सोमवार 2 मई 2022 की दैनिक मुरली

02-05-2022 praatahmurli om shanti "baapdaada"' madhuban

“meethe bachche - shanti tumhaare gale ka haar hai, aatma ka svadharma hai, isliye shanti ke liye bhatakne ki darkaar nahin, tum apne svadharma mein sthit ho jaao''

prashn:- manushya kisi bhi cheez ko shuddh banaane ke liye kaun si yukti rachte hain aur baap ne kaun si yukti rachi hai?

uttar:- manushya kisi bhi cheez ko shuddh banaane ke liye use aag mein daalte hain। yagya bhi rachte hain to usmein bhi aag jalaate hain। yahaan bhi baap ne roodra yagya racha hai lekin yeh gyaan yagya hai, ismen sabki aahuti padni hai। tum bachche deh sahit sab kuchh ismen svaaha karte ho। tumhein yog lagaana hai। yog ki hi race hai। isi se tum pahle rudra ke gale ka haar banenge phir vishnu ke gale ki maala mein piroye jaayenge।

geet:- om namo shivaae…

om shanti। yeh mahima kiski suni? paarlaukik parampita param aatma arthaat paramatma ki। sabhi bhakta athva saadhna karne vaale unko yaad karte hain। unka naam phir patit-paavan bhi hai। bachche jaante hain bhaarat paavan tha। lakshmi-naaraayan aadi ka pavitra pravritti maarga ka dharma tha, jisko aadi sanaatan devi-devta dharma kaha jaata hai। bhaarat mein pavitrata sukh shanti sampatti sab kuchh tha। pavitrata nahin hai to na shanti hai, na sukh hai। shanti ke liye bhatakte rehte hain। jangal mein phirte rehte hain। ek ko bhi shanti nahin hai kyonki na baap ko jaante hain, na apne ko samajhte ki main aatma hoon, yeh mera shareer hai। in dvaara karma karna hota hai। mera to svadharma hi shant hai। yeh shareer ke organs hain। aatma ko yeh bhi pata nahin hai ki ham aatmaayen nirvