रविवार 25 जनवरी 1970 की अव्यक्त मुरली

> 25-01-70om shanti […/…/…/jpg/Ray2.jpg]avyakt baapdaada madhuban

yaadgaar kaayam karne ki vidhi – २५-०१-१९७०

avyakt sthiti hi mukhya subject hai | vyakta mein rehte karma karte bhi avyakt sthiti rahe | is subject mein hi paas hona hai | apne buddhi ki line ko clear rakhna hai | jab raasta clear hota hai to jaldi-jaldi daudkar mazil par pahunchna hota hai | purushaartha ki line mein koi rukaavat ho to usko mitaakar line clear karna – is saadhan se hi avyakt sthiti ko praapti hoti hai | madhuban mein aakar koi-na-koi vishesh gun sabhi ko dena yahi yaadgaar hai | woh to ho gaya jad yaadgaar | lekin yeh apne gun ki yaad dena yeh hai chaitanya yaadgaar | jo sadaiv yaad karte rehte | kabhi kahin par jaao to yahi lakshya rakhna hai ki jahaan jaaen vahaan yaadgaar kaayam karen | yahaan se vishesh sneh apne mein bhar ke jaayenge to sneh patthar ko bhi paani kar dega | yeh aatmik sneh ki saugaat saath le jaana | jisse kisi par bhi vijay ho sakti hai | samay jyaada samajhte ho va kam ? to ab kam samay mein १००% tak pahunchne ki koshish karni hai | jitni bhi apni himmat hai woh poori lagaani hai | ek sekand bhi vyartha na jaae itna dhyaan rakhna hai | sangam ka ek sekand kitna bada hai | apne samay aur sankalp donon ko saphal karna hai | jo kaarya bade na kar saken woh chhote kar sakte hain | abhi to woh kaarya bhi raha hua hai | ab tak jo daudi lagaaeen woh to hui lekin ab jump dena hai tab lakshya ko pa sakenge | sekand mein bahut baaton ko parivartan karna – yeh hai jump maarna | itni himmat hai ? jo kuchh suna hai unko jeevan mein laakar dikhaana hai | jiske saath sneh rakha jaata hai, un jaisa banne ka hota hai | to jo bhi baapdaada ke gun hai woh khud mein dhaaran karna, yahi sneh ka farz hai | jo baap ki shreshthata hai usko apne mein dhaaran karna hai | yeh hai sneh | ek bhi visheshta mein kami na rahe | jab sarva gun apne mein dhaaran karenge tab bhavishya mein sarvagunsampanna devta banenge | yahi lakshya rakhna hai ki sarva gun sampanna banen | baap ke gun saamne rakh apne ko check karo ki kahaan tak hain | kam parsentej bhi na ho | parsentej bhi sampoorn ho tab vahaan bhi sambandh mein najdeek aa sakenge |

