सोमवार 1 मार्च 1999 की अव्यक्त मुरली

>

01-03-99 om shanti avyakt baapdaadaamdhuban

holi manaana arthaat sampoorn pavitra bankar sanskaar milan manaana

aaj baapdaada chaaron or ke apne holiest aur highest bachchon ko dekh rahe hain। vishwa mein sabse highest oonche-te-oonche shreshtha aatmaayen aap bachchon ke sivaae aur koi hai?kyonki aap sabhi oonche-te-oonche baap ke bachche hain। saare kalpa mein chakra lagaakar dekho to sabse oonche martabe vaale aur koi nazar aate hain? raajya-adhikaari swaroop mein bhi aapse oonche raajya adhikaari bane hain? phir poojan aur gaayan mein dekho jitni pooja vidhipoorvak aap aatmaon ki hoti hai usse jyaada aur kisi ki hai?wonderful raaz drama ka kitna shreshtha hai jo aap svayan chaitanya swaroop mein,is samay apne poojya swaroop ko knowledge ke dvaara jaante bhi ho aur dekhte bhi ho। ek taraph aap chaitanya aatmaayen hain aur doosre tarap aapke jad chitra poojya roop mein hain। apne poojya swaroop ko dekh rahe ho na? jad roop mein bhi ho aur chaitanya roop mein bhi ho। to wonderful khel hai na! aur raajya ke hisaab se bhi saare kalpa mein nirvighna,akhanda-atal raajya ek aap aatmaon ka hi chalta hai। raaje to bahut bante hain lekin aap vishvaraazan va vishvaraajan ki royal family sabse shreshtha hai। to raajya mein bhi highest, poojya roop mein bhi highest aur ab sangam par parmaatma-varse ke adhikaari,parmaatma milan ke adhikaari, parmaatma-pyaar ke adhikaari,parmaatma-parivaar ki aatmaayen aur koi banti hain?aap hi bane ho na? ban gaye ho ya ban rahe ho? ban bhi gaye aur ab to varsa lekar sampanna ban baap ke saath-saath apne ghar mein bhi chalne vaale hain। sangam ka sukh, sangamayug ki praaptiyaan,sangamayug ka samay suhaana lagta hai na! bahut pyaara lagta hai। raajya ke samay se bhi sangam ka samay pyaara lagta hai na? pyaara hai ya jaldi jaane chaahte ho? phir poochhte kyon ho ki baba vinaash kab hoga? sochte ho na - pata nahin vinaash kab hoga? kya hoga? ham kahaan honge?baapdaada kehte hain jahaan bhi honge - yaad mein honge, baap ke saath honge। saakaar mein ya aakaar mein saath honge to kuchh nahin hoga। saakaar mein kahaani sunaai hai na। billi ke poongare bhatthi mein hote hue bhi safe rahe na! ya jal gaye? sab safe rahe। to aap parmaatma bachche jo saath honge woh safe rahenge। agar aur kahaan buddhi hogi to kuchh-na-kuchh sek lagega, kuchh-na-kuchh prabhaav hoga। saath mein combined honge, ek second bhi akele nahin honge to safe rahenge। kabhi-kabhi kaamkaaz ya seva mein akele anubhav karte ho? kya karen akele hain, bahut kaam hai! phir thak bhi jaate hain। to baap ko kyon nahin saathi banaate! do bhuja vaalon ko saathi bana dete, hazaar bhuja vaale ko kyon nahin saathi banaate। kaun jyaada sahayog dega?hazaar bhuja vaala ya do bhuja vaala?

sangamayug par brahmaakumaar va brahmaakumaari akele nahin ho sakte। sirf jab seva mein,karmayog mein bahut busy ho jaate ho na to saath bhi bhool jaate ho aur phir thak jaate ho। phir kehte ho thak gaye, abhi kya karen! thako nahin, jab baapdaada aapko sada saath dene ke liye aaye hain, paramdham chhodkar kyon aaye hain? sote,jaagte,karma karte, seva karte, saath dene ke liye hi to aaye hain। brahma baap bhi aap sabko sahayog dene ke liye avyakt banen। vyakta roop se avyakt roop mein sahayog dene ki raphtaar bahut teevra hai, isliye brahma baap ne bhi apna vatan change kar diya। to shiv baap aur brahma baap donon har samay aap sabko sahayog dene ke liye sada haazar hain। aapne socha baba aur sahayog anubhav karenge। agar seva, seva,seva sirf vahi yaad hai,baap ko kinaare baith dekhne ke liye alag kar dete ho, to baap bhi saakshi hokar dekhte hain,dekhen kahaan tak akele karte hain। phir bhi aane to yahaan hi hain। to saath nahin chhodo। apne adhikaar aur prem ki sookshm rassi se baandhakar rakho। dheela chhod dete ho। sneh ko dheela kar dete ho,adhikaar ko thoda sa smriti se kinaara kar dete ho। to aise nahin karna। jab sarvashaktivaan saath ka offer kar raha hai to aisi offer saare kalpa mein milegi? nahin milegi na? to baapdaada bhi saakshi hokar dekhte hain, achha dekhen kahaan tak akele karte hain!

