गुरुवार 4 जून 2020 की दैनिक मुरली

04-06-2020 praatahmurli om shanti "baapdaada"' madhuban

“meethe bachche - abhi tumhein behad ki pavitrata ko dhaaran karna hai, behad ki pavitrata arthaat ek baap ke sivaae aur koi yaad na aaye''

prashn:- baap se varsa lene ke pahle ka purooshaartha aur uske baad ki sthiti mein kya antar hota hai?

uttar:- jab tum baap se varsa lete ho to deh ke sab sambandhon ko chhod ek baap ko yaad karne ka purooshaartha karte ho aur jab varsa mil jaata hai to baap ko hi bhool jaate ho। abhi varsa lena hai isliye koi se bhi naya sambandh nahin jodna hai। nahin to bhoolne mein museebat hogi। sab kuchh bhool ek ko yaad karo to varsa mil jaayega।

geet:- yeh vakta ja raha hai…

om shanti। meethe-meethe roohaani bachchon prati baap samjhaate hain-gyaani aur agyaani kis-kis ko kaha jaata hai, yeh sirf tum brahman hi jaante ho। gyaan hai padhaai jisse tum jaan gaye ho ki ham aatma hain, woh parampita paramatma hai। tum jab vahaan se madhuban aate ho to pahle zaroor apne ko aatma samajhte ho। ham jaate hain apne baap ke paas। baba, shivbaaba ko kehte hain, shivbaaba hai prajaapita brahma ke tan mein। woh bhi baba ho gaya। tum ghar se nikalte ho to samajhte ho ham baapdaada ke paas jaate hain। tum chitthi mein bhi likhte ho “baap-daada'' shivbaaba, brahma daada। ham baba ke paas jaate hain। baba kalpa-kalpa hamse milte hain। baba hamko behad ka varsa dete hain, behad pavitra banaae। pavitrata mein had aur behad hai। tum purooshaartha karte ho behad pavitra satopradhaan banne ke liye। nambarvaar to hote hi hain। behad pavitra arthaat sivaae ek behad ke baap ke aur koi ki yaad na aaye। woh baba bahut meetha hai। oonch te oonch bhagwan hai aur behad ka baap hai। sabhi ka baap hai। tum bachchon ne hi pahchaana hai। behad ka baap sadaiv bhaarat mein hi aate hain। aakar behad ka sannyaas karaate hain। sannyaas bhi mukhya hai na, jisko vairaagya kaha jaata hai। baap saari puraani chhi-chhi duniya se vairaagya dilaate hain। bachche inse buddhi ka yog hata do। inka naam hi hai narka, duhkhadhaam। khud bhi kehte rehte hain, koi marte hain to kehte hain svargavaasi hua, to narka mein tha na। abhi tum samajhte ho yeh jo kehte hain woh bhi wrong hai। baap right baat bataate hain, svargavaasi banne ke liye। abhi hi purooshaartha karna hota hai। svargavaasi banne liye bhi sivaae baap ke aur koi purooshaartha kara na sake। tum abhi purooshaartha kar rahe ho-21janmon ke liye svargavaasi banen। banaane vaala hai baap। unko kaha hi jaata hai heavenly god father। khud aakar kehte hain bachchon-ham pahle tumko shantidham le jaaoonga। maalik hai na। shantidham jaakar phir aayenge sukhdhaam mein part bajaane। ham shantidham jaayenge to sab dharma vaale shantidham jaayenge। buddhi mein yeh saara drama ka chakra rakhna hai। ham sab jaayenge shantidham phir ham hi pahle aakar baap se varsa paate hain। jisse varsa paana hota hai unko yaad zaroor karna hai। bachche jaante hain varsa mil jaayega to phir baap ki yaad bhool jaayegi। varsa bahut sahaj reeti milta hai। baap sammukh kehte hain-meethe bachchon, tumhaare jo bhi deh ke sambandh hai, sab bhool jaao। abhi koi bhi naya sambandh nahin jodna hai। agar koi bhi sambandh jodenge to phir unko bhoolna padega। samjho bachcha va bachchi paida hue to woh bhi museebat hui। extra yaad badhi na। baap kehte hain sabko bhool ek ko hi yaad karna hai। vahi hamaara maat, pita, teacher guru aadi sab kuchh hai, ek baap ke bachche ham bhaai-behen hain। chaacha-maama aadi ka koi sambandh nahin। yeh ek hi samay hai jabki bhaai-behen ka sambandh hi rehta hai। brahma ke bachche shivbaaba ke bachche bhi hain to potre-potriyaan bhi hain। yeh to pakka buddhi mein yaad aata hai na। nambarvaar purooshaartha anusaar। svadarshan chakradhaari tum bachche chalte-phirte bante ho।

