मम्मा की मुरली - gyan-sitar-30

७.१२.५९

baap ke golden versions hi aatma ko sachcha sona banaate hain

geet:- yeh kaun aaj aaya savere-savere… ।

savera ek to hai had ka, doosra hai behad ke chakra ki raat-din ka savera । ab savera aarambha ho raha hai। aage phir din hota jaaega। jab raat ke ant aur din ke aadi ka sangam hota hai, tab hi paramatma ka aana hota hai। bhakti vaale bhi jo masta hote hain, ek baje uthte hain। woh satopradhaan samay hai। samay ka prabhaav rehta hai। to baba ne samay bhi sangam ka pakda hai। ant se phir aadi karna uska kaam hai। to ab savere ke time baba aae hain, jinki aankhon mein jaadu, baaton mein sona hai। baba ke golden versions hain na। jo direct mahaavaakya uchchaaran karte hain-- maamekam । aur koi bhi nahin kahenge-- mujhe yaad karo। manushya kahenge -- unko yaad karo। baba to direct sikhaate hain - mujhe yaad karo । to unki baaton mein sona hai jo ham bhi golden athva patthar se paaras ban jaate hain। jaise arjun ko paramatma ka saakshaatkaar hua to kaha - hazaaron sooryon se tej hai। woh to ever-gold hai। isliye baba ka naam hai paarasnaath ।

somnaath gyaan somras pilaate hain। baaki meetha paani pilaane ki baat nahin। unse aatma meethi va svachchha nahin banegi। ganga nahaane ki baat bhi yeh gyaan ki hai। kehte hain - main gyaan saagar hoon, mere se yeh gyaan gangaaen nikli hain। unhonne phir nadiyon par naam rakhe hain। kehte hain na -- gyaanaamrit pilaana। to unhonne phir yeh sthool amrit pilaana, ganga nahaana.. anek baaten nikaali hain। samajhte hain - isse paap naash honge। ab ganga nahaana to bahut sahaj hai। phir shaastra, sanskrit aadi padhne ki kya darkaar hai ? ganga nahaane se paap naash ho jaaen phir to mukta ho gaye । lekin ab ham jaante hain ki yeh bhi bhakti maarga hai। iska bhi bada vriksha hai। vriddhi hoti rehti hai। abhi phir jadajdeebhoot avastha hai। pahle bhakti satopradhaan thi। ab tamopradhaan hai to cheenti, makode, mitti aadi sabko poojte rehte hain। ham kisi baat ko khandan nahin karte । yeh sab drama mein hai aur ab iska bhi ant hona hai। phir ab naya chakra chalega।

ab baba ne savera shuru kiya hai। gyaan-amrit athva gyaan-anjan sab yeh hai। jaadu ka surma bhi mashhoor hai, woh bhi yeh hai। bada jaadoogar to baba hai jo manushya ko devta banaate hain। kitna transfer kar dete hain ! to bada jaadoogar hua na । tamopradhaan aatma ko satopradhaan bana dete hain। saudaagar bhi kaisa hai ? kehte hain – sab de do। jaise satya naaraayan ki katha hai। kaha mere paas kuchh nahin hai to kuchh nahin ho gaya। yeh vahi part chal raha hai। sauda bhi dekho kaisa karte hain ! ham apna tan-man-dhan dete hain to uska १०० guna jaasti baap se milta hai। to baap se sauda karne mein kitne phaayde hain ! yeh khuda dosta hai। tvamev maataashcha pita.. sab sambandh unke saath hain। vidya dene vaala teacher bhi bante hain। kehte hain - main woh vidya padhaata hoon jisse raajaaon ka raaja bante ho । kaha hai - sabse uttam mera yahi rudra-yagya hai। rudra kaho, paarasnaath kaho, somnaath kaho – ek baba ke hi sab naam hain। baba ka kaam hai tamopradhaan ka vinaash kar satopradhaan ki sthaapna karna। sarvashaktivaan ka yahi matlab hai na। baaki vyaapak hai, tab sarvashaktivaan hai - aise to nahin kahenge।

is samay tamopradhaan hain, ५ bhoot pravesh hain। baba aakar in ५ bhooton ka vinaash kar satopradhaan banaate hain । yeh baba ki shakti hai। baaki murde ko jinda banaana ya jinde ko maarna -- yeh baba ki shakti nahin hai। haan, ham maaya se mare pade the aur baba ne aakar surjeet kiya hai gyaan-sanjeevni-booti se । to yeh hai baba ka jaadu। aankhon mein, baaton mein sona hai jisse aatma ko sona banaate hain। stars bhi koi chamak vaala, koi kam chamak vaala hota hai। to apne ko chamakdaar banaana hai। phir shareer bhi aisa sundar milega। isliye devtaayen bade sundar hote hain। natural beauty rehti hai, tandarusti bhi rehti hai। to shareer beautiful rehte hain-- chehre par muskaraahat, saral, shant yeh sanskaar hain aatma mein to chehra bhi aisa rehta hai। jitna soul mein power hai utna nazdeek sambandh mein aate hain। yeh hai hamaare purushaartha ki siddhi । gyaan-yog bal se jitna pure honge utna sambandh mein sameep aayenge। baaki abhi yahaan hi sambandh nahin jodne hain। yog to ek ke saath lagaana hai।

