बुधवार 15 जुलाई 2020 की दैनिक मुरली

15-07-2020 praatahmurli om shanti "baapdaada"' madhuban

“meethe bachche - tumhein sachcha-sachcha vaishnav banna hai, sachche vaishnav bhojan ki parhej ke saath-saath pavitra bhi rehte hain''

prashn:- kaun-sa avgun gun mein parivartan ho jaae to beda paar ho sakta hai?

uttar:- sabse bada avgun hai moh। moh ke kaaran sambandhiyon ki yaad sataati rehti hai। (bandari ka misaal) kisi ka koi sambandhi marta hai to 12 maas tak use yaad karte rehte hain। munh dhak kar rote rahenge, yaad aati rahegi। aise hi agar baap ki yaad sataaye, din-raat tum baap ko yaad karo to tumhaara beda paar ho jaayega। jaise laukik sambandhi ko yaad karte aise baap ko yaad karo to aho saubhaagya…।

om shanti। baap roz-roz bachchon ko samjhaate hain ki apne ko aatma samajh baap ki yaad mein baitho। aaj usmein add karte hain - sirf baap nahin doosra bhi samajhna hai। mukhya baat hi yeh hai - parampita paramatma shiv, unko god father bhi kehte hain, gyaan saagar bhi hai। gyaan saagar hone kaaran teacher bhi hai, raajayog sikhlaate hain। yeh samjhaane se samjhenge ki satya baap inhon ko padha rahe hain। practical baat yeh sunaate hain। woh sabka baap bhi hai, teacher bhi hai, sadgati daata bhi hai aur phir unko knowledgeful kaha jaata hai। baap, teacher, patit-paavan, gyaan saagar hai। pahle-pahle to baap ki mahima karni chaahiye। woh hamko padha rahe hain। ham hain brahmaakumaar-kumaariyaan। brahma bhi rachna hai shivbaaba ki aur abhi hai bhi sangamayug। em object bhi raajayog ki hai, hamko raajayog sikhlaate hain। to teacher bhi siddha hua। aur yeh padhaai hai hi nai duniya ke liye। yahaan baithe yeh pakka karo - hamko kya-kya samjhaana hai। yeh andar dhaarna honi chaahiye। yeh to jaante hain koi ko jaasti dhaarna hoti hai, koi ko kam। yahaan bhi jo gyaan mein jaasti teekhe jaate hain unka naam hota hai। pad bhi ooncha hota hai। parhej bhi baba batlaate rehte hain। tum poore vaishnav bante ho। vaishnav arthaat jo vegetarian hote hain। maas madira aadi nahin khaate hain। parantu vikaar mein to jaate hain, baaki vaishnav bana to kya hua। vaishnav kul ke kahlaate hain arthaat pyaaz aadi tamoguni cheezen nahin khaate hain। tum bachche jaante ho - tamoguni cheejen kya-kya hoti hain। koi achhe manushya bhi hote hain, jisko religious minded va bhakta kaha jaata hai। sanyaasiyon ko kahenge pavitra aatma aur jo daan aadi karte hain unko kahenge punya aatma। isse bhi siddha hota hai - aatma hi daan-punya karti hai isliye punya aatma, pavitra aatma kaha jaata hai। aatma koi nirlep nahin hai। aise achhe-achhe akshar yaad karne chaahiye। saadhuon ko bhi mahaan aatma kehte hain। mahaan paramatma nahin kaha jaata hai। to sarvavyaapi kehna wrong hai। sarva aatmaayen hain, jo bhi hain sabmen aatma hai। padhe likhe jo hain woh siddha kar batlaate hain jhaad mein bhi aatma hai। kehte hain 84 laakh yoniyaan jo hain unmein bhi aatma hai। aatma na hoti to vriddhi ko kaise paati! manushya ki jo aatma hai woh to jad mein ja nahin sakti। shaastron mein aisi-aisi baaten likh di hain। indraprastha se dhakka diya to patthar ban gaya। ab baap baith samjhaate hain, baap bachchon ko kehte hain deh ke sambandh tod apne ko aatma samjho। maamekam yaad karo। bas tumhaare 84 janma ab poore hue। ab tamopradhaan se satopradhaan banna hai। duhkhadhaam hai apvitra dhaam। shantidham aur sukhdhaam hai pavitra dhaam। yeh to samajhte ho na। sukhdhaam mein rahne vaale devtaaon ke aage maatha tekte hain। siddha hota hai bhaarat mein nai duniya mein pavitra aatmaayen thi, oonch pad vaale the। abhi to gaate hain mujh nirgun haare mein koi gun naahi। hai bhi aise। koi gun nahin hain। manushyon mein moh bhi bahut hota hai, mare hue ki bhi yaad rehti hai। buddhi mein aata hai yeh mere bachche hain। pati athva bachcha mare to unko yaad karte rehte। stri 12 maas tak to achhi reeti yaad karti hai, munh dhak kar roti rehti hai। aise munh dhak kar agar tum baap ko yaad karo din-raat to beda hi paar ho jaae। baap kehte hain - jaise pati ko tum yaad karti rehti ho aise mere ko yaad karo to tumhaare vikarma vinaash ho jaaen। baap yuktiyaan batlaate hain aise-aise karo।