to sangamayug ke sukh aur suhejon ko emerge rakho। buddhi busy rehti hai na to busy hone ke kaaran smriti merge ho jaati hai। aap socho saare din mein kisi se bhi poochhen ki baap yaad rehta hai ya baap ki yaad bhoolti hai?to kya kahenge? nahin। yeh to right hai ki yaad rehta hai lekin emerge roop mein rehta hai ya merge rehta hai? sthiti kya hoti hai?emerge roop ki sthiti ya merge roop ki sthiti, ismen kya antar hai?emerge roop mein yaad kyon nahin rakhte? emerge roop ka nasha shakti,sahayog,saphalta bahut badi hai। yaad to bhool nahin sakte kyonki ek janma ka naata nahin hai, chaahe shiv baap satayug mein saath nahin hoga lekin naata to yahi rahega na! bhool nahin sakta hai, yeh right hai। haan koi vighna ke vash ho jaate ho to bhool bhi jaata hai lekin vaise jab natural roop mein rehte ho to bhoolta nahin hai lekin merge rehta hai। isliye baapdaada kehte hain - baar-baar check karo ki saath ka anubhav merge roop mein hai ya emerge roop mein? pyaar to hai hi। pyaar toot sakta hai? nahin toot sakta hai na? to pyaar jab toot nahin sakta to pyaar ka phaayda to uthaao। phaayda uthaane ka tareeka seekho।

baapdaada dekhte hain pyaar ne hi baap ka banaaya hai। pyaar hi madhuban nivaasi banaata hai। chaahe apne sthaan par kaise bhi rahen, kitna bhi mehnat karen lekin phir bhi madhuban mein pahunch jaate hain। baapdaada jaante hain, dekhte hain,kai bachchon ko kaliyugi circumstance hone ke kaaran ticket lena bhi mushkil hai parantu pyaar pahuncha hi deta hai। aise hai na? pyaar mein pahunch jaate hain lekin circumstance to din pratidin badhte hi jaate hain। sachchi dil par saaheb raazi to hota hi hai। lekin sthool sahayog bhi kahaan-na-kahaan kaise bhi mil jaata hai। chaahe double foreigners hon, chaahe bhaaratvaasi, sabko yeh baap ka pyaar circumstance ki deevaar paar kara leta hai। aise hai na? apne-apne centres par dekho to aise bachche bhi hain jo yahaan se jaate hain, sochte hain pata nahin doosre varsha aa sakenge ya nahin aa sakenge lekin phir bhi pahunch jaate hain। yeh hai pyaar ka saboot। achha।

aaj holi manaai?mana li holi?baapdaada to holi manaane vaale holi hanson ko dekh rahe hain। sabhi bachchon ka ek hi title hai holiest। dvaapar se lekar kisi bhi dharmaatma ya mahaatma ne sarva ko holiest nahin banaaya hai। svayan bante hain lekin apne followers ko,saathiyon ko holiest, pavitra nahin banaate aur yahaan pavitrata brahman jeevan ka mukhya aadhaar hai। padhaai bhi kya hai?aapka slogan bhi hai ‘‘pavitra bano-yogi bano’’। slogan hai na? pavitrata hi mahaanta hai। pavitrata hi yogi jeevan ka aadhaar hai। kabhi-kabhi bachche anubhav karte hain ki agar chalte-chalte mansa mein bhi apvitrata arthaat vesta va negative,parchintan ke sankalp chalte hain to kitna bhi yog powerful chaahte hain, lekin hota nahin hai kyonki zara bhi anshamaatra sankalp mein bhi kisi prakaar ki apvitrata hai to jahaan apvitrata ka ansh hai vahaan pavitra baap ki yaad jo hai, jaisa hai vaise nahin aa sakti। jaise din aur raat ikaththa nahin hota। iseelie baapdaada vartamaan samay pavitrata ke oopar baar-baar attention dilaate hain। kuchh samay pahle baapdaada sirf karma mein apvitrata ke liye ishaara dete the lekin abhi samay sampoornata ke sameep aa raha hai isliye mansa mein bhi apvitrata ka ansh dhokha de dega। to mansa, vaacha,karmana,sambandh-samparka sabmen pavitrata ati aavashyak hai। mansa ko halka nahin karna kyonki mansa baahar se dikhaai nahin deti hai lekin mansa dhokha bahut deti hai। brahman jeevan ka jo aantarik varsa sada sukh swaroop, shant swaroop, man ki santushtata hai, uska anubhav karne ke liye mansa ki pavitrata chaahiye। baahar ke saadhnon dvaara ya seva dvaara apne aapko khush karna - yeh bhi apne ko dhokha dena hai।

