मंगलवार 27 अक्टूबर 2026 की दैनिक मुरली

27-10-2026 praatahmurli om shanti "baapdaada"' madhuban

“meethe bachche - apni buddhi ko gyaan manthan mein busy rakho to sab phikraaton se phaarig ho jaayenge, sada khushi bani rahegi''

prashn:- jo apne ko shivbaaba ke yagya ka servant samajhte hain unki nishaani sunaao?

uttar:- shivbaaba is brahma mukh se jo kuchh bolenge, use woh phauran maan lenge। jo kahe - use maanna, isko hi shreemat kaha jaata hai। shri-shri shivbaaba ki mat par chalne se hi tum shreshtha bante ho। shreshtha banna maana vijay maala mein aana।

geet:- om namo shivaae…

om shanti। shaaligraamon prati shiv bhagvaanuvaach। roohaani bachchon prati roohaani baap samjha rahe hain। abhi tum bachche jaan gaye ho ki hamko yahaan aatma samajhkar baithna hai। saari duniya mein ek bhi aisa manushya nahin hoga jo apne ko aatma samajhte ho। aatma kya hai, yahi nahin jaante to paramatma ko phir kaise jaanenge। baap dvaara hi tumko aatma ki samjhaani milti hai ki mool kya cheez hai। manushyon ko kuchh bhi pata na hone ke kaaran kitna duhkhi hain। tum bachche jaante ho is drama athva srishti roopi kalpa vriksha ki aayu 5 hajaar varsha hai। jaise aam ka beej hai, woh chaitanya hota to samjhaata ki ham beej hain, hamse yeh jhaad aise nikla। parantu woh hai jad। chaitanya jhaad ek hi hai। shuru se lekar ant tak is saare jhaad ka tumko gyaan mila hua hai। nambarvaar purushaartha anusaar samajh sakte ho। baap kehte hain main is manushya srishti ka beej sat chit aanand swaroop hoon। mujhe gyaan ka saagar kaha jaata hai। yeh niraakaar ke liye mahima hai। tum jaante ho baap ki yeh mahima sabse nyaari hai। manushya to baap ki mahima ko bilkul hi nahin jaante। bhal yeh lakshmi-naaraayan aadi devtaayen hain। unhon ko bhi yeh knowledge nahin hai। yeh drama ka gyaan tumko mila hai। tum jaante ho yeh srishti ka chakra kaise phirta hai phir devta banenge to yeh gyaan rahega nahin। wonder hai na। tum is drama ke actors ho na। tumko rachta aur rachna ke aadi-madhya-ant ka gyaan hai। baaki na shoodra varna ko, na devta varna ko yeh gyaan hai। aise nahin ki gyaan parampara chalta hai। jaise tyohaaron ke liye kehte hain parampara se chalte aaye hain। abhi tum samajhte ho satayug mein to in tyohaaron ko koi jaante hi nahin। vahaan kuchh bhi yaad nahin rahega। vahaan to raajya karte hain। tum har ek ki buddhi ka taala khula hua hai। mukhya creator, director, principal actor ko tum jaante ho। tumko kitni achhi knowledge milti hai, is knowledge ko jo nahin jaante hain, woh hain besmajh। tum bhi besmajh the। ab devta ban rahe ho। yeh knowledge jiski buddhi mein tapakti rahegi unko apaar khushi hogi। tumhaare sivaae koi nahin jo yeh knowledge samajh sake। god father ko hi world almighty authority, knowledgeful kaha jaata hai, knowledge kiski hai? sabhi vedon shaastron, srishti ke aadi madhya ant ki knowledge usko hai। shaastron mein bhi rachta aur rachna ki knowledge nahin hai, tab to rishi muni aadi kehte aaye hain ham rachta aur rachna ko nahin jaante hain। samjhaane vaala ek hi hai to aur koi jaanenge kaise। yeh knowledge sivaae tum bachchon ke koi de na sake। tumko dene vaala phir hai baap। woh kitna bada knowledgeful hai। kitna tum martaba paate ho। kitni khushi honi chaahiye। ham behad ke baap ki santaan hain। gyaan se buddhi bharpoor honi chaahiye। aisi koi cheez nahin jisko tum nahin jaante ho। abhi tum master knowledgeful ban rahe ho। jo aatma tamopradhaan bani hai woh baap ko yaad karte-karte satopradhaan ban jaayegi। nambarvaar to hote hain na। koi ki tamo se rajo buddhi bani hogi, koi ki rajo se sato bani hogi। abhi satopradhaan buddhi kiski hai nahin। satopradhaan jab ban jaayegi tab tumhaari karmaateet avastha ho jaayegi। phir to nai duniya chaahiye - raajya karne ke liye। yeh yagya jab poora hota hai tab ismen saari puraani duniya ki aahuti pad jaati hai। phir padhaai bhi poori ho jaati hai - nambarvaar purushaartha anusaar। jaise school mein student samajhte hain ham yeh imtahaan paas kar phir us class mein transfer honge। tumhaari bhi jab karmaateet avastha hogi to is mrityulok se transfer ho amarpuri mein chale jaayenge। tum jaante ho - abhi yahaan se transfer hone ka hai। pavitra hokar amarlok mein chale jaayenge। asul ham shantidham ke rahvaasi the phir part bajaate-bajaate amarlok se mrityulok mein aakar pahunche hain। to yeh saari knowledge buddhi mein rahne se khushi rahegi। sivaae knowledge ke aur kuchh soojhega hi nahin। abhi ham padhkar nai duniya ke maalik banenge, yeh bhi samjhaana chaahiye। yahaan hain hi patit। devta to koi hai nahin। manushya se devta kaun banaayega? baap hi bana sakte hain। abhi tum samjha sakte ho barobar svarga tha, jismen lakshmi-naaraayan ka raajya tha। uski sthaapna kisne ki? heavenly god father ne paradise sthaapan kiya। jahaan devi-devta raajya karenge to aur koi dharma nahin hoga। yeh bada behad ka naatak hai। tum chaitanya ho na। jaante ho is jhaad ka beej oopar mein hai। baap bhi imperishbal avinaashi hai। tum bhi imperishbal ho। abhi saara jhaad jadajdeebhoot avastha ko paaya hai। is samay sab manushya kaanten misal ban gaye hain। kaanton ka jangal hai na। sab ek do ko duhkh dene vaale hain। baap hi baagvaan hai, unko khivaiya bhi kehte hain। tum bhi boat chalaane seekh rahe ho। har ek ki naeeya paar kaise ho, so tumko baith samjhaate hain। naeeya koi shareer nahin hai। naeeya aatma aur shareer do cheez ki bani hui hai। gaate bhi hain naeeya meri paar lagaao। abhi aatma bhi patit hai to shareer bhi patit hai। ab paar kaise ho, aur kahaan jaaye? abhi tum mool vatan, sookshm vatan... satayug se lekar kaliyug tak sab raazon ko jaan gaye ho। phir bhi buddhi mein yeh kyon nahin rehta! tum bhool kyon jaate ho? sadaiv buddhi mein yeh tapakta rahe to tum khushi mein rahenge, phikar se phaarig ho jaayenge।

