शुक्रवार 22 अप्रैल 2022 की दैनिक मुरली

22-04-2022 praatahmurli om shanti "baapdaada"' madhuban

“meethe bachche - baba aaya hai tum bachchon se daan lene, tumhaare paas jo bhi puraana kichda hai, use daan de do to punya aatma ban jaayenge''

prashn:- punya ki duniya mein chalne vaale bachchon prati baap ki shreemat kya hai?

uttar:- meethe bachche - punya ki duniya mein chalna hai to sabse mamatva mitaao। 5 vikaaron ko chhodo। is antim janma mein gyaan chita par baitho। pavitra bano to punya aatma ban punya ki duniya mein chale jaayenge। gyaan-yog ko dhaaran kar apni daivi chalan banaao। baap se sachcha sauda karo। baap tumhaare se lete kuchh nahin, sirf mamatva mit jaaye, uski yukti bataate hain। buddhi se sab baap havaale kar do।

geet:- is paap ki duniya se…

om shanti। duniya ke manushya va raavanraajya ke manushya pukaarte hain he patit-paavan aao। paavan duniya athva punya ki duniya mein le chalo। geet banaane vaalon ko in baaton ki samajh nahin hai। pukaarte hain - raavanraajya se raamraajya mein le chalo, parantu apne ko koi patit samajhte nahin hain। apne bachchon ke paas to sammukh baap baithe hain। raamraajya mein le chalne ke liye, shreshtha banne ke liye shreemat de rahe hain। bhagvaanuvaach - raam bhagvaanuvaach nahin। bhagwan to niraakaar hai। niraakaari, aakaari, saakaari teen duniyaayen hain na। niraakaar paramatma niraakaari bachchon (aatmaon) ke saath niraakaari duniya mein rahne vaale hain। abhi baba aaya hua hai - svarga ka raajya bhaagya dene, hamko punya aatma banaane। raamraajya maana din, raavan raajya maana raat। yeh baaten aur koi nahin jaante। tumhaare mein bhi koi virla jaante hai। is gyaan ke liye bhi pavitra buddhi chaahiye। mool baat hai yaad ki। achhi cheez hamesha yaad rehti hai। tumko punya kya karna hai? tumhaare paas jo kichda hai woh mere havaale kar do। manushya jab marte hain to uske bistar kapde aadi sab karni-ghor ko dete hain। woh doosre kisam ke brahman hote hain। ab baba aaya hai, tumhaare se daan lene ke liye। yeh puraani duniya, puraana shareer sab kuchh sada hua hai। yeh mujhe de do aur isse mamatva mitaao। bhal 10-20 karod hain। parantu baap kehte hain inse buddhi nikaalo। badle mein tumko sab kuchh nai duniya mein milega, kitna yeh sasta sauda hai। baap kehte hain jinmen mainne pravesh kiya hai, usne sab sauda kiya। ab dekho - uske badle kitna raajya-bhaagya milta hai। kumaariyon ko to kuchh dena hi nahin hai। varsa milta hai bachchon ko to unko milkiyat ka nasha rehta hai। aajkal stri ko half partner thode hi banaate hain, saara bachchon ko hi dete hain। purush mar jaata hai to stri ko koi poochhta bhi nahin। yahaan to tum baap se full varsa lete ho। yahaan to koi mel female ka savaal hi nahin। sab varse ke adhikaari hain। maataaon, kanyaaon ko to aur hi hak jaasti milta hai kyonki kanyaaon ka laukik baap ke varse mein mamatva nahin hai। vaastav mein tum sab kumaar kumaariyaan ho gaye। baap se kitna varsa paaya hai। ek kahaani hai - raaja ne bachchiyon se poochha - kiska khaati ho? to ek ne kaha apne bhaagya ka। to raaja ne usko nikaal diya। woh baap se bhi saahookaar ho gai, baap ko nimantran diya, poochha ab kiska khaati hoon, dekho। to baap bhi kehte hain bachche, tum sab apni takdeer banaate ho।