potaamel dekhte hain aaj itna kharcha hua, itna phaayda hua, balance roz nikaalte hain। koi maas-maas nikaalte hain। yahaan to yeh bahut zaroori hai, baap ne baar-baar samjhaaya hai। baap kehte hain tum bachche saubhaagya-shaali, hajaar bhaagyashaali, karod bhaagyashaali, padam, arab, kharab bhaagyashaali ho। jo bachche apne ko saubhaagyashaali samajhte hain, woh zaroor achhi tarah se baap ko yaad karte rahenge। vahi gulaab ke phool banenge। yeh to nutshell mein samjhaana hota hai। banna to khushboodaar phool hai। mukhya hai yaad ki baat। sanyaasiyon ne yog akshar kah diya hai। laukik baap aise nahin kahenge ki mujhe yaad karo ya poochhe ki mujhe yaad karte ho? baap bachche ko, bachcha baap ko yaad hai hi। yeh to law hai। yahaan poochhna padta hai kyonki maaya bhula deti hai। yahaan aate hain, samajhte hain ham baap ke paas jaate hain to baap ki yaad rahni chaahiye isliye baba chitra bhi banaate hain to woh bhi saath mein ho। pahle-pahle hamesha baap ki mahima shuru karo। yeh hamaara baba hai, yoon to sabka baap hai। sarva ka sadgati daata, gyaan ka saagar knowledgeful hai। baba hamko srishti chakra ke aadi-madhya-ant ka gyaan dete hain, jisse ham trikaaldarshi ban jaate hain। trikaaldarshi is srishti par koi manushya ho nahin sakta। baap kehte hain yeh lakshmi-naaraayan bhi trikaaldarshi nahin hain। yeh trikaaldarshi ban kya karenge! tum bante ho aur banaate ho। in lakshmi-naaraayan mein gyaan hota to parampara chalta। beech mein to vinaash ho jaata hai isliye parampara to chal na sake। to bachchon ko is padhaai ka achhi reeti simran karna hai। tumhaari bhi oonch te oonch padhaai sangam par hi hoti hai। tum yaad nahin karte ho, deh-abhimaan mein aa jaate ho to maaya thappad maar deti hai। 16 kala sampoorn banenge tab vinaash ki bhi taiyaari hogi। woh vinaash ke liye aur tum avinaashi pad ke liye taiyaari kar rahe ho। kaurav aur paandavon ki ladaai hui nahin, kaurvon aur yaadvon ki lagti hai। drama anusaar paakistaan bhi ho gaya। woh bhi shuru tab hua jab tumhaara janma hua। ab baap aaye hain to sab practical hona chaahiye na। yahaan ke liye hi kehte hain rakta ki nadiyaan bahti hain tab phir ghi ki nadi bahegi। ab bhi dekho ladte rehte hain। phalaana shahar do nahin to ladaai karenge। yahaan se paas na karo, yeh hamaara raasta hai। ab woh kya karen। steamer kaise jaayenge! phir raay karte hain। zaroor raay poochhte honge। madad ki ummeed mili hogi, woh aapas mein hi khatma kar denge। yahaan phir civil war ki drama mein noondh hai।

