सोमवार 20 दिसंबर 2021 की दैनिक मुरली

20-12-2021 praatahmurli om shanti "baapdaada"' madhuban

“meethe bachche - tum jo bhi sunte ho us par vichaar saagar manthan karo to buddhi mein saara din yeh gyaan tapakta rahega''

prashn:- yahaan ka kaun sa hunar nai duniya ki sthaapna mein kaam aayega?

uttar:- yahaan jo science ka hunar hai - jisse aeroplane, makaan aadi banaate hain, yeh sanskaar vahaan bhi saath le jaayenge। yahaan bhal gyaan na len lekin vahaan yeh hunar saath jaayega। tum abhi satayug se lekar kaliyug ant tak ki history-geography jaante ho। tumhein pata hai ki in aankhon se jo kuchh puraani duniya ka dekhte hain, woh sab abhi khatma hona hai।

geet:- toone raat gavaai so ke…

om shanti। baap baith bachchon ko samjhaate hain। hoobhu jaise 5 hajaar varsha pahle samjhaaya tha, vaise phir bhi samjha rahe hain ki puraani duniya ka vinaash aur nai duniya satayug ki sthaapna kaise hoti hai। abhi hai puraani duniya aur nai duniya ka sangamayug। baap ne samjhaaya hai nai duniya satayug se lekar ab kaliyug ant tak kya-kya ho raha hai! kya-kya saamagri hai! kya-kya dekhte ho! yagya, tap, daan-punya aadi kya karte hain। yeh jo kuchh dekhne mein aata hai yeh kuchh bhi rehna nahin hai। puraani koi bhi cheez rahne vaali nahin hai। jaise puraana makaan todte hain to unmein jo marble ke patthar aadi achhi cheezen hoti hain, woh rakh dete hain। baaki tod phod dete hain। tum bachche jaante ho yeh puraana sab khatma hona hai। baaki yeh jo science ka hunar hai, woh kaayam rahega। tum sab jaante ho ki yeh srishti chakra kaise phirta hai। satayug se kaliyug ant tak kya-kya hota hai। yeh science bhi ek vidya hai, unse aeroplane, bijli aadi sab kuchh bane hain। pahle yeh nahin tha, ab bana hai। duniya to chalti rehti hai। bhaarat hai avinaashi khanda, pralay to hoti nahin। yeh science jisse abhi itna sukh milta hai, woh hunar bhi vahaan rehta hai। seekhi hui cheezen doosre janma mein bhi kaam aati hain। kuchh na kuchh rehta hai। yahaan bhi earthquake jahaan hoti hai to phir jaldi mein saara naya bana dete hain। vahaan nai duniya mein vimaan aadi banaane vaale bhi honge। srishti to chalti hi rehti hai। yeh banaane vaale phir bhi aayenge। ant mati so gati hogi। bhal unhon mein yeh gyaan nahin hai parantu woh aayenge zaroor aur aakar nai-nai cheezen banaayenge। yeh khyaalaat abhi tumhaari buddhi mein hain। yeh sab khatma ho jaayenge, baaki sirf bhaarat khanda hi rahega। tum warriors ho। apne liye yogbal se svaraajya ki sthaapna kar rahe ho। vahaan sab kuchh naya hoga। tatva bhi jo tamopradhaan hain woh satopradhaan ban jaayenge। tum bhi nai pavitra duniya mein jaane ke liye ab pavitra ban rahe ho। tum jaante ho ham bachche yeh seekhkar bahut hoshiyaar ho jaayenge। bahut meethe phool ban jaayenge। tum koi ko bhi yeh baaten sunaate ho to woh bahut khush hote hain। jo jitna achhi reeti samjhaate hain, un par bahut khush hote hain। kehte hain yeh samjhaate to bahut achha hain, parantu jab opinion likhne liye kehte hain to kehte hain vichaar karenge। itne mein ham kaise likh den। ek baar sunne se baap se yog kaise rakhen, yeh seekh nahin sakte। achha to lagta hai। tum yeh zaroor samjhaate honge ki ab puraani duniya ka vinaash hona hai। paapon ka bojha sir par bahut hai। yeh patit duniya hai, paap bahut kiye hue hain। raavanraajya mein sab patit hain tab to patit-paavan baap ko bulaate hain। yeh gyaan abhi tumko hai। satayug mein yeh koi nahin jaante ki inke baad treta aayega। vahaan to praalabdha bhogte hain।

