बुधवार 28 अक्टूबर 2026 की दैनिक मुरली

28-10-2026 praatahmurli om shanti "baapdaada"' madhuban

“meethe bachche - baba kitni door se tumhein padhaane aate hain, padhaai ki fees bhi nahin lete to kitna pyaar se padhna chaahiye''

prashn:- roohaani government ne saari duniya ke liye yeh free school khola hai - kyon?

uttar:- kyonki sabhi orphan, nidhanke ban gaye hain। baap aise gareeb bachchon se fees kya lenge। is antim janma mein baap aisi padhaai padhaate hain jisse tum vishwa ka maalik ban jaate ho। jo naye-naye bachche padhne ke liye aate hain, unhein bhi koi ghaata nahin hota। bhal pichhaadi mein aaye hain lekin thodi mehnat kar puraanon se bhi aage ja sakte hain।

geet:- jaag sajniyaan jaag…

om shanti। meethe-meethe roohaani bachchon ne geet suna। roohaani baap ne kaha, yahaan tum bachchon ko aatma-abhimaani ho baithna hota hai। parampita paramatma aur bachche abhi aakar mile hain। isko kaha jaata hai aatmaon aur parampita paramatma ka is srishti par mela। yeh mela ek hi baar hota hai। aadhaakalpa satayug treta mein koi bulaate hi nahin। tum bachche sukhi rehte ho, jo sukh tum aatmaayen abhi pa rahi ho। tum pahle satopradhaan the, abhi tamopradhaan patit ban pade ho phir baap paavan banaate hain। jab pujaari bante ho to duhkhi hote ho। 5 vikaaron ke kaaran hi duhkh hota hai। jitna-jitna seedhi utarte jaate ho utna duhkhi hote jaate ho। abhi tum bachche jaante ho duhkh ke pahaad girne hain। is puraani duniya ka ab vinaash hona hai। tumhaari buddhi jaanti hai - baba hai niraakaar, woh teacher bankar ham shaaligraamon ko padhaate hain। kehte hain bachchon, ham phir se tumko vishwa ka maalik banaane aaya hoon। 5 hajaar varsha pahle bhi tum svarga ke maalik the, yaad hai na। sangam par hi tumko banaaya tha। abhi phir tumko manushya se devta, vaikuntha svarga ka maalik banaane aaya hoon। tumko yeh varsa diya tha phir tumko 84 janma lene pade। abhi tumhaare 84 janma poore hue hain। abhi main aaya hoon, phir tumko pahle number janma se shuru karna hai। main tumhaara baap tumko padhaata bhi hoon। ab baap padhaane ki fee bachchon se lega? bachchon se fee kaise lenge! ek paai bhi fee nahin leta hoon। kitna door paramdham se aata hoon tumko padhaane। yeh naukri karne roz aata hoon। koi ki naukri door kahaan hoti hai to roz aana-jaana hota hai na। tum jaante ho baba gyaan ka saagar hai, jo hamko srishti ke aadi madhya ant ka gyaan dete hain। bhagvaanuvaach - main niraakaar paramatma hoon, na ki shreekrishna। tum jis shreekrishna ko bhagwan samajhte ho, woh bhagwan ho na sake। woh to poore 84 janma lete hain। bhagwan ko apna shareer nahin hai। jaise tum aatma ho woh bhi aatma hai। parantu sirf aatma kahne se to sabke saath mil jaayenge isliye mujhe param aatma kehte hain। drama plan anusaar mujh aatma ka naam shiv hai। main hoon niraakaar। mujhe bulaate hi hain - shivbaaba। asul mera naam ek hi hai। baaki bhinna-bhinna naam rakh diye hain। mera naam koi roodra hai nahin। na shreekrishna ne koi yagya racha hai। yeh sab hai jhooth। main hi aakar tumko sach batlaata hoon। tumko sach-sach nar se naaraayan banaane main aaya hoon। mera ghar bahut door hai। yahaan aakar is shareer dvaara tumko padhaata hoon। saara din ismen baithta nahin hoon। chakra lagaata rehta hoon। meri glaani karne ke kaaran tum bahut duhkhi, mahaan patit ban gaye ho। brahma ko bhi koi aadi dev kehte, koi Adam kehte, koi mahaaveer kehte, tum prajaapita kehte ho। tumne mujhe aadhaakalpa yaad kiya hai, isliye mujhe is paraaye desh mein aana pada hai। sab patit duhkhi hain। orphans hain। dhani-dhori hai nahin। orphan ko padhaane ke liye government fee nahin leti hai। yeh to bahut badi roohaani government hai। behad ke baap ko koi jaante nahin hain। kitne jap-tap, daan-punya aadi karte hain। poochha jaata hai yeh kyon karte ho? to kahenge isse bhagwan ke paas pahunch jaayenge। koi jap-tap karne se pahunchega, koi shaastra padhne se। baap kehte hain - aise to hai nahin। bhakti karte-karte to tum aur hi patit ban gaye ho। pankh toot gaye hain। tum ud nahin sakte ho, jab tak tumhaare mein gyaan-ghrit na pade। ghrit athva petrol khatma ho jaane se jyot bujh gai hai। phir main aakar bharta hoon।