abhi baap kehte hain - meethe bachche, bahut-bahut samajhdaar bano। yahaan se baahar ghar mein jaane se phir bhool nahin jaao। yahaan tum aate ho kamaai jama karne। chhote-chhote bachchon ko le aate ho to unke bandhan mein rehna padta hai। yahaan to gyaan saagar ke kanthe par aate ho, jitni kamaai karenge utna achha hai। ismen lag jaana chaahiye। tum aate hi ho avinaashi gyaan ratnon ki jholi bharne। gaate bhi hain na bholaanaath bhar de jholi। bhakta to shankar ke aage jaakar kehte hain jholi bhar do। woh phir shiv-shankar ko ek samajh lete hain। shiv-shankar mahaadev kah dete hain। to mahaadev bada ho jaata। aisi chhoti-chhoti baaten bahut samajhne ki hain।

tum bachchon ko samjhaaya jaata hai - abhi tum brahman ho, knowledge mil rahi hai। padhaai se manushya sudharte hain। chaal-chalan bhi achhi hoti hai। abhi tum padhte ho। jo sabse jaasti padhte aur padhaate hain, unke manners bhi achhe hote hain। tum kahenge sabse achhe mama-baba ke manners hain। yeh phir ho gai badi mama, jismen pravesh kar bachchon ko rachte hain। maat-pita combined hain। kitni gupta baaten hain। jaise tum padhte ho vaise mama bhi padhti thi। unko adopt kiya। sayaani thi to drama anusaar sarasvati naam pada। brahmaputra badi nadi hai। mela bhi lagta hai saagar aur brahmaputra ka। yeh badi nadi thahri to maa bhi thahri na। tum meethe-meethe bachchon ko kitna oonch le jaate hain। baap tum bachchon ko hi dekhte hain। unko to kisi ko yaad karna nahin hai। inki aatma ko to baap ko yaad karna hai। baap kehte hain ham donon, bachchon ko dekhte hain। mujh aatma ko to saakshi ho nahin dekhna hai, parantu baap ke sang mein ham bhi aise dekhta hoon। baap ke saath rehta to hoon na। unka bachcha hoon to saath mein dekhta hoon। main vishwa ka maalik ban ghoomta hoon, jaise ki main hi yeh karta hoon। main drishti deta hoon। deh sahit sab kuchh bhoolna hota hai। baaki bachcha aur baap jaise ek ho jaate hain। to baap samjhaate hain khoob purooshaartha karo। barobar mama-baba sabse jaasti service karte hain। ghar mein bhi maa-baap bahut service karte hain na। service karne vaale zaroor pad bhi oonch paayenge to phir follow karna chaahiye na। jaise baap apkaariyon par bhi upkaar karte hain, aise tum bhi follow father karo। iska bhi arth samajhna hai। baap kehte hain mujhe yaad karo aur kiska bhi nahin suno। koi kuchh bole, suna-ansuna kar do। tum muskaraate raho to woh aapehi thanda ho jaayega। baba ne kaha tha koi krodh kare to tum un par phool chadhaao, bolo tum apkaar karte ho, ham upkaar karte hain। baap khud kehte hain saari duniya ke manushya mere apkaari hain, mujhe sarvavyaapi kahkar kitni gaali dete hain main to sabka upkaari hoon। tum bachche bhi sabka upkaar karne vaale ho। tum khyaal karo - ham kya the, abhi kya bante hain! vishwa ke maalik bante hain। khyaal-khvaab mein bhi nahin tha। bahuton ko ghar baithe saakshaatkaar hua hai। parantu saakshaatkaar se kuchh hota thode hi hai। aahiste-aahiste jhaad vriddhi ko paata rahega। yeh naya daivi jhaad sthaapan ho raha hai na। bachche jaante hain hamaara daivi phoolon ka bageecha ban raha hai। satayug mein devtaayen hi rehte hain so phir aane hain, chakra phirta rehta hai। 84 janma bhi vahi lenge। doosri aatmaayen phir kahaan se aayengi। drama mein jo bhi aatmaayen hain, koi bhi part se chhoot nahin sakti। yeh chakra phirta hi rehta hai। aatma kabhi ghatti nahin। chhoti-badi nahin hoti hai।

