बुधवार 4 दिसंबर 1991 की अव्यक्त मुरली

>

04-12-91 om shanti avyakt baapdaadaamdhuban

saphal tapasvi arthaat purity ki personality aur royalty vaale

aaj chaaron or ke tapasvi bachchon ki yaad baapdaada ke paas pahunch rahi hai। koi saakaar mein sammukh yaad ka return milan mana rahe hain koi bachche aakaari roop mein yaad aur milan ka anubhav kar rahe hain। baapdaada donon hi roop ke bachchon ko dekh rahe hain। aaj amritvele baapdaada bachchon ki tapasya ka pratyaksha swaroop dekh rahe the। har ek bachcha apne purooshaartha pramaan tapasya kar rahe hain। lakshya bhi hai aur umang bhi hai। tapasvi sabhi hain kyonki brahman jeevan ki visheshta hi tapasya hai। tapasya arthaat ek ke lagan mein magna rehna। saphal tapasvi bahut thode hain। purushaarthi tapasvi bahut hain। saphal tapasvi ki nishaani unke soorat aur seerat mein purity ki personality aur purity ki royalty sada spashta anubhav hogi। tapasya ka arth hi hai man-vachan-karma aur sambandh-samparka mein apvitrata ka ansh maatra bhi vinaash hona। naam- nishaan samaapta hona। jab apvitrata samaapta ho jaati hai to is samaapti ko hi sampanna sthiti kaha jaata hai। saphal tapasvi arthaat sada-svatah pavitrata ki personality aur royalty,har bol aur karma se, drishti aur vritti se anubhav ho। purity sirf brahmacharya nahin, sampoorn pavitrata arthaat sankalp mein bhi koi bhi vikaar touch na ho। jaise brahman jeevan mein shaareerik aakarshan va shaareerik touching apvitrata maante ho, aise man-buddhi mein kisi vikaar ke sankalp maatra ki aakarshan va touching, isko bhi apvitrata kaha jaayega। pavitrata ki personality vaale, royalty vaale man-buddhi se bhi is buraai ko touch nahin karte। kyonki saphal tapasvi arthaat sampoorn vaishnav। vaishnav kabhi buri cheej ko touch nahin karte hain। to unhon ka hai sthool, aap brahman vaishnav aatmaon ka hai sookshm। buraai ko touch na karna yahi tapasya hai। dhaaran karna arthaat grahan karna। ye to bahut moti baat hai। lekin sankalp mein bhi touch nahin karna। isko hi kaha jaata hai sachche vaishnav।

sirf yaad ke samay yaad mein rehna isko tapasya nahin kaha jaata। tapasya arthaat purity ke personality aur royalty ka svayan bhi anubhav karna aur auron ko bhi anubhav karaana। saphal tapasvi ka arth hi hai vishesh mahaan aatma banna। vishesh aatmaon va mahaan aatmaon ko desh ki va vishwa ki personalities kehte hain। pavitrata ki personality arthaat har karma mein mahaanta aur visheshta। personality arthaat sada svayan ki aur auron ki seva mein sada busy rehna arthaat apni inarja,samay, sankalp vesta nahin ganvaana, saphal karna। isko kahenge personality vaale। personality vaale kabhi bhi chhoti-chhoti baaton mein apne man-buddhi ko busy nahin rakhte hain। to apvitrata ki baaten aap shreshtha aatmaon ke aage chhoti hain ya badi hain?isliye tapasvi arthaat aisi baaton ko sunte hue nahin sunen,dekhte hue nahin dekhen। aisa abhyaas kiya hai? aisi tapasya ki hai?va yahi sochte ho chaahte to nahin hain, lekin dikhaai de deta hai, sunaai de deta hai?jaise koi cheez se aapka connection hi nahin hain, un cheejon ko dekhte hue nahin dekhte ho na। jaise raaste par jaate ho, kahin kuchh dikhaai deta hai parantu aapke matlab ki koi baat nahin hai,to dekhte hue nahin dekhenge na। side scene samajh kar paar kar lenge na? aise jo baaten sunte ho, dekhte ho, aapke kaam ki nahin hain, to sunte hue nahin suno, dekhte hue na dekho। agar man-buddhi mein dhaaran kiya, ki ye aise hain, ye vaise hain… isko kaha jaayega vyartha buraai ko touch kiya arthaat sachcha vaishnavpan sampoorn roop se nahin hai। purity ke personality mein percentage kam arthaat tapasya ki percentage kam। to samjha tapasya kya hai?

