सोमवार 2 नवंबर 2026 की दैनिक मुरली

02-11-2026 praatahmurli om shanti "baapdaada"' madhuban

“meethe bachche - tum yahaan apni raajaai takdeer banaane aaye ho, jitna yaad mein rahenge, padhaai par dhyaan denge utna takdeer shreshtha banti jaayegi''

prashn:- sangam par kis shreemat ka paalan kar 21 janmon ke liye tum apni takdeer shreshtha bana lete ho?

uttar:- sangam par baap ki shreemat hai - meethe bachche nirvikaari bano। dehi-abhimaani banne ka poora-poora purushaartha karo। kabhi koi paap karma nahin karna to 21 janmon ke liye takdeer shreshtha ban jaayegi।

geet:- takdeer jagaakar aai hoon…

om shanti। meethe-meethe roohaani bachchon ne yeh geet suna। ab in do line ka arth jinhonne samjha woh haath uthaayen? yeh kisne kaha - takdeer jagaakar aai hoon? aatma ne। sabhi ki aatma kehti hai - main takdeer banaakar aayi hoon, kaun si takdeer? nai duniya mein jaane ki takdeer। nai duniya hai svarga। yeh puraani duniya hai narka। to yeh sab aatmaayen kehti hain। aatma ko to shareer zaroor chaahiye tab to bole। jeev ki aatmaayen kehti hain ham aaye hain school mein takdeer banaane। padhaane vaala kaun hai? shivbaaba gyaan ka saagar। manushya ko devta athva patit ko paavan, narkavaasiyon ko svargavaasi banaane vaala woh ek baap hi hai। is narka ko aag lagni hai। duniya mein aisa koi school nahin jahaan bachche kahen ki ham behad ke baap ke paas aaye hain athva aisa bhi koi nahin jo kahe main baap bhi hoon, teacher bhi hoon, guru bhi hoon। yeh brahma bhi nahin kah sakte hain। ek shivbaaba hi kehte hain - main sabhi ka baap, teacher, guru hoon। vahi baith padhaate hain। to ab bachchon ko takdeer banaani hai। bachche kehte hain ham aaye hain nai duniya ke raajdhaani ki takdeer banaane। hamko maaloom hai ki yeh puraani duniya khatma honi hai। baap aakar nai duniya sthaapan karte hain। tum 21 janmon ka raajya-bhaagya lene padhte ho। goya tum raajaai takdeer banaane aaye ho। yahaan raajayog seekh rahe ho। yeh geet to bhal un naatak vaalon ka banaaya hua hai parantu iska arth phir samjhaaya jaata hai। jaise baap sabhi vedon, shaastron ka saar baith samjhaate hain। is samay saari duniya mein hai bhakti। satayug mein bhakti, mandir aadi hote nahin। tumne aadhaakalpa bhakti ki hai, ab to bhagwan mil gaya hai। pahle-pahle bhaarat mein in devi devtaaon ka raajya tha, phir 84 janma lete-lete takdeer bigad gai hai। ab phir se takdeer banaate hain। baap aaye hi hai takdeer banaane। bachchon ko kehte hain mujhe yaad karo। tum bahut hi paap aatma ban pade ho। pahle-pahle bhakti ki jaati hai shivbaaba ki, woh hai avyabhichaari bhakti। phir bhakti bhi vyabhichaari ho jaati hai। to bachchon ko pahle-pahle yeh nishchay hona chaahiye ki jisko bhagwan kaha jaata hai woh hamko padhaate hain। unko koi shareer hai nahin, woh is shareer mein baith bolte hain। jaise tumhaari aatma is shareer mein aane se bolne lagti hai। kabhi-kabhi manushya mar jaate hain, phir jab shamshaan mein le jaate hain to aadhe mein churpur karne lag padte hain। aise aatma chali gai phir aai, nahin। aatma bilkul sookshm hai na, to kahaan chhip gai। aise kahenge unconscious ho gai, kisko pata nahin pada। aise kabhi-kabhi ho jaata hai। chita se bhi jaag padte hain, phir unko utha lete hain। to yeh kya hua? aatma kahaan chhip gai। phir apne thikaane aa gai। aatma nahin hai to shareer ekdam murda ho jaata hai। to aatmaon ka desh hai paramdham। tum jaante ho ham vahaan us ghar ke rahne vaale the। pahle-pahle ham aatma ghar se aaye satayug mein। bhaaratvaasi jo devi-devta the, vahi aaye honge। vaastav mein jo-jo dharma sthaapan karte hain, pichhaadi tak kaayam rehte hain। buddha ka dharma kaayam hai, Christ ka dharma kaayam hai। sirf devi-devta dharma vaale jo raajya karte the unka naam hi gum hai। koi bhi nahin hai jo apne ko devi-devta dharma ka kehta ho।

