मम्मा की मुरली - gyan-sitar-47

१८.७.६३

paramatma ki shakti unke kartavya par hi gaai jaati hai, unka kartavya hai patiton ko paavan banaana

om shanti । parampita paramatma ko yaad to sab karte hain, parantu ham abhi unko jaankar ke yaad karte hain। bhakti-maarga mein bhi paramatma ko itna to samajhte hain ki woh jaani-jaananhaar, sarvashaktivaan hai। parantu woh kaise sarvashaktivaan, jaani-jaananhaar hai- yeh unke dvaara ab hamne samjha hai। bhakti-maarga mein to sirf paramatma ke prati shraddha rakhte aaye hain। samajhte hain - “paramatma ne uthaaya, paramatma ne bithaaya, paramatma ne khilaaya, paramatma ne yeh sab diya hai। paramatma bigar ek patta bhi nahin hil sakta hai। jo bhi kuchh chalta hai, woh paramatma chala rahe hain।" kya unka kartavya, unki vishaalta, unki shakti yahi hai ? parantu yeh koi yathaartha gyaan nahin hai। apne paas to ab roshni hai। yeh koi paramatma ke mahaanta ki baaten nahin hain। agar patta bhi unke hukm se hilta hai, to phir chor-chori bhi unki shakti se karta hai ? paramatma ki shakti va mahaanta isse tailuk nahin rakhti hai। aise nahin ki jo kuchh chal raha hai, yeh paramatma ki shakti hai। shakti mein to phir kai bure kaam bhi ho rahe hain, na hone vaali baaten bhi ho rahi hain। to kyon samjhen ki yahi paramatma ki shakti hai ? paramatma ki sirf yeh shakti nahin hai। yeh apni aatma ki bhi to shakti hai na। jo bhi manushya karma karta hai, to aatma ko apni samajh hai, woh bhi to chaitanya hai। paramatma ki shakti paramatma ke kartavya se gaai jaati hai।

kai samajhte hain -- vriksha badhta hai to yeh bhi paramatma ki shakti hai। parantu nahin, woh to har cheej ko badhna-ghatna hai। har cheej ki chaitanyata apni hai। manushya ki shakti bhi to gaai jaati hai na। kehte hain - gaandhi mein shakti thi jo itna bada kaam kiya । bhookh- hadtaal aadi dvaara yeh sab kiya, jisko woh ahinsa samajhte hain। parantu ahinsa yeh nahin hai। gaandhi ne bhaarat ko svatantra banaaya । kartavya par shaktivaan samjha gaya na। to paramatma ki shakti kya hai ? kya yeh sab jo chal raha hai, ise paramatma jaanta hai ? phir to woh sab jaanta rahe aur woh baaten hoti bhi rahen। khooni ke andar khoon karne ka sankalp hai – phir baaki paramatma ke shakti ki mahaanta kya rahi ? sab kuchh paramatma jaanta hai - sirf is jaanne se kya phaayda hua ? unke jaante hue bhi ulta kaam ho jaata hai to baaki paramatma ki mahaanta kya hui ? parantu unki mahima kartavya par hai।

hamaare saare karmo ki gati ko woh jaanta hai। aise nahin, jab ham karma karte hain tab jaante hain, woh to pahle se hi jaante hain। parantu paramatma ke kartavya ki mahima tab hai jab aakar hamko apne jaanne ka phaayda dete hain। kaise ham is chakra mein aate hain, unki knowledge dete hain। woh director-creator hai, sab unke paas knowledge hai। parantu unki mahima kartavya par hai। paramatma to sab jaanta hi hai। ham aatmaayen anek janmon mein aati hain to ham hi bhool jaati hain। unke focus mein to saara drama hai। aage kya ho chuka hai- woh bhi jaante hain। parantu usse kya phaayda ? hamko giri hui stage se uthaate hain, patit se paavan banaate hain - yeh unki shakti hai। baaki sirf jaanta hai- patit hue to bhi unki shakti, paavan hue to bhi unki shakti। unki shakti mein ham patit bhi ho jaate hain to isse kya phaayda ? yeh sab baaten ab buddhi mein hain।

paramatma ki shakti unke kartavya par gaai jaati hai। humein saari roshni dete hain ki tum kitne paavan the, phir kaise patit bane । phir paavan banne ke liye kya karo – woh bhi samjhaate hain। woh sukh-daata hai। aise nahin ki sirf sukh-duhkh ko jaanta hai। daata ka kartavya hai, agar sukh-daata hai, to ham sada sukhi hone chaahien। parantu ham duhkhi bhi hote hain, uska kya kaaran hai ? yeh sab baaten ham jaante hain। paramatma ki mahaanta athva unki shreshthata kartavya se gaai jaati hai। srishti par unka kartavya sabse mahaan aur manushyon prati hua hai, tab unka gaayan hai। baaki sab kuchh paramatma karaata hai - yeh koi badaapan nahin hai। sabmen unka shreshtha kartavya hua hai, use hi badaapan kahenge। manushya srishti ko sukhi banaaya hai। saari srishti, tatva aadi jo bhi rachna hai unko satopradhaan banaaya hai, tab hi mahima hai। baaki sirf hamaare sankalpon ko read kare tab shakti samjhen, woh to १० varsha ke pahle ke sankalpon ko bhi jaanta hai, phir kya hua ? yeh koi mahaanta nahin hui । to baap ki mahima ko bhi samajhna hai।