baapdaada dekhte hain kabhi-kabhi bachche apne ko isi aadhaar par achha samajh,khush samajh dhokha de dete hain, de bhi rahe hain। de dete hain aur de bhi rahe hain,yeh bhi ek gu¿ raaz hai। kya hota hai,baap daata hai,daata ke bachche hain, to seva yuktiyukta nahin bhi hai,mix hai,kuchh yaad aur kuchh baahar ke saadhnon va khushi ke aadhaar par hai, dil ke aadhaar par nahin lekin dimaag ke aadhaar par seva karte hain to seva ka pratyaksha phal unhon ko bhi milta hai;kyonki baap daata hai aur woh usi mein hi khush rehte hain ki vaah hamko to phal mil gaya,hamaari achhi seva hai। lekin woh man ki santushtata sadaakaal nahin rehti aur aatma yogayukta powerful yaad ka anubhav nahin kar sakti, usse vanchit rah jaate। baaki kuchh bhi nahin milta ho,aisa nahin hai। kuchh-na-kuchh milta hai lekin jama nahin hota। kamaaya,khaaya aur khatma। isliye yeh bhi attention rakhna। seva bahut achhi kar rahe hain, phal bhi achha mil gaya, to khaaya aur khatma। jama kya hua?achhi seva ki, achhi result nikli,lekin woh seva ka phal mila,jama nahin hota। isliye jama karne ki vidhi hai - mansa,vaacha, karmana - pavitrata। foundation pavitrata hai। seva mein bhi foundation pavitrata hai। svachchha ho,saaph ho। aur koi bhi bhaav mix nahin ho। bhaav mein bhi pavitrata, bhaavna mein bhi pavitrata। holi ka arth hi hai - pavitrata। apvitrata ko jalaana। iseelie pahle jalaate hain phir manaate hain aur phir pavitra ban sanskaar milan manaate hain। to holi ka arth hi hai - jalaana,manaana। baahar vaale to gale milte hain lekin yahaan sanskaar milan,yahi mangal milan hai। to aisi holi manaai ya sirf dance kar li? gulaabjal daal diya? woh bhi achha hai khoob manaao। baapdaada khush hote hain gulaabjal bhale daalo, dance bhale karo lekin sada dance karo। sirf 5-10minute ki dance nahin। ek-do mein gunon ka vibration phailaana - yeh gulaabjal daalna hai। aur jalaane ko to aap jaante hi ho, kya jalaana hai! abhi tak bhi jalaate rehte ho। har varsha haath uthaakar jaate hain, bas dridh sankalp ho gaya। baapdaada khush hote hain,himmat to rakhte hain। to himmat par baapdaada mubaarak bhi dete hain। himmat rakhna bhi pahla kadam hai। lekin baapdaada ki shubh aasha kya hai? samay ki date nahin dekho। 2hazaar mein hoga, 2001 mein hoga, 2005 mein hoga,yeh nahin socho। chalo ever ready nahin bhi bano isko bhi baapdaada chhod dete hain, lekin socho bahutkaal ke sanskaar to chaahiye na! aap log hi sunaate ho ki bahutkaal ka purooshaartha,bahutkaal ke raajya-adhikaari banaata hai। agar samay aane par dridh sankalp kiya,to woh bahutkaal hua ya alpakaal hua? kismen ginti hoga?alpakaal mein hoga na! to avinaashi baap se varsa kya liya? alpakaal ka। yeh achha lagta hai? nahin lagta hai na! to bahutkaal ka abhyaas chaahiye,kitna kaal hai woh nahin socho, jitna bahutkaal ka abhyaas hoga,utna ant mein bhi dhokha nahin khaayenge। bahutkaal ka abhyaas nahin to abhi ke bahutkaal ke sukh, bahutkaal ki shreshtha sthiti ke anubhav se bhi vanchit ho jaate hain। isliye kya karna hai?bahutkaal karna hai? agar kisi ke bhi buddhi mein date ka intajaar ho to intazaar nahin karna, intazaam karo। bahutkaal ka intazaam karo। date ko bhi aapko laana hai। samay to abhi bhi ever ready hai,kal bhi ho sakta hai lekin samay aapke liye rooka hua hai। aap sampanna bano to samay ka parda avashya hatna hi hai। aapke rokne se rooka hua hai। raajya-adhikaari to taiyaar ho na? takhta to khaali nahin rehna chaahiye na! kya akela vishvaraajan takhta par baithega! isse shobha hogi kya? royal family chaahiye,praja chaahiye, sab chaahiye। sirf vishvaraajan takhta par baith jaae, dekhta rahe kahaan gai meri royal family। isliye baapdaada ki ek hi shubh aasha hai ki sab bachche chaahe naye hain, chaahe puraane hain,jo bhi apne ko brahmaakumaari ya brahmaakumaar kahlaate hain,chaahe madhuban nivaasi, chaahe videsh nivaasi,chaahe bhaarat nivaasi - har ek bachcha bahutkaal ka abhyaas kar bahutkaal ke adhikaari banen। kabhi-kabhi ke nahin। pasanda hai? ek haath ki taali bajaao। peechhe vaale hoshiyaar hain, attention se sun rahe hain। baapdaada peechhe vaalon ko apne aage dekh raha hai। aage vaale to hain hi aage। (meditation haal mein baithkar murli sun rahe hain) neeche vaale baapdaada ke sir ke taaj hokar baithe hain। woh bhi taali baja rahe hain। neeche vaalon ko tyaag ka bhaagya to milna hi hai। aapko sammukh baithne ka bhaagya hai aur unhon ke tyaag ka bhaagya jama ho raha hai। achha baapdaada ki ek aash suni! pasanda hai na! abhi agle varsha kya dekhenge?aise hi phir bhi haath uthaayenge! haath bhale uthaao,do-do uthaao parantu man ka haath bhi uthaao। dridh sankalp ka haath sada ke liye uthaao।