baap samjhaate hain bhaaratvaasi apne dharma ko bhool gaye hain, hamaara grihastha dharma pavitra tha। sampoorn nirvikaari, mahaaraaja-mahaaraani ka raajya tha। unhon ko kehte hain bhagavti lakshmi aur bhagwan naaraayan। vaastav mein bhagwan ek hai, unko hi gyaan saagar kaha jaata hai। in lakshmi-naaraayan mein to koi gyaan hai nahin। gyaan ka saagar ek hi shivbaaba hai। woh baith tum bachchon ko gyaan dete hain। tum abhi padh rahe ho, yeh padhaai phir vahaan bhool jaayenge। abhi tum har ek samajhte ho hamaari aatma mein 84 janmon ka record bhara hua hai। aatma abhi knowledge le rahi hai। phir satayug mein jaakar apna raajya bhaagya karegi। tum kahenge hamne 84 ka chakra lagaaya। ab baba se ham svarga ki baadshaahi le rahe hain। har ek us daade se varsa lete hain, parantu apne-apne purushaartha anusaar। ismen koi hissa baanta nahin jaata hai। agyaan kaal mein baanta jaata hai na। behad ka baap kehte hain ham vaikuntha sthaapan karte hain। usmein oonch martaba paana, woh hai tumhaare purushaartha par madaar। jitna baap ko yaad karenge utna vikarma vinaash honge। pavitra banenge। sona ko bhatthi mein daalte hain na। to unse khaad nikal sachche sone ki dalli ban jaati hai। yeh aatma bhi sachcha sona thi, yahaan part bajaane aati hai। pahle hai golden aged phir pahle chaandi ki khaad padi। aatma thodi impure ban jaati hai to phir aahiste-aahiste thoda ghatti jaati hai। makaan bhi pahle naya phir aahiste-aahiste puraana hota jaata hai। 100 varsha ke baad kahenge puraana। vaise duniya bhi nai aur puraani hoti hai। aaj se 5 hajaar varsha pahle nai thi, in devi-devtaaon ka raajya jo tha - woh kahaan gaya? 84 janma bhogte-bhogte puraana ho gaya। aatma bhi maili, to shareer bhi maila ho gaya। gore se saanvare ho gaye। shreekrishna ko bhi gora aur saanvara dikhaate hain na। taang narka taraph, munh svarga taraph dikhaana hai। tum bhi us kul ke ho। tumhaari bhi taang narka taraph munh svarga taraph hai। abhi tum pahle nirvaandhaam mein jaakar phir svarga mein aayenge। kaliyug ko aag lag jaayegi। mooslaadhaar barsaat, aag, earthquake aadi hogi। patit aatmaayen sab hisaab-kitaab chuktu kar ghar chali jaayengi। baaki thode bachenge। pavitra aatmaayen aati jaayengi। abhi to sab hain kaante। kaam kataari chalaana, yeh kaanta lagaana hai। yahaan to baap kehte hain ki sampoorn nirvikaari banna hai। baap kehte hain - mujhe yaad karo to main tumko svarga ka varsa doonga, tum pavitra ban jaayenge। tum paavan the to grihastha vyavhaar bhi pavitra tha। abhi tum patit bane ho to grihastha vyavhaar bhi apvitra, vikaari hai। satayug mein vyavhaar dhandha bhi sachcha chalta hai। vahaan jhooth aadi bolne ki darkaar nahin rehti, jhooth tab bola jaata hai jab bahut paise kamaane ka lobh hota hai। vahaan to athaah paise milte hain। anaaj aadi ka koi daam nahin rehta। vahaan koi gareeb hota hi nahin, jo achha purushaartha karenge woh mahaaraaja banenge। heere javaahron ke mahal milenge। purushaartha poora nahin karenge to praja mein chale jaayenge। raaja-raani phir prince-princess saara gharaana hota hai na। phir praja mein bhi nambarvaar saahookaar aur gareeb praja hoti hai। vahaan to sab pavitra honge। raaja-raani, vajeer bhi ek। vahaan koi bahut vajeer nahin rehte। raaja mein taakat rehti hai raajya chalaane ki। to jaise baap samjhaate hain to bachchon ko bhi samjhaana chaahiye। ham bhaaratvaasi devi-devta the। satayug mein hamaara raajya tha। grihastha vyavhaar mein ham pavitra the, svargavaasi the phir patit bante-bante narkavaasi bane hain phir svargavaasi bante hain। yeh khel bana hua hai। svargavaasi ek janma mein ban jaayenge phir narkavaasi banne mein 84 janma lene padenge। seedhi mein bada clear dikhaaya hua hai। abhi buddhi mein aaya hai ki ham jaakar svarga mein raajya karenge। abhi baap se varsa le rahe hain। baap hi satya bataakar nar se naaraayan banaate hain। ve log jo satya naaraayan ki katha sunte hain woh koi nar se naaraayan bante nahin। to woh katha jhoothi hui na। yahaan tum baithe hi ho nar se naaraayan banne ke liye, woh aise thode hi kehte ki pavitra bano, maamekam yaad karo। satya-naaraayan ki katha poornamaasi ke din sunaate hain। ab is samay poornamaasi kaha jaata hai 16 kala chandrama ko। jab pichhaadi hoti hai tab chandrama ki lakeer jaakar rehti hai, jisko amaavas kehte hain। amaavas maana andhiyaari raat। satayug treta ko din, dvaapar kaliyug ko raat kaha jaata hai। yeh sab point samajhne ki hain। yeh shivbaaba baith padhaate hain। woh baap bhi hai, teacher bhi hai aur guru bhi hai। inmen pravesh kar aatmaon ko padhaate hain।

baap kehte hain jaise inki aatma bhrakuti ke beech mein baithi hai, main bhi aakar yahaan baithta hoon। tumko baith samjhaata hoon। tum pahle paavan the phir patit bane ho। ab mujh baap ko yaad karo, pavitra banne bigar ghar vaapis ja nahin sakte। pavitra banenge tab udenge। sab pukaarte bhi hain he patit-paavan aao, paavan banaao, tab ham uden। apne ghar muktidhaam mein jaayen। woh hai ham aatmaon ka ghar। patit ghar ja nahin sakte। jo achhi reeti shiksha ko dhaaran karenge to jaldi svarga mein aayenge, nahin to deri se aayenge। naye makaan mein aana chaahiye na। naye makaan mein maja hai na। pahle-pahle satayug mein aana chaahiye। mama baba satayug mein jaate hain, ham phir deri se kyon jaaye! tum bhi follow karo brahma ko। baap ko yaad karte raho। koi baat mein takleeph hoti hai to shivbaaba se poochho। shreemat se hi shreshtha banenge। puraani duniya mein to paanch vikaaron roopi raavan ki mat par chalte aaye ho। pahle-pahle hai deh-abhimaan। abhi tum bachchon ko dehi-abhimaani banna hai। main aatma paramdham ki rahne vaali hoon, unko shantidham kaha jaata hai। aisi-aisi baaten doosra koi samjha na sake। baap hi samjhaate hain, tumhaari aatma in organs se sunti hai, satayug mein kabhi shareer kharaab hota hi nahin। yahaan to baithe-baithe akaale mrityu ho jaati hai। satayug mein aisi koi baat hoti nahin, usko kaha hi jaata hai heaven, svarga, paradise। phir ham chakra lagaakar punarjanma lete-lete 84 ka chakra poora kiya hai, phir baap aakar bachchon ko svarga ka laayak banaate hain। abhi tum nayi duniya ke laayak bane ho। abhi to narka hai। abhi tum aaye ho narkavaasi se svargavaasi banne ki takdeer banaane। kehte hain ham shivbaaba ke paas aaye hain takdeer banaane। kalpa-kalpa har 5 hajaar varsha baad ham takdeer banaate hain। ham svargavaasi bante hain phir raavan raajya shuru hone se ham vikaari ban jaate hain। abhi sab vikaari patit hain tab aap aakar nai duniya sthaapan karte hain। nai duniya mein sirf tum bachche hi honge। baaki sab shantidham mein chale jaayenge। oopar mein aatmaon ka jhaad hai। phir apne-apne samay par aayenge। jab hamaara raajya hoga to vahaan aur dharma vaale honge nahin। phir dvaapar mein raavan raajya shuru hoga। yeh sab baaten achhi reeti dhaaran karni hain। yahaan narkavaasi se svargavaasi banna hai। narkavaasi manushya ko asur aur svargavaasi manushya ko devta kaha jaata hai। ab sabhi aasuri svabhaav vaale hain। ab baap baith purushaartha karaate hain। baap kehte hain pavitra bano। har baat mein poochhte raho। koi poochhte hain ki baba dhandhe mein jhooth bolna padta hai, jhooth bolne se thoda paap banega। woh phir baap ko yaad karte rahenge to paap kat jaayenge। aajkal ki duniya mein sab paap karte rehte hain। kitni rishvat khaate rehte hain। yeh pradarshani ka chitra maps hain, aise maps kahaan hote nahin। agar koi dekhkar copy karke banaaye bhi, parantu unka arth kuchh bhi samajh nahin sakenge। pradarshani mele mein to bahut aate hain। kaha jaata hai 7 roz liye samajhne aao to tum svargavaasi banne laayak ban jaayenge। abhi narkavaasi ho, seedhi mein dekho kitna clear hai। yeh hai patit duniya, paavan duniya oopar khadi hai।