tum bachche is samay chaitanya light house ho, tumhaari ek aankh mein muktidhaam, doosri aankh mein jeevanmuktidhaam hai। woh light house jad hote, tum ho chaitanya। tumhein gyaan ka netra mila hai। tum gyaanvaan ban sabko raasta dikhaate ho। baap bhi tumhein padha rahe hain। tum jaante ho-yeh duhkhadhaam hai। ham abhi sangam par hai। baaki saari duniya kaliyug mein hai। sangam par baap bachchon ke saath baith baat karte hain aur bachche hi yahaan aate hain। koi-koi likhte hain baba phalaane ko le aaven? achha hai gun uthaayega, shaayad teer lag jaae। to baba ko bhi raham padta hai, ho sakta hai kalyaan ho jaae। tum bachche jaante ho yeh hai purooshottam sangamayug। is samay hi tum purooshottam bante ho। kaliyug mein sab hain kanishta puroosh, jo uttam puroosh lakshmi-naaraayan ko naman karte hain। satayug mein koi bhi kisko naman nahin karte hain। yahaan ki yeh sab baaten vahaan hoti nahin। yeh bhi baap samjhaate hain-achhi reeti baap ki yaad mein rah service karenge to aage chal tumko saakshaatkaar bhi hote rahenge। tum koi ki bhi bhakti aadi nahin karte ho। tumko baap sirf padhaate hain। ghar baithe aapehi saakshaatkaar aadi hote rehte hain। bahuton ko brahma ka saakshaatkaar hota hai, unke saakshaatkaar ke liye koi purooshaartha nahin karte। behad ka baap in dvaara saakshaatkaar karaate hain। bhakti maarga mein jo jismen jaisi bhaavna rakhte hain, uska saakshaatkaar hota hai। abhi tumhaari bhaavna sabse oonch te oonch baap mein hai। to bigar mehnat baap saakshaatkaar karaate rehte hain। shuru mein kitna dhyaan mein jaate the, aapehi aapas mein baith dhyaan mein chale jaate the। koi bhakti thode hi ki। bachche kabhi bhakti karte hain kya? jaise ek khel ho gaya tha, chalo baikuntha chalen। ek-do ko dekhte chale jaate the, jo kuchh bhi past hua woh phir repeat karenge। tum jaante ho ham hi is dharma ke the। satayug mein pahle-pahle yeh dharma hai, inmen bahut sukh hai। phir dheere-dheere kalaayen kam hoti jaati hain। jo sukh naye makaan mein hota hai woh puraane mein nahin। thode samay ke baad woh bhabhka kam ho jaata hai। svarga aur narka mein to bahut pharka hai na। kahaan svarga, kahaan yeh narka! tum khushi mein rehte ho, yeh bhi jaante ho baap ki yaad bhi pakki thahregi। ham aatma hain-yahi bhool jaate hain to phir deh-abhimaan mein aa jaate hain। yahaan baithe ho to bhi koshish karke apne ko aatma nishchay karo। to baap ki yaad bhi rahegi। deh mein aane se phir deh ke sab sambandh yaad aayenge। yeh ek law hai। tum gaate bhi ho mera to ek doosra na koi। baba ham balihaar jaayenge। woh abhi samay hai, ek ko hi yaad karna hai। aankhon se bhal kisko bhi dekho, ghoomo phiro sirf aatma ko baap ko yaad karna hai। shareer nirvaah arth karma bhi karna hai। parantu haathon se kaam karte, dil baap ki yaad mein rahe, aatma ko apne maashook ko hi yaad karna hai। koi ki kisi sakhi se preet ho jaati hai to phir unki yaad thahar jaati hai। phir woh rag tootne mein badi mushkilaat hoti hai। poochhte hain baba yeh kya hai! are, tum naam-roop mein kyon phansate ho। ek to tum deh-abhimaani bante ho aur doosra phir tumhaara koi past ka hisaab-kitaab hai, woh dhokha deta hai। baap kehte hain in aankhon se jo kuchh dekhte ho unmein buddhi na jaaye। tumhaari buddhi mein yeh rahe ki hamko shivbaaba padhaate hain। aise bahut bachche hain jo yahaan baithe bhi baap ko kabhi yaad nahin karte। kai to yahaan baithe bhi yaad mein nahin rah sakte hain। to apne ko dekhna chaahiye-hamne kitna shivbaaba ko yaad kiya? nahin to chart mein rola pad jaayega।

