मम्मा की मुरली - gyan-sitar-01

११.१२.४८

sabko vaapis le jaane vaala, srishti ke aadi-madhya-ant ko jaanne vaala ek hi paramatma hai।

saari duniya is samay ghor andhakaar mein hai। isliye jahaan se bhi chalte hain, usmein duhkh ki thokren khaate rehte hain। ek to agyaanta yeh hai jo knowledge hi nahin hai ki ham kaun hain, kahaan se aaye hain? usmein phir thokren bhi khaate hain। jisse ulti duhkh ki hi result nikalti hai। kyonki maarga ka hi pata nahin hai। yeh pata to ek ko hi hai jiske paas aadi-madhya-ant ki saari roshni hai। harek ke aadi-madhya-ant ko jaan bhi vahi sakta hai। jiski aadi-madhya-ant nahin hai। jo khud hi aadi-madhya-ant mein aane vaale hain woh aadi-ant ko kaise jaan sakte hain? jo saakshi drishta paramatma hai, vahi jaan sakta hai। woh janma-maran ke chakra mein aane vaala nahin hai। usko hi saari knowledge hai। janma-maran mein aane vaale ke paas saari roshni rah nahin sakti hai। aur jo bhi dharma sthaapan karne aaye hain, woh bhi is samay janma-maran ke chakra mein hain। to ab roshni kaun de?

sabhi dharmon ko jaanne vaala athva vaapis le jaane vaala woh hai door ka musaaphir। woh to is duniya ka nahin hai। jab kehte hain ki yeh duniya jhoothi hai। jhoothi kaaya, jhoothi maaya, jhootha sab sansaar। saara sansaar hi jhootha hai to unse le chalne vaala musaaphir to is duniya ka nahin chaahiye na। is desh mein to sab jhoothe hain। unko to is jhoothi duniya se paar le jaana hai। bhal yeh duniya hi nai banti hai parantu is duniya mein to uska bhi ansh nahin hai na। woh duniya ekdam is duniya se paar hai। to jarur paar le jaane vaala us duniya ka musaaphir chaahiye। roshni to unke paas rah sakti jo is chakra mein aane vaala na ho। yeh chakra bhi jab tak apni aadi-madhya-ant poori na kare tab tak vaapis koi bhi ja nahin sakta। aise bhi nahin koi mukti ko pahunche hue hain jin dvaara roshni mil sakti hai। vahaan koi ja nahin sakta। ab hamne rachayita aur rachna ke bhed ko poora jaana hai। jabki aadi ko chakra lagaakar ant mein aana hai, ant ko phir aadi mein aana hai, to phir beech mein koi vaapas kaise jaayenge? chakra ko bhi nambarvaar apni stage mein badalna hai। to jab chakra ke ant ka bhi ant ho tab hi vaapas ja sakenge। to yeh saari knowledge ek ke paas hi hai। rachna ki aadi-madhya-ant kaise hoti hai, woh to rachta hi jaanega na। manushya trikaaldarshi ho nahin sakta। jaise manushya ki bhi aadi-madhya-ant hoti hai। nambarvaar hi stages aati hain। baal avastha ke baad vriddha avastha to nahin aayegi। yeh sab niyam bane banaaye hain। to apni buddhi mein ab roshni aayi hai। chakra ko poora jaante hain aur jaante bhi tab hain jabki ab aadi mein jaane ka samay hai। agar aadi ke samay ham trikaaldarshi banen athva us samay yeh knowledge rahe ki humein neeche girna hai to phir sukh ki bhaavna hi na rahe। to ab ant mein hi ham jaante hain। devtaaon ko trikaaldarshi banne ki aavashyakta hi nahin hai aur na dvaapar mein aane vaalon ko hi aavashyakta hai। paramatma aate hi ant mein hain jabki teenon kaalon ka khel poora hone par hota hai। jab khel chal raha hai, tab use beech mein dekhne se maja hi nahin aayega।

ab paramatma samjha rahe hain ki ab kahaani poori hui। abhi ant ka bhi ant hai। phir nai kahaani shuru hoti hai। yeh chakra athva kahaani anaadi bani banaai hai। ek hi world history hai। yeh sab knowledge buddhi mein hai, isliye apne ko khushi hai ki phir se jo kahaani shuru hui hai usmein hamaara bhi part hai। ham usmein poora sukh lete hain। apne ko maaloom hai ki is knowledge ko poora jaanne vaala vahi door ka musaaphir hai। khud hi phir vaapas le jaane phir aata hai। manushya yeh kaam kar nahin sakta। agar manushya aatma kare to woh aadi-madhya-ant mein nahin aani chaahiye। woh to chakra se alag cheej chaahiye। woh hai hi ek paramatma svayan maalik। manushya samajhte hain — bahut avtaar hote hain, yug-yug avtaar hote hain। parantu yug-yug mein to aane ki darkaar hi nahin hai। kyonki chakra to phirna hi hai। ab ham chakra ke niyam ko samajhte hain। ab ismen humein kya karna chaahiye jisse hamaari pragti bane? woh stage kya hai? uski knowledge poori koi bhi suna nahin sakta hai। koi se bhi yeh knowledge mili hui nahin hai ki manushya ke liye poorn stage kya hai aur woh kaise praapta ho sakti hai? baaki to sab apni-apni shiksha ke aadhaar se manushyon ko thoda-bahut bataate hain। manushya ke liye oonch stage kya hai, woh to rachta hi samjha sakte hain।

ab ham andhiyaare ko bhi samajhte hain — jabki roshni ka pata pada hai। duniya thode hi samajhti hai ki ham andhiyaare mein hain। woh to samajhte hain — ab tarakki karte jaate hain, roshni mein aate jaate hain। parantu woh roshni to giraavat ki hai। woh to chadhaane vaala jab samjhaate hain tab hi ham jaante hain। duniya to ab bigdi hui hai। yeh to samajhte bhi hain lekin usko sudhaarne ki tarkeeb hi kya hai — woh ek paramatma hi jaanta hai। jo khud hi bigde hue hain woh kaise is tarkeeb ko act mein la sakte hain! maamla saari duniya ka bigda hua hai। paanch tatva aadi sab bigde hue hain। har cheej ka sudhaar ek rachayita paramatma ke haath mein hi hai। achha।