ab tum bachche kitne buddhivaan bante ho, jaante ho hamko roohaani baap padhaate hain। baba hai world almighty authority, woh hai shaastron ki authority। un shaastra padhne vaalon ko almighty nahin kaha jaata hai। yeh sab bhakti maarga ke shaastra hain। baaki yeh jo baba tumko padha rahe hain, yeh hain nai duniya ke liye nai baaten। to tum bachchon ko bahut khushi honi chaahiye। buddhi mein saara din yeh gyaan tapakta rahe। student jo padhte hain usko phir revise bhi karte hain, jisko hi vichaar saagar manthan kaha jaata hai। tum yeh samajhte ho ki baba hamko behad ki padhaai athva srishti ke aadi-madhya-ant ka saara raaz baith samjhaate hain, jisko tumhaare sivaae koi samajh nahin sakte isliye tumko bahut khushi honi chaahiye। tum bahut bade aadmi ho। tumko padhaane vaala bhi oonche te ooncha baap hai। to tumko sadaiv khushi ka paara chadha rehna chaahiye। sadaiv buddhi mein yeh baaten revise karo ki pahle-pahle ham paavan the। phir 84 janma le patit ban gaye, ab drama plan anusaar baba paavan bana rahe hain। saadhu-santa sab kehte hain ki ham rachta baap aur rachna ke aadi madhya ant ko nahin jaante। tum jaante ho Christ phir apne samay par aayega। Christian ka jaise saari prithvi par raajya tha, ab sab alag-alag ho gaye hain, aapas mein lad jhagad rahe hain। ab kehte hain ek raajya ek bhaasha ho। matbhed na ho, yeh kaise ho sakta hai। ab to aapas mein lad jhagad kar aur hi pakke ho gaye hain। abhi yeh to ho nahin sakta jo sabki ek devtaai mat ho jaae। bhal kehte hain raamraajya chaahiye parantu samajhte kuchh nahin hain। tumko bhi pahle kuchh pata nahin tha। abhi tum brahman bane ho, tum jaante ho ki hamaara yug hi alag hai। is sangamayug par brahma mukh vanshaavli brahman dharma ki sthaapna hoti hai। tum brahman ho raajarishi। tum pavitra bhi ho aur shiv-baba se raajya praapta karte ho। woh yog rakhte hain brahm se, ek baap se nahin rakhte। koi kisse rakhte, koi kisse। koi kiska pujaari, to koi kiska। yeh kisko pata hi nahin ki oonche te ooncha kaun hai isliye baap ne kaha hai yeh sab hain aasuri sampradaay, tuchchha buddhi। raavan ke mureed hain। tum abhi shivbaaba ke bane ho। tumko baap se varsa milta hai nai duniya satayug ka। baap kehte hain - he aatmaayen tumko ab tamopradhaan se satopradhaan zaroor banna hai isliye sirf mujhe yaad karo। kitni sahaj baat hai। geeta mein krishna ka naam daal diya hai phir unko dvaapar yug mein le gaye hain। bhool to bhaari ki hai parantu yeh baaten unki hi buddhi mein baithengi jo sthaai yahaan aate rahenge। mele mein aate to dher hain unmein se dekho sapling kaise lagta hai। anek dharma vaale aate hain, usmein bhi jaasti hindu dharma vaale aate hain, jo devi-devtaaon ke pujaari honge। aapehi poojya aapehi pujaari...iska bhi arth samjhaana padta hai। mele pradarshani mein itna adhik samjha nahin sakte। koi to 4-5 maas aate hain, samajhte hain। koi thoda achhi reeti samajhte hain। tum jitne jaasti pradarshani mele aadi karenge utne bahut aayenge। samjhenge gyaan bada achha hai, jaakar samjhen। centre par itne chitra nahin hote hain। pradarshani mein bahut chitra hote hain। tum samjhaate ho - to achha bhi unhon ko lagta hai parantu baahar jaane se maaya ka vaayumandal hai, apne dhandhedhori mein lag jaate hain। abhi yeh puraani duniya khatma ho nai banegi aur baba hamaare liye svarga ki baadshaahi sthaapan kar rahe hain। nai duniya mein ham jaakar naye mahal banaayenge। aise nahin neeche se mahal nikal aayenge। pahli-pahli mukhya yeh baat nishchay karni hai ki woh hamaara baap bhi hai, teacher bhi hai। manushya srishti ka beejroop hai। unmein saari knowledge hai, tab to mahima gaate hain gyaan ka saagar...woh beej jad hota hai। woh bol na sake। yeh chaitanya hai। baap ne tumko saari knowledge di hai jo auron ko achhi reeti samjhaani hai। mele va pradarshani mein dher aate hain। nikalte koton mein koi hain। 7-8 din aakar phir gum ho jaate hain। aise karte-karte koi na koi nikal aayega। samay thoda hai, vinaash saamne khada hai। karmaateet avastha ko paana hai zaroor। patit se paavan hone ke liye yaad bahut zaroori hai। apni sambhaal karni hai। mujhe satopradhaan banna hai - yeh chinta lagi rahe kyonki sir par janma-janmaantar ka bojha hai। raavan raajya hone se seedhi utarte hi aaye ho। ab yogbal se chadhna hai। raat din yahi phikraat rahe ki mujhe satopradhaan banna hai aur srishti chakra ki knowledge bhi buddhi mein chaahiye। school mein bhi yeh rehta hai ki ham phalaani-phalaani subject mein paas ho jaayen, ismen mukhya subject hai yaad ki। srishti ke aadi madhya ant ka bhi gyaan chaahiye। tumhaari buddhi mein saara seedhi ka gyaan hai ki ab ham baba ki yaad se satayugi sooryavanshi gharaane ki seedhi chadhte hain। 84 janma lete seedhi utarte aaye, ab phat se chadh jaana hai। gaayan hai na - second mein jeevanmukti। is janma mein hi baap se jeevanmukti ka varsa lekar so devta ban jaayenge। baba kehte hain bachche tum hi sooryavanshi the, phir chandravanshi, vaishya vanshi bane। abhi tumko brahman banaata hoon। brahman hain choti। oonche te ooncha parampita paramatma aakar brahman, devta, kshatriy teen dharmon ki sthaapna karte hain। tum jaante ho abhi ham brahman varna mein hain। phir devta varna mein aayenge। bachchon ko roz kitna buddhi mein gyaan bharte rehte hain, jisko dhaaran karna hai। nahin to aap samaan kaise banaayenge। sooryavanshi gharaane mein bahut thode aayenge, jo achhi reeti padhenge aur padhaayenge।

is samay tumhaari gat mat duniya se bilkul nyaari hai। jaise kehte hain eeshvar ki gat mat nyaari hai। tumhaare sivaae koi bhi baap se yog lagaate nahin hain। pradarshani mein aate hain phir chale jaate hain। woh ban jaate hain praja। baaki jo achhi reeti padhenge, padhaayenge woh achha pad pa sakte hain। phir tumhaari yeh missionary bhi jor bharti jaayegi। bahuton ko kashish hogi, aate rahenge। nai baat ko phailne mein samay to lagta hai na। chitra bhi phat se bahut ban jaayenge। din-pratidin manushya bhi vriddhi ko paate jaate hain।

tum jaante ho yeh jo bombs aadi ki ladaai lagegi phir kya haal hoga। din-pratidin duhkh apaar hota jaayega। aakhreen yeh duhkh ki duniya khatma hogi। total vinaash nahin hoga। shaastron mein gaayan hai yeh bhaarat avinaashi khanda hai। tum jaante ho hamaara yaadgaar hoobhu aabu mein hai। us par samjhaana chaahiye, woh hai jad yaadgaar। yahaan practical sthaapna ho rahi hai। raajayog seekh rahe ho vaikuntha ke liye। delvaada mandir kitna achha bana hua hai। ham bhi yahaan aakar baithe hain। pahle se hi hamaara yaadgaar bana hua hai। tum svarga ki raajaai paane ke liye yahaan baithe ho। kehte hain baba ham aapse raajya lekar hi chhodenge। jo achhi tarah saara din simran karte aur karaate honge, khushi bhi unhon ko rahegi। student khud samajhte hain - ham paas honge va nahin। laakhon karodon mein se scholarship kitne thodon ko milti hai। mukhya hain 8 sone ke phir 108 chaandi ke, baaki 16000 tombe ke। jaise dekho pope medals dete the to sabko sone ka thode hi denge। koi ko sone ka, koi ko chaandi ka। maala bhi aise banti hai। tum chaahte ho golden prize leven। chaandi ki lene se chandravanshi mein aa jaayenge। baba kehte hain mujhe yaad karo to vikarma vinaash honge aur koi upaay hi nahin hai। yahi phurna rakho paas hone ka। ladaai ka thoda jaasti hangaama hoga phir jor se purushaartha karne lag padenge। imtahaan ke time student bhi gallop karne purushaartha mein lag jaate hain। yeh behad ka school hai। pradarshani par khoob practice karte raho। projector se itne prabhaavit nahin hote hain, jitna pradarshani dekh wonder khaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) puraani duniya ka vinaash ho uske pahle apni karmaateet avastha banaani hai, yaad mein rah satopradhaan banna hai।

2) sada yahi khushi rahe ki humein padhaane vaala svayan oonche te ooncha baap hai। padhaai achhi reeti padhni aur padhaani hai। sunkar vichaar saagar manthan karna hai।

vardaan:- nirvikaari va pharishte swaroop ki sthiti ka anubhav karne vaale aatma-abhimaani bhav

jo bachche aatma-abhimaani bante hain woh sahaj hi nirvikaari ban jaate hain। aatma-abhimaani sthiti dvaara mansa mein bhi nirvikaareepan ki stage ka anubhav hota hai। aise nirvikaari, jinhen kisi bhi prakaar ki impyuriti va 5 tatvon ki aakarshan aakarshit nahin karti - vahi pharishta kahlaate hain। iske liye saakaar mein rehte hue apni niraakaari aatma-abhimaani sthiti mein sthit raho।

slogan:- jeevan mein ateendriy sukh ka anubhav karne ke liye vishesh amritvele ekaantapriy bano।