bhagwan kehte hain - meethe bachchon, mujhe yaad karo। apne paas note karo, jab chaahe yaad mein baith jaao। khaana khaakar chakra lagaae 10-15 minute aakar baith jaao yaad mein kyonki yahaan koi gorakhdhandha to hai nahin। phir bhi jo kaam-kaaj chhodkar aaye ho woh koi-koi ki buddhi mein aata rehta hai। badi jabardasta manzil hai, tab baba kehte hain apni jaanch karo। yeh tumhaara most valuable time hai। bhakti maarga mein tumne kitna time vesta kiya hai। din-pratidin girte hi rehte ho। krishna ka deedaar hua, bahut khushi ho jaati hai। milta to kuchh bhi nahin। baap ka varsa to ek hi baar milta hai, ab baap kehte hain meri yaad mein raho to tumhaare janma-janmaantar ke paap mit jaaen। svarga ka passport unheen bachchon ko milta hai jo yaad mein rah apne vikarmon ko vinaash kar karmaateet avastha ko paate hain। nahin to bahut saza khaani padti hai। baba aur bhi raay dete hain apne taaj va takhta ka photo apne pocket mein rakh do to yaad rahegi। inse ham yeh bante hain। jitna dekhenge utna yaad karenge। phir usmein hi moh lag jaayega। ham yeh ban rahe hain-nar se naaraayan, chitra dekhkar khushi hogi। shivbaaba yaad aayega। yeh sab purooshaartha ki yuktiyaan hain। koi se bhi tum poochho satya naaraayan ki katha sunne se kya hota hai? hamaara baba hamko satya naaraayan ki katha suna rahe hain। kaise 84 janma liye hain, woh bhi hisaab to chaahiye na। sab to 84 janma nahin lenge। duniya ko to kuchh bhi pata nahin hai। aise hi mukh se sirf kah dete hain-isko kaha jaata hai thyoreetikal। yeh hai tumhaara practical। abhi jo ho raha hai unke phir bhakti maarga mein pustak aadi banenge। tum svadarshan chakradhaari bankar vishnupuri mein aate ho। yeh hai nai baat। raavan raajya jhooth khanda, phir sachkhanda raamraajya hoga। chitron mein bada clear hai। abhi is puraani duniya ka ant hai, 5 hazaar varsha pahle bhi vinaash hua tha। saainsadaan jo bhi hain unhon ko khyaal mein aata hai ki hamko koi prerak hai, jo ham yeh sab karte rehte hain। samajhte bhi hain ham yeh karenge to inse sab khatma ho jaayenge। parantu parvash hain, dar laga hua hai। samajhte hain ghar baithe ek bomb chhodenge to khatma kar denge। aeroplane, petrol aadi ki bhi darkaar nahin rahegi। vinaash to zaroor hona hi hai। nai duniya satayug tha, Christ se 3 hazaar varsha pahle svarga tha phir ab svarga ki sthaapna ho rahi hai। aage chal samjhenge-tum jaante ho sthaapna zaroor honi hai। ismen to paai ka bhi sanshay nahin।

