मम्मा की मुरली - gyan-sitar-21

२५.८.५९

direct parmaatma mukh-vanshaavli hi sarvottam jeevanmukti ke adhikaari hain

geet:- duhkhiyon par kuchh raham karo…।

om shanti । merciful to paramatma ko hi kahenge aur duhkhi hi unse raham maangate hain। jo sada sukhi hain woh to nahin maangenge। raham ka matlab hai ki unse sukh ki maang karte hain। yeh maang paramatma se hi karte hain kyonki sabka pita woh hai। sabko sukhi karne vaala bhi woh hai। isliye har ek ki nazar unke taraph jaati hai । unko hi kehte hain tum maat-pita ham baalak tere । ab bhal bachche to sab unke hain lekin ek hain sage, doosre hain lage । sage bachche woh hain jo direct mukh-vanshaavli hai, jinhon ka avinaashi gyaan se yeh pure sambandh jutta hai। yeh hain mukh-vanshaavli । baaki to saari duniya hai lage bachche । sage aur lage ke arth ko bhi samajhna hai, to mukti aur jeevanmukti ko bhi samajhna hai। jo unki mukh-vanshaavli bante hain unhon ko to jeevanmukta banaate hain। baaki sab bachchon ko part se mukta kar dete hain। aise to jo bhi aatmaayen neeche utarti hain, to pahle sab jeevanmukta hain kyonki koi vikarmon ka hisaab-kitaab nahin hai। lekin jeevanmukti ki bhi stages hain-- sato-rajo-tamo ।

paramatma ne apne mukh-vanshaavli braahmanon ko jo jeevanmukti di. woh hai sarvottam jeevanmukti, satopradhaan jismen sampoorn sukh-shanti-pavitrata kaayam hai। peechhe dvaapar se to pavitrata ki baat rehti nahin । lekin aatmaayen jo aati hain unhon ka koi karmon ka hisaab-kitaab nahin, isliye aadha samay sukh- shanti mein rehti hain। usko kahenge rajoguni jeevanmukti । jo ekdam kaliyug mein utarte hain unhon ki sukh-shanti bhi itni rehti hai, isliye woh hai tamoguni jeevanmukti । kyonki aatmaayen nambarvaar aati hain, to jitna deri se aati hain utna kam stage vaali hoti । to jab pahle aadi sanaatan dharma sthaapan hota hai, to us samay sarvottam jeevanmukti hai। phir nambarvaar stage anusaar aatmaayen aati jaati hain। har cheej ki stage to jarur hoti hai। baaki mukti to sabko milti hai। lekin vahaan bhi nambarvaar section hain। jitni pure utni baap ke sameep nivaas karti hain। baap to sabse oonch hai। baaki sab aatmaaen nambarvaar hain। unhon mein bhi pahle hain avyakt devtaayen brahma-vishnu-shankar, phir saakaar lakshmi-naaraayan ityaadi । mukh-vanshaavli brahman devta dharma, phir nambarvaar aur dharma । jaise nambarvaar taakat anusaar yahaan part bajaane utarte hain, vaise vahaan bhi nambarvaar nivaas karte hain। yeh bhi bana banaaya drama hai, ismen kuchh change ho nahin sakti ।

koi kahe -- ab yeh sampoorn sukh ka part doosre dharma ko kyon nahin milta ? lekin nahin, sabko apna anaadi part mila hua hai। aise bhi nahin ho sakta jo Christ ka part buddha ko mile, buddha ka Christ ko mile । sabko apne dharma ki sthaapna kar phir unki paalna bhi unko hi karni hai। kyonki jo dharma sthaapan karte hain woh jaise apne dharma ka pita ho gaya। to unko apne bachchon ki paalna bhi karni hai। isliye apne dharma ke guru bante aate hain। paalna bhi to yahaan hi karenge। isliye vaapas to koi ja nahin sakte । sab yahaan hi aate rehte hain। ant mein sab aakar iktthe hote hain। jab saara vriksha nikal ant mein pahunchta hai tab beej aakar sabko vaapas le jaate hain। aise nahin, har ek dharma jaise alag-alag aate hain vaise alag-alag time par jaayenge । nahin jaane ka time sabka ek hai aur ek hi baar paramatma aakar sabko vaapas le jaate hain। vahaan se hi phir apne samay par aate hain।

ibraahim, buddha aadi ko messenger bhi kehte hain। lekin baap apna daivi dharma sthaapan karne ke liye koi messenger ko nahin bhejte। yeh time to unke aane ka hai। to vahi aakar yeh daivi dharma sthaapan karte hain। isko aarya dharma bhi kah sakte hain kyonki sabse sudhre hue to devtaayen hain। abhi to anekaanek dharma hain। un sabki bhi antim stage aa gai hai। isliye koi mein taakat nahin rahi hai। ab to sab itne duhkhi hue hain jo samajhte hain - is part mein aaven hi nahin। to unhon ki bhi aash poorn karte hain। bhaaratvaasi phir jeevanmukti maangate hain। kehte hain hamko baikunthavaasi banaao। koi marta hai to kehte hain ki svargavaas hua। to unhon ke liye svarga sthaapan karte hain। ab hi sachmuch svargavaasi ho sakte hain। baaki to janma - janmaantar narkavaasi hote aaye hain। hell-heaven yahaan isi stage par hai।

ab antim samay bahut duhkh ka time hai। lekin duhkh bahut samay to nahin chalega, iska bhi vinaash hoga। vinaash se thoda samay pahle baap aate hain। vinaash to hona hi hai। yeh jo bombs bane hain, woh sab kaam mein aayenge। yahaan bhaarat mein jab aapas mein ladenge tab kya haalat hogi ? jab paakistaan hua tab kitne manushya duhkhi hue ! uski bhent mein jab itni vinaash ki aag bhadkegi to manushya kitne duhkhi honge ! isliye is duhkh se bachaane ke liye thoda samay pahle aate hain। jab paramatma dvaara pavitra banen tab sukh-shaantimay raajya bhogne ki power bhi mile। sukh-shanti bhogna bhal aatmaon ka kaam hai lekin dena to unka kaam hai। aatmaayen to sab ५ vikaaron ke vash duhkhi ho aapas mein ladti - jhagadti rehti hain। ab to kaise ek do ka vinaash karne ko taiyaar ho gaye hain ! to bachchon ko shant karaana - yeh baap ka kaam hai na। iski yukti yahi hai jo sabko mukti-jeevanmukti mein le jaate hain। is samay baap khud bhi haajir hai tab to direct kehte hain - bachche, mujh ek ko yaad karo, baaki sab bhoolo ।