dehli mein ek ground hai, naam rakha hai raamleela ground। vaastav mein naam rakhna chaahiye raavan leela kyonki is samay saare vishwa mein raavan leela chal rahi hai। bachchon ko raamleela ground lekar - usmein chitra lagaane chaahiye। ek taraph raam ka chitra ho aur neeche bada raavan ka bhi chitra ho। bahut bada gola ho। beech mein likh dena chaahiye - yeh raam raajya, yeh raavan raajya। to samajh jaayen। devtaaon ki dekho kitni mahima hai - sarvagun sampanna....। aadhaakalpa hai kaliyugi bhrashtaachaari, raavanraajya... usmein sabhi aa jaate hain। ab raavan raajya ka ant to raam hi karenge। is samay raamleela hai nahin, saari duniya mein raavan leela hai। raamleela hoti hai satayug mein। lekin sabhi apne ko bada aklamand samajhte hain। shri shri ka title rakhaate hain - yeh title to hai niraakaar parampita paramatma ka, jis dvaara shri lakshmi-naaraayan bhi raajya paate hain। ab baba aaya hai, tumko bhakti roopi andhakaar se chhudaakar sojhre mein le jaate hain। jinmen gyaan-yog hoga unki chalan bhi daivi hogi। aasuri chalan vaale kiska bhi kalyaan nahin kar sakte। jhat maaloom pad jaata hai ismen aasuri avgun hain ya daiveegun! abhi tak koi sampoorn to hai nahin। abhi bante jaate hain to baba to daata hai, tumse kya lenge। jo kuchh lete hain woh tumhaari seva mein laga dete hain। baba ne inko bhi surrender karaaya - bhatthi banaani hai, bachchon ki paalna karni hai। paise bigar itnon ki paalna kaise hogi। pahle baba ne inko arpan karaaya phir jo aaye unko bhi arpan karvaaya। parantu sabhi ki ek-ras avastha to bani nahin, bahut chale bhi gaye। (billi ke poongaron ki kahaani) nambarvaar purushaartha anusaar sab pak kar nikle। baba to punya ki duniya mein le chalte hain। sirf kehte hain 5 vikaaron ko chhodo। ham tumko prince-princess banaayenge। brahma ka saakshaatkaar ghar baithe bahuton ko ho jaata hai। vahaan se likhkar bhej dete hain - baba ham aapke ban gaye hain, hamaara sab kuchh aapka hai। baba kuchh lete nahin। baba kehte hain sab kuchh apne paas rakho। yahaan makaan banaate hain, koi poochhte hain paisa kahaan se laaya। are itne dher bachche hain, baba ko। prajaapita brahma ka naam suna hai na। kehte hain sirf mamatva mitaao, tumhein vaapis jaana hai। baba ko yaad karo। hamko bhagwan padhaate hain to khushi ka paara chadha rehna chaahiye। lakshmi-naaraayan ko bhagwan nahin kahenge, devi-devta kahenge। bhagwan ke paas bhagavti hoti nahin। kitni yukti ki baat hai। sivaae sammukh yeh baaten koi samajh na sake। gaate bhi hain tvamev maataashcha pita... gyaan na hone ke kaaran lakshmi-naaraayan ke aage, hanoomaan ke aage, ganesh ke aage bhi jaakar yeh mahima gaate hain। are woh to saakaari the, unko apne bachche hi maat-pita kahenge। tum unke bachche ho kahaan? tum to raavan ke raajya mein ho। yeh brahma bhi maata hai। in dvaara baba kehte hain tum mere bachche ho। parantu maataaon, kanyaaon ko sambhaalne vaali maata chaahiye। adopted bachchi hai - bi.ke.sarasvati। kitni guhya baaten hain। baba jo gyaan dete hain woh koi bhi shaastron mein nahin hai। bhaarat ka ek mukhya shaastra hai geeta, usmein gyaan ke padhaai ki baaten hain। usmein charitra ki koi baat nahin। gyaan se martaba milta hai।

baba jaadoogar hai। tum gaate ho ratnaagar, jaadoogar... tumhaari jholi bharti hai svarga ke liye। saakshaatkaar to bhakti maarga mein bhi karte hain, parantu unse kuchh laabh nahin। likhenge, padhenge... saakshaatkaar se tum koi woh ban gaye kya? saakshaatkaar main karaata hoon। patthar ki moorti thode hi saakshaatkaar karaayegi। naundha bhakti mein bhaavna to shuddh rakhte hain। unka ujoora main deta hoon, parantu tamopradhaan to banna hi hai। meera ne saakshaatkaar kiya parantu gyaan to kuchh bhi nahin tha। manushya to din pratidin tamopradhaan hote jaayenge। abhi to sabhi manushya patit hain। gaate bhi hain humein aisi jagah le chalo, jahaan sukh chain paayen।

tum bhaaratvaasiyon ko satayug mein bahut sukh tha। satayug ka naam baala hai na। svarga bhaarat mein hi tha - parantu samajhte nahin hain। yeh bhi jaante hain bhaarat hi praacheen tha, svarga tha। vahaan koi aur dharma nahin tha। yeh sab baaten baap hi samjhaate hain। tum sabhi ab shravan kumaar aur kumaariyaan bante ho। tum sabko gyaan ki kavaanthi (kaanvar) par bithaate ho। tumko sab mitra-sambandhiyon ko gyaan de uthaana hai। baba ke paas yugal bhi aate hain। aage to jismaani brahman se hathiyaala bandhavaate the। abhi tum roohaani brahman kaam chita ka hathiyaala todte ho। baba ke paas aate hain to baba poochhte hain - svarga mein chalenge। koi kehte hain hamko svarga yahaan hi hai। are yeh alpakaal ka svarga hai। main tumko 21 janma ke liye svarga doonga, parantu pahle pavitra rehna padega। bas, is hi baat mein dheele pad jaate hain। are behad ka baap kehte hain - to yeh antim janma gyaan chita par baitho। to dekha jaata hai striyaan jhat aa jaati hain। koi phir kehti hain pati parmeshvar ko naaraaz kaise karen।

