मंगलवार 28 दिसंबर 2021 की दैनिक मुरली

28-12-2021 praatahmurli om shanti "baapdaada"' madhuban

“meethe bachche - practice karo main aatma hoon, main aatma hoon, shareer ka bhaan chhod do, bas shivbaaba ko yaad karte-karte ghar jaana hai''

prashn:- shivbaaba ko kin bachchon par bahut-bahut taras padta hai?

uttar:- jo bachche apna valuable samay vyartha ganva dete hain, baap ka bankar baap ki service nahin karte। un par baap ko bahut-bahut taras padta hai। baba kehte - mere bachche bane ho to first grade bankar dikhaao। gyaan ratna jo milte hain unka daan karo।

geet:- takdeer jagaakar aai hoon…

om shanti। jaise baba gyaan ka saagar hai bachchon ko bhi srishti ke aadi-madhya-ant ka gyaan samjhaate rehte hain aur chitron ke oopar bhi achhi tarah samjhaate rehte hain। baba ka seedhi ke chitra par saari raat vichaar chal raha tha kyonki yeh hai sabse achhe te achha chitra samjhaane ka aur hai bhi bhaaratvaasiyon ke liye। shivbaaba to gyaan ka saagar hai, yeh baba bhi gyaan ki uchhaalen dete rehte hain, isko kaha jaata hai vichaar saagar manthan। tum bachchon ka bahut thoda vichaar saagar manthan chalta hai। kai bachchon ka to vichaar saagar manthan chalta hi nahin hai। har ek ki buddhi chalni chaahiye। seedhi par bahut vichaar chalte hain। mool vatan bhi oopar mein dikhaana pade। seedhi to hai sthool vatan ki, 84 janmon ki। gyaan ke bigar yeh chitra koi bana na saken। gyaan to tum bachchon mein hi hai। seedhi banaate bhi vichaar saagar manthan chalte rehna chaahiye। yeh badi achhi cheez hai। oopar mein mool vatan bhi zaroor chaahiye। samjhaaya jaata hai - aatmaayen mool vatan mein star misal rehti hain। mool vatan ke baad hai brahma-vishnu-shankar puriyaan, jisko sookshm vatan kaha jaata hai। seedhi mein to bhaarat ka hi dikhaate hain। bhaarat paavan tha, abhi patit hai। akshar sab likhne padte hain। bichaare manushya to kuchh bhi nahin jaante। jo poojya the vahi pujaari bane hain, yeh kisko bhi pata nahin hai। tumhaare mein bhi nambarvaar hain jo jaante hain। raajdhaani sthaapan ho rahi hai। koi to bahut achhi reeti purushaartha karne lag padte hain। main aatma hoon। shareer ko jaise bhool jaate hain aur kuchh dikhaai nahin padta kyonki samjhaaya jaata hai ki tum apne ko aatma samjho। shareer ka bhaan toot jaaye। kehte hain na - aap muye mar gai duniya। shivbaaba ko yaad karte-karte apne ghar jaana hai। is avastha ko jamaane mein hi mehnat hai। seedhi par bhi samjhaaya jaata hai ki bhaarat mein aadi sanaatan devi-devta dharma tha to sukh-shanti-pavitrata thi। abhi manushya duhkhi hue hain to ghar ko yaad karte hain। koi ko bhi is seedhi ke chitra par samjhaana bahut achha hai। seedhi ke aage jaakar baith jaaen to bhi buddhi mein rahe - ham bhaaratvaasiyon ne 84 janma liye hain। 84 janma siddha karne hain। phir is hisaab se samjhaaya jaata hai - jo aadhaakalpa ke baad aate hain unhon ke zaroor kam janma honge। saara din buddhi mein yeh gyaan tapakta rahe। satayug treta mein sampoorn nirvikaari, poojya the phir vikaari pujaari bane। vikaari banne ke kaaran hi apne ko hindu kahlaate rehte hain। aur koi ne apna naam nahin badla hai। hinduon ne hi badla hai। abhi tum bachchon ko yeh gyaan milta hai। gyaan saagar baba tumko naya gyaan de rahe hain। seedhi ke chitra par bahut bachchon ko dhyaan dena hai। sirf koi chitra ke saamne aakar baith jaaye to bhi buddhi mein sab kuchh aa jaayega। saari raat buddhi chalti rahe। 84 ka chakra kaise samjhaaya jaae। aadhaakalpa hai raavan raajya, baad mein jo aane vaale hain woh yeh gyaan uthaayenge hi nahin। satayug treta mein aane vaale hi uthaayenge। jinko satayug treta mein aana hi nahin hai, woh yeh gyaan uthaayenge bhi nahin। abhi to bhaarat ki kitni sankhya hai। satayug treta mein hota hai ek bachcha, ek bachchi। pichhaadi mein thodi gadbad hoti hai, parantu vikaar ki baat nahin। raavanraajya hota hi hai - dvaapar mein। parantu treta mein do kala kam ho jaane se kuchh na kuchh purity kam ho jaati hai। raavan raajya aur raamraajya ko bhi koi samajhte nahin hain। raajaai pad paane vaale achha padhenge। shauk chaahiye koi ka kalyaan karne ka। parantu takdeer mein nahin hai to tadbeer hi nahin karte hain। dhaarna karte jaayen to service par bhi baba bhej den। jinko service ka shauk hai woh to din raat service karte hain। seedhi ke raaz ko koi samajh jaaen to khushi ka paara chadh jaaye। baba gyaan ka saagar hai, ham bachche nadiyaan hain to woh show dikhaana hai। din-pratidin vriddhi hoti jaayegi। raajaai