tum jaante ho baba aaya hua hai, hamko le jaane। jo knowledge baap mein hai woh hamko de rahe hain। yeh hain bilkul nai baaten, jo baap ke sivaae aur koi samjha nahin sakte। niraakaar baap saakaar dvaara sunaate hain। tum bhi is shareer ke dvaara sunte ho। to baap tum bachchon ko bhi aap samaan banaate hain। jo baap ki mahima woh tumhaari bhi honi chaahiye। koi farka nahin hai। sirf baap kehte hain - ham janma-maran mein nahin aata hoon, tum janma-maran mein aate ho। tum mujhe kehte ho gyaan ka saagar, sukh ka saagar... to zaroor main tumko gyaan doonga, kalpa-kalpa deta hoon। tum samajh gaye ho barobar 84 ka chakra khaae abhi ham ant mein hain। phir baap hamko pahla number mein le jaate hain। yeh knowledge hai na। knowledge hai source oph income। jo jitna-jitna padhta hai, unki income vaisi hoti hai। yeh knowledge bhi hai, dhandha bhi hai। tum kooda-kichda dete ho baba ko। jab koi marta hai to karneeghor ko dete hain na। yahaan tumko jeete ji dena hai। vaastav mein baat abhi ki hai। baap kehte hain - tumhaare paas jo kuchh hai, marne se pahle de do। tum trustee ban jaao। nahin to tumhaare paas jo pada hoga woh ant mein yaad aayega। jaise koi saahookaar aadmi hai, woh gyaan nahin lenge। unki saahookaari bhi ek janma ke liye hai na। shareer to chhod hi denge, pata nahin karmon anusaar kahaan jaakar janma lenge। tum to jaante ho ham abhi jitna purushaartha karenge utna praalabdha paayenge। is samay hain sab jismaani service karne vaale। roohaani service ko koi jaante hi nahin। supreme rooh aakar tumko knowledge samjhaate hain। woh hai sukh ka saagar, duhkh harta sukh karta। unki shiv jayanti bhi manaate hain, parantu buddhi mein nahin aata hai। abhi tumhaari buddhi mein yeh gyaan hai ki baba hamko phir 5 hajaar varsha baad aakar sunaayenge। satayug mein yeh gyaan nahin hoga to kaliyug mein phir kahaan se aayega। duniya mein yeh koi nahin jaante ki lakshmi-naaraayan ka mandir ham kyon banaate hain। yeh kaun the, inhon ko yeh raajya kisne diya? yeh karmon ka phal hai na। baap baith abhi tumko karma, akarma, vikarma ki gati samjhaate hain। bhagvaanuvaach hai na। geeta se hi aadi sanaatan devi-devta dharma ki sthaapna hoti hai। vahaan manushya thode hote hain। baaki sab zaroor mukti ko paate honge। mahaabhaarat ladaai bhi likhi hui hai, bahut aaphten aayengi। natural calamities aayegi। puraani duniya khatma hogi। yeh vahi bombs, missiles hain, yeh vahi vinaash ka samay hai jabki bhagwan ne aakar roodra gyaan yagya racha tha, jisse vinaash jvaala nikli। bhagwan yagya rachte hain sukh-shanti ke liye। baaki duhkh ashaanti ka zaroor vinaash hona chaahiye। is eeshvareey gyaan yagya mein saari srishti svaaha ho jaayegi। yeh baaten tumhaari buddhi mein hain।