baapdaada ek-ek bachche ke mastak mein sampoorn pavitrata ki chamakti hui mani dekhne chaahte hain। naynon mein pavitrata ki jhalak, pavitrata ke do naynon ke taare, roohaaniyat se chamakte hue dekhne chaahte hain। bol mein madhurta, visheshta,amoolya bol sunne chaahte hain। karma mein santushtata,nirmaanta sada dekhne chaahte hain। bhaavna mein - sada shubh bhaavna aur bhaav mein sada aatmik bhaav, bhaai-bhaai ka bhaav। sada aapke mastak se light ka, pharishte pan ka taaj dikhaai de। dikhaai dene ka matlab hai anubhav ho। aise saje sajaaye moortta dekhne chaahte hain। aur aisi moortta hi shreshtha poojya banegi। woh to aapke jad chitra banaayenge lekin baap chaitanya chitra dekhne chaahte hain। achha –

chaaron or ke sada baapdaada ke saath rahne vaale,sameep ke sada ke saathi, sada bahutkaal ke purooshaartha dvaara bahutkaal ka sangamayugi adhikaar aur bhavishya raajya-adhikaar praapta karne vaale ati sensible aatmaayen, sada apne ko shaktiyon, gunon se saje-sajaaye rakhne vaale, baap ki aashaaon ke deepak aatmaayen, sada svayan ko holiest aur highest sthiti mein sthit rakhne vaale baap samaan ati snehi aatmaon ko baapdaada ka yaadapyaar aur namaste।

sarva videsh va desh mein door baithe hue bhi sammukh anubhav karne vaalon ko baapdaada ka bahut-bahut-bahut yaadapyaar।

daadi ji

se baapdaada aapko sada mubaarken bahut dete hain। tan ki duaayen bhi dete hain,man ka saath bhi dete hain aur seva ke saathi bhi bante hain। aise anubhav hota hai? tan ki duaayen bhi bahut milti hain। yeh davaai bahut achhi mil rahi hai। baaki hisaab-kitaab to brahma baap ne bhi chuktu kiya to sabko karna hai। sab sooli se kaanta ho jaata hai, baaki duaayen bahut milti hain। parivaar dvaara bhi to baapdaada dvaara bhi। amritvele se lekar raat tak baapdaada duaaon se maalish karte rehte hain। aise anubhav hota hai na? aap nahin chal rahi hain, chalaane vaala chala raha hai, iseelie athak hain। achha।

special duaayen hain। (daadi jaanki se)special duaayen hain na?sab nimitta banne vaalon ko special duaayen milti hain। aap foreigners se kya chaahti ho? (sabhi baapdaada ke gale mein piro jaayen) yeh to bahut kuchh chaahti hain, aap bhi bahut kuchh karte ho na! yeh pyaar ki paalna de rahi hain, itna attention rakhna- yahi dil ka pyaar hai। jisse pyaar hota hai na uski kami dekh nahin sakte। (baapdaada ne daadi, daadi jaanki ko saath mein bithaaya)

yeh daadiyaan jo hain na - yeh baap ke bade bhaai hain। to bhaai to saath baithte hain na?achhi mehnat nahin lekin muhabbat achhi karte hain। baapdaada bhi nimitta banne vaalon ko aur jo karne vaale hain unhon ko dekhkar khush hote hain। aap bhi kam nahin ho। aur yeh bhi kam nahin hain। achha।