to sthaapan honi hi hai। seedhi mein bhi dikhaaya hai satayug shreshthaachaari paavan bhaarat, vahi ab patit bhrashtaachaari durgati ko paaya hua bhaarat hai। sab durgati ko paaye hue hain tab to baba aakar sadgati karte hain। ismen bhal koi aatma achhi va buri bhi hoti hai। religious aadmi itna paap karma nahin karte hain। veshyaayen aadi bahut paap karma karti hain। yeh hai veshyaalay। satayug hai shivaalay, unki sthaapna shivbaaba karte hain। unko krishnapuri bhi kehte hain arthaat krishnaalay kahen... parantu sthaapna to shivbaaba karte hain na। yeh seedhi ka chitra bhi zaroori hai। is par to bahut dhyaan dena chaahiye। seedhi ko dekhne se saara 84 ka chakra buddhi mein aa jaata hai। parantu andar bada shuddh hona chaahiye। shivbaaba se yog ho tab nasha chadhe aur pad bhi pa saken। aise nahin kehna chaahiye ki jo milega, takdeer mein jo hoga... service ka shauk rakhna chaahiye। shareer par to bharosa nahin hai। aage chalkar kailemeteez bhi jor se aati rahengi phir khaali haath jaayenge। earthquake mein laakhon manushya mar padte hain to dar rehna chaahiye, yog ki yaatra se ham satopradhaan ban jaayen phir auron ko bhi banaana hai। dhan diye dhan na khute... mehnat karni hai। baap to samjhaate rehte hain tumko 21 janmon ke liye apne paanv par khada rehna hai isliye achhi reeti purushaartha karte raho। purushaartha ka samay hi abhi hai। duniya mein kisko pata nahin hai ki 21 janmon ke liye raajaai kaise milti hai। tum is seedhi par bahut achhi reeti samjha sakenge। 84 janma kaise hain? oopar mein likha hua bhi hai shiv bhagvaanuvaach, niraakaar patit-paavan gyaan ka saagar samjha rahe hain। jinko samjhaate hain woh phir auron ko bhi samjhaayenge ki bachche tumko ab kaaroon ka khajaana milta hai to woh lena chaahiye। oonch pad paana chaahiye। yeh hai pravritti maarga ka gyaan। ek hi ghar se ek bhaati gyaan mein hai, doosra nahin hai। khit-khit to hogi hi। yeh sapling lag raha hai। ham poojya se pujaari kaise banen। yeh raaz bada samajhne ka hai। jo sabse jaasti poojya paavan bante hain, vahi sabse jaasti patit bante hain। inke bahut janmon ke ant mein hi pravesh kiya hai। sab patit hain na। baap bhi samjhaate hain to daada bhi samjhaate hain to daadiyaan bhi samjhaati hain। behen-bhaaeeyon ka dhandha hi yeh hai। grihastha vyavhaar mein rehte kamal phool samaan rahen to tumse bhi teekhe ja sakte hain। jo kaanton ke jangal mein rehte service karte hain, unko phal jaasti milta hai। grihastha vyavhaar mein rehte service bahut achhi karte hain, unhon ko service mein bada maza aayega। shivbaaba bhi madad to karenge na। kahenge achha service chhodkar phalaani jagah jaao। jaise dekho nimantran milte hain - projector show ke liye। 4-5 mukhya chitra bhi le jaao। vahaan service karke aao। service ke jo shaukeen honge, kahenge ham jaakar samjhaate hain। vahaan centre bhi khul sakta hai। nimantran to bahut mil sakte hain। service vriddhi ko paati rahegi। baap gaayan to karenge na। yeh bachcha bahut achhi service karne vaala hai। koi to service se 3 kos door bhaagte hain। service ka shauk rakhne se madad bhi milti hai, jitna baap ki service karenge utna taakat milegi, aayu bhi badhegi। khushi ka paara chadhega। naami-graami bhi honge apne kul mein। purushaartha se itna oonch ban sakte ho to itna purushaartha karna chaahiye। chalan se hi maaloom pad jaata hai। kisko service ka shauk hai। raat-din apni kamaai ka chintan rakhna pade। bahut bhaari kamaai hai। baba ko bhi kab-kab khyaal aata hai, jaakar bachchon ko refresh karen। bahut khushi hogi। baba ko to serviceable bachche hi yaad padte hain। amritvele vichaar saagar manthan ka dance achha chalta hai, jiska jo dhandha usi mein lage rehte hain। savere mein vichaar saagar manthan chalta hai। bachchon ko bhi pahle to murli achhi reeti dhaaran karni pade। revise karen tab phir aakar murli chalaayen। aage baba raat ko do baje uthkar likhte the phir savere mama murli padhkar phir chalaati thi। bhal murli haath mein na bhi leven, to bhi achhi chala sakte hain। jin-jin bachchon ko murli padhne aur us par chintan karne ka shauk hai, woh service karte rahenge। murli padhne se jaag padenge। yeh murli chhapne ka kaam to bahut jor se chalega। tape ka bhi kaam bahut badh jaayega। murli vilaayat tak bhi jaayegi। koi ki buddhi mein baith jaae to ekdam nasha chadh jaayega। uthte-baithte 84 ka chakra buddhi mein phirta rahega। koi ki buddhi mein to kuchh bhi nahin baithta hai। khushi ka paara nahin chadhta hai।

