गुरुवार 3 फ़रवरी 2005 की अव्यक्त मुरली

03-02-05 om shanti avyakt baapdaada madhuban

seva karte upraam aur behad dvaara ever ready ban,bahma baap samaan sampanna bano

aaj great great grand father apne chaaron or ke koton mein koi aur koi mein bhi koi bachchon ke bhaagya ko dekh harshit ho rahehain। itna vishesh bhaagya aur kisi ko bhi mil nahin sakta। har ek bachche ki visheshta ko dekh harshit hote hain। jin bachchon ne baapdaada se dil se sambandh joda un har ek bachchon mein koi na koi visheshta zaroor hai। sabse pahli visheshta saadhaaran roop mein aayen hue baap ko pahchaan "mera baba" maan liya। yeh pahchaan sabse badi visheshta hai। dil se maana mera baba, baap ne maana mera bachcha। jo bade-bade philaasophar saainsadaan dharmaatma nahin pahchaan sake, woh saadhaaran bachchon ne pahchaan apna adhikaar le liya। koi bhi aakar is sabha ke bachchon ko dekhe to samajh nahin sakenge ki in bholi bholi maataaon ne, in saadhaaran bachchon ne itne bade baap ko pahchaan liya। to yeh visheshta - pahchaanna,baap ko pahchaan apna banaana, yeh aap koton mein koi bachchon ka bhaagya hai। sabhi bachchon ne jo bhi sammukh baithe hain va door baithe sanmukh anubhav kar rahe hain, to sabhi bachchon ne dil se pahchaan liya hai! pahchaan liya hai ki pahchaan rahe hain? jisne pahchaan liya hai woh haath uthaao। (sabhi ne haath uthaaya) pahchaan liya?achha। to baapdaada pahchaanne ke visheshta ki har ek bachche ko mubaarak de rahe hain। vaah bhaagyavaan bachche vaah! pahchaanne ka teesra netra praapta kar liya। bachchon ke dil ka geet baapdaada sunte rehte hain, kaun sa geet? paana tha vo pa liya। baap bhi kehte O laadle bachche, jo baap se lena tha vo le liya। har ek bachcha anek roohaani khazaanon ke baalak so maalik ban gayen।

to aaj baapdaada khazaanon ke maalik bachchon ke khazaana ka potaamel dekh rahe the। baap ne khazaana to sabko ek jaisa, ek jitna diya hai। kisko padam,kisko laakh nahin diya hai। lekin khazaanon ko jaanna aur praapta karna,jeevan mein samaana ismen nambarvaar hain। baapdaada aajkal baar-baar bhinna-bhinna prakaar se bachchon ko attention dila rahe hain - samay ki sameepta ko dekh apne aapko sookshm vishaal buddhi se check karo kya mila, kya liya aur nirantar un khazaanon mein palte rehte hai? checking bahut aavashyak hai kyoki maaya vartamaan samay bhinna-bhinna royal prakaar ke albelaapan aur royal aalasya ke roop mein trial karti rehti hai। isliye apni checking sada karte chalo। itne attention se,albele roop se checking nahin - bura nahin kiya, dukh nahin diya. buri drishti nahin hui, yeh checking to hui lekin achhe te achha kya kiya? sada aatmik drishti natural rahi? ya vismriti smriti ka khel kiya? kitno ko shubh bhaavna,shubh kaamna,duaayen di?aise jama ka khaata kitna aur kaise raha? kyonki achhi tarah se jaante ho ki jama ka khaata sirf abhi kar sakte hain। yeh samay, full season khaata jama karne ki hai। phir saara samay jama pramaan raajya bhaagya aur poojya devi-devta banne ka hai। jama kam to raajya bhaagya bhi kam aur poojya banne mein bhi nambarvaar hota hai। jama kam to pooja bhi kam, vidhipoorvak jama nahin to pooja bhi vidhipoorvak nahin, kabhi-kabhi vidhipoorvak hai to pooja bhi aur pad bhi kabhi-kabhi hai। isliye baapdaada ka har ek bachche se ati pyaar hai,to baapdaada yahi chaahte ki har ek bachcha sampanna bane,samaan bane। seva karo lekin seva mein bhi upraam behad।