(shaantivan se yahaan achha lagta hai)lekin anek vanchit rah jaayenge। sabhi bhaai-bahnon ka khyaal to rakhna hai na। yeh to holi ka chance aapko mil gaya hai।

videshi bhaai-bahnon se

pahla chance double foreigners ko mila hai। dekho sabka double foreigners se kitna pyaar hai। pahla chance aapko hi mila hai। achha hai,baapdaada seva mein vriddhi ka umang-utsaah dekh khush hota hai। baapdaada vatan mein bhi aapki meetings,plan,programme,rooh-roohaan sab kuchh dekhte hain। achha chance bhi milta hai। har saal foreign mein itna sangathan to nahin ho sakta hai। yahaan ek to kitna behad ka bada parivaar hai, yeh dekhne ko milta hai, sabka parichay ho jaata hai। aur doosra powerful paalna bhi milti hai, pyaar bhi milta hai। aur beech beech mein thodi si strikta ki aankh dikhaana bhi zaroori hai। attention hai lekin attention ko underline ho jaata hai। aise anubhav karte ho jo madhuban mein paalna milti hai to underline to hoti hai na! aur sameep bhi aate hain।

baapdaada ko double foreigners ki,majority ki ek visheshta vartamaan samay ki bahut achhi lagti hai, ek to jo baar-baar something-something kehte the na,woh abhi majority ka kam hai। pahle to chhoti-chhoti baat mein kehte the something, sometime। lekin abhi achhe himmat vaale ban aage badh rahe hain। bachpan poora hua hai,kahaan-kahaan purooshaartha mein youth hain aur kahaan-kahaan vaanaprastha ke nazdeek hain। to youth vaalon ko abhi bhi thodi lahar aati hai। aayu mein youth nahin, purooshaartha mein। phir bhi pahle aur abhi mein antar hai। abhi nolezphul ho gaye hain। samajh gaye hain - kya karna hai,kaise chalna hai, iske nolezphul ban gaye hain। baaki kya raha hai?abhi powerful banna hai, usmein underline karo। centre bhi badhte jaate hain। himmat rakhkar centre kholte achhe hain। jo sabhi centres sambhaalte hain,centre par rehte hain woh haath uthaao। achha - to centre par rahne vaale va nimitta banne vaale kabhi thakaavat hoti hai?thodi-thodi hoti hai? thoda time hoti hai phir theek ho jaate hain। achha hai, dekho aap logon ko ek vishesh lift hai seva ki। bhaarat mein to pahle training karte hain phir trial par rehti phir teacher banti aur aap log seedha hi centre incharge ban jaate। to yeh chance to achha hai na। double kaam karte hain। himmat ke kaaran aage badh rahe ho aur badhte rahenge। job bhi karte, centre bhi sambhaalte,thak kar aate phir thode time mein apne ko refresh kar phir centre sambhaalte, yeh dekh karke baapdaada ko kabhi-kabhi dil mein vishesh pyaar aata hai। double busy ho gaye na। lekin double kaarya karne ka double phaayda bhi hota hai। seva karna arthaat apne punya ka khaata jama karna aur jitna nihsvaartha,yuktiyukta seva bhaav se seva karte hain,utni punya ki poonji jama karte ho। aur vahi punya ki poonji, khazaana saath mein le jaayenge। us punya ki kamaai aadhaakalpa ki kamaai ho jaayegi। to punya aatmaayen achhi ho। main nimitta sevaadhaari punya aatma hoon, yeh smriti chhote-chhote paapon se mukta kar deti hai। to sada check karo ki aaj ke din mansa dvaara ya seva dvaara kitne punya jama kiye? aur punya ke aadhaar se chhoti-chhoti baaten kitni samaapta ho gai? kharcha kitna hua aur bachat kitni hui?agar baar-baar vighna aate hain aur usko mitaane ke liye gun aur shaktiyon ka kharcha karte hain to woh kitna hua?aur yogayukta avastha se baap ko saathi banaakar seva karne mein punya ka khaata kitna jama hua?sabse bade se bade malteemiliyner aap ho। ek din mein dekho kitni kamaai karte ho? itni kamaai na foreign mein koi kar sakta hai, na bhaarat mein kar sakta hai। to multi multi lagaate jaao jaise hisaab mein bindi lagaao to badh jaata hai na। ek ke aage ek bindi lagaao to 10 ho jaata hai aur do bindi lagaao to 100 ho jaata hai aur lagaao to hajaar ho jaata hai,bindi ki kamaal hai। to aap aise bindi lagaate jaao, multi multi multi-millionaire ho jaao।

achha - sab theek ho?paandav theek hain? bahut achha। baapdaada ko bhi naaz hai ki vishwa mein jahaan bhi jaao baap ke bachche hain। aap logon ko bhi nasha hota hai na jis desh mein bhi jaao to kya kahenge?hamaara ghar hai। aise lagta hai na kitne ghar ho gaye hain aapke? itne ghar kiske honge? sabhi kehte ho baba ka ghar hai, baba ke ghar mein ja rahe hain। kitne laadle ho gaye ho। iseelie sada khush। svapna mein bhi duhkh ki lahar nahin aave। svapna bhi aaven to khushi ke। udaasi ke nahin,thakaavat ke nahin, moonjhane vaale nahin। khushi ke। to aise hai? aise khush raho jo aapka khushi ka chehra dekh rone vaale bhi khush ho jaaen। aisi khushi hai na?rone vaale ko hansa sakte ho na! chehra badli nahin ho। kabhi aisa, kabhi aisa nahin। sada muskaraata rahe। achha - kitne percent refresh hue? 100 percent ya 90percent? 101percent achha।