yeh drama chalta rehta hai kalpa pahle muaaphiphak। drama zaroor purooshaartha karaayega। aise bhi nahin, jo drama mein hoga so hoga.....। poochhte hain purooshaartha bada ya praalabdha badi? purooshaartha bada kyonki purooshaartha ki hi praalabdha banegi। purooshaartha bigar kabhi koi rah na sake। tum purooshaartha kar rahe ho na। kahaan-kahaan se bachche aate hain, purooshaartha karte hain। kehte hain baba ham bhool jaate hain। are, shivbaaba tumko kehte hain mujhe yaad karo, kisko kaha? mujh aatma ko kaha। baap aatmaon se hi baat karte hain। shivbaaba hi patit-paavan hai, yeh aatma bhi unse sunti hai। tum bachchon ko yeh pakka nishchay rehna chaahiye ki behad ka baap hamko vishwa ka maalik banaate hain। woh hai oonch te oonch, pyaare te pyaara baap। bhaktimaarga mein unko hi yaad karte the, gaate bhi hain tumhaari gati-mati nyaari। to zaroor mat di thi। ab tumhaari buddhi mein hai-itne sab manushya maatra vaapis ghar jaayenge। vichaar karo kitni aatmaayen hain, sabka sijra hai। sab aatmaayen phir nambarvaar jaakar baithengi। class transfer hota hai to nambarvaar baithti hain na। tum bhi nambarvaar jaate ho। chhoti bindi (aatma) nambarvaar jaakar baithegi phir nambarvaar aayegi part mein। yeh hai roodra maala। baap kehte hain itne karod aatmaon ki meri maala hai। oopar mein main phool hoon phir part bajaane ke liye sab yahaan hi aaye hain। yeh drama bana hua hai। kaha bhi jaata hai bana banaaya drama hai। kaise yeh drama chalta hai so tum jaante ho। sabko yahi bataao ki apne ko aatma samajh baap ko yaad karo to tumhaare vikarma vinaash honge phir tum chale jaayenge। yeh mehnat hai। sabko raasta bataana hai, tumhaara farja hai। tum koi dehdhaari mein nahin phansaate ho। baap to kehte hain mujhe yaad karo to paap bhasma ho jaayenge। baap direction dete hain so to karna padega। poochhne ki kya baat। kaise bhi karke yaad zaroor karo, ismen baba kya kripa karenge। yaad tumko karna hai, varsa tumko lena hai। baap svarga ka rachayita hai to zaroor svarga ka varsa milega। abhi tum jaante ho yeh jhaad puraana ho gaya hai isliye is puraani duniya se vairaagya hai। inko kaha jaata hai behad ka vairaagya। woh hathayogiyon ka hai had ka vairaagya। woh behad ka vairaagya sikhla na saken। behad ke vairaagya vaale phir had ka kaise sikhlaayenge। ab baap kehte hain sikeeldhe bachche, tum bhi kehte ho kitna sikeeldha baap hai। 63 janma baap ko yaad kiya hai, bas hamaara to ek baap doosra na koi। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) svarga mein jaane ka passport lene ke liye baap ki yaad se apne vikarmon ko vinaash kar karmaateet avastha banaani hai। sazaaon se bachne ka purooshaartha karna hai।

2) gyaanvaan ban sabko raasta bataana hai, chaitanya light house banna hai। ek aankh mein shantidham, doosri aankh mein sukhdhaam rahe। is duhkhadhaam ko bhool jaana hai।

vardaan:- apne double light swaroop dvaara aane vaale vighnon ko paar karne vaale teevra purooshaarthi bhav

aane vaale vighnon mein thakne va dilshikasta hone ke bajaae second mein svayan ke aatmik jyoti swaroop aur nimitta bhaav ke double light swaroop dvaara second mein high jump do। vighna roopi patthar ko todne mein samay nahin ganvaao। jump lagaao aur second mein paar ho jaao। thodi si vismriti ke kaaran sahaj maarga ko mushkil nahin banaao। apne jeevan ki bhavishya shreshtha manzil ko spashta dekhte hue teevra purooshaarthi bano। jis nazar se baapdaada va vishwa aapko dekh rahi hai usi shreshtha swaroop mein sada sthit raho।

slogan:- sada khush rehna aur khushi baantana-yahi sabse bada shaan hai।