baapdaada ne dekha hai majority bachchon ki yong arthaat yaad ki subject mein ruchi va attention kam hota hai, seva mein jyaada hai। lekin bina yaad ke seva mein jyaada hai to usmein had aa jaati hai। upraam vritti nahin hoti। naam aur maan ka,position ka mix ho jaata hai। behad ki vritti kam ho jaati hai। isliye baapdaada chaahte hai ki koto mein koi,koi mein koi mere bachche abhi se ever ready ho jaayen, kyon?kai sochte hai samay aane par ho jaayenge। lekin samay aapki kriyenshan hai,kya kriyenshan ko apna shikshak banaayenge? doosri baat jaante ho ki bahutkaal ka hisaab hai, bahutkaal ki sampannata bahutkaal ki praapti karaati hai। to abhi samay ki sameepta pramaan bahutkaal ka jama hona aavashyak hai phir ulhana nahin dena ki hamne to samjha bahutkaal mein samay pada hai। abhi se bahutkaal ka attention rakho। samjha! attention please।

baapdaada yahi chaahte ki bachche mein bhi kimi bhi ek subject ki kami nahin rah jaae। brahma baap se to pyaar hai na! pyaar ka return to denge na! to pyaar ka return hai - apni kami ko check karo aur return do, tarna karo। apne aapko tarna karna, yeh return hai। to return dene ki himmat hai?haath to utha lete ho, bahut khush kar lete ho। haath dekhkar to baapdaada khush ho jaate hain, abhi dil mein pakka-pakka ek percent bhi kachcha nahin,pakka vrat lo - return dena hi hai। apne aapko tarna karna hai।

abhi shivraatri aa rahi hai na! to sabhi bachchon ko baap ki jayanti so apni jayanti manaane ka umang bahut pyaar se aata hai। achhe-achhe programme bana rahe hain। seva ke plan to bahut achhe banaate ho,baapdaada khush hota hai। lekin, lekin kehna achha nahin lagta hai। jagat amba maa lekin shabd ko kehti thi, sindhi bhaasha mein, le-kin,kin kehte hain kichde ko। to lekin kehna maana kuchh na kuchh kichda lena। to lekin kehna achha nahin lagta hai। kehna padta hai। jaise aur seva ke plan banaaye bhi hai aur banaayenge bhi lekin is vrat lene ka bhi programme banaana। return dena hi hai kyonki jab baapdaada ya koi poochhte hain kaise hain? to majority ka yahi uttar aata hai, hain to bahut achhe lekin jitna baapdaada kehte hain utna nahin। abhi yeh uttar hona chaahiye jo baapdaada chaahte hain vahi hai। note karo baapdaada kya chaahta hai, woh list nikaalo aur check karo baapdaada yeh chaahta hai, woh hai ya nahin hai?duniya vaale aap poorvajo dvaara mukti chaahte hain, chilla rahe hain, mukti do, mukti do। jab tak majority bachche apne puraane sanskaar, jisko aap nature kehte ho, natural nahin nature, usmein kuchh bhi thoda raha hua hai. mukta nahin hue hai to sarva aatmaon ko mukti nahin mil sakti। to baap daada kehte hain - he muktidaata ke bachche master muktidaata abhi apne ko mukta karo to sarva aatmaon ke liye mukti ka dvaar khul jaae। sunaaya tha na - get ki chaabi kya hai, “behad ka vairaagya”। kaarya sab karo lekin jaise bhaashnon mein kehte ho pravritti vaalon ko kamal pushpa samaan bano, aise sab kuchh karte,karttaapan se mukta, nyaare,na saadhnon ke vash, na position ke। kuchh na kuchh mil jaae yeh position nahin opposition hai maaya ki। nyaare aur baap ke pyaare। mushkil hai kya, nyaare aur pyaare banna? jisko mushkil lagta hai woh haath uthaao। (kisi ne haath nahin uthaaya) kisko bhi mushkil nahin lagta hai phir to shivraatri tak sab sampanna ho jaayenge। jab mushkil nahin hai to banna hi hai। brahma baap samaan banna hi hai। sankalp mein bhi, bol mein bhi, seva mein bhi, sambandh-samparka mein bhi, sabmen brahma baap samaan।