abhi tum bachche shivbaaba se promise karte ho baba ham narkavaasi se svargavaasi zaroor banenge। abhi tum taiyaari kar rahe ho shivaalay mein jaane ke liye, isliye vikaar mein kabhi nahin jaana hai। toofaan to maaya ke bahut aayenge parantu nangan (patit) nahin hona hai। patit hone se badi khata (bhool) ho jaayegi phir dharmaraaj ki bahut badi saja khaani padegi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) manushya se devta banne ke liye jo bhi aasuri svabhaav hai, jhooth bolne ki aadat hai, uska tyaag karna hai। daivi svabhaav dhaaran karna hai।

2) ghar chalne ke liye pavitra zaroor banna hai। maaya ke toofaan aate bhi karmendriyon se kabhi koi vikarma nahin karna hai।

vardaan:- adhikaari pan ki sthiti dvaara baap ko apna saathi banaane vaale sada vijayi bhav

baap ko saathi banaane ka sahaj tareeka hai - adhikaari pan ki sthiti। jab adhikaari pan ki sthiti mein sthit rehte ho tab vyartha sankalp va ashuddha sankalpon ki halchal mein va anek rason mein buddhi dagmag nahin hoti। buddhi ki ekaagrata dvaara saamna karne, parakhne va nirnay karne ki shakti aa jaati hai, jo sahaj hi maaya ke anek prakaar ke vaar se vijayi bana deti hai।

slogan:- raajayogi woh hain jo second mein saar se vistaar aur vistaar se saar mein jaane ke abhyaasi hain।

ye avyakt ishaare - brahma baap samaan sampanna aur sampoorn sthiti ka anubhav karo

brahma baap ne sampoorn banne ke liye apne sarva khajaane aadi se antim din tak saphal kiye, iska pratyaksha pramaan dekha - sampoorn pharishta ban gaye। to lakshya rakho mujhe baap samaan sampanna aur sampoorn banna hi hai। kuchh bhi purushaartha karna pade lekin nishchit hai ki baap samaan banna hi hai।