गुरुवार 29 दिसंबर 1983 की अव्यक्त मुरली

>

29-12-83 om shanti avyakt baapdaada madhuban

sangamayug - sahaj praapti ka yug

sarva vardaanon ke daata dilaaraam baap apne vardaani bachchon ke prati bole:-

aaj merciful dilvaala baap apne badi dil rakhne vaale dil khush bachchon se milne aaye hain। jaise baapdaada sada badi dil vaale behad ki dil vaale hain, isliye sarva ki dil lene vaale ‘dilaaraam’ hain। aise bachche bhi behad ki dil pharaakhdil daataapan ki dil rakhne vaale sada dil khush se jahaan ko khush karte hain। aise khushanseeb aatmaaen ho। aap shreshtha aatmaaen hi jahaan ke aadhaar ho। aap sabhi jagte,jaagti jyot bante to jahaan vaale bhi jagte। aap sote hain to jahaan sota hai। aap sab ki chadhti kala hoti to sarva aatmaon ka kalyaan ho jaata। sarva yathaashakti samay pramaan mukti aur jeevan-mukti ko praapta hote hain। aap vishwa par raajya karte ho to sarva aatmaaen mukti ki sthiti mein rehti hain। teenon lokon mein aapke raajya samay duhkh ashaanti ka naam nishaan nahin। aisi sarva aatmaon ko baap dvaara sukh-shanti ki anchali dilaate jo usi anchali dvaara bahut samay ki mukti ki aasha sarva ki poorn ho jaati hai। aise sarva aatmaon ko, vishwa ko yathaashakti praapti karaane vaale sva-praapti swaroop ho na! kyonki direct sarva praaptiyon ke daata, sarva shaktiyon ke vidhaata, second mein sarva adhikaar dene vaale vardaata,shreshtha bhaagya-vidhaata,avinaashi baap ke bachche bane। aisi adhikaari aatmaon ko sada adhikaar ko yaad karte roohaani shreshtha nasha aur sada ki khushi rehti hai?behad ki dil vaale, kisi had ki praapti ki taraph dil aakarshit to nahin hoti? sada sahaj praapti ke anubhveemoortta bane ho va jyaada mehnat karne ke baad thoda-sa phal praapta karte ho। vartamaan samay season hai pratyaksha phal khaane ki। ek shaktishaali sankalp va karma kiya aur ek beej dvaara padmaguna phal paana। to season ka phal arthaat sahaj phal ki praapti karte ho? phal anubhav hota hai va phal nikalne ke pahle maaya roopi panchhi phal ko khatma to nahin kar dete hain! to itna attention rehta hai va mehnat karte,yog lagaate,padhaai bhi padhte, yathaashakti seva bhi karte,phir bhi jaisa praapta hona chaahiye vaisa nahin hota। hona sada chaahiye kyonki ek ka padmaguna hai to anginat phal ki praapti hui na। phir bhi sada nahin rehta। jitna chaahiye utna nahin rehta। uska kaaran? sankalp, karma roopi beej shaktishaali nahin। vaataavran roopi dharni shaktishaali nahin। va dharni aur beej theek hai,phal bhi nikalta hai lekin ‘‘mainne kiya’’, is had ke sankalp dvaara kachcha phal kha lete va maaya ke bhinna-bhinna samasyaaen, vaataavran,sangadosh,parmat va manmat, vyartha sankalp roopi panchhi phal ko samaapta kar dete hain? isliye phal arthaat praaptiyon se,anubhootiyon ke khazaane se vaachint rah jaate। aisi vanchit aatmaon ke bol yahi hote ki - ‘pata nahin kyon’! aise vyartha mehnat karne vaale to nahin ho na। sahaj yogi ho na?sahaj praapti ki season par mehnat kyon karte ho! varsa hai,vardaan hai,season hai, badi dil vaala daata hai। pharaakhdil bhaagya vidhaata hai phir bhi mehnat kyon?sada diltakhtansheen bachchon ko mehnat ho nahin sakti। sankalp kiya aur saphalta mili। vidhi ka switch on kiya aur siddhi praapta hui। aise siddhi-swaroop ho na va mehnat kar-kar ke thak jaate ho। mehnat karne ka kaaran hai - albelaapan aur aalasya। smriti-swaroop ke kile ke andar nahin rehte ho। va kile mein rehte hue koi na koi shakti ki kamzori ke darvaaje va khidki khol dete ho। isliye maaya ko chance de dete ho। check karo ki kaunsi shakti ki kami hai arthaat kaun-sa raasta khula hua hai। sankalp mein bhi dridhta nahin hai to samjho thoda sa raasta khula hua hai। isliye kehte - chal to theek rahe hain,niyam to sab paalan kar rahe hain, shreemat par chal rahe hain lekin number one khushi aur dridhta se nahin। niyam par chalna hi padega,brahman parivaar ki loklaaj ke vash, kya kahenge, kya samjhenge, is majboori va bhay se niyam to nahin paalan karte? dridhta ki nishaani hai ‘saphalta’। jahaan dridhta hain vahaan saphalta na ho,yeh ho nahin sakta। jo sankalp mein bhi nahin hoga woh praapti hogi arthaat sankalp se praapti jyaada hogi। to vartamaan samay sahaj sarva praapti ka yug hai। dvaapar-kaliyug mehnat ka yug hai। sangam sahaj praapti ka yug hai। isliye sada sahaj yogi bhav ke adhikaari aur vardaani bano। samjha। master sarvashaktivaan ban kar ke bhi mehnat ki, to master ban ke kya kiya? mehnat se chhudaane vaala mushkil ko sahaj karne vaala baap mila,phir bhi mehnat! bojh uthaate ho isliye mehnat karte। bojh chhodo, halke bano to pharishta ban udte rahenge। achha-