achha jo samajhte hain,brahma baap aur daada, great great grand father,usse mera bahut-bahut 100 percent se bhi jyaada pyaar hai, woh haath uthaao। khush nahin karna, sirf abhi- abhi khush nahin karna। sabhi ne uthaaya hai। T.vi. mein nikaal rahe ho na। shivraatri par yeh T.vi. dekhenge aur hisaab lenge। theek hai! jara bhi samaanta mein antar nahin ho। pyaar ke peechhe kurbaan karna, kya badi baat hai। duniya vaale to ashuddha pyaar ke peechhe jeevan bhi dene ke liye taiyaar ho jaate hain। baapdaada to sirf kehte hain, kichda de do bas। achhi cheej nahin do, kichda de do। kamzori,kami kya hai?kichda hai na! kichda kurbaan karna kya badi baat hai! paristhiti samaapta ho jaae,sva-sthiti shreshtha ho jaae। bataate to yahi hain na,kya karen paristhiti aisi thi। to hilaane vaali parasthiti ka naam hi nahin ho, aisi sva-sthiti shaktishaali ho। samaapti ka parda khule to sab kya dikhaai deven?pharishte chamak rahe hain। sabhi bachche chamakte hue dikhaai den। iseelie abhi parda khulna ruka hua hai। duniya vaale chilla rahe hain, parda kholo, parda kholo। to apna plan aap hi banaao। bana hua plan dete hain na to phir kai baaten hoti hai। apna plan apni himmat se banaao। dridhta ki chaabi lagaao to saphalta milni hi hai। dridh sankalp karte ho aur baapdaada khush hote hain vaah bachche vaah! dridh sankalp kiya lekin dridhta mein phir thoda- thoda albelaapan mix ho jaata hai। iseelie saphalta bhi kabhi aadhi, kabhi pauni parsentej mein ho jaati hai। jaise pyaar 100 percent hai vaise purushaartha mein sampannata,yeh bhi 100 percent ho। jyaada bhale ho,kam nahin ho। pasanda hai? pasanda hai na? shivraatri par jalva dikhaayenge na! banna hi hai। ham nahin banege to kaun banega! yeh nishchay rakho,ham hi the, ham hi hai aur phir bhi ham hi honge। yeh nishchay vijayi bana dega। par-darshan nahin karna, apne ko hi dekhna। kai bachche roohrihaan karte hain na,kehte hain bas isko thoda sa theek kar do, phir mai theek ho jaaoonga। ise thoda badli kar do to main bhi badli ho jaaoonga lekin na woh badlega na aap badlenge। svayan ko badlenge to woh bhi badal jaayenga। koi bhi aadhaar nahin rakho, yeh ho to yeh ho। mujhe karna hi hai। achha - shivraatri abhi aani hai na!

achha,jo pahle baari aaye hain - woh haath uthaao। to jo pahli baari aaye hain unhon ke liye vishesh baapdaada kehte hain ki aise samay par aaye ho jab samay bahut kam bacha hai lekin purushaartha itna teevra karo jo last so fast, fast so first number aa jaao kyonki abhi chairs game chal rahi hai। abhi kiski jeet hai,woh out nahin hua hai। let to aaye ho lekin fast chalne se pahunch jaayenge। sirf apne aapko amritvele amar bhav ka vardaan yaad dilaana। achha - sabhi koi door se koi najdeek se aaye hain। baapdaada kehte hain bhale padhaare apne ghar mein। sangathan achha lagta hai। T vi mein dekhte ho na, sabha kul hone se kitna achha lagta hai। achha। to ever ready? ever ready ka paath padhenge na। achha।

seva ka tarna – indaur zone:- Indore vaale utho, haath hilaao। bahut aaye hain। bahut achha। chance lena yeh bhi bahut shreshtha takdeer banaana hai। takdeervaan ho jo chance mila bhi hai aur liya bhi hai। baapdaada to sada kehte hain ki yeh 15 - 20 din har zone ko jo golden chance milta hai,yeh bahut-bahut svamaan, sva-sthiti aur punya ka khaata jama karne ka chance hai। to sabhi ne umang- utsaah se seva ki hai,uski mubaarak hai। achha hai Indore to sada antarmukh rehta hoga, in-dor hai na,dor ke andar rahne vaale to antarmukhi ho gaye na। to antarmukhi sada sukhi hota hai। to Indore nivaasiyon ko natural vardaan ho gaya - antarmukhi sada sukhi। to kamaai jama ki?jyaada mein jyaada ki ya thodi ki? sabne bahut kamaai ki'achha। ek brahman ko khilaate hain,seva karte hain uska bhi punya maante hain। aapne to kitne braahmanon ki seva ki। to aapke punya ka khaata bahut bada jama ho gaya। aur sachche braahmanon ki seva ki। to punya ka khaata bhi itna mahaan ho gaya। achha hai। umang-utsaah se sva-unnati kar rahe hain,karte rehna aur aage udte rehna। achha।