tumhaara to saara din dhandha hi yeh rehna chaahiye। yeh hai oonche te ooncha dhandha। baba ko vyaapaari bhi kaha jaata hai na। yeh avinaashi gyaan ratnon ka vyaapaar koi virla kare। saara din buddhi mein yahi phirta rehna chaahiye aur khushi mein masta rehna chaahiye। yeh khushi hai saari andar ki। aatma ko khushi hoti hai - oho! hamko baba mil gaya hai। behad ke baap ne 84 janmon ki kahaani sunaai hai। bachche; baap ka, teacher ka shukriya maanenge na। student teacher dvaara paas hote hain to phir teacher ko saugaat bhi bhej dete hain। tum bachche jaante hain baba hamko oonch padhaai padhaate hain, jisse ham vishwa ke maalik ban jaate hain। yeh padhaai hai bahut sahaj। parantu poora dhyaan nahin dete hain। first class knowledge hai। inko samajhne se kaaroon ka khajaana milta hai bhavishya mein। kamaal hai na!

har ek bachcha samajh sakta hai ham kis grade mein hai। saara madaar hai - service par। baba to kahenge third grade se nikal first grade mein aa jaao tab kuchh pad pa sakenge। 21 janmon ki result nikal jaati hai। baba ko to taras padta hai। vyartha samay ganvaate hain। baba samjhaate hain drama plan anusaar mujhe aana padta hai - sadgati dene ke liye। yeh hai hi durgati ki duniya। poochho tum durgati mein ho? to kahenge hamaare liye to yahaan hi svarga hai। ham to svarga mein baithe hain। yeh buddhi mein nahin aata hai ki svarga satayug ko kaha jaata hai। bade-bade pandit, vidvaan hain। kiski bhi buddhi mein nahin aata hai ki yeh to puraani iron aged duniya hai। bade ghamanda se baithe hain। kitna bhakti maarga ka zor hai। bhakti ka to bahut pomp hai। kumbha ke mele par laakhon manushya jaate hain। yeh hai antim pomp। maaya is taraph aane nahin deti hai। choohe misal phoonk deti hai, saara khoon choos leti hai। achha।

meethe meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) savere-savere uthkar vichaar saagar manthan karna hai। murli padhkar us par chintan karke dhaaran karna hai। avinaashi gyaan ratnon ka vyaapaar karna hai।

2) service ka bahut-bahut shauk rakhna hai। shareer par koi bharosa nahin, isliye 21 janmon ki kamaai abhi hi jama karni hai।

vardaan:- silence ki shakti dvaara apne register ko saaph karne vaale lokapriy, prabhu priy bhav

jaise science ne aisi invention ki hai jo likha hua sab mit jaae, maaloom na pade। aise aap silence ki shakti se apne register ko roz saaph karo to prabhu priy va daivi lok priy ban jaayenge। sachchaai saphaai ko sabhi pasanda karte hain। isliye ek din ke kiye hue vyartha sankalp va vyartha karma ki doosre din leek bhi na rahe, beeti ko beeti kar fullstop laga do to register saaph rahega aur saaheb raazi ho jaayega।

slogan:- vyartha sankalp karna va doosron ke vyartha sankalp chalaane ke nimitta banna - yeh bhi apvitrata hai।