शुक्रवार 5 नवंबर 2021 की दैनिक मुरली

05-11-2021 praatahmurli om shanti "baapdaada"' madhuban

“meethe bachche - vichaar saagar manthan kar service ki bhinna-bhinna yuktiyaan nikaalo, jisse sabko baap ka parichay mil jaae''

prashn:- baap har ek bachche ko oonch takdeer banaane ki yukti kaun si bataate hain?

uttar:- apni oonch takdeer banaani hai to andar se sab chhi-chhi buri aadten nikaal do। jhooth bolna, gussa karna yeh bahut kharaab aadten hain। service ka shauk rakho। jaise baap nirhankaari ban seva karte hain। aise jitna ho sake auron ke kalyaan arth roohaani seva mein busy raho।

geet:- marna teri gali mein…

om shanti। meethe-meethe roohaani bachchon ko pahli-pahli yeh point samajhni aur samjhaani hai ki baap kaun hai! bachchon ko ateendriy sukh tab feel hota hai jab nishchay karte hain ki ham behad baap ki santaan hain। bas is ek hi baat se khushi ka paara chadhta hai। yeh hai sthaai khushi ki point। tum jaante ho ham apne ko brahmaakumaar kumaariyaan kahlaate hain। yeh hai nai rachna। to pahle sabko nishchay karna hai ki yeh hamaara baap hai। baap ke neeche phir hai vishnu (trimooti ke chitra par) baap se vishnupuri ka varsa milta hai to kitni khushi honi chaahiye। yeh nishchay karaake phir likhaana chaahiye। vishnu ka arth vaishnav bhi nikaalte hain। bhaaratvaasi achhi tarah jaante hain ki yeh devi-devtaayen nirvikaari the। svarga mein inhon ka pavitra pravritti maarga tha। gaate bhi hain aap hai sampoorn nirvikaari, ham vikaari। satayug mein sampoorn nirvikaari hain। kaliyug mein sampoorn vikaari hain। vikaari ko patit, bhrashtaachaari kahenge। krodhi ko patit bhrashtaachaari nahin kaha jaata। krodh to sannyaasiyon mein bhi hota hai। to pahle-pahle parichay dena hai baap ka। oonche te ooncha baap jab bhaarat mein aata hai to yeh mahaabhaari ladaai bhi lagti hai zaroor kyonki paramatma aakar patit duniya se paavan duniya mein le jaate hain। shareeron ka to vinaash hona hai। yeh nishchay hona chaahiye ki hamko baap padhaate hain to kitna regular hona chaahiye। yahaan hostel nahin hai। hostel banaayen to phir bahut makaan chaahiye। 7 roz, 4 roz ke liye bhi aaten hain to bhi bahut makaan chaahiye। baap kehte hain- grihastha vyavhaar mein rah sirf baba ko yaad karo। bas baba hi patit-paavan hai। baap kehte hain mujhe yaad karo - main guarantee karta hoon to tumhaare sab paap bhasma ho jaayenge। pahle to yeh likhva lena chaahiye ki barobar ham shivbaaba ki santaan hain, phir vishwa ke maalikapne ke hakdaar bante hain। raaja-raani praja sab vishwa ke maalik hain। mele pradarshani mein jo bhi samjhaane vaale hain, unko baba direction dete hain - mool baat samjhaani hai ki oonche te ooncha bhagwan ek hi hai। vahi gyaan ka saagar, patit-paavan hai। gyaan ka saagar hai to zaroor direction bhi vahi denge। krishna to de na sake। shivbaaba bigar aur koi bhagwan hai nahin। brahma, vishnu, shankar bhi devtaayen hain। svarga mein hain daiveegun vaale manushya, yahaan kaliyug mein hain aasuri gun vaale manushya। yeh bhi peechhe samjhaana hai। pahle-pahle to baap ka parichay dekar sahi karaani chaahiye। vichaar saagar manthan karke bhinna-bhinna yuktiyaan nikaalni chaahiye aur baba ko bataani chaahiye ki baba is prakaar ka prashn poochhte hain, is prakaar hamne samjhaaya। phir baba bhi aisi point sunaayenge jo unko asar pade। baba ko sarvavyaapi athva kachchha machchha avtaar kehna yeh bhi glaani hai, isliye baba ka parichay dena hai। baba hi vishwa ka maalik banaate hain। yeh lakshmi-naaraayan vishwa ke maalik, satopradhaan the। phir punarjanma lete-lete tamopradhaan ban gaye hain। phir baap kehte hain- mujhe yaad karo to satopradhaan ban jaayenge। koi bhi dharma vaale hon baap ka sandesh sabke liye hai। unko kehte hain god father liberator। liberate karne zaroor patit duniya mein aayenge। kaliyug ant mein saari duniya hi tamopradhaan hai, jab satopradhaan banen tab nai duniya mein ja saken। baaki jo vahaan nahin aate woh shantidham mein rehte hain। yeh buddhi mein bithaana hai, jo samjhen ki hamko us baap ko yaad karna hai। koi dehdhaari ko yaad nahin karna hai। baap hai hi videhi, vichitra aur sabke chitra bhinna-bhinna hain। koi ko samjhaane ka shauk rehna chaahiye। pradarshani mein bahut log aate hain। centre par itne nahin aate hain। service mein rahne se bachchon ko bahut hullaas rahega। yahaan baap ko ghadi-ghadi bhool jaate hain। service mein rahenge to yaad ki yaatra bhoolenge nahin। khud yaad karenge auron ko bhi yaad karaayenge। tum bachche padh rahe ho। tumhaari buddhi mein hai ham raajaai zaroor lenge। yeh yaad rahne se bhi khushi rehti hai। bhool jaane se ghabraahat aati hai।