achha - doosre varsha jab aayenge to 101 hoga ya neeche jaayega ya oopar jaayega?sabhi ka oopar jaayega! jo samajhte hain dekhenge, jaane ke baad pata padega। chaahte to aise hain lekin dekhenge, woh haath uthaao। aise koi hai। first time vaale haath uthaao। achha…।

doosra group - aabu nivaasi,sevaadhaari,hospital nivaasi tatha party se

sabhi apne shreshtha bhaagya ko dekh harshit hote hain? sada harshit। kabhi-kabhi to nahin?sabhi kehte hain baap mila sab kuchh mila। jab sab mila,to jahaan sarva praapti hain, vahaan sada khushi hai hi। aise hai na?khushi kam tab hoti hai jab koi apraapti hai। to koi apraapti hai kya? to sada khush। khushi apni khuraak hai। to khuraak ko koi chhodta hai kya? to sada khush rahne vaale, auron ko bhi khushi baantate hain। jab bhi aapko koi dekhe to khushi ki jhalak dikhaai de। aise anubhav karte ho?baapdaada sada har bachche ko khushanseeb ki nazar se dekhte hain। khushanseeb hain aur khushmijaaj hain। kabhi chehra badli to nahin hota? thoda sa soch mein,thoda sa kanaphyuz chehra to nahin hota hai na! ya thoda-thoda ho jaate ho?kanaphyuz hote ho? haan haan kah rahe ho?kabhi-kabhi hote hain। kabhi-kabhi bhi nahin। baap ke bachche sada ekras rehte hain। kabhi kis ras mein, kabhi kis ras mein,nahin। ekras,sada khush। theek hai na? abhi nahin badalna। aaj ke din isko jala do। khatma। kuchh bhi ho, baap saath hai, moonjhane ki kya baat hai। kanaphyuz hone ki kya baat hai। baap ke saath ka sahayog lo, akele samajhte ho to mauj ke bajaae moonjh jaate ho। to moonjhana nahin। theek hai na? abhi bhi moonjhenge। (nahin) abhi nahin moonjh rahe ho, mauj mein ho isliye kehte ho ki nahin moonjhenge! kuchh bhi ho jaae lekin mauj nahin jaae। theek hai na ya mauj chali jaayegi?mauj nahin jaani chaahiye। seva ka bal hai to us bal ko kaarya mein lagaao। sirf seva nahin karo lekin seva ka bal jo baap se milta hai, usko kaam mein lagaao। sirf seva kar rahe hain, seva kar rahe hain to thak jaate ho,moonjh bhi jaate ho lekin baap ke saath ka anubhav, jahaan baap hai vahaan mauj hi mauj hai। to saath ko emerge karo, sunaaya na - yaad karte ho lekin saath ko use nahin karte,iseelie moonjh jaate ho। sangamayug maujon ka yug hai ya moonjhane ka yug hai? mauj ka hai to phir moonjhate kyon ho? abhi apne jeevan ki dictionary se moonjhana shabd nikaal do। nikaal liya?pakka। ya thoda-thoda dikhaai dega? ekdam mita do। paramatma ke bachche aur mauj mein nahin rahe to aur kaun rahega aur koi hai kya? to sada mauj hi mauj hai। sabhi apni duty par khush ho? ya thoda-thoda duty mein khitkhit hai? kuchh bhi ho jaae, yeh paper paas karna hai। baat nahin hai, paper hai। to paper paas karne mein khushi hoti hai na। class aage badhte hain na! to baat ho gai,samasya aa gai yeh nahin socho। paper aaya paas hua, mauj manaao। jab bachche paper paas karke aate hain to kitne mauj mein hote hain,moonjhate hain kya! yeh paper to aayenge। paper hi anubhav mein aage badhaate hain, isliye sada mauj mein rahne vaale। sevaadhaari nahin lekin mauj mein rahne vaale। sada yeh apna title yaad karo। hospital ke sevaadhaari hain, nahin,mauj mein rahne vaale sevaadhaari hain। achha।

doctors to mauj mein rehte ho na?patient ko mauj dilaane vaale। bahut achha। (baapdaada sabhi se haath uthvaakar mil rahe hain।)