baba ke bane to kadam-kadam par shreemat par chalna pade। ab baba aaya hai, svarga ka maalik banaane। pavitra banna achha hai। kul kalankit mat bano। baap kahenge na! laukik baap to chamaat bhi maarenge। mama meethi hoti hai। bahut meetha merciful banna hai। baap kehte hain bachche, tum mujhe bahut gaaliyaan dete ho। ab main apkaari par bhi upkaar karta hoon। main jaanta hoon ki tumhaara raavan mat par yeh haal hua hai। jo second paas hua woh drama। parantu aage ke liye khabardaar rehna ki hamaara khaata kharaab na ho। har ek ko apni praja bhi banaani hai, vaaris bhi banaana hai। murli koi miss nahin karni chaahiye। koi points miss na ho jaaen। achhe-achhe gyaan ratna nikal jaayen aur sunen nahin to dhaarna kaise karenge। regular student murli kabhi miss nahin karenge। koshish kar roz vaani padhni chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) apna khaata kharaab na ho, iske liye bahut khabardaar rehna hai। kabhi kul kalankit nahin banna hai। padhaai roz padhni hai, miss nahin karni hai।

2) shravankumaar-kumaari ban gyaan kavaanthi (kaanvar) par sabko bithaana hai। mitra-sambandhiyon ko bhi gyaan de unka kalyaan karna hai।

vardaan:- apne occupation ki smriti dvaara man ko control karne vaale raajayogi bhav

amritvele tatha saare din mein beech-beech mein apne occupation ko smriti mein laao ki main raajayogi hoon। raajayogi ki seat par set hokar raho। raajayogi maana raaja, usmein controlling aur ruling power hoti hai। woh ek second mein man ko control kar sakte hain। woh kabhi apne sankalp, bol aur karma ko vyartha nahin ganva sakte। agar chaahte hue bhi vyartha chala jaata hai to use knowledgeful va raaja nahin kahenge।

slogan:- sva par raajya karne vaale hi sachche svaraajya adhikaari hain।

maateshvari ji ke anmol mahaavaakya - “is avinaashi gyaan par anek naam dhare hain''

is avinaashi eeshvareey gyaan par anek naam dhare gaye hain (rakhe gaye hain)। koi is gyaan ko amrit bhi kehte hain, koi gyaan ko anjan bhi kehte hain। gurunaanak ne kaha gyaan anjan guru diya, koi ne phir gyaan varsha bhi kaha hai kyonki is gyaan se hi saari srishti sabja (hari bhari) ban jaati hai। jo bhi tamopradhaan manushya hain vo satoguni manushya ban jaate hain aur gyaan anjan se andhiyaara mit jaata hai। is hi gyaan ko phir amrit bhi kehte hain jisse jo manushya paanch vikaaron ki agni mein jal rahe hain usse thande ho jaate hain। dekho geeta mein paramatma saaph kehte hain kaameshu krodheshu usmein bhi pahla mukhya hai kaam, jo hi paanch vikaaron mein mukhya beej hai। beej hone se phir krodh lobh moh ahankaar aadi jhaad paida hota hai, usse manushyon ki buddhi bhrashta ho jaati hai। ab us hi buddhi mein gyaan ki dhaarna hoti hai, jab gyaan ki dhaarna poorn buddhi mein ho jaati hai tab hi vikaaron ka beej khatma ho jaata hai। baaki sannyaasi to samajhte hain vikaaron ko vash karna badi kathin baat hai। ab yeh gyaan to sannyaasiyon mein hai hi nahin। to aisi shiksha deven kaise? sirf aise hi kehte hain ki maryaada mein raho। parantu asul maryaada kaunsi thi? vo maryaada to aajkal toot gai hai, kahaan vo satayugi, tretaayugi devi devtaaon ki maryaada jo grihastha mein rahkar kaise nirvikaari pravritti mein rehte the। ab vo sachchi maryaada kahaan hai? aajkal to ulti vikaari maryaada paalan kar rahe hain, ek do ko aise hi sikhlaate hain ki maryaada mein chalo। manushya ka pahla kya pharja hai, vo to koi nahin jaanta, bas itna hi prachaar karte hain ki maryaada mein raho, magar itna bhi nahin jaante ki manushya ki pahli maryaada kaunsi hai? manushya ki pahli maryaada hai nirvikaari banna, agar koi se aisa poochha jaae tum is maryaada mein rehte ho? to kah dete hain aajkal is kaliyugi srishti mein nirvikaari hone ki himmat nahin hai। ab mukh se kehna ki maryaada mein raho, nirvikaari bano, isse to koi nirvikaari ban nahin sakta। nirvikaari banne ke liye pahle is gyaan talvaar se in paanch vikaaron ke beej ko khatma karna tab hi vikarma bhasma ho sakenge। achha - om shanti।