isi vidhi se apne aapko check karo- tapasya varsha mein tapasya ka pratyaksha swaroop purity ki personality anubhav karte ho?parsa-nailiti kabhi chhip nahin sakti। pratyaksha dikhaai zaroor deti hai। jaise saakaar brahma baap ko dekha- purity ki personality kitni spashta anubhav karte the। ye tapasya ke anubhav ki nishaani ab aap dvaara auron ko anubhav ho। soorat aur seerat denon dvaara anubhav kara sakte ho। abhi bhi kai log anubhav karte bhi hain। lekin is anubhav ko aur svayan dvaara auron mein phailaao। aaj personality ka sunaaya। phir royalty ka sunaayenge।

sabhi milan manaane aaye hain। to baapdaada bhi milan manaane ke liye aap jaise vyakta shareer mein aate hain। samaan banna padta hai na। aap saakaar mein ho to baap ko bhi saakaar tan ka aadhaar lena padta hai। vaise aapko vyakta se avyakt banna hai ya avyakt ko vyakta banna hai? kaayda kya kehta hai?avyakt banna hai na?to phir avyakt ko vyakta mein kyon laate ho?jab aapko bhi avyakt hi banna hai to avyakt ko to avyakt hi rahne do na। avyakt milan ke anubhav ko badhaate chalo। avyakt bhi drama anusaar vyakta mein aane ke liye baandhe hue hain lekin samay pramaan circumstance pramaan avyakt milan ka anubhav bahut kaam mein aane vaala hai। isliye is anubhav ko itna spashta aur sahaj karte jaao, jo samay par yeh avyakt milan saakaar samaan hi anubhav ho। samjha - us samay aise nahin kehna ki hamko to avyakt se vyakta mein milne ki aadat hai । jaisa samay vaise milan mana sakte ho। samjha!

jo bhi jahaan se bhi aaye ho is samay sabhi madhuban nivaasi ho। ya apne ko mahaaraashtra nivaasi, udeesa nivaasi… samajhte ho? original to madhuban nivaasi ho। yeh seva arth bhinna-bhinna sthaan par gaye ho, brahman arthaat madhuban nivaasi। seva sthaan par gaye ho iseelie seva sthaan ko mera yahi sthaan hai - yeh kabhi bhi nahin samajhna। kai bachche aise kehte hain, isko change karo to kehte hain nahin,hamko panjaab mein va udeesa mein hi bhejo। to original panjaab, udeesa ke ho va madhuban ke ho । phir kyon kehte ho ham panjaab ke hain to panjaab mein hi bhejo, gujraat ke hain to gujraat mein hi bhejo? change hone mein taiyaar ho? teachers sabhi taiyaar ho?kisi ko kahaan bhi change karen, taiyaar hain? dekho,daadi sabhi ko certificate na ka de rahi hai। achha yeh bhi April mein karenge। jo change hone ke liye taiyaar hon vahi milne aaven। centre par jaakar sochenge yadi nahin rahenge ki iska kya hoga, mera kya hoga…?thoda bahut kuchh kinaara bhi karengi। baapdaada se tapasya ki prize lene chaahte ho aur baapdaada ko tapasya ki prize dene bhi chaahte ho,ya sirf lene chaahte ho?sabhi centre se surrender hokar aana। naye makaan mein aasakti hai kya? mehnat karke banaaya hai na, jahaan meraapan hai vahaan tapasya kisko kaha jaayega? tapasya arthaat tera aur tapasya bhang hona maana mera। samjha - ye to sab chhoti-chhoti teachers hain kahengi harja nahin yahaan se vahaan ho jaayengi। badon ko thoda sochna padta। achha - jo centre par aane vaale hain vo bhi sochte honge hamaari teacher chali jaayegi,aap sabhi bhi ever ready ho?koi bhi kahaan bhi chali jaaye। va kahenge hamko to yahi teacher chaahiye?jo samajhte hain ki koi bhi teacher mile usmein raazi hain woh haath uthaaven। koi bhi teacher mile baapdaada jimmevaar hai, daadi deedi jimmevaar hai,woh haath uthaayen। abhi ye T.vi. mein to nikaala hai na। sabhi ke photo T.vi. mein nikaal lo phir dekhenge। antim paper ka question hi yeh aana hai - nashtomoha smriti swaroop। to antim paper ke liye to sabhi taiyaar hona hi hai । rehearsal karenge na, zone head ko bhi change karenge। paandavon ko bhi change karenge। aapka hai hi kya ?baapdaada ne diya aur baapdaada ne liya। achha- sabhi ever ready hain isliye abhi sirf haath uthaane ki mubaarak ho।