medical wing:- achha kiya hai, inhonne apne wing mein vishesh dhaarna bahut achhi rakhi hai। daya,dua evam dava। daya, dua,dava to kitna achha rakha hai। to check karna - daya bhaav raha? tang hoke to seva nahin ki? koi aisa patient aa jaae tang to nahin hote! dua bhi do, dava bhi do to sada ke liye patient nahin,patience ho jaae। patience mein aa jaae। dekho, jo doctors hote hain na unko next god kehte hain, to aapki seva ka kitna mahattva hai,title mila hai next god। iseelie lakshya achha rakha hai daya aur dua। davaai dena to kaarya hai hi। jo bhi patient aave, rota aave aur muskaraate jaave tab kahenge daya aur dua ki। chillaata aave aur aaraam se jaayen। achha hai। mendikal wing ka to saboot hai, doctor baitha hai na (da. sateesh gupta) medical wing ne saboot diya hai, government tak aavaaj pahuncha hai। baapdaada chaahta hai aise har ek wing ka government tak aavaaj jaaye। dekho, president ne bhi kaha ki brahmaakumaariyaan bina kharche ke heart theek kar deti hai। to yeh bhi aavaaj phaila na। government tak aavaaj zaroor jaana chaahiye। government tak jaane ka matlab hai ki woh aavaaj automatic phailega। jaise pahle aap log kya karte the,koi na koi neta ko bula lete the aur T vi mein nikalta tha। abhi to TV aapki ho gai hai lekin pahle bulaate the to naam hove। T vi vaale aave, aavaaj phaile। abhi isse oopar chale gayen hai, abhi TV. vaale aapko aur hi poochhne ke liye aate hain, aap kya karte ho,kaise karte ho। to pharka hua na। to government tak pahunchne se aavaaj phail jaata hai। to achha kar rahe hain, mubaarak ho।

sport wing:-achha। (mama, baba, deedi, daadi ka photo baidmintan khelte hue dikha rahe hain)chitra dikha rahe hain। achha sabhi ko dikhaao। achha hai - koi na koi aisi aatmaon ko sandesh do jo woh mike banke aavaaj phailaayen। programme banaaya hai na achha hai। baapdaada chaahte hain jaise sport mein jo gaaye hue naameegraami hain, woh mike bane। itna purushaartha karo। har ek varga ka jo sabse vishesh gaaya hua hai,woh aapka mike bane। aapko mike banne ki aavashyakta nahin padegi। har ek varga vaala yeh koshish karo bhinna-bhinna subject hoti hain, usmein se koi naameegraami dhoondho usko anubhav karaao aur woh apna anubhav sunaaye। aapko kharcha bhi nahin karna padega,mehnat bhi nahin karni padegi। har varga ko aise karna chaahiye। saadhaaran ki to kar hi rahe ho। yeh mega programme kar rahe ho to general aa rahe hain lekin abhi thoda quality ki seva karo। har ek varga aisa ek do mike taiyaar karo kyonki abhi to kaaphi samay ho gaya hai, varga vaale seva kar rahe hain, parichay to abhi kaaphi ho gaya hai। abhi ek ek koi aisa taiyaar karo,chalo regular student nahin ho lekin mike to bane kyonki aisi aatmaayen regular student mushkil bante hain, anubhav to sunaaven। to is varsha yeh karna। har ek varga koshish karo aur phir unhon ka sangathan ho jaae,chhota sangathan,bada nahin। to ek do ko dekh karke bhi umang aata hai। theek hai na! to pahle kaun karega? aap karenge। achha – in advance mubaarak ho।