purushaartha ka sirf yahi time hai। kehte hain- is samay yeh antim jeevan mere havaale karne se bada phaayda hai। jisko surrender kehte hain, hands-up । phir jaise chalaave । ab kuchh raha nahin hai। unke havaale karne se halke ho jaayenge। isliye kehte hain - saara bojha mujhe de do to responsible main hoon। kehte hain – sab bhoolo, jo kuchh padha hai unko bhoolo। arjun ko bhi kaha hai na - yeh jo puraane sanskaar bhare hain, un sabko bhool jo main sunaata hoon woh suno। ab woh sab practical chal raha hai। jo padhe-likhe hain to buddhi bhatakti hai, moonjh padte hain। isliye vahi pharmaan ho raha hai। koi maane, na maane ।

vinaash to saamne khada hai। aisi cheejen bani hain jo poora vinaash karengi। iske aage aur kya banaaenge। isko hi to mahaabhaarat mahaabhaari ladaai kahenge na। aage to chhoti ladaaiyaan lagti theen। ab to poora vinaash saamne hai। mahaabhaari mahaabhaarat ladaai saamne hai। to geeta ka bhagwan bhi zarur hoga। sab yaadav bhi saamne khade hain marne-maarne ke liye, kaurav bhi khade hain aur paandav bhi khade hain। tab baba kehte hain – yeh last vaar hai। phir to na ladaaiyaan hongi, na yeh court aadi chori-chakaari honge। aadha kalpa ke liye ladaai ka naam-nishaan nahin hoga। yeh akaasur, bakaasur, soorpankha, pootna sab is samay hain। yeh sab karttavyon par naam hain। baaki koi sir par seeng nahin hote । yeh sab krodh ke chihna dikhaate hain। jaise soul ke sanskaar hain। yahaan hi kai aurten purushon ko tang karti hain, maar bhi deti hain। bade maje ke khel chalte hain। jo wonders baba ki sthaapna mein chalte hain, aage kabhi nahin chale hain।

gopiyon ko bandhan hona dikhaate hain। jab krishna paramatma tha to unke paas jaane se kyon rokte the ? agar kharaab aadmi tha to unko poojte kyon hain ? jis krishna ke deedaar ke liye meera ne raana ko taj diya, woh (krishna) jab svayan tha tab aurton ko jaane se rokte kyon the ? jarur kuchh gadbad hai। saadhaaran tan mein aate hain, tab tuchchha samajh gaali dete hain। to isliye baandh hoti hai। isliye vakeel logon ko apni vakaalat ko bhi purify karna hai। aise kaanoon ko pakdo, jo inhon ka kuchh prabandh ho। is service se vakaalat bhi pure ho jaayegi। samjhaaven to ek samjhega, lekin ek to kuchh kar nahin sakta। ek ka raajya to hai hi nahin। paramatma sarvavyaapi hai to sab paramatma ho gae, sab authority ho gae। aise samay baba aakar difficult kaam karte hain, jo koi manushya kar nahin sakta । manushya ko to ghar ka hi kuchh jhanjhat hota hai to hairaan ho jaate hain। yeh kitna bhaari jhanjhat hai ! yeh to us samartha ka kaam hai jo saari responsibility uthaate hain। woh authority sab kaam kar rahi hai, yeh bhoolna mat । 'kaarya' hi siddha karta hai yeh manushya ki taakat nahin। yeh baba bhi kehte – chalte-chalte hamko pakad liya। brahma bhi naam baba ne rakha hai। woh tan bhi to marjeeva bana jo brahma naam pad gaya। to daada ka kaam nahin, daade (grand father) ka kaam hai jo kar rahe hain, jo hamko bhi himmat de rahe hain। sahansheel banne se shakti aati hai। sahan karne ka bhi baba bal de raha hai। ismen darna nahin hai। bhal is lok mein naam badnaam ho, lekin us lok mein naam baala hoga। baaki yeh to ladenge, kahenge – kaam, krodh bigar kaise kaam chalega ? yeh sab sunaakar phir baba kehte hain – manmanaabhav ।