya bhi hai, brahma dvaara sthaapna shiv-baba karaate hain। shreekrishna kaise raajayog sikhaayega। raajayog sikhlaate hi hain satayug ke liye। to zaroor sangam par baap ne sikhaaya hoga। satayug ki sthaapna karne vaala hai baba। brahma dvaara karaate hain, karnakraavanhaar hai na। vo log to trimoorti brahma kah dete hain। parantu oonch te oonch shiv hai na। woh saakaar hai, woh niraakaar hai। srishti bhi yahi hai। is srishti ka hi chakra phirta hai, repeat hota rehta hai। sookshm vatan ki srishti ka chakra nahin gaaya jaata hai। world ki history-geography repeat hoti hai। gaate bhi hain satayug, treta, dvaapar, kaliyug। beech mein zaroor sangamayug chaahiye। nahin to kaliyug ko satayug kaun banaaye! narkavaasiyon ko svargavaasi banaane baap sangam par hi aate hain। jitni puraani duniya utna duhkh jaasti। aatma jitna tamopradhaan banti jaati hai, utna duhkhi hoti hai। devtaayen hain satopradhaan। yeh to highest authority god fatherly government hai। saath mein dharmaraaz bhi hai। baap kehte hain - tum shivaalay mein rahne vaale the, ab hai veshyaalay। tum paavan the ab patit bane ho to kehte ho ham to paapi hain। aatma kehti hai mujh nirgun haare mein koi gun naahi। koi bhi devta ke mandir mein jaayenge to unke aage aise kahenge। kehna chaahiye baap ke aage। usko chhod brothers ko kahne lagte hain, yeh devtaayen brothers thahre na। brothers se to kuchh milna nahin hai। bhaaiyon ki pooja karte-karte neeche girte aaye hain। ab tum bachche jaante ho - baap aaya hua hai, usse hamko varsa milta hai। baaki manushya to baap ko jaante hi nahin। sarvavyaapi kah dete hain। koi phir kehte akhanda jyoti tatva hai। koi kehte woh naamroop se nyaara hai। are tum kehte ho akhanda jyoti swaroop hai, phir naam roop se nyaara kaise kehte ho। baap ko na jaanne ke kaaran hi patit ban pade hain। tamopradhaan bhi banna hi hai। phir jab baap aaye tab sabko paavan banaaye। aatmaayen niraakaari duniya mein sab baap ke saath rehti hain। phir yahaan aakar sato rajo tamo ka part bajaati hain। aatma hi baap ko yaad karti hai। baap aate bhi hain, kehte hain brahma tan ka aadhaar leta hoon, yeh hai bhaagyashaali rath। bigar aatma rath thode hi hota hai। kehte hain bhaageerath ne ganga laai। ab yeh baat to ho nahin sakti। parantu kuchh bhi samajhte nahin ki ham kehte kya hain!

abhi tum bachchon ko samjhaaya hai - yeh hai gyaan varsha। isse kya hota hai? patit se paavan bante hain। ganga jamuna to satayug mein bhi hoti hain। kehte hain shreekrishna jamuna ke kanthe par khelpaal karte hain। aisi koi baaten hain nahin। woh to satayug ka prince hai, uski bahut sambhaal se paalna hoti hai kyonki phool hai na। phool kitne achhe sundar hote hain। phool se sabhi aakar khushbu lete hain। kaanton se thode hi khushbu lenge। abhi to hai hi kaanton ki duniya। jangal ko baap aakar garden oph flowers banaate hain isliye unka naam babulnaath bhi rakh diya hai। kaanton se phool banaate hain isliye mahima gaate hain kaanton ko phool banaane vaala baba। ab tum bachchon ka baap ke saath kitna lav hona chaahiye। abhi tum jaante ho ham behad ke baap ke bane hain। abhi tumhaara sambandh unse bhi hai to laukik se bhi hai। paarlaukik baap ko yaad karne se tum paavan banenge। aatma jaanti hai, woh hamaara laukik baap aur yeh paarlaukik baap hai। bhakti maarga mein bhi aatma jaanti hai, woh hamaara laukik baap aur yeh god father। avinaashi baap ko yaad karte hain। woh baap kab aakar heaven sthaapan karte hain, yeh kisko pata nahin hai। baap aate hi hain patiton ko paavan banaane। to zaroor sangam par aayenge। shaastron mein to kalpa ki aayu laakhon varsha likhkar manushyon ko bilkul ghor andhiyaare mein daal diya hai। kehte hain jo bahut bhakti karte hain unhein bhagwan milta hai। to sabse jaasti bhakti karne vaale ko zaroor pahle milna chaahiye। baap ne hisaab bhi batlaaya hai। sabse pahle bhakti tum karte ho tumko hi pahle-pahle bhagwan dvaara gyaan milna chaahiye, jo phir tum hi nai duniya mein raajya karo। behad ka baap tum bachchon ko gyaan de rahe hain, ismen takleeph ki koi baat nahin hai। baap kehte hain tumne aadhaakalpa yaad kiya hai। sukh mein to koi yaad karte hi nahin। ant mein jab duhkhi ho jaate hain tab ham aakar sukhi banaate hain। abhi tum bahut bade aadmi bante ho। chief minister, prime minister aadi ke bangale kitne first class hote hain। saara furniture aisa first-class hoga। tum to kitne bade aadmi (devta) bante ho। daivi gun vaale devta svarga ke maalik bante ho। vahaan tumhaare liye mahal bhi heeron javaahron ke hote hain। vahaan tumhaara furniture sone jadit ka first class hoga।

