शनिवार 23 अप्रैल 2022 की दैनिक मुरली

23-04-2022 praatahmurli om shanti "baapdaada"' madhuban

“meethe bachche - baap ko yaad karne ki aadat daalo to dehi-abhimaani ban jaayenge, nasha va khushi kaayam rahegi, chalan sudharti jaayegi''

prashn:- gyaan amrit peete hue bhi kai bachche traitor ban jaate hain - kaise?

uttar:- jo ek or gyaan amrit peete doosri or jaakar gand karte arthaat aasuri chalan chal dis-service karte, eeshvar ke bachche bankar apni chalan sudhaarte nahin, aapas mein maayaavi baaten karte, ek do ko duhkhi karte, woh hain traitor। baba kehte bachche, tum yahaan aaye ho asur se devta banne, to sada ek do mein gyaan ki charcha karo, daiveegun dhaaran karo, andar jo bhi avgun hain unhein nikaal do। buddhi ko svachchha, saaph banaao।

geet:- takdeer jagaakar aai hoon…

om shanti। bachchon ne geet suna aur bachchon ne hi gaaya। koi bhi school mein jab jaate hain to takdeer buddhi mein rehti hai ki yeh imtahaan paas karoonga। buddhi mein takdeer ki em object rehti hai। ab tum bachche jaante ho ham apni takdeer mein nai duniya ko dhaaran kar baithe hain। nai duniya ko rachne vaale parampita paramatma se ham varsa lene ki takdeer le aaye hain। kaun sa varsa? manushya se devta va nar se naaraayan banne ka varsa। is raavan ke bhrashtaachaari raajya se le jaate hain। yeh hai raavan ka bhrashtaachaari raajya, bhrashtaachaari vikaar se paida hote hain aur vikaari ko hi bhrashtaachaari kaha jaata hai। bhagvaanuvaach, kaam mahaashatru hai, tumko in par jeet paani hai, tab hi shreshtaachaari banenge। bhaarat hi bhrashtaachaari, bhaarat hi shreshtaachaari banega। moot paleeti ko hi bhrashtaachaari kaha jaata hai। satayug mein bhrashtaachaari hote hi nahin kyonki vahaan maaya ka raajya hi nahin hai। is samay hai hi raavan raajya। sabmen 5 vikaar hain। satayug mein bhi agar raavanraajya hota to vahaan bhi raavan ko jalaate। vahaan yeh baaten hoti nahin। vahaan hain shreshthaachaari। bhrashtaachaari duniya mein koi oonch position par hai to sab unko maante hain। jaise sannyaasi bahut achhi position par hain to sab unko maante hain, kyonki ve pavitra rehte hain tab hi sab manushya unko achha samajhte hain। government bhi apne se achha samajhti hai। unhon ko apna raaz-guru bhi banaati hai। satayug mein to guru ka naam hota hi nahin। guru arthaat sadgati karne vaale। shaastron mein to kahaaniyaan bana di hain। raaja janak ne unhein jel mein daal diya jinmen brahm gyaan, raajayog ka gyaan nahin tha। jab unhein raajayog ka gyaan mila tab second mein jeevanmukti ko paaya। bhrashtaachaari ka sirf yeh arth nahin hai ki rishvat aadi khaate hain। nahin, baap kehte hain jo bhi manushya maatra hain sab bhrashtaachaari hain kyonki sabke shareer vikaar se paida hote hain। tumhaara shareer bhi vikaar se paida hua hai। parantu abhi tum apne ko aatma samajh baap ke bane ho, deh-abhimaan chhod diya hai isliye tum parampita paramatma ki mukh vanshaavli ho, eeshvareey santaan ho। parampita paramatma ne aakar tum aatmaon ko apna banaaya hai। yeh bahut guhya baaten hain। ham aatma parampita paramatma ki vanshaavli bane hain। aatma kehti hai - baba। satayug mein aatma koi paramatma ko baba nahin kahegi। vahaan to jeev aatma, jeev aatma ko baba kahegi। tum jeev aatma ho। ab baba ne kaha hai apne ko aatma nishchay kar paramatma ko yaad karo। sabse uttam janma tum braahmanon ka hai। aatma kehti hai ham aapke bachche bane hain। garbha se thode hi nikle hain। baba ko pahchaan kar unke bane hain। shivbaaba ham aapke hi hain aur aapki hi mat par chalenge। kitni sookshm baaten hain। baba ne kaha hai, jab baba ke paas jaate ho to yeh nishchay karo ki ham shivbaaba ke saamne baithe hain। aatma bhi niraakaar hai to shivbaaba bhi niraakaar hai। shivbaaba ki yaad se hi vikarma vinaash hote hain। yaad nahin kiya to bhrashtaachaari banen। kitni kadi baaten hain, parantu bahut bachchon ko yeh bhool jaata hai ki main aatma parampita paramatma ki god mein baithi hoon। bhoolne ke kaaran woh nasha aur khushi nahin rehti hai। baba ko yaad karne ki aadat pad jaae to dehi-abhimaani ban jaaven। vilaayat mein bahut bachchiyaan hain, sammukh nahin hain। parantu baba ko yaad karti hain। baba ko bahut pyaar se yaad karna hai। jaise sajni saajan ko kitna pyaar se yaad karti hai। chitthi nahin aati hai to sajni bahut hairaan ho jaati hai। tum sajniyon ko to dhakka kha-kha kar saajan mila hai to yaad achhi rahni chaahiye। chalan bhi badi achhi chaahiye। aasuri chalan vaale ka gala hi ghut jaata hai। baba chalan se hi samajh jaate hain - yeh yaad nahin karte hain isliye dhaarna nahin hoti hai। service nahin kar sakte hain to pad bhi nahin pa sakenge। pahle-pahle to baap ka banna hai। bi.ke. banna pade। bi.ke. ko zaroor shivbaaba hi yaad rahega kyonki daade se varsa lena hai। yaad mein rehna badi mehnat hai। aise koi mat samjhe bhog lagta hai ham woh khaate hain to buddhiyog baba se lag jaayega। nahin, yeh to shuddh bhojan hai। parantu woh mehnat na kare to kuchh bhi nahin hua। shreshtaachaari yaad se hi banenge। pavitrata first hai। aatma ko shuddh banaane ke liye yog ka bal chaahiye, paani mein snaan aadi karne se to paavan ban nahin sakte kyonki patit aatma hi banti hai। aise thode hi kahenge - jevar jhootha hai, sona sachcha hai। vo log samajhte hain aatma shuddh hai। jevar (shareer) jhootha hai, unko ham saaph karte hain। parantu nahin। aatma agar shuddh hoti to shareer bhi shuddh hota। yahaan ek bhi shreshtha nahin hai। satayug mein aise nahin kahenge। woh to sampoorn nirvikaari hain, chola vikaari ho to aatma phir pavitra kaise ho sakti। sona pavitra hai aur jevar jhoothe banen, yeh kaise ho sakta। yeh achhi tarah samjhaana hai, is samay koi bhi shreshthaachaari nahin hai। baap ko bhi nahin jaante hain aur pavitra bhi nahin hain।