ham brahman hain। is shivbaaba ke yagya mein ham brahman servant hain। ham hain sachche-sachche mukh vanshaavli brahman। tum bachchon ko baap jo mukh se kahe woh maanna chaahiye। shreemat par hi hamko chalna hai। yeh bhi tum jaante ho shri-shri shivbaaba ki mat par ham shreshtha bankar maala ke daane banenge। maala ke daane kaha jaata hai sijre ko। sijra hota hai na phir woh badhta jaata hai। baba ne khud sijra banaaya hai, yeh bhi sijra hai। oopar mein hai niraakaari shivbaaba, phir hain aatmaayen। niraakaari sijra phir saakaari hota hai। pahle-pahle number mein hai prajaapita, woh jismaani woh roohaani। roohaani baap aakar prajaapita brahma dvaara rachte hain। kehte bhi hain patit duniya ko aakar paavan banaao। pralay to kabhi hoti nahin। world ki history geography repeat hoti hai। puraani duniya so phir nai banti hai। abhi tum purushaartha kar rahe ho nai duniya ke liye। yeh behad ki knowledge behad ka baap hi dete hain। had ka varsa hote bhi behad ke baap ko yaad karte hain। he bhagwan kehte hain na। jab koi marte hain to kehte hain - god father ko yaad karo to do father siddha hote hain na। sabhi aatmaayen brothers hain। aatma hi pukaarti hai he duhkh harta sukh karta, he liberator aao, hamko ghar jaane ke liye guide karo। hamko ghar yaad hai parantu ja nahin sakte kyonki maaya ne pankh tod daale hain। koi ghar vaapis ja nahin sakte। abhi tumko apni jyot ko aapehi jagaana hai। baap ko yaad karne se ghrit pad jaayega। jyot ekdam bujh nahin sakti। koi marta hai to deeva jagaate hain। khaas vahaan ek mukrar rakhte hain ki ismen ghrit daalte jaao, nahin to andhiyaara ho jaae। abhi to tumko yogbal se ghrit daalna hai to ghor andhiyaare se sojhra, deep maala ho jaayegi। deepmaala satayug mein hogi। yahaan nahin। utsav jo bhi manaaye jaate hain, unka bhi rahasya tumne samjha hai। woh to kuchh bhi samajhte nahin। phir bhi samjhaaya jaata hai yeh raakhi aadi hai pavitrata mein rahne ke liye। manushyon ko gyaan ka injection aisi yukti se lagaana chaahiye jo feel karen ki barobar ham to bhrashtaachaari hain। shreshthaachaari baap hi banaate hain। baap kehte hain - manamnaabhav - to tum tamopradhaan se satopradhaan ban jaayenge। yukti se teer lagaana chaahiye, baat karne ki taakat chaahiye। abhi tum sarvashaktimaan baap se shakti paae maaya par jeet paate ho। phir tumhein raajya-bhaagya mil sakta hai, sivaae baap ke aur koi jeet pahna na sake। baap kehte hain dekho - bachche tumko kya se kya banaata hoon। ab aise baap ko nirantar yaad zaroor karna hai to vikarma vinaash honge। baap kehte hain - maamekam yaad karo to ant mati so gati ho jaayegi। jaisa chintan kiya jaata hai vaisa ban jaate hain, to baap kehte hain mujhe yaad karte-karte tum bhi ban jaayenge। yaad se vikarma bhi vinaash honge aur apne ghar vaapis chale jaayenge। yeh knowledge source aaph income hai। health wealth hai to happy bhi hai। vahaan kitni badi aayu hoti hai। yogeshvar krishna ko nahin kahenge। yogeshvar tum ho। eeshvar tumko yog sikha rahe hain। yeh raajayog hai। yog lagaakar tum raajyabhaagya paate ho। eeshvar tumko yog sikhaae raajaai ka varsa dete hain। tumko raajya kisne diya? baap ne। baap kehte hain - alpha ko yaad karo। baap aur varse ko yaad karo to paap katte jaayenge। yeh to bahut sahaj hai। tumhaari buddhi mein kitna gyaan hai। bhagwan ke bachche master god thahre। baap ke paas baith thode hi jaana hai। hamko to part bajaana hai, ismen dehi-abhimaani banna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap jo gyaan dete hain, uska hi sadaiv manthan karna hai। yukti se baaten karni hai। bahut pyaar se samjhaana hai।

2) apne paas jo kuchh hai woh jeete ji baap ko dekar trustee ban ek baap ko yaad karna hai।

vardaan:- deh-abhimaan ke main pan ki sampoorn aahuti daalne vaale dhaarna swaroop bhav

jab sankalp aur svapna mein bhi deh-abhimaan ka main pan na ho, anaadi aatmik swaroop ki smriti ho। baba-baba ka anhad shabd nikalta rahe tab kahenge dhaarna swaroop, sachche brahman। main pan arthaat puraane svabhaav, sanskaar roopi srishti ko jab aap brahman is mahaayagya mein svaaha karenge tab is puraani srishti ki aahuti padegi। to jaise yagya rachne ke nimitta bane ho, aise ab antim aahuti daal samaapti ke bhi nimitta bano।

slogan:- svayan se, seva se aur sarva se santushtata ka certificate lena hi siddhi swaroop banna hai।

ye avyakt ishaare - paropkaar ki bhaavna se sampanna ban apkaari par bhi upkaar karo

yogi jeevan ki oonchi manzil ko praapta karne vaali aatma ninda ko stuti mein, glaani ko gaayan mein, thukraane ko satkaar mein, apmaan ko sva-abhimaan mein, apkaar ko upkaar mein parivartit kar baap samaan sada vijayi, ashta ratna aur bhakton ke ishta bano। yeh bhaavna nahin rakho ki yeh bhi to kuchh badle, to main badloon, yeh lene ki bhaavna hai। mujhe baayabreshan dena hai। mujhe merciful banna hai। mujhe gunon ka, shaktiyon ka sahayog dena hai, ismen master daata, phraak-dil bano।