sikyooriti wing:- (banner dikha rahe hai) lakshya to achha rakha hai,inhonne lakshya rakha hai, “suraksha,seva, sampoorn samarpan”। sampoorn samarpan ho gaya to phir to sampoorn ho hi jaayenge। achha lakshya rakha hai। apne ko samarpan karna arthaat nimitta aur nirmaan banna। nimitta aur nirmaan banne se saphalta to hai hi। achha hai, aap logon ko to ant tak seva karni padegi। ant ke samay aapki seva jyaada hogi। achha hai har ek wing lakshya ko dohraate rehna। likha to sabhi ne achha hai, lakshya ko lakshan banaake hi chhodna hai। aaj to lathya dikhaaya hai, abhi lakshan dekhenge। sabhi wing ne achha lakshya rakha hai। achha - koi military vaale taiyaar kar rahe ho? sikyooriti ke har group mein connection rakho। chaahe desh ke liye, chaahe aatmaon ke liye jo sikyureti department hai un sabki seva ho kyonki yeh samay par bahut kaam mein aane hain। jaisa samay naajuk hoga to aapko unhon ki madad se aavaaj phailaane mein bahut achha hoga। connection sabse rakho। jo bhi shaakhaayen hai,unhon se bhi samparka rakho। sevaadhaari bahut hote hai na to samay par sevaadhaari kaam mein aave। achha hai phir bhi baapdaada dekhte hain har varga koshish achhi kar rahe hain। achha,mubaarak ho।

SpARC group:- (moolyanishtha samaaj ki rachna karne ka lakshya rakh abhiyaan nikaalne ka socha hai, jismen har zone har wing isi ke antargat seva kare, saath- saath antim samay ki taiyaariyaan tatha sanskaar parivartan ke vishay par gahan anubhooti karaane ka lakshya rakha hai)

bahut achha, ghar ghar mein aavaaj phail jaayega। aur aisa group taiyaar karo jo government tak bhi aavaaj jaaye,yeh abhiyaan karaayenge to aavaaj jaayega। achha socha hai। sankhya to bahut hai। sab result nikaalna, phir baapdaada aur mubaarak denge। achha hai yeh umang-utsaah,apne purushaartha mein bhi umang-utsaah badhaayega। sirf seva mein hi nahin,saath mein apne purushaartha mein bhi umang-utsaah badhta jaae, seva bhi badhti jaae। baaki achha kiya hai, mubaarak ho।

youth group bhi seva karke aayen hain:- seva mein khushi ka meva khaaya kyonki seva ka meva milta hai khushi, umang-utsaah। to sirf seva ki, seva ke saath meva khaaya, kitni khushi rahi? khush rahe aur khushi baanti yeh meva khaaya aur meva khilaaya। aise hi aage badhte chalo। achha kiya hai । mehnat achhi ki hai। mehnat ki mubaarak aur aage badhne ki bhi mubaarak ho। achha।

double videshi:-kitne deshon se hain? (35 deshon se) achha hai double videshiyon se madhuban saj jaata hai। chaahe gyaan sarovar mein raho, chaahe neeche raho lekin aap madhuban ke double shrringaar ho। sab aapko dekhkar khush hote hain। aur baapdaada ne sunaaya ki jab sthaapna hui to baapdaada ka ek title nahin tha, aur jab videsh seva hui hai to practical mein woh title aa gaya। woh kaun-sa title?vishwa kalyaankaari। to abhi vishwa mein kone-kone mein sevaakendra hain। har khanda mein anek sevaakendra hain। ek yu.ke.,Europe mein kitne honge,Australia mein kitne honge? to vishwa kalyaankaari ka title double foreign seva se siddha hua aur aap jaante ho na - baapdaada ko ek double pharinarsa ki visheshta bahut achhi lagti hai। jaante ho? sachchaai saphaai। bata dete hain। himmat thodi- thodi bhale kam ho lekin bata dete hain । chhipaane ki aadat nahin hai। to sachchaai baap ko priy hai। satyata,mahaanta ko praapta karaane vaali hoti hai। bahut achha kiya hai,jis desh se nikle usi desh ke sevaadhaari ban gaye। nahin to bhaaratvaasi bachchon ko kitni bhaashaayen seekhni padti। pahle to yeh padhaai padhni padti lekin aap aaye sevaadhaari ban gaye। seva ka saboot bhi laate ho iski bahut-bahut-bahut mubaarak। aur sabhi O. ke. rahne vaale, O .ke. kabhi nahin bhoolna। achhe hain, achhe te achhe rehna hi hai। videsh ko number one lena hai। win karke one lena hai। theek hai na! win karne vaale one number lene vaale। theek hai?aise hain?tu number nahin na! one। win aur one। achhe hain, sabhi ko pyaare lagte hain। aapko sab dekhne chaahte hain। baapdaada ne to dekh liya, abhi ghoom jaao jo sab aapko dekhen। dekhon, darshaneey moorta ban gaye। (jayanti behen se) yeh theek hai! achha hai। achha।