tum jaante ho - baba aaya hua hai। yahaan tum khushi mein rehte ho। ghar mein jaane se tum bhool jaate ho। tumse main is padhaai ki fee nahin leta hoon। tum kahenge yeh chaaval mutthi dete hain। yeh chaaval mutthi to tum bhakti maarga mein dete aaye ho, jiska return phir doosre janma mein milta hai। abhi to tum jaante ho - baap sammukh baithe hain, free padhaate hain kyonki jaante hain inhon ke paas rakha hi kya hai। to baap thode hi tumse kuchh lenge। us padhaai mein to kitna kharcha karna padta hai। kitne imtahaan paas karne padte hain। main to ek hi padhaai padhaata hoon। school mein jo aate jaate hain, unko add karta jaata hoon। haan jo let aate hain, unko thodi mehnat jaasti karni padti hai। unke badle mein phir deri se aane vaalon ko achhi points milti hain। jo jaldi-jaldi padhte unko kuchh ghaata nahin hai। nai-nai achhi points milne se puraanon se bhi teekhe jaate hain। baap kehte hain - shuru mein jo aaye woh kitne bhaaganti ho gaye। achha hua jo tum deri se aaye so phir tumko guhya te guhya points milti hain। baap kehte hain - jismaani padhaai bhi padho। shareer nirvaah arth dhandha dhori bhal karo sirf mujhe yaad karo aur chakra ko yaad karo। yeh bhoolna nahin chaahiye। yeh to samajhte ho na ki ab hamaare 84 janmon ka ant hai।