sabhi bahut-bahut punya ka khaata jama kar rahe ho। variety guldasta sabse pyaara lagta hai। variety ki sada shobha hoti hai, sundarta hoti hai, isliye pyaara lagta hai। to sthaan anek hain lekin hain sab ek। ek hi lakshya hai, ek hi mat hai aur ek hi baap hai, ek hi parivaar hai aur avastha bhi ekras। ekras hai na? aur ras mein nahin jaana,maaya kha jaayegi। isliye ekras rehna। maaya ko bhi aapse pyaar hai na। 63janmon ka pyaar hai। lekin aap jaante ho ki maaya se pyaar rakhna hai ya baap se? to jahaan baap hoga vahaan maaya nahin aayegi। maaya bhaag jaayegi,himmat hi nahin hogi baap ke najdeek aane ki। koi bhi paristhiti aave to dil se baba kaha, paristhiti bhaagi। anubhav hai na! bhagaana aata hai ya bithaana aata hai? usko bithaana nahin। bhagaao, door se bhagaao। aa jaave phir nikaalne ki mehnat karo,woh bhi nahin karna। door se hi bhagaao। baap ka haath pakad lo to dekhegi yeh to baap ka haath pakda hua hai to bhaag jaayegi। to sada maayaajeet। theek hai na! dekho aaj najdeek mein to baithe ho na। chance to mila na। abhi to nahin kahenge hamko to kabhi chance nahin mila। mil gaya na? bada parivaar hai to baantakar milta hai। achha to sab khushraaji। baapdaada ka shabd yaad hai na - sada। kabhi kabhi vaale nahin,sada। hospital vaale bhi achhi mehnat kar rahe hain। hospital ka kaarya bhi badh raha hai। achha।

teesra group—madhuban nivaasi bhaai-bahnon se

madhuban nivaasi arthaat karma mein madhurta aur vritti mein behad ka vairaagya। one mein kya hota hai?behad ka vairaagya hota hai na! to madhuban nivaasi arthaat extra gift ke adhikaari। gift hai na! kitne nishchint ho। apni duty bajaai aur mauj mein rahe। madogri karni hai, jigyaasuon ko sambhaalna hai, isse to free hain na! jyaada mein jyaada 8ghanta duty। kam hi hai। itphaak kabhi extra deni padti hogi। lekin aur jimmevaari to nahin hai na। chalo bijli vaale ko bijli ki jimmevaari ya jo bhi duty hai, ek hi duty hai na। anek to nahin hai। to 8ghanta to duty ke liye baapdaada ne diya hai, kabhi12 ghanta bhi ho jaata hoga,to bhi 8ghanta aaraam,achha 12ghanta duty to bhi 4 ghanta to bachta hai। 12 ghanta se jyaada to duty hogi nahin। 12ghante mein to saara din aa gaya। phir kabhi raat ko karni padti hogi to din mein halka hoga। to kam se kam 4ghanta powerful yog rehta hai? nirantar yaad to hai hi lekin powerful yaad woh kam se kam 4 ghante hai?to madhuban nivaasiyon ko special attention rakhna hai ki humein chaaron or powerful yaad ke vibration phailaane hain kyonki aap oonche-te-oonche sthaan par baithe ho। sthaan to ooncha hai na! isse ooncha to koi hai nahin। to oonchi tower jo hoti hai, woh kya karti hai?sakaash deti hai na! light might phailaate hain na। to kam se kam 4ghante aise samjho ham oonche te oonche sthaan par baith vishwa ko light aur might de raha hoon। yeh to aapko achhi tarah se anubhav hai ki madhuban ka vibration chaahe kamjori ka, chaahe power ka - donon hi bahut jaldi phailta hai। anubhav hai na! madhuban mein sui bhi girti hai to woh aavaaj bhi pahunchta hai kyonki madhuban nivaasiyon ki taraph sabka attention hota hai। madhuban vaale samjho vijay praapta karne aur karaane ke nimitta hain। madhuban ki mahima kitni sunte ho! madhuban ke geet bhi gaate ho na। to madhuban ke deevaaron ki mahima hai ya madhuban nivaasiyon ki mahima hai! kiski mahima hai? aap sabki। to aise apni jimmevaari samjho। sirf apna kaam kiya, duty poori ki yeh jimmevaari nahin। madhuban ka vaayumandal chaaron or vaayumandal banaata hai। baapdaada ko khushi hai ki aapas mein sangathan banaakar unnati ke plan va roohrihaan karte hain। yeh bahut achha hai,isko chhodna nahin। sangathan mein laabh hota hai aur saara din samjho karmana kiya, thoda samay bhi aapas mein unnati ki roohrihaan karne se change ho jaate hain। umang-utsaah bhi badhta hai। to baapdaada ko yeh achha lagta hai, jo group banaakar baithte ho usko halka nahin karo aur powerful banaao। miss bhi nahin karna chaahiye। aap samjho hamaare mein to taakat hai,hamne to sab kuchh kar liya hai, nahin। sahayog dena bhi seva hai। baithne ki jaroorat nahin ho,lekin baithna - yeh bahut seva hai। baapdaada ne samaachaar suna hai, achha hai। isko aur badhaao। murli to sunte ho lekin murli sunne ke baad karmana mein chale jaate ho to beech-beech mein karma conscious bhi ho jaate ho। kuchh yog lagaate ho,kuchh karma conscious ho jaate ho। lekin aapas mein aisi roohrihaan karna - yeh ek do ko refresh karna hai। vaayumandal ko powerful banaana hai। to is khushkhabri par baba bahut khush hai।