jibraaltar sabse chhota bachcha hai,bahut achha nimitta ban aage ja rahe hain:-

bahut achha। sabse number one jaana। achha। sabhi apni- apni seva kar rahe hain, karte rahenge, sabko udaate rahenge।

madhuban nivaasiyon se:- madhuban vaale haath uthaao। bahut hai। madhuban vaale host hain aur to guest hokar aate hain chale jaate hain lekin madhuban vaale host hain। nearest bhi hain, dearest bhi hain। madhuban vaalon ko dekhkar sab khush hote hain na। kisi bhi sthaan par madhuban vaale jaate hain to kis najar se dekhte hain। vaah madhuban se aaye hain। kyonki madhuban naam sunne se madhuban ka baba yaad aa jaata hai। isliye madhuban vaalon ka mahatva hai। hai mahatva? khush hote ho na! aisa prempoorvak paalna ka sthaan koton mein koi ko hi mila hai। sab chaahte hain madhuban mein hi rah jaae, rah sakte hain kya। aap rah rahe ho। to achha hai। madhuban vaale bhoolte nahin hain, samajhte hain hamaare ko poochha nahin lekin baapdaada sada dil mein poochhte hain। pahle madhuban vaale। madhuban vaale nahin hon to aayenge kahaan! seva ke nimitta to hai na! sevaadhaari kitne bhi mile,phir bhi foundation to madhuban vaale hain। to jo oopar gyaan sarovar mein, paandav bhavan mein hai,un sabko bhi baapdaada dil ki duaayen aur yaadapyaar de rahe hain। yahaan jo toli dete hain woh oopar madhuban mein milti hai? to madhuban vaalon ko toli bhi milti, boli bhi milti। dono milti hai। achha।

global hospital vaalon se:-sabhi hospital vaale theek hai kyonki hospital ka bhi vishesh part hai na। aate hain neeche। achha thode aate hain। hospital vaale bhi achhi seva kar rahe hain। dekho aaeevel mein to phir bhi hospital hi kaam mein aati hai na। aur jab se hospital khuli hai tab se sabki najar mein yeh aaya hai ki brahmaakumaariyaan sirf gyaan nahin deti,lekin samay par madad bhi karti hai, social seva bhi karti hai। to hospital ke baad aabu mein yeh vaayumandal badli ho gaya। pahle jis najar se dekhte the,abhi us najar se nahin dekhte hain। abhi sahayog ki najar se dekhte hain। gyaan maane ya nahin maane lekin sahayog ki nazar se dekhte hain to hospital vaalon ne seva ki na। achha hai।

achha - aaj ki baat yaad rahi? sampanna banna hi hai,kuchh bhi ho jaae, sampanna banna hi hai। yeh dhun lag jaae,sampanna banna hai, samaan banna hai। achha।

chaaron or ke koton mein koi, koi mein bhi koi bhaagyavaan, bhagwan ke bachche shreshtha aatmaayen, sada teebra pukpaartha dvaara jo socha woh kiya,shreshtha sochna, shreshtha karna, lakshya aur lakshan ko samaan banaana,aise vishesh aatmaon ko sada bahutkaal ke purushaartha dvaara raajya bhaagya aur poojya banne baale shreshtha aatmaon ko,sada baap ke sneh ka return apne ko tarna karne vaale nambarban,win karne vaale bhaagyavaan bachchon ko baapdaada ka yaadapyaar aur namaste।

daadeeji se:- aapka naam hi seva kar raha hai। daadi,daadi kahke hi seva ho rahi hai। achha sabhi sahayogi aur snehi number one hain। snehi bhi hain,raajayogi bhi hain। group achha hai।

(ratanmohini daadi kal reeva (ma.pra) ke mini mega programme mein ja rahi hain) seva to bahut achhi chal rahi hai। achha hai umang-utsaah se karte hain,response bhi milta hai, achha hai sabko yaad dena।

jayanti behen se:-prakritijeet ho gai na। prakriti to natkhat hai hi। last janma ki hai na। isliye natkhat to karti hai lekin prakriti jeet hoke udte chalo,baapdaada ki aur parivaar ki bhi duaayen bahut hai। to duaayen bhi davaai ka kaam kar rahi hai।

da. hansa raaval se:-seva mein bahut achha phal milta hai। pratyakshaphal milta hai khushi,sameepta। to yeh phal lene vaale, hoshiyaar ho।

om shanti।