baap samjhaate hain mujhe yaad karo to tum tamopradhaan se satopradhaan ban jaayenge। yaad to tum baap ko bhi karte ho, pati ko bhi karte ho। ab main tumhaara patiyon ka pati, baapon ka baap hoon, teacher bhi hoon। main tumhaara sab kuchh hoon। sukh dene vaala hoon। woh patit sambandhi aadi to tumko duhkh hi denge। satayug mein koi kisko duhkh nahin dete। ab main aaya hoon satayug ka raajya-bhaagya dene। tum jaante ho is sangam par hi baap se ham varsa lete hain। ab jitna tum padhenge। padhaai bhi bahut sahaj hai। yeh hai hi sahaj gyaan, sahaj yaad। maut bhi saamne khada hai। main aaya hoon tum sabko le jaane isliye mujhe kaalon ka kaal bhi kehte hain। yeh bhi kehte hain ki inko kaal kha gaya। kaal shareer ko khaata hai, aatma ko to kha na sake। aatma to ek shareer chhod doosra jaakar leti hai। part bajaati hai। abhi tum jaante ho ek hi dhak se yeh sab khalaas ho jaayega, maut aisa hona hai jo koi kiske liye royega nahin। sabhi ko vaapis jaana hi hai। rote tab hain jabki punarjanma phir phir duhkh ki duniya mein hi lete hain। tum baap ko bulaate bhi isliye hi ho ki baba hamko apne saath le jaao। to ab baba aaya hua hai, jo bhi manushya maatra hain sabko le jaate hain। vinaash hoga to sab marenge। rahega koi nahin। government apna plan bana rahi hai। manushya srishti to badhti hi jaati hai। chhoti-chhoti taal taaliyon mein bhi kitne patte nikal aate hain। jhaad to badhega hi। parantu unki aayu bhi zaroor hai। kalpa vriksha ki aayu koi laakhon varsha thode hi ho sakti hai। abhi baap tumko padha rahe hain, poojya devi-devta banaane ke liye। pahle-pahle baap tumko hi milta hai aur dharma vaale to aate hi pichhaadi mein hain। satayug mein tum aate ho। padhaata bhi tumko hoon। sirf kehta hoon paavan duniya mein chalna hai to vikaar mein mat jaao। phir bhi tum maante kyon nahin ho, vish bigar tum rah nahin sakte ho? meri mat par nahin chalenge to oonch pad bhi nahin paayenge। tumhaari aash hi thi krishnapuri mein jaane ki। to shreekrishna ki raajdhaani mein jaayenge va praja mein? shreekrishna ke saath khel-paal prince-princess hi karenge। praja thode hi karegi। yeh mama baba bhi padh rahe hain। tum jaante ho yeh raadhe-krishna phir svayanvar ke baad lakshmi-naaraayan banenge। raajaai vaalon ki hi maala banti hai na। 8 daane mein aao, achha 8 mein nahin to 108 mein to aao। kam se kam 16108 mein to aao। yeh hai hi raajayog। baap ki shreemat par chalna chaahiye। ghar ke bhaatiyon ko bhi samjhaao। baap tumko samjhaate hain, auron ko samjhaane ke liye। puraani duniya ka vinaash hona hi hai। mahaabhaarat ki ladaai bhi prasiddha hai jabki bhagwan aaya tha। bhagwan ne hi aakar raajayog sikhlaaya tha, svarga ki sthaapna aur narka ka vinaash hua, yeh samay vahi hai। phir raajdhaani sthaapan ho jaayegi। satayug mein doosra dharma hota hi nahin। bhaarat kitna sirtaaj tha, kitna saahookaar tha, Christian log sab yahaan se hi saahookaar hue hain। somnaath ke mandir se bhi kitna maal le gaye, oont bharkar। yeh to ek mandir ki baat hai। bhaarat mein bahut mandir the। baap saare jhaad ka raaz samjhaate hain। main beej oopar mein hoon। yeh ulta jhaad hai na। knowledgeful main hoon। tum mujhe pukaarte hi ho patit-paavan aao। phir bhi kah dete naam roop se nyaara hai। raavan ne sabko ekdam besmajh bana diya hai। ab tumko smriti aai hai, hamaara baap kaun hai। yeh chakra kaise phirta hai। sabki samajh to ek nahin hoti। ek ki samajh na mile doosre se। ek ke features na mile doosre se। to ab tum bachchon ko baap ka banna chaahiye na। woh baap bhi hai, teacher bhi to satguru bhi hai। tum jaante ho yeh fee kuchh lete nahin hain। bigar kaudi kharcha tumko 21 janmon ke liye raajaai mil jaati hai। tum bhakti maarga mein eeshvar arth kuchh dete the to doosre janma mein tumko milta tha। abhi to main direct aakar bhaarat ko svarga banaata hoon। ismen jo kuchh kharcha lagta hai, woh bachchon ka hi lagta hai। bachchon ko hi kahenge kharcha karna hai। is ek brahma ko achhi tarah pakda kharcha karne ke liye। inmen pravesh kar inse sab kuchh karaaya। yeh to jhat svaaha ho gaya। sab kuchh jo inke paas tha, sab de diya। baba bole, beggar ban jaao to phir aisa prince banaaoonga, saakshaatkaar kara diya। khyaal aaya - ab yeh kya karenge। vinaash hona hi hai। baba ne kaha bandar muaaphik mutthi banda nahin karo, khol do। jhat khol di। nahin to itne bachchon ka kharcha kaise chalta। bachchu baadshaah, peeru vajeer yeh ho gaya। ek ko hi paise ke liye pakad liya। tum bachchon ki bhatthi banni thi। school bhi bane the। abhi tum hoshiyaar ho phir auron ko bhi padhaate ho। tum kitnon ka kalyaan karte ho। baap hai hi kalyaankaari, sabko narka se nikaal svarga mein le jaate hain।