chaaron or ke saphal tapasvi aatmaon ko,sada purity ke personality mein rahne vaali,sada purity ke royalty mein rahne vaali, sada sachche sampoorn vaishnav aatmaayen, sada samay pramaan svayan ko parivartan karne vaale vishwa parivartak, aise sada yogi, sahaj yogi, svatah yogi, mahaan aatmaon ko baapdaada ka yaadapyaar aur namaste।

party se mulaakaat

1- sabhi tapasvi aatmaaen hain - aise anubhav karte ho? tapasya arthaat ek baap doosra na koi। aise hai ya doosra koi hai abhi bhi koi hai? koi vyakti ya koi vaibhav? ek ke sivaae aur koi nahin ya thoda-thoda lagaav hai? nimitta banvar seva karna woh aur baat hai lekin lagaav jahaan bhi hoga, chaahe vyakti mein,chaahe vaibhav mein, to lagaav ki nishaani hai, vahaan buddhi zaroor jaayegi। man bhaagega zaroor। to check karo ki saare din mein man aur buddhi kahaan-kahaan bhaagti hai? sivaae baap aur seva ke aur kahaan to man-buddhi nahin jaati? agar jaati hai to lagaav hai। agar vyavhaar bhi karte ho,jo bhi karte ho, vo bhi trustee bankar। mera nahin, tera। mera kaam hai,mujhe hi dekhna padta hai… meri jimmevaari hai… aise kehte ho kabhi? kya karen, meri jimmevaari hai na, nibhaana padta hai na,karna padta hai na, kehte ho kabhi? ya tera tere arpan, mera kahaan se aaya?to yeh bol bhi nahin bol sakte ho? mujhe hi dekhna padta hai, mujhe hi karna padta hai, mera hi hai, nibhaana hi padega…। mera kaha aur bojh hua। baap ka hai, baap karega, main nimitta hoon to halke। bojh uthaane ki aadat to nahin hai? 63 janma bojh uthaaya na। kaiyon ki aadat hoti hai bojh uthaane ki। bojh uthaane bina rah nahin sakte। aadat se majboor ho jaate hain। mera maanna maana bojh uthaana। samjha। thoda sa kinaara karke rakha hai, samay par kaam mein aayega?। paandavon ne thoda bank balance, thoda jeb kharcha rakha hai? jara bhi meraapan nahin। mera maana maila। jahaan meraapan hoga na vahaan vikaaron ka mailaapan zaroor hoga। tera hai to kya hoga?tairte rahenge, doobenge nahin। tairne mein to maja aata hai na! to tapasya arthaat tera,mera nahin। achha- ye eastern zone hai। soorya uday hota hai na। to eastern zone vaalon ke paas baap ke saath ka yaadgaar soorya sada hi chamakta hai na। sabhi tapasya mein saphalta ko praapta kar rahe ho na। tapasya mein santushta ho?apne chart se santushta ho? ya abhi hona hai? yeh bhi ek lift ki gift hai। gift jo hoti hai usmein kharcha nahin karna padta, khareedne ki mehnat nahin karni padti। ek to hai apna purooshaartha aur doosra hai vishesh baap dvaara gift milna। to tapasya varsha ek gift hai,sahaj anubhooti ki gift। jitna jo karna chaahe kar sakta hai। mehnat kam,nimitta maatra aur praapti jyaada kar sakte hain। abhi bhi samay hai, varsha poora nahin hua hai। abhi bhi jo lene chaaho le sakte ho। isliye saphalta ka soorya east mein jagaao। sada sabhi khush hain ya kabhi-kabhi kuchh baaten hoti to naakhush bhi hote ho?khushi badhti jaati hai, kam to nahin hoti hai? maayaajeet ho ya maaya rang dikha deti hai? woh kitna bhi rang dikhaaye, main maayaapti hoon। maaya rachna hai,main master rachayita hoon। to khel dekho lekin khel mein haar nahin khaao। kitna bhi maaya anek prakaar ka khel dikhaaye,aap dekhne vaale manoranjan samajhkar dekho। dekhte-dekhte haar nahin jaao। saakshi hokar ke, nyaare hokar ke dekhte chalo। sabhi tapasya mein aage badhne vaale,gift lene vaale ho? seva achhi ho rahi hai? svayan ke purooshaartha mein ud rahe hain aur seva mein bhi ud rahe hain। sabhi first hain। sada first rehna,second mein nahin aana। first rahenge to sooryavanshi banenge, second banen to chandravanshi। first number maayaajeet honge। koi samasya nahin,koi problem nahin, koi question nahin, koi kam-jori nahin। first number arthaat fast purooshaartha। jiska fast purooshaartha hai vo peechhe nahin ho sakta। sada saakshi aur sada baap ke saathi - yahi yaad rakhna।