baap baith meethe bachchon ko samjhaate hain, kehte hain bachche sukhdaai bano। maa kehti hai na - aapas mein lado-jhagdo nahin। behad ka baap bhi bachchon ko kehte hain yaad ki yaatra bahut sahaj hai। woh yaatra to janma-janmaantar karte aaye ho phir bhi seedhi neeche utarte paap aatma bante jaate ho। baap kehte hain yeh hai roohaani yaatra। tumko is mrityulok mein lautna nahin hai। us yaatra se to lautkar aate hain phir vaise ke vaise ban jaate hain। tum to jaante ho ham svarga mein jaate hain। svarga tha phir hoga। yeh chakra phirna hai। duniya ek hi hai baaki stars aadi mein koi duniya hai nahin। oopar jaakar dekhne ke liye kitna maatha maarte rehte hain। maatha maarte-maarte maut saamne aa jaayega। yeh sab hai science। oopar jaayenge phir kya hoga। maut to saamne khada hai। ek taraph oopar jaakar khoj karte hain। doosre taraph maut ke liye bombs bana rahe hain। manushyon ki buddhi dekho kaisi hai। samajhte bhi hain koi prerak hai। khud kehte hain world vaar zaroor honi hai। yeh vahi mahaabhaarat ladaai hai। ab tum bachche bhi jitna purooshaartha karenge, utna hi kalyaan karenge। khuda ke bachche to ho hi। bhagwan apna bachcha banaate hain to tum bhagwan-bhagavti ban jaate ho। lakshmi-naaraayan ko god goddess kehte hain na। krishna ko god maante hain, raadhe ko itna nahin। sarasvati ka naam hai, raadhe ka naam nahin hai। kalash phir lakshmi ko dikhaate hain। yeh bhi bhool kar di hai। sarasvati ke bhi anek naam rakh diye hain। woh to tum hi ho। deviyon ki bhi pooja hoti hai to aatmaon ki pooja hoti hai। baap bachchon ko har baat samjhaate rehte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) jaise baap apkaari par bhi upkaar karte hain, aise follow father karna hai। koi kuchh bole to suna ansuna kar dena hai, muskaraate rehna hai। ek baap se hi sunna hai।

2) sukhdaai ban sabko sukh dena hai, aapas mein ladna-jhagadna nahin hai। samajhdaar ban apni jholi avinaashi gyaan ratnon se bharpoor karni hai।

vardaan:- shuddh sankalp ke vrat dvaara vritti ka parivartan karne vaale diltakhtansheen bhav

baapdaada ka diltakhta itna pure hai jo is takhta par sada pure aatmaayen hi baith sakti hain। jinke sankalp mein bhi apvitrata ya amaryaada aa jaati hai vo takhtansheen ke bajaae girti kala mein neeche aa jaate hain isliye pahle shuddh sankalp ke vrat dvaara apni vritti ka parivartan karo। vritti parivartan se bhavishya jeevan roopi srishti badal jaayegi। shuddh sankalp va dridh sankalp ke vrat ka pratyakshaphal hai hi sadaakaal ke liye baapdaada ka diltakhta।

slogan:- tan aur man ko amaanat samajhkar chalenge to anaasakta rahenge aur roohaaniyat aayegi।