शनिवार 26 मार्च 2022 की दैनिक मुरली

26-03-2022 praatahmurli om shanti "baapdaada"' madhuban

“meethe bachche - ab behad ki raat poori ho rahi hai, din aane vaala hai, vaapis ghar chalna hai isliye ab dar-dar bhatakna band karo''

prashn:- kis practice ke aadhaar par tum bachche service bahut achhi kar sakte ho?

uttar:- yadi kam se kam 8 ghante tak yaad bani rahe, yeh practice ho jaae to service bahut achhi kar sakte kyonki yaad se hi saare vishwa mein pavitrata aur shanti ke vibration phailte hain। yaad se hi vikarma bhi vinaash honge aur pad bhi oonch milega isliye is roohaani yaatra mein kabhi bhi thakna nahin hai। jisma ka bhaan chhod dehi-abhimaani banne ka nirantar abhyaas karte rehna hai।

geet:- raat ke raahi thak mat jaana…

om shanti। bachchon ne saavdhaani suni। baap ne bachchon ko saavdhaani di ki he raat ke raahi.... kyonki ab tumhaare liye din aa raha hai। yeh hai behad ki raat aur din। behad ki raat poori hoti hai aur behad ke din ki sthaapna ho rahi hai। ab tum bachchon (aatmaon) ko jaana hai apne ghar। jiske liye tumne aadhaakalpa bhakti ki, parantu tum baap ko dhoondh na sake kyonki unke naam roop ko badal diya hai। ab tum jaante ho baap din mein athva kaliyug se satayug mein jaane ka raasta bata rahe hain। baba ne samjhaaya hai - bhrashtaachaari unko kaha jaata hai jo vikaar se paida hote hain। bhaaratvaasi baap ko hi bhool gaye hain, geeta ka bhagwan niraakaar, uske badle saakaar krishna ka naam daal diya hai। yeh hai bade te badi bhool, jis kaaran aadhaakalpa duhkh bhogna pada hai। bhool nimitta bani hai duhkh bhogvaane ke। yeh bhi drama ka part noondha hua hai, bhaktimaarga mein bhatakte rehte hain। agar baap ko jaan len to bhatakne ki darkaar nahin। tumne ab baap ko jaana hai। shreekrishna agar isi roop mein aaye phir to unko pahchaanne mein koi takleeph na ho। jhat sab jaan jaayen। parantu yeh to itna gupta hai jo tum bachche bhi bhool jaate ho। krishna ko to koi bhool na sake। saari duniya ekdam chatak pade। samjhe shreekrishna to hamko svarga mein le chalega kyonki woh to svarga ka maalik hai। unko koi chhode hi nahin, parantu samjhaane ki badi yukti chaahiye। agar samjhaane ki yukti nahin aati hai to kahaan-kahaan disservice kar dete hain kyonki khud hi poora samjha hua nahin hai - jo kisko achhi reeti siddha kar hisaab-kitaab bata sake। is samay sab patit hain। gaate bhi hain patit-paavan seetaaraam। parantu paavan banaane vaala kaun hai - yeh koi nahin jaante। geeta ka bhagwan krishna samajh liya hai। raam ka to koi shaastra nahin hai। aise nahin raamaayan koi raamchandra ka shaastra hai। kshatriy dharma koi raam ne nahin sthaapan kiya। brahman, devta aur kshatriy teenon dharma ek saath hi shivbaaba sthaapan karte hain। tumhaare mein bhi thode hain jo is baat ko samajh sakte hain। raaja raani to ek hota hai, baaki praja aur daas daasiyaan to anek bante hain। aage raajaaon ke paas dher daas daasiyaan thi, koi bahlaane ke liye, koi dance karne ke liye। dance ka shauk to vahaan bhi bahut hi rehta hai। baaki raaja raani bahut thode nikalte hain। jo achhi reeti samajh aur samjha sakte hain। pradarshani ki service se maaloom pad jaata hai ki kaun-kaun achhi reeti samjha sakte hain। pahli baat yeh samjhaani hai ki bhagwan ko na jaanne ke kaaran sarvavyaapi kah diya hai। doosra krishna ko bhagwan kahne se svarga rachne vaale shivbaaba ka naam gum kar diya hai। niraakaar baap hi sabka rachayita hai। us ek ko hi yaad karna hai, vahi raajayog sikhlaate hain। parantu geeta mein jo krishna bhagvaanuvaach likh diya hai, is kaaran hi haath mein geeta uthaae jhoothi kasam lete hain। ab bataao kya shreekrishna haazir naazir hai! va niraakaar paramatma haazir naajir hai! sab moonjhe hue hain।