2- sada apne ko sahajyogi,sahaj gyaani samajhte ho? sahaj hai ya mehnat hai? jab maaya bade roop mein aati hai to mushkil nahin lagta? madhuban mein baithe ho to sahaj hai, vahaan pravritti mein rehte jab maaya aati hai phir mushkil lagta hai? kabhi-kabhi kyon lagta hai,uska kaaran?maarga kabhi mushkil, kabhi sahaj hai - aise nahin kahenge। maarga sada sahaj hai, lekin aap kamzor ho jaate ho isi-liye sahaj bhi mushkil lagta hai। kamzor ke liye koi chhota sa bhi kaarya bhi mushkil lagta hai। apni kamzori mushkil bana deti hai, baaki mushkil hai nahin। kamzor kyon hote hain? kyonki koi na koi vikaaron ke sang dosh mein aa jaate hain। sat ka sang kinaare ho jaata hai aur doosra sang dosh lag jaata hai। isliye bhakti mein bhi kehte hain ki sada satsang mein raho। satsang arthaat sat baap ke sang mein rehna। to aap sada satsang mein rehte ho ya aur sang mein bhi chakkar lagaate ho? satsang ki kitni mahima hai! aur aap sabke liye sat baap ka sang ati sahaj hai। kyonki sameep ka sambandh hai। sabse sameep sambandh hai baap aur bachche ka। yeh sambandh sahaj bhi hai aur saath-saath praapti karaane vaala bhi hai। to aap sabhi sada satsang mein rahne vaale sahaj yogi, sahaj gyaani hai। sadaiv yeh socho ki ham auron ki bhi mushkil ko sahaj karne vaale hain। jo doosron ki mushkil ko sahaj karne vaala hota woh svayan mushkil mein nahin aa sakta। achha seva mein quality hai ya quantity hai? quality vaalon ki nishaani kya hoti hai?

quality vaali aatma ki nishaani hai -woh aate hi apnaapan mahsoos karegi। usko ye smriti spashta hogi ki main isi parivaar ka tha aur pahunch gaya hoon। apnepan se nishchay mein ya purooshaartha mein deri nahin lagegi। woh apne parivaar ko parakh lega,apne baap ko pah-chaan lega। to apnepan ka anubhav hona ye purooshaartha mein quality ki nishaani hai। sirf naam ya dhan mein quality nahin,usko sirf quality nahin kaha jaata hai, lekin purooshaartha ki bhi quality usmein ho aur jiska atal nishchay pakka rehta hai,uska prabhaav svatah hi auron par padta hai। apnaapan hone ke kaaran usko sab sahaj anubhav hoga। isliye teevra arthaat fast jaayega। jahaan apnaapan hota hai vahaan koi bhi kaam mushkil nahin lagta hai। to aisi quality vaali aatmaayen aur jyaada se jyaada nikaalo। samjha। aap sab to quality vaali aatmaaen ho na। vriddhi ko praapta kar rahe ho aur aage bhi karte rahenge। pahle sva ke purooshaartha mein vriddhi,phir seva mein। to denon baaton mein sada hi vriddhi ko praapta karte,udte chalo। achha। maataaon ko bahut khushi hai ya kabhi-kabhi duhkh ki lahar bhi aa jaati hai? kuchh bhi ho jaaye,duhkh ki lahar to nahin aati hai? sankalp mein bhi duhkh ki mahsoosta nahin ho। sukhdaata ke bachche ho na। sukhdaata ke bachchon ke paas duhkh ki leshmaatra bhi nahin aa sakti। svapna mein bhi nahin aa sakti। aise sukhdaayi aatma ho? kya bhi ho jaaye duhkh nahin ho sakta। sukh mein rahne vaale aur sukh dene vaale। duhkh ki duniya ko chhod diya।

3- double videshi bataao - aapka is aabu parvat par kaun sa yaadgaar hai?achha bhaaratvaasi sunaao aapka yaadgaar kaun sa hai? achha - bhaaratvaasiyon ka yaadgaar achalgadh hai aur double videshiyon ka yaadgaar dilvaala hai?ya denon hi yaadgaar denon ke hain? achalgadh kaun ban sakta hai? jisne dilaaraam ko apna bana liya,vahi achal ban sakta hai। isliye denon hi yaadgaar bahut kaayde pramaan bane hue hain। agar dilvaala baap ko apna nahin banaaya to achal ki bajaae halchal hoti hai। koi bhi cheej mein halchal hoti rahe to woh toot jaayegi aur jo achal hogi vo sada kaayam rahegi। to sadaiv ye smriti mein rakho ki ham dilvaala baap ko dil dene vaali achal aatmaayen hain। ye mera yaadgaar hai - harek anubhav kare। aise nahin - ye brahma baap ka ya mahaarthiyon ka hai। nahin, mera yaadgaar hai। dekho draamaanusaar apne yaadgaar sthaan par hi pahunch gaye। nahin to paakistaan se aabu mein aana - yeh to svapna mein bhi nahin aa sakta tha। lekin drama mein yaadgaar yahin tha to kaise pahunch gaye hain। apne hi yaadgaar ko dekh harshit hote rehte ho। achal rehna - koi mushkil baat nahin hai। koi bhi cheej ko hilaate raho to mehnat bhi aur mushkil bhi। seedha rakh do to woh sahaj hai। aise hi man-buddhi dvaara halchal mein aana kitna mushkil hota hai aur man buddhi ekaagra ho jaati hai to kitna sahaj hota hai। abhi halchal mein aana pasanda hi nahin karenge। achha nahin lagega। aadhaakalpa halchal mein aate thak gaye। tan ki bhi halchal,man ki bhi halchal, dhan ki bhi halchal। tan se bhi bhatakte rahe। kabhi kis mandir mein। kabhi kis yaatra par, to kabhi kis yaatra par aur man pareshaaniyon mein, halchal mein aate raha aur dhan mein to dekho- kabhi lakhapti to kabhi kakhapti। to anek janmon ki halchal ka anubhav hone ke kaaran abhi achal avastha ati priy lagti hai। iseelie doosron ke oopar raham aata hai। shubh bhaavna, shubh kaamna utpanna hoti hai ki ye bhi achal ho jaaye। achal sthiti vaalon ka vishesh gun hoga - merciful। sada har ek aatma ke prati daataapan ki bhaavna। aise master daata bane ho ki doosre ko dekhkar ghrina aati hai? raham aata hai, daya bhaav aata hai,daataapan ki smriti aati hai?ya kyon kya utpanna hai? aap sabka vishesh title hai - vishwa kalyaankaari। jo vishwa kalyaankaari hai usko har aatma ke prati kalyaan ki bhaavna hogi। uske andar svatah hi kisi aatma ke prati bhi ghrina bhaav, dvesh bhaav, eershya bhaav ya glaani ka bhaav kabhi utpanna nahin hoga। isko kaha jaata hai vishwa kalyaankaari aatma। to aise ho? ya kabhi-kabhi doosre bhaav bhi aa jaate hain? bas,sada kalyaan ka bhaav ho।