abhi sabko kam se kam 4 ghante ka chart daadi ko dena chaahiye। pasanda hai? 4se 6 ho jaae to kam nahin karna। 6 ho jaae, 8 ho jaae bahut achha। lekin kam se kam 4ghanta, ikaththa nahin mile koi harja nahin। 5 minute 10 minute powerful stage banaao - total mein 4ghanta hona chaahiye। chaahe aadha ghanta milta hai, chaahe5 minute milta hai lekin jama 4 ghanta hona chaahiye। ho sakta hai? jo samajhte hain ho sakta hai woh haath uthaao। achha yeh to sabhi ever ready hain। baapdaada khush hai, himmat bahut achhi hai। baapdaada extra madad dega, himmat nahin haarna। himmat rakhenge to parivaar ki bhi madad, badon ka bhi man se sahayog milega। aur baapdaada to ek ka padamguna deta hi hai। to sabko pasanda hai?achha - 4ghante se kam nahin karna। ek din agar 4 ghante nahin ho to doosre din 6 ghante karke 4 ghante poore karna। kar sakte ho? dekho,soch samajhkar haan karo। abhi prabhaav mein aakar haan nahin karo। kar sakte hain? (daadi se) dekh rahi ho na। sabhi ne haath uthaaya hai। inhon ko to mubaarak ka inaam hai। advance mein mubaarak hai। inaam ko chhodna nahin। bahut achha।

baapdaada to madhuban nivaasiyon ko sada naynon ke saamne dekhte hain। noore ratna dekhte hain। madhuban nivaasi banna koi chhoti si baat nahin hai। madhuban nivaasi banna arthaat anek gift ke adhikaari banna। dekho,sthool gift bhi madhuban mein bahut milti hai na! aur kitna svamaan milta hai। agar madhuban vaala kahaan bhi jaata hai to kis najar se sabhi dekhte hain?madhuban vaala aaya hai। to itna apna svamaan sada emerge rakho। merge nahin, emerge। theek hai na?

abhi baapdaada chart poochhte rahenge? 15-15din ke baad chart ki result dekhenge। theek hai na! chart mein dena - haan ya na। oopar taareekh likhna aur neeche haan na, haan na। bas do ya 3 ya 4ghanta powerful yaad rahi। bas, jyaada nahin likhna। padhne ka time nahin milta hai na। madhuban nivaasiyon se sabhi ka pyaar hai aur aap logon ko kitni duaayen milti hain। jo aai.pi. bhi aate hain, yog shivir mein aate hain, conference mein aate hain to madhuban ki seva dekh karke duaayen to dete hain na। har ek ke dil se nikalta hai - vaah sevaadhaari vaah! to duaayen bhi to jama ho rahi hain। to kamaal karke dikhaana। madhuban vaalon ka record 4 ghante ka zaroor ho, jyaada bhi ho to aur achha। yahi pravritti vaalon ko, centre vaalon ko, sabhi ko powerful banaayega। nimitta aap bano। achha। khushraaji hain, yeh poochhne ki aavashyakta hai?ya khush rehte hi ho, poochhne ki aavashyakta hai? khush to sabhi hain hi। sabhi ke chehre dekho, sabhi ke daant nikle hue hain। bahut achhe ho। apni visheshta dekho aur usko kaarya mein lagaao।

vishesh madhuban ki bahinon se baat kar rahe hain। baapdaada sab dekhte hain। baapdaada se kuchh chhipta nahin hai। andar ka bhi dekhta hai,to baahar ka bhi dekhta hai। madhuban ki bahinen vishesh apni-apni visheshta ko kaarya mein lagaao। har ek mein visheshtaayen hain, aise nahin koi visheshta nahin hai। sabhi mein hain। sirf usko kaarya mein lagaane se vriddhi ko praapta hoti jaayengi। auron ki bhi visheshta dekho aur apni visheshta kaarya mein lagaao। kam nahin hain। sabhi kya bulaate hain! madhuban ki bahinen। madhuban naam aane se hi kitni khushi ho jaati hai। to madhuban ki bahinen kam nahin hain। sabhi ke duaaon ki paatra ho। punya ka khaata jitna banaane chaaho utna bana sakte ho। chance hai। samay ko jitna saphal karne chaaho utna kar sakte ho। chance to hai na! ya chance nahin milta hai?chance aapehi lo, chance aise nahin milega। koi kahe haan yeh karo,nahin। chance lo। chance lene se kya ban jaayenge? chancellor। madhuban vaale bhaagyavaan to hain hi lekin apne bhaagya ko kaarya mein lagaao। samjha। bahinen hain sikeeldhi aur bhaai hain bahut। sikeeldhi hain na! bahut achha hai। abhi4 ghante mein pahla number bahinen aani chaahiye। aise nahin kehna - yeh ho gaya na। yeh hona nahin chaahiye na! yeh nahin। karna hi hai। pakka! inhon ki photo nikaalo।

achha। om shanti।