ab tum bachchon ko savere uth practice karni hai samjhaane ki। (raaja janak ka misaal) kehte hain ashtaapa ne janak ko gyaan diya! parantu yeh koi brahm gyaan to hai nahin, yeh hai brahma gyaan। brahmaakumaariyaan yeh gyaan de rahi hain। brahm-kumaariyaan nahin। woh log brahm ko eeshvar samajhte hain, parantu nahin। eeshvar to baap hai। baap ka naam hi shiv hai। brahm to tatva hai। yeh sab baaten moti buddhi vaale samajh na saken। nambarvaar daas daasiyaan bhi bante hain। samajhna chaahiye agar ham kisko achhi tarah samjha nahin sakte hain to hamaara part pichhaadi mein hai। to phir purushaartha karna chaahiye। saari duniya mein jo jo kuchh sikhlaate hain, woh deh-abhimaan se hi sikhlaate hain। dehi-abhimaani sivaae tum braahmanon ke koi hai nahin। tumhaare mein bhi nambarvaar hain, jo aatma-abhimaani bante hain, ham aatmaon ko sunaate hain। aatma in organs dvaara bolti hai। aatma kehti hai main nahin sun sakti hoon, mere organs kharaab hain। to dehi-abhimaani banne mein mehnat hai। satayug mein dehi-abhimaani rehte hain। baaki paramatma ka gyaan nahin hai। baap kehte hain mera simran vahaan koi nahin karte, vahaan darkaar hi nahin। simran athva yaad ek hi baat hai। vo log maala haath mein lete hain, mukh se raam raam kehte hain। yahaan to raam akshar kehna bhi wrong ho jaata hai। right akshar hai shivbaaba। parantu shiv shiv bhi kehna nahin hai। baap ko yaad karne ke liye naam thode hi liya jaata hai। baap ko yaad karna - yeh hai yaatra। jismaani yaatra par jaate hain to bhi yaad rakhte hain - ham amarnaath par jaate hain। vo naam to lena padta hai na! tumko kuchh bhi japna nahin hai। tum jaan gaye ho - naatak poora hona hai। hamaare 84 janma poore hue। yeh puraana chola chhodna hai। part bajaate-bajaate patit hona hi hai। baap kehte hain yeh jo manushya srishti roopi jhaad hai, unka thur sad gaya hai। baaki taal, taaliyaan bachi hain। yeh bhi tamopradhaan ho gaye hain, jhaad ki aayu ab poori hoti hai। phir se naatak repeat hona hai। har ek apna-apna part bajaayenge। doosri koi duniya nahin hai। agar hoti to ham padhte kyon? kehte hain baba phir se aakar raajayog sikhlaao, geeta gyaan sunaao, paavan banaao। parantu patit ham kaise bane hain, yeh koi jaanta nahin hai। ab tum jaante ho ham hi paavan the। phir history repeat hoti hai।

ab baap kehte hain vaapis ghar chalna hai। ghar mein to baap hi rehta hai। kehte hain paramdham mein rehte hain phir bhool jaate hain। aatmaayen bhi brahmaanda mein rehti hain। yeh srishti hai, ismen manushya rehte hain। brahmaanda mein aatmaayen rehti hain, phir aati hain yahaan part bajaane। oopar mein aakaash tatva hai। pair sabke prithvi par hain। baaki shareer kahaan hai? woh to aakaash tatva mein hi hai। vahaan to aatmaayen stars rehti hain। vahaan girne ki cheez nahin jo ham gir padenge। science vaale rocket mein jaate hain, chakra lagaane phir baahar bhi nikalte hain। likhte bhi hain, girne ka dar nahin, itni aakarshan hai jo manushya aakaash tatva mein thahar jaate hain। to itni chhoti si aatma mahtatva mein kyon nahin thahar sakti। rahne ka sthaan vahaan hi hai, yeh soorya, chaand, stars bahut bade hain। yeh kaise thahre hue hain। koi rassi aadi to nahin hai। yeh saara drama bana hua hai। ham 84 ke chakra mein aate hain। yeh jhaad hai। kitni badi taal-taaliyaan hain। baaki chhote-chhote thode hi dekh sakenge। baba bhi nutshell mein samjhaate hain, jo peechhe-peechhe aate hain woh zaroor thode janma hi lenge। baaki ek ek ka hisaab nahin bataayenge। tum jaante ho brahma dvaara brahman, devta, kshatriy dharma ki sthaapna ho rahi hai। jisse sthaapna hui unko hi phir paalna karni hai। brahma vishnu shankar teenon hi devtaayen alag-alag hain। baaki aise nahin brahma ko 3 mukh hain। aise ho na sake। baap kehte hain - bachche tum bilkul besmajh ban gaye ho। baap aakar samajhdaar banaate hain। abhi tum sab seetaayen raavan ki kaid mein ho। tum hi bandar the, tumhaari sena li। tumko hi mandir laayak banaaya। ab raajdhaani sthaapan ho rahi hai, jitna jo shreemat par chalenge utna hi oonch pad paayenge। tum jaante ho hamaare mama baba number one mein jaate hain। sthool vatan mein tumhaare saamne baithe hain। sookshm vatan mein bhi dekhte ho baithe hain, aur phir baikuntha mein bhi dekhte ho। pahle bahuton ko saakshaatkaar karaaya gaya phir sab thode hi krishna ban jaayenge। baal-leela aadi dikhaai jaati hai, purushaartha karaane ke liye। bigar purushaartha mahaaraaja mahaaraani to nahin banenge। jo pakke nishchaybuddhi hain woh ek-dam tham (thahar) jaate hain। baba ham to aapko kabhi nahin chhodenge। kai phir aise kehte-kehte chhod bhi dete hain। aashcharyavat sunanti, kathanti, bhaaganti ho jaate hain। pahle ki kahaavat hai। abhi bhi yeh sab kuchh hota hi rehta hai। kehte hain kalpa pahle bhi aise bhaaganti hue the, kis par bhi bharosa nahin। jaise shvaans par bharosa nahin। baba ka bankar phir bhi mar jaate hain। eeshvareey janma din manaakar bhi mar jaate hain athva haath chhod dete hain। baba ghadi-ghadi kehte rehte hain tum aise samjho to hamko ab apne sweet hom mein jaana hai isliye baap aur ghar yaad padta hai। bhakti maarga mein bhi aadhaakalpa yaad kiya hai। parantu vaapis koi ja nahin sakte। jaante hi nahin to ja kaise sakenge। woh roohaani raahi ban kaise sakte! tum ab poore raahi bane ho। jo jaasti yaad karte hain unke paap katte jaate hain। yaatra ka bhi dhyaan rakhna hai। pichhaadi mein 8 ghanta tumhaari yeh service rahe to bhi bahut achha hai। yeh hai shanti aur pavitrata ke vibration phailaana। yaad se vikarma bhi vinaash honge aur pad bhi ooncha milega isliye kaha jaata hai - raat ke raahi thak mat jaana। kaliyug ka ant maana brahma ki raat poori hona। sabko vaapis zaroor jaana hai। roohaani ghar ko yaad karna hai। rooh ko ab jaana hai। jisma ka bhaan chhodna hai, dehi-abhimaani banna hai। yeh hai yaad ki yaatra। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) pakka nishchaybuddhi ban dridh sankalp karna hai ki baap ka haath kabhi nahin chhodenge। baap aur ghar ko ghadi-ghadi yaad karna hai।

2) dehi-abhimaani banne ki mehnat karni hai। 5 vikaaron roopi raavan ki kaid se chhootne ke liye shreemat par chalna hai। mandir laayak banne ka purushaartha karna hai।

vardaan:- gyaan yukta bhaavna aur sneh sampanna yog dvaara udti kala ka anubhav karne vaale baap samaan bhav

jo gyaan swaroop yogi tu aatmaayen hain ve sada sarvashaktiyon ki anubhooti karte hue vijayi banti hain। jo sirf snehi va bhaavna swaroop hain unke man aur mukh mein sada baba-baba hai isliye samay prati samay sahayog praapta hota hai। lekin samaan banne mein gyaani-yogi tu aatmaayen sameep hain, isliye jitni bhaavna ho utna hi gyaan swaroop ho। gyaanayukta bhaavna aur sneh sampanna yog - in donon ka balance udti kala ka anubhav karaate hue baap samaan bana deta hai।

slogan:- sada snehi va sahayogi banna hai to saralta aur sahansheelta ka gun dhaaran karo।

maateshvari ji ke anmol mahaavaakya - om shivoham, ham so so ham in shabdon ka yathaartha arth

om shanti, yeh jo shabd uchchaaran karte hain ham so, so ham, shivoham, aham aatma so paramatma ab yeh mahaavaakya kaun uchchaaran karte hain aur in shabdon ka yathaartha arth kya hai? jab om akshar kehte hain to om ka arth hai main aatma shant swaroop hoon, yeh nishchay hone se phir main aatma so paramatma hoon, yeh akshar nahin kah sakte hain। phir to aise hi samajhte hain ki main aatma paramatma ki santaan hoon, to yeh om shabd kehna aatmaon ka adhikaar hai। phir jab ham so, so ham shabd kehte hain, to us shabd ka arth hai ham so poojya, so ab pujaari bane। ham so poojya, ab yeh shabd bhi aatma hi kah sakti hai। yeh jo manushya kehte hain aham aatma so paramatma, ab yeh shabd sirf paramatma hi kah sakta hai kyonki vahi ek aatma, param aatma hai, phir yeh jo shivoham shabd kehte hain vo bhi paramatma kah sakte hain kyonki vo shiv hain। to in shabdon ke arth ko bhi tab jaante hain jab paramatma aakar yeh knowledge dete hain, baaki aur dharma vaalon ko, Christian aadi ko yeh maaloom nahin ki ham so pope banoonga। unhon ko yeh knowledge hi nahin hai। abhi hamko yeh knowledge mili hai ki ham so devta banenge, hamaare saamne devtaaon ka yaadgaar chitra hai aur saath-saath unhon ke jeevan charitra history, geeta bhaagvat saamne hain kyonki ham aadi se ant tak saare kalpa ke chakra mein hain aur vo dharma pitaayen jab aate hain to vo kalpa ke beech mein aate hain, isliye ve ham so shabd nahin kah sakte, om shabd kah sakte hain। achha - om shanti।