ab jitna purushaartha karenge utna oonch pad paayenge। praja ke liye bhi pradarshaniyon aadi ki yuktiyaan aur bhi nikalti rahengi। dher praja banti jaayegi। raaja-raani to thode hote hain। praja to karodon ke andaaj mein hoti hai na। king queen to ek hai। vahaan ladaai jhagda aadi hota nahin। bachche jaante hain - ab to maut saamne khada hai। jitna yog mein rahenge utna paap aatma se punya aatma banenge aur koi upaay hai nahin। sapoot bachche maa-baap ko follow karte hain। baap paavan bane, bachcha na bane to woh kapoot bachcha thahra na। ismen to nashtomoha banna hota hai। mera to ek shivbaaba doosra na koi। varsa bhi unse milega। ab baap se varsa paana hai nai duniya ka, to patit mat bano। paavan banne bigar nai duniya mein ja nahin sakenge। janma-janmaantar ke paap kiye hue hain, unki saza bhogni padti hai। jaise ki 63 janmon ke paapon ki saja milti hai। garbhajel mein bhi saja bhogte hain। satayug mein koi jel aadi hoti nahin hai। hai hi svarga। ab baap saadhaaran tan mein aaye hain, isliye baap ko pahchaante nahin hain। baap ke saath yog lagaane se hi aatma paavan banegi। baap kehte hain - main patit duniya, patit shareer mein aata hoon phir inko number one paavan banaata hoon। tat tvam। tum bhi paavan bante ho। tum baap ke bachche bane ho। prajaapita brahma ke bhi bachche ho isliye baapdaada kaha jaata hai। baap samjhaate hain ab time bahut thoda hai। shareer par bharosa nahin hai। baap ko yaad karte raho, svadarshan chakradhaari bano। saara din yahi baaten khyaal mein rahe। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) poora-poora nashtomoha banna hai। ek shivbaaba doosra na koi, yeh paath pakka karna hai। sapoot bachcha ban maat-pita ko follow karna hai।

2) bigar kaudi kharche padhaai se 21 janmon ki raajaai milti hai to bahut lagan se padhaai padhni hai। svadarshan chakradhaari banna hai।

vardaan:- sada apne shreshtha bhaagya ke nashe aur khushi mein rahne vaale padmaapdam bhaagyashaali bhav

saare vishwa mein jo bhi dharma pitaayen va jagadguru kahlaane vaale bane hain kisi ko bhi maat-pita ke sambandh se alaukik janma aur paalna praapta nahin hoti hai। ve alaukik maat-pita ka anubhav svapna mein bhi nahin kar sakte aur aap padmaapadmapti shreshtha aatmaayen har roz maat-pita ki va sarva sambandhon ki yaadapyaar lene ke paatra ho। svayan sarvashaktimaan baap aap bachchon ka sevak ban har kadam mein saath nibhaata hai - to isi shreshtha bhaagya ke nashe aur khushi mein raho।

slogan:- tan aur man ko sada khush rakhne ke liye khushi ke hi samartha sankalp karo।

ye avyakt ishaare - paropkaar ki bhaavna se sampanna ban apkaari par bhi upkaar karo

baapdaada sada shreemat dete hain ki man mein har aatma ke prati shubh bhaavna aur shubh kaamna rakho, apkaari par bhi upkaar ki vritti rakho - yeh hai svachchha man। svayan ke prati va anya ke prati vyartha sankalp aata hai to yeh svachchha man nahin hai। svachchha man, clean aur clear buddhi ho tab double light sthiti ban sakegi। baap samaan sthiti banaane ka yahi sahaj saadhan hai।