aise sada dil khush, sada sahaj phal ki praapti swaroop, sada vardaata dvaara saphalta ko paane vaale vardaani, vaaris bachchon ko dilaaraam baap ka yaad-pyaar aur namaste।’’

party se

panjaab zone:- sabhi svadarshan chakradhaari ho? svadarshan chakra chalta rehta hai? jahaan svadarshan chakra hai vahaan sarva vighnon se mukta hain kyonki svadarshan chakra maaya ke vighnon ko samaapta karne ke liye hain। jahaan svadarshan chakra hai vahaan maaya nahin। baap ke bachche bane aur sva ka darshan hua। baap ka bachcha banna arthaat svadarshan chakradhaari banna। aise svadarshan chakradhaari hi vishwa-kalyaankaari hain। kyonki vighnavinaashak hain। vighna vinaashak ganesh ko kehte hain। ganesh ki kitni pooja hoti hai! kitna pyaar se pooja karte hain, kitna sajaate hain, kitna kharcha karte hain, aisi vighna vinaashak aatmaayen kaun hain? sada smriti mein rahe ki ham vighna-vinaashak hain, yeh sankalp hi vighna ko samaapta kar deta hai kyonki sankalp hi swaroop banaata hai। vighna hain-vighna hain,kahne se vighna swaroop ban jaate, kamzor sankalp se kamzor srishti ki rachna ho jaati kyonki ek sankalp kamzor hai to uske peechhe anek kamzor sankalp paida ho jaate hain। ek kyon aur kya ka sankalp, anek kyon-kya mein le aata hai। samartha sankalp utpanna hua - main mahaaveer hoon,main shreshtha aatma hoon, to srishti bhi shreshtha hoti hai। to ‘jaisa sankalp vaisi srishti’। yeh saari sankalp ki baaji hai। agar khushi ka sankalp racho to usi samay khushi ka vaataavran anubhav hoga। duhkh ka sankalp racho to khushi ke vaataavran mein bhi duhkh ka vaataavran lagega। khushi ka anubhav nahin hoga। to vaataavran banaana, srishti rachna apne haath mein hai, dridh sankalp racho to vighna chhu mantra ho jaayenge। agar sochte - pata nahin hoga ya nahin hoga to mantra kaam nahin karta। jaise koi doctor ke paas jaate hain to doctor bhi pahle yahi poochhte hain ki tumhaara mere mein faith hai?kitni bhi badhiya davaai ho lekin agar faith nahin to us davaai ka asar nahin ho sakta। yeh vinaashi baat hai,yahaan hai avinaashi baat। to sada vighnavinaashak aatmaayen hain, poojya aatmaayen hain। aapki abhi bhi kis roop mein pooja ho rahi hai? yeh last ka vikaari janma hone ke kaaran is roop ka yaadgaar nahin rakhte hain lekin kis na kis roop mein aapka yaadgaar hai। to sada aane ko master sarvashaktivaan,vighna-vinaashak shiv ke bachche ‘ganesh’ samajhkar chalo। apna hi sankalp rachte ho ki - ‘pata nahin, pata nahin’, to is kamzor sankalp ke kaaran hi phans jaate। to sada khushi mein jhoolne vaale sarva ke vighna-hartta bano। sarva ke mushkil ko sahaj karne vaale bano। iske liye bas sirf ‘dridh sankalp aur double light’। mera kuchh nahin, sab kuchh baap ka hai। jab bojh apne oopar rakhte ho tab sab prakaar ke vighna aate hain। mera nahin to - nirvighna। mera hai to vighnon ka jaal hai। to jaal ko khatma karne vaale vighna-vinaashak। baap ka bhi yahi kaarya hai। jo baap ka kaarya woh bachchon ka kaarya। koi bhi kaarya khushi se karte ho to us samay vighna nahin hota। to khushi-khushi kaarya mein busy raho। busy rahenge to maaya nahin aayegi। achha –

(2) sada saphalta ke chamakte hue sitaare hain,yeh smriti rehti hai? aaj bhi is aakaash ke sitaaron ko sab kitne pyaar se dekhte hain kyonki roshni dete hain, chamakte hain isliye pyaare lagte hain। to aap bhi chamakte hue sitaare saphalta ke ho। saphalta ko sabhi pasanda karte hain, koi praarthana bhi karte hain to kehte - yeh kaarya saphal ho। saphalta sab maangate hain aur aap svayan saphalta ke sitaare ban gaye। aapke jad chitra bhi saphalta ka vardaan abhi tak dete hain, to kitne mahaan ho,kitne oonch ho, isi nashe aur nishchay mein raho। saphalta ke peechhe bhaagne vaale nahin lekin master sarvashaktivaan arthaat saphalta swaroop। saphalta aapke peechhe-peechhe svatah aayegi।

achha - om shanti।