ab rooh ko hi dekhna hai | jisma ko bahut dekh-dekhkar thak gae ho | isliye ab rooh ko hi dekhna hai | jisma ko dekhne se kya mila ? dukhi hi bane | ab rooh-rooh ko dekhta hai to rahat milti hai | shoorveer ho na ! shoorveer ki nishaani kya hoti hai ? unkon koi bhi baat ko paar karna mushkil nahin lagta hai aur samay bhi nahin lagta hai | unka samay sivaae service ke apne vighnon aadi ko hataane mein nahin jaata hai | isko kaha jaata hai shoorveer | apna samay a[mein vighnon mein nahin, lekin service mein lagaana chaahiye | ab to samay bahut aage badh gaya hai | is hisaab se ab tak woh baaten bachpan ki hain | chhote bachche naazuk hote hain | bade bahaadoor hote hain | to purushaartha mein bachapna na ho | aisa bahaadoor hona chaahiye | kaisi bhi paristhiti ho, kya bhi ho, vaayumandal kaisa bhi ho | lekin kamzor na banen, isko shoorveer kaha jaata hai | shaareerik kamjori hoti hai to bhi asar ho jaata hai – mausam, vaayu aadi ka | tandurusta ko asar nahin hota hai | to yeh bhi vaayumandal ka asar naazuk ko hota hai | vaayumandal koi rachayita nahin hai | woh to rachna hai | rachayita ooncha va rachna ? (rachayita) to phir rachayita rachna ke adheen kyon ? ab shoorveer banne ka apna smriti divas yaad rakhna | yeh smriti bhoolna nahin | aisa naksha bankar jaao jo aapke naqshe mein baap ko dekhen | apne ko sampoornata ka naksha dikhaana hai | himmat hai to madad zaroor mil jaaegi | ab yeh samajhte ho ki yahaan aakar dheelepan mein tez aai hai ? abhi purushaartha ma i dheele nahin banna hai | sampoorn hak lene ke liye sampoorn aahuti bhi deni hai | koi bhi yagya racha jaata hai to woh sampoorn saphal kaise hota ? jabki aahuti daali jaati hai | agar aahuti kam hogi to yagya saphal nahin ho sakta | yahaan bhi harek ko yeh dekhna hai ki aahuti daali hai ? zara bhi aahuti ki kami rah gayi to sampoorn safalta nahin hogi | jitna aur itna ka hisaab hai | hisaab karne mein dharmaraaj bhi hai | unse koi bhi hisaab rah nahin sakta | isliye jo bhi kuchh aahuti mein dena hai woh sampoorn dena hai aur phir sampoorn lena hai | dene mein sampoornata nahin to lene mein bhi nahin hogi | jitna denge utna hi lenge | jab maaloom pad gaya ki saphalta kisme hai phir bhi saphal na karenge to kya hoga ? kami rah jaaegi isliye sadaiv dhyaan rakho ki kahaan kuchh rah to nahin gaya | mansa mein, vaani mein, karma mein kahaan bhi kuchh rehna nahin chaahiye | koi bhi kaarya ka jab samaapti ka din hota hai to us samay chaaron or dekha jaata hai ki kuchh rah to nahin gaya | vaise abhi bhi samaapti ka samay hai | agar kuchh rah gaya to woh rah hi jaayega | phir sveekaar nahin ho sakta | isko sampoorn aahuti bhi nahin kaha jaayega | isliye itna dhyaan rakhna hai | abhi kami rakhne ka samay beet chooka | ab samay bahut tez aa raha hai | agar samay tez chala gaya aur khud dheele rah gae to phir kya hoga ? manzil par pahunch sakenge ? phir satayugi manzil ke bajaaye treta mein jaana padega | jaise samay tez daud raha hai vaise khud ko bhi daudna hai | sthool mein bhi jab koi gaadi pakadni hoti hai to samay ko dekhna padta hai | nahin to rah jaate hain | samay to chal hi raha hai | koi ke liye samay ko runkana nahin hai | ab dheele chalne ke din gae | daudi ke bhi din gae | ab hai jump lagaane ke din | koi bhi baat ki kami feel hoti hai to usko ek sekand mein parivartan mein laana isko kaha jaata hai jump | dekhne mein ooncha aata hain lekin hai bahut sahaj | sirf nishchay aur himmat chaahiye | nishchay vaalon ki vijay to kalpa pahle bhi hui thi woh abhi bhi hui padi hai | itna pakka apne ko banaana hai | sekand sekand man, vaani aur karma ko dekhna hai | baapdaada ko yeh dekhna koi mushkil nahin | dekhne ke liye ab koi aadhaar lene ki aavashyakta nahin hai | kahaan se bhi dekh sakte hain | puraanon se nae mein aur hi umang hota hai ki ham karke dikhaayenge | aise teevra students bhi hain | nae hi kamaal kar sakte hain kyonki unhon ko samay bhi spashta dekhne mein aa raha hai | samay ka bhi sahayog hai, paristhitiyon ka bhi sahayog hai | paristhitiyaan bhi ab dikhla rahi hain ki purushaartha kaise karna hai | jab pareekshaaen shuru ho gayi to phir purushaartha kar nahin saktenge | phir final paper shuru ho jaayega | paper ke pahle pahunch gae ho, yeh bhi apna saubhaagya samajhna jo theek samay par pahunch gae ho | paper dene ke liye daakhil ho sake ho | paper shuru ho jaata hai phir get bandh ho jaata hai | shuru mein aaye unhon ko vairaagya dilaaya jaata tha | aajkaal ki paristhitiyaan hi vairaagya dilaati hai | aap log ki dharni banne mein deri nahin hai | sirf gyaan ke nishchay ka pakka beej daalenge aur phal taiyaar ho jaayega | yeh aisa beej hai jo bahut jaldi phal de sakta hai | beej powerful hai | baaki paalna karna, dekhbhaal karna aap ka kaam hai | baap sarvashaktivaan aur bachchon ko sankalpon ko rokne ki bhi shakti nahin ! baap srishti ko badalte hain, bachche apne ko bhi nahin badal sakte! yahi socho ki baap kya hai aur ham kya hai ? to apne oopar khud hi sharma aaega | apni chalan ko parivartan mein laana hai | vaani se itna nahin samjhenge | parivartan dekh khud hi poochhenge ki aap ko aisa banaanevaala kaun ? koi badalkar dikhta hai to na chaahte hue bhi unse poochhte hain kya hua, kaise kiya, to aap ki bhi chalan ko dekh khud kheenchenge |