yeh hai roodra gyaan yagya। shiv ko rood bhi kehte hain। jab bhakti poori hoti hai to bhagwan rood yagya rachte hain। satayug mein yagya athva bhakti ki baat hi nahin। is samay hi baap yeh avinaashi roodra gyaan yagya rachte hain, jiska phir baad mein gaayan chalta hai। bhakti to sadaiv nahin chalti rahegi। bhakti aur gyaan, bhakti hai raat, gyaan hai din। baap aakar din banaate hain, to bachchon ka bhi baap ke saath kitna lav hona chaahiye। baap hamko vishwa ka maalik banaate hain। most beloved baba hai na। unse jyaada pyaari vastu koi ho na sake। aadhaakalpa se yaad karte aaye hain। baba aakar hamaare duhkh haro। ab baap aaye hain, samjhaate hain bachche, tumhein apne grihastha vyavhaar mein rehna hi hai। yahaan baba ke paas kahaan tak baithenge। saath mein to paramdham mein hi rah sakte। yahaan to nahin rah sakte। yahaan to knowledge padhne ki hai। knowledge padhne vaale thode hote hain। laaud speaker par kabhi padhaai hoti hai kya? teacher savaal kaise poochhenge? laaud speaker par respond kaise de sakenge? isliye thode-thode student ko padhaate hain। college to bahut hote hain phir sabke imtahaan hote hain। result nikalti hai। yahaan to ek baap hi padhaate hain। yeh bhi samjhaana chaahiye ki do baap hain - laukik aur paarlaukik। duhkh mein simran us paarlaukik baap ka karte hain। ab woh baap aaya hua hai। mahaabhaarat ladaai bhi saamne khadi hai। woh samajhte hain mahaabhaarat ladaai mein shreekrishna aaya, yeh to ho na sake। parantu woh hai niraakaar, woh hai saakaar। niraakaar baap sabhi aatmaon ka baap hai। hain donon most beloved। shreekrishna bhi vishwa ka maalik hai na। abhi tum judge kar sakte ho ki jaasti pyaara kaun? shivbaaba hi aisa laayak banaate hain na। shreekrishna kya karte hain? baap hi to unko aisa banaate hain na। to gaayan bhi jaasti us baap ka hona chaahiye na। baap ne samjhaaya hai - tum sab paarvatiyaan ho। yeh shiv amarnaath tumko katha suna rahe hain। tum hi sab arjun ho, tum hi sab dropdiyaan ho। is vicious duniya ko raavan raajya kaha jaata hai। woh hai viceless world। vikaar ki baat nahin। niraakaar baap vikaari duniya rachenge kya? vikaar mein hi duhkh hai। sannyaasiyon ka hai hi hathayog, nivriti maarga। karma sannyaas to kabhi hota hi nahin। woh tab ho jab aatma shareer se alag ho jaae। garbha jel mein phir karmon ka hisaab shuru ho jaata hai। baaki karma sannyaas kehna wrong hai, hathayog aadi bahut seekhte hain, guphaaon mein jaakar baithte hain। aag se bhi chale jaate hain। riddhi siddhi bhi bahut hai। jaadoogri se bahut cheezen bhi nikaalte hain। bhagwan ko bhi jaadoogar, ratnaagar, saudaagar kehte hain। lekin unse koi ko gati sadgati to nahin mil sakti। woh to ek hi sachcha satguru aakar sabki gati sadgati karte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kaanton se phool banaane vaala most beloved ek baap hai, use bahut lav se yaad karna hai। khushboodaar paavan phool ban sabko sukh dena hai।

2) yeh knowledge (padhaai) source oph income hai, isse 21 janma ke liye tum bahut bade aadmi bante ho isliye ise achhi reeti padhna aur padhaana hai। aatma-abhimaani banna hai।

vardaan:- jimmevaari sambhaalte hue aakaari aur niraakaari sthiti ke abhyaas dvaara saakshaatkaarmoorta bhav

jaise saakaar roop mein itni badi jimmevaari hote hue bhi aakaari aur niraakaari sthiti ka anubhav karaate rahe aise follow father karo। saakaar roop mein pharishte pan ki anubhooti karaao। koi kitna bhi ashaanta va bechain ghabraaya hua aapke saamne aaye lekin aapki ek drishti, vritti aur smriti ki shakti unko bilkul shant kar de। vyakta bhaav mein aaye aur avyakt sthiti ka anubhav kare tab kahenge saakshaatkaarmoorta।

slogan:- jo sachche merciful hain unhein deh va deh-abhimaan ki aakarshan nahin ho sakti।

ye avyakt ishaare - paropkaar ki bhaavna se sampanna ban apkaari par bhi upkaar karo

gyaani tu aatma sadaiv har ek ke prati master sneh ka saagar hote hain। bina sneh ke uske paas aur kuchh hai hi nahin। koi bhi aayega to use sneh hi denge। aajkal sampatti se bhi jyaada sneh ki aavashyakta hai। sneh ki shakti se dushman ko bhi mitra bana sakte ho। apkaariyon par bhi upkaar kar sakte ho।