baba ko likhna chaahiye ki baba ham ateendriy sukh mein hai। baaki thoda samay hai ham chalen apne sukhdhaam। 63 janma ham bahut beemaar rahe। koi davaai nahin hui to naasoor ban gaya। koi ki sambhaal mil na saki, beemaari andar ghar kar gai। yeh beemaari aisi hai jo sivaae avinaashi surgeon ke kabhi chhoot nahin sakti। abhi sabke chhootne ka time hai। pavitra ban muktidhaam mein chale jaayenge। koi kehte hain mukti mein rehna achha hai। part hi nahin। jaise naatak mein kisne thoda part kar liya to unko hero heroine athva ooncha paartadhaari nahin kahenge। baap samjhaate hain jitna ho sake baap ko yaad karo to pakke ho jaao। yaad bhoolni nahin chaahiye। mukhya hai ek baap। baaki yeh chhote-chhote chitra hain - samjhaane ke liye, inse siddha karna hai shiv-shankar ek nahin। baaki sookshm vatan mein koi baat hoti nahin। abhi tum samajhte ho yeh sab hai bhakti maarga, gyaan dene vaala hai ek baap। woh dete hain sangam par, yeh pakka karo। bhaaratvaasiyon ko to kalpa-kalpa svarga ka varsa milta hi hai। 5 hajaar varsha ki baat hai। woh phir laakhon varsha kah dete hain। woh kehte sirf kaliyug laakhon varsha ka hai aur ham kehte yeh saara chakra hi 5 hajaar varsha ka hai। gapoda kitna bada lagaaya hai। bulaate hain he patit-paavan। krishna ko patit-paavan to nahin kahenge। koi bhi dharma vaala krishna ko liberator nahin kahenge। he patit-paavan karke pukaarte hain to buddhi oopar chali jaati hai phir bhi samajhte nahin। maaya ka kitna andhiyaara hai, gaphlat mein pade hain। kehte hain shaastra anaadi hain। parantu satayug treta mein yeh hote nahin। yeh padhaai aisi hai jo beemaari mein bhi baith class mein padh sakte hain। yahaan bahaana chal na sake। gau bahut achhi hoti hai, koi to laat bhi maar deti hai। yahaan bhi jismen krodh hai to anhakaar vash laat bhi maar dete hain। disservice kar dete hain। koi bhi avgun nahin hona chaahiye। parantu karmabandhan aisa hai jo oonch pad paane nahin dete। baap oonchi takdeer banaane ka raasta bataate hain। parantu koi nahin banaayenge to baap kya kare, bahut bhaari kamaai hai। kamaai ka phakhur rehna chaahiye। kamaai nahin karenge to parinaam kya hoga! kalpa-kalpa aisa haal hoga। baap to sabko saavdhaani dete hain, insult nahin karte। bachchon mein koi chhi-chhi aadat nahin honi chaahiye। jhooth bolna bada kharaab hai। yagya ki service khushi se karni chaahiye। baba ke paas aate hain to baap ishaara karte hain service karo। jo tumko khilaate hain unki service zaroor karni chaahiye। seva karna baap sikhlaate hain। dekho, oonche te ooncha baap bhi kitni seva karte hain। jo kaam agyaan mein nahin kiya, woh bhi karna pade। itna nirhankaari banna hai। kaayde ke viruddha koi kaam nahin karna hai। jitna ho sake auron ke kalyaan arth sab kuchh haathon se karna pade। laachaari haalat mein kuchh karaaya woh aur baat hai। apne ko nirhankaari, nirmohi banaana hai। baba ki yaad bigar kiska kalyaan ho na sake। jitna yaad karenge utna paavan banenge। yaad mein hi vighna padte hain। gyaan mein itne vighna nahin padte, gyaan ki to anek point hain। baap ko yaad karne se khushboodaar phool banenge। kam yaad karenge to ratan-jyot banenge। ak ke bhi phool hote hain। to apne ko khushboodaar phool banaana chaahiye। koi badbu nahin honi chaahiye। aatma ko khushboodaar banna hai। itni chhoti bindi mein saara gyaan bhara hua hai, wonder hai। srishti ek hi hai oopar va neeche srishti nahin hai। trimooti ka arth bhi tum jaante ho। unhonne sirf naam rakh diya hai - trimooti maarga। koi brahma ko trimoorti kah dete hain। unki biography ka kuchh pata nahin। shaastron mein hai shreshthaachaari manushyon ki jeevan kahaani। lakshmi-naaraayan, raadhe-krishna aadi hain to sab manushya। parantu auron ki jeevan kahaani ko shaastra nahin kaha jaayega। devtaaon ki jeevan kahaani ko shaastra kaha jaata hai। baaki shivbaaba ki jeevan kahaani kahaan hai? woh to niraakaar hai। khud kehte hain main to patit-paavan hoon, mujhe sab father kah bulaate hain। main aakar svarga ki sthaapna karta hoon। bhaarat 5 hajaar varsha pahle svarga tha। ab phir banna hai। kitna sahaj hai। parantu pattharbuddhi aise hain jo taala khulta hi nahin hai। gyaan aur yog ka taala band hai।

baap kehte hain - ghar-ghar mein paigaam do ki oonche te ooncha hai baap। first floor mool vatan, second floor sookshm vatan। third floor hai yeh saakaari duniya। agar in floors ki bhi bachchon ko yaad rahe to pahle baba zaroor yaad pade। service ke liye bhaagna chaahiye। baba kahaan bhi jaane ki mana nahin karte। bhal shaadi mein jaao, teertho par jaao, service karne jaao। bhaashan karo - bolo ek hai roohaani yaatra, doosri hai jismaani yaatra। point to bahut milti rehti hain। vaanaprasthiyon ke jhunda mein jaakar service karo। unhon ka bhi suno। vo log kya kehte hain। haath mein parcha ho। mukhya 4-5 baaten likhi hui hon - eeshvar sarvavyaapi nahin, geeta ka bhagwan krishna nahin, yeh saaph likh do। jo koi padhe to samjhe yeh sach to hai, ismen chaturaai badi chaahiye। baba trimoorti ke liye bhi samjhaate hain। yeh ghadi-ghadi pocket se nikaal dekhte raho। koi ko bhi samjhaao - yeh baba, yeh varsa। vishnu ka chitra bhi achha hai। train mein bhi service kar sakte ho, baap ko yaad karo to vishwa ke maalik ban jaayenge। service bahut ho sakti hai। parantu koi ko akla aata nahin hai। bahut purushaartha karna hai। ladaai ke maidaan mein susta thode hi hona chaahiye। bahut khabardaari rakhni hai। mandiron mein bahut service ho sakti hai। bas baba kehte hain manmanaabhav। tamopradhaan se satopradhaan bano। mukhya baat pakki kara deni chaahiye। bachchon ko service ka bahut khyaal hona chaahiye। trimoorti ke chitra mein saara gyaan bhara hua hai। seedhi bhi achhi hai। har ek apni unnati chaahte hain, dhan kamaane ki। chhote bachchon ko bhi yuktiyaan sikhlaao, sab aaphreen denge। kamaal hai brahmaakumaar-kumaariyon ki, chhote bachche bhi itna gyaan dete hain jo koi sannyaasi aadi de na sake। muphta mein cheez milegi to samjhenge yeh hamaare kalyaan ke liye dete hain। bolo, yeh free hai। aap bhal padho, inse apna kalyaan karo। shivbaaba bhola bhandaari hai na। dher bachche hain। baba ko paise ki kya darkaar hai। train mein bhi tum bahut service kar sakte ho। aadmi achha dekha to jhat unko samjhaae chitra de dena chaahiye। kaho tum apna bhi kalyaan karo aur auron ka bhi kalyaan karna। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) koi bhi kaam kaayde ke virooddha nahin karna hai। bahut-bahut nirhankaari, nirmohi rehna hai। jitna ho sake har kaarya apne haathon se karna hai। yagya ki service bahut khushi se karni hai।

2) padhaai mein kabhi bahaana nahin dena hai। beemaari mein bhi padhna zaroor hai। hullaas mein rahne ke liye service ka shauk rakhna hai।

vardaan:- knowledge ki light might dvaara vighna-vinaashak banne vaale master knowledgeful bhav

bhakti maarga mein ganesh ko vighna-vinaashak kahkar poojte hain, saath-saath unhein master knowledgeful arthaat vidyaapti bhi maante hain। to jo bachche master knowledgeful bante hain ve kabhi vighnon se haar nahin kha sakte kyonki knowledge ko light-might kaha jaata hai, jisse manzil par pahunchna sahaj ho jaata hai। aise jo vighna-vinaashak hain, baap ke saath sada combined rehte hue knowledge ka simran karte rehte hain ve kabhi vighna haar nahin ban sakte।

slogan:- andar baahar jo bhi buraaeeyaan hain unhein sampoorn will kar do to will-power aa jaayegi।