yeh to nimitta seva kendra hain | mukhya kendra to sabhi ka ek hi hai | aise behad ki drishti mein rehte ho na | mukhya kendra se hi sabhi ka connection hai | sabhi aatmaon ka unse connection hai, sambandh hai | ek se sambandh rehta hai to avastha bhi ekras rehti hai | agar aur kahaan sambandh ki raag jaati hai to ekras avastha nahin rahegi | to ekras avastha banaane ke liye sivaae ek ke aur kuchh bhi dekhte hue na dekho | yeh jo kuchh dekhte ho woh koi vaastu rahne vaali nahin hai | saath rahne vaali avinaashi vaastu woh ek baap hi hai | ek ki hi yaad mein sarva praapti ho sakti hai aur sarva ki yaad se kuchh bhi praapti na ho to kaun-sa sauda achha ? dekhbhaal kar sauda kiya jaata hai ya kahne par kiya jaata hai ? yeh bhi samajh mili hai ki yeh maaya sadaiv ke liye vidaai lene thoda samay mukhda dikhlaati hai | ab vidaai lene aati hai, haar khilne nahin | chhutti lene aati hai | agar ghabraahat aai to woh kamjori kahi jaaegi | kamjori se phir maaya ka vaar hota hai | ab to shakti mili hai na | sarvashaktivaan ke saath sambandh hai to unki shakti ke aage maaya ki shakti kya hain ? sarvashaktivaan ke bachche hain, yeh nasha nahin bhoolna | bhoolne se hi phir maaya vaar karti hai | behosh nahin hona hai | hoshiyaar jo hote hain, woh hosh rakhte hain | aajkal daaku log bhi koi-koi cheez se behosh kar dete hain | to maaya bhi aisa karti hai | jo chatur hote hain woh pahle se hi jaan lete ki inka yeh tareeka hai isliye pahle se hi saavdhaan rehte hain | apne hosh ko ganvaate nahin hain | is sanjeevni booti ko sadaiv saath rakhna hai |

bhal ek maas se aaye hain | yeh bhi bahut hai | ek sekand mein bhi parivartan aa sakta hai | aise nahin samajhna ki ham to abhi aaye hain, nae hain, yahaan to sekand ka sauda hai | ek sekand mein janma siddha adhikaar le sakte hain | isliye aisa teevra purushaartha karo, yahi yukti milti hai | jo bhi baat saamne aaye to yeh lakshya rakho ki ek sekand mein badal jaaye | saare kalpa mein yahi samay hai | ab nahin to kab nahin, yeh mantra yaad rakhna hai | jo bhi puraane sanskaar hain aur puraani nature hai woh badal kar eeshvareey ban jaaye | koi bhi puraana sanskaar, puraani aadten na rahe | aapke parivartan se anek log santushta honge | sadaiv yahi koshish karni hai ki hamaari chalan dvaara koi ko bhi duhkh na ho | meri chalan, sankalp, vaani, har karma sukhdaayi ho | yeh hai brahman kul ki reeti | jo door se hi koi samajh le ki yeh ham logon se nyaare hain | nyaare aur pyaare rehna – yeh hai purushaartha | auron ko bhi aisa banaana hai | apne jeevan mein alaukikta bhaasti hai ? apne ko dekhna ki logon se nyaara apne ko samajhte hain | agar yaad bhool jaate hain to buddhi kahaan rehti hai ? sirf ek taraph se bhoolte hain to dusre taraph lagegi na | yeh apne ko check karo ki avyakt sthiti se niche aate hain to kis vyakta taraph buddhi jaati hai ? zaroor kuchh raha hua hai tab buddhi vahaan jaati hai | kis baaten aisi hoti hain jinko kheenchane se khincha jaata hai | kai baation mein dheela chhodna bhi kheenchana hota hai | patang ko ooncha udaane ke liye dheela chhodna padta hai | dekha jaata hai is reeti nahin kheenchega to phir dheela chhodna chaahiye | jisse woh svayan kheenchega |