tum bachche jaante ho ki gareeb hi gupta purushaartha karke raajya bhaagya lete hain baaki to sabka vinaash hona hai। yeh gyaan hai bhaarat ke liye। baba kehte hain mere bhakton ko yeh gyaan sunaao। shiv ke pujaari ho ya devtaaon ke pujaari hon। doosre dharmon mein bhi bahut convert ho gaye hain। unse bhi nikal aayenge। mool baat hai yahaan ki pavitrata, tab to apvitra manushya unhon ko apna guru banaae maatha tekte hain। paramatma to hai ever pavitra। unko sampoorn nirvikaari bhi nahin kah sakte hain। paramatma ki mahima alag hai। devtaaon ki mahima alag gaai jaati hai - sampoorn nirvikaari ...। unko phir vikaari zaroor banna hai। yeh baaten buddhi mein dhaaran kar phir auron ko bhi samjhaana hai। yaadav aur kaurav... yatha raaja raani tatha praja sabne vinaash ko paaya hai। baaki jayjaykaar paandav sena ki hui। woh hai gupta। shaastron mein to dikhaaya hai - paandav pahaadon par gal gaye। pralay ka hisaab nikaal diya hai, parantu pralay to hoti nahin hai। geeta ka bhagwan kehte hain main dharma ki sthaapna karta hoon। patit duniya mein aaya hoon paavan raajya banaane। raajayog sikhaane aaya hoon। yeh jo pradarshani hoti hai, usmein raajayog bhi sikhaaya jaata hai। tumhaara saara madaar hai samjhaane par। baba ne kaha tha yeh chitra banaao ki kaise ham raajayog mein rehte hain। oopar mein shivbaaba ka chitra ho। ham shiv-baba ki yaad mein baithe hain। unki mat par chalte hain। woh hai shri shri rudra, jo hamko shreshtha banaate hain। shri shri ka title vaastav mein unka hi hai। yeh bhaarat kyon itna gira hai? ek to eeshvar ko sarvavyaapi samajh baithe aur apne ko eeshvar maan baithe।

tum jaante ho satguru to ek hi baap hai। unki yeh janma bhoomi hai। sachchi-sachchi satya naaraayan ki katha baap hi aakar sunaae beda paar karte hain। baap kehte hain - patit-paavan to tum mujhe hi kehte ho na। mujhe hi sabko vaapis le jaana hai। yeh hai kayaamat ka samay, jabki hisaab-kitaab chuktu kar ham vaapis jaate hain। sab kehte hain nav bhaarat, nav dehli ho। ab nav bhaarat to svarga hi tha। ab to narka hai na। bhrashtaachaari bante jaate hain। yeh samajhne aur samjhaane ki baaten hain। aatma aur paramatma ka roop bhi koi nahin jaante hain। bhal kehte hain ham aatma, paramatma ki santaan hain parantu knowledge chaahiye na। baap mein knowledge hai। aatma mein knowledge kahaan hai। ham aatma kitne punarjanma leti hain, kahaan rehti hain, phir kaise aati hain, kyon duhkhi banti hain..... kuchh bhi samajh nahin hai। tum bachche jaante ho baba ham aatmaon ko pavitra banaane aaya hai। to woh daiveegun bhi chaahiye। main devta ban raha hoon, to mere mein koi bhi avgun nahin hona chaahiye। nahin to sau guna danda khaana padega। pavitrata ki pratigya karke phir koi bura kartavya karte hain to 100 pratishat apvitra bhi ban padte hain। service ke badle aur hi disservice karte hain, isliye phir pad bhrashta ho jaata hai। hamesha aapas mein ek do mein gyaan ki charcha chalni chaahiye। ham baba ke paas aaye hain kaante se phool athva manushya se devta banne, baap se svarga ka varsa lene। yahi baat ek do ko sunaani chaahiye। aatma aur paramatma ka roop bhi koi jaante hi nahin। bhal kehte hain aatma paramatma ki santaan hai। parantu knowledge chaahiye, dhaarna chaahiye, jo maayaavi baaten karte hain, kisko duhkhi karte hain unko traitor kaha jaata hai। yeh bhi dikhaaya hai na ki asuron ko gyaan amrit pilaaya phir woh baahar jaakar gand karte the। aise bhi bahut hain jo gyaan amrit peete bhi rehte hain aur dis-service bhi karte rehte hain। vaastav mein tum sab kanyaaye ho, are adhar-kumaari ke to mandir bane hue hain। delvaada to tumhaara accurate yaadgaar hai। tumhaare mein bhi kiski buddhi mein mushkil baithta hai। buddhi badi saaph chaahiye। tum abhi eeshvareey parivaar ke ho। to khyaal karna chaahiye ki hamaari chalan kitni achhi chaahiye। jo manushya samjhen ki inko barobar shreemat milti hai। yahaan shreshtha te shreshtha banen, tab vahaan pad mile। shreshtha yahaan banna hai। grihastha vyavhaar mein rehte yeh antim janma pavitra rehna hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shuddh bhojan khaate hue bhi aatma ko paavan banaane ke liye yaad ki mehnat zaroor karni hai। yaad se hi shreshtaachaari banna hai। vikarma vinaash karne hain।

2) is kayaamat ke samay mein jabki ghar vaapis jaana hai to puraana sab hisaab-kitaab chuktu kar dena hai। aapas mein gyaan ki charcha karni hai। maayaavi baaten nahin karni hai।

vardaan:- purity ki royalty dvaara brahman jeevan ki visheshta ko pratyaksha karne vaale sampoorn pavitra bhav

purity ki royalty hi brahman jeevan ki visheshta hai। jaise koi royal family ka bachcha hota hai to uske chehre se, chalan se maaloom padta hai ki yeh koi royal kul ka hai। aise brahman jeevan ki parakh purity ki jhalak se hoti hai। chalan aur chehre se purity ki jhalak tab dikhaai degi, jab sankalp mein bhi apvitrata ka naam-nishaan na ho। purity arthaat kisi bhi vikaar va ashuddhi ka prabhaav na ho tab kahenge sampoorn pavitra।

slogan:- holeehans woh hai jo vyartha ko samartha mein parivartan kar de।

maateshvari ji ke anmol mahaavaakya - yeh eeshvareey satsang common satsang nahin hai

apna yeh jo eeshvareey satsang hai, common satsang nahin hai। yeh hai eeshvareey school, college। jis college mein apne ko regular study karni hai, baaki to sirf satsang karna, thoda samay vahaan suna phir to jaisa hai vaisa hi ban jaata hai kyonki vahaan koi regular padhaai nahin milti hai, jahaan se koi praalabdha banen isliye apna satsang koi common satsang nahin hai। apna to eeshvareey college hai, jahaan paramatma baith humein padhaata hai aur ham us padhaai ko poori dhaaran kar oonch pad ko praapta karte hain। jaise rozaana school mein master padhaae degree deta hai, vaise yahaan bhi svayan paramatma guru, pita, teacher ke roop mein hamko padhaae sarvottam devi devta pad praapta karaate hain isliye is school mein jvaainta hona jaruri hai। yahaan aane vaale ko yeh knowledge samajhna jarur hai, yahaan kaunsi shiksha milti hai, is shiksha ko lene se hamko kya praapti hogi! ham to jaan chuke hain ki hamko khud paramatma aakar degree paas karaate hain aur phir ek hi janma mein saara course poora karna hai। to jo shuru se lekar ant tak is gyaan ke course ko poori reeti uthaate hain vo full paas honge, baaki jo course ke beech mein aayenge vo to itni knowledge ko uthaayenge nahin, unhon ko kya pata aage ka course kya chala? isliye yahaan regular padhna hai, is knowledge ko jaanne se hi aage badhenge isliye regular study karni hai। achha - om shanti।