vighnon ko mitaane ki yuktiyaan agar sadaiv yaad hain to purushaartha mein dheele nahin honge | yuktiyaan bhool jaate hain to purushaartha mein dheela ho jaata hai | ek ek baat ke liye kitni yuktiyaan mili hain ? praapti kitni badi hai aur raasta kitna saral hai | jo anek janma purushaartha karne par bhi koi nahin pa sakte | woh ek janma ke bhi kuchh ghadiyon mein praapta kar rahe ho | itna nasha rehta hai na! “ichchha maatran avidya” aisi avastha praapta karne ka tareeka bataaya | aisi oonchi knowledge aur kitni maheen hai | jeevan mein itna ooncha lakshya koi rakh nahin sakta ki main devta ban sakta hoon | yeh kab socha tha ki ham hi devta the ? socha kya tha aur bante kya ho ? bin maange amoolya ratna mil jaate hain | aise padmaapadma bhaagyashaali apne ko samajhte ho ? president aadi bhi aapke aage kya hain ? itni oonchi drishti, itna ooncha svamaan yad rehta hai ki kab bhool bhi jaate ho ? smriti-vismriti ki chadhaai utaarte chadhte ho ? gandagi se machhar aadi pragat hote hain isliye unko hataaya jaata hai | vaise hi apni kamjori se maaya ke keede pakad lete hain | kamzori ko aane na do to maaya aayegi nahin | sadaiv yeh yad rakho ki sarvashaktivaan ke saath hamaara sambandh hai | phir kamjori kyon ? sarvashaktivaan baap ke bachche hote bhi maaya ki shakti ko khalaas nahin mar sakte | ek baat sadaiv yaad rakho ki baap mera sarvashaktivaan hai | ham sabhi se shreshtha sooryavanshi hain | hamaare oopar maaya kaise vaar kar sakti hai | apna baap, apna vansh yad rakhenge to maaya kuchh bhi nahin kar sakegi | smriti svarup banna hai | itne janma vismriti mein rahe phir bhi vismriti achhi lagti hai ? ६३ janma vismriti mein dhokha khaaya, ab ek janma ke liye dhokhe se bachna mushkil lagta hai ? agar baar-baar kamzor bante, checking nahin rakhte to phir unki nature hi kamzor ban jaati hai | avastha check kar apne ko taaqatvar banaana hai, kamjori ko badal shakti laani hai |

abhi jo baithe hain woh ape ko sooryavanshi sitaare samajhte ho ? sooryavanshi sitaaron ka kya karttavya hai ? sooryavanshi sitaara maaya ke adheen ho sakte hain ? sabhi maayaajeet bane ho ? bane hain va banna hai ? maayaajeet ka title apne oopar dhaaran kiya hai ? yugal mein bhi ek kehte hain ki maayaajeet ban rahe hain aur ek kehte hain ki ban gae hain | ek hi padhaai, ek hi padhnevaala, phir bhi koi vijayi ban gae hain, koi ban rahe hain, yeh pharka kyon ? agar ab tak bhi trutiyaan rahengi to trutiyon vaale treta yug ke ban jaayenge | aur jo purushaarthi hain woh satayug ke banenge | pahle se hi poora abhyaas hoga to woh abhyaas madad dega | agar aisa hi abhyaas raha, kabhi vismriti kabhi smriti to ant samay bhi vismriti ho sakti hai | jo bahut samay ke sanskaar hote hain vaahi ant ki sthiti rehti hai | laukik reeti se jab koi shareer chhodte hain, agar koi sanskaar dridh hota hai, khaan-paan va pahanne aadi ka to pichhaadi samay bhi woh sanskaar saamne aata hai | isliye abhi se lekar sadaiv smriti ke sanskaar bharo | to ant mein yahi madadgaar banenge – vijayi banne mein | student bahut samay ki padhaai theek nahin padhte hain to paper theek nahin de sakte | bahut samay ka abhyaas chaahiye | isliye ab ye vismriti ke athva haar khaane ke sanskaar mit jaane chaahiye | abhi woh samay aa gaya | kyonki saakaar roop mein sampoornata ka saboot dekha | saakaar sampoornata ko praapta kar chuke, phir aap kab karenge ? samay ki ghanti baj chuki hai | phir bhi ghanti bajne ke baad agar purushaartha karenge to kya hoga ? ban sakenge ? pahli seeti baj chuki hai | doosri bhi baj gayi | pahli seeti thi saakaar mein maa ki aur doosri baji saakaar roop ki | ab teesri seeti bajni hai | do seeti hoti hain taiyaar karne ki aur teesri hoti hai savaar ho jaane ki | do ghanti ittalaav ki hoti hain | teesri ittalaav ki nahin hoti hai | teesri hoti hai savaar ho jaane ki | teesri mein jo rah gaya so rah gaya | itna thoda samay hai phir kya karna chaahiye ? agar teesri seeti par sanskaaron ko sametna shuru karenge to phir rah jaayenge | sunaaya tha na ki peti bistar kaun-sa hai | vyartha sankalpon roopi bistara aur anek samasyaaon ki peti donon hi band karni hai | jab donon hi samet kar taiyaar honge tab ja sakenge | agar kuchh rah gaya to buddhiyog zaroor us taraph jaayega | phir savaar ho na sakenge arthaat vijayi ban nahin sakenge | ab ise kya karna pade ? kab kar lenge yeh `kab’ shabd ko nikaal do | `ab’ shabd ko dhaaran karo | kab kar lenge, dheere-dheere karenge | aise sochnevaale door hi rah jaayenge | aisa samay ab pahunch gaya hai | isliye baapdaada suna dete hain phir koi ulahna na de | samay ka bhi aadhaar rakhna hai | agar samay ke aadhaar par thahre to praapti kuchh nahin hogi | samay ke pahle badalne se apne kiye ka phal milega | jo karega woh paayega | samay pramaan kiya, woh to samay ki kamaal hui | apni mehnat karni hai |

baap ka bachchon par sneh hota hai | to sneh ki nishaani hai sampoorn banna | chal to rahe hain lekin speed ko bhi dekhna hai | abhi sampoornata ka lakshya rakhna hai tab sampoorn raajya mein aaenge | koi kami rah gayi to sampoorn raajya nahin paaenge | jitni jyaada praja banaayenge utna najdeek mein aayenge | door vaale to door hi dekhne aaenge | najdeek vaale har kaarya mein saath rahenge | number one shaktiyaan hain va paandav hain ? dusre ko aage badhaana yeh bhi to khud aage badhna hai | aage badhaanevaale ka naam to hoga na | beech-beech mein checking bhi chaahiye | har kaarya karne ke pahle aur baad mein checking karte raho | jab kaarya shuru karte ho to dekho usi sthiti mein rah kaarya shuru kar raha hoon ? phir bich mein bhi checking karte raho | kitna samay yaad rahi ? kaarya ke shuru mein checking karne se woh kaarya bhi saphal hoga aur sthiti bhi ekras rahegi | sirf raat ko chart check karte to saara din to aise hi beet jaata hai | lekin har karma ke har ghante mein checking chaahiye | abhyaas pad jaata hai to phir woh abhyaas avinaashi ho jaata hai | himmat rakhne se phir sahaj ho jaayega | mushkil sochenge to mushkil feel hoga | apne purushaartha ko kab tez karenge, abhi samay hi kahaan hai |

saare kalpa ki takdeer is ghadi banaani hai | aise dhyaan dekar chalna hai | saare kalpa ki takdeer banne ka samay ab hai | is samay ko amoolya samajh kar prayog karo tab sampoorn banenge | ek sekand mein padmon ki kamaai karni hai | ek sekand ganvaaya goya padmon ki kamaai ganvaayi, attention itna rakhenge to vijayi banenge | ek sekand bhi vyartha nahin ganvaana hai | sangam ka ek sekand bhi bahut bada hai | ek sekand mein hi kya se kya ban sakte ho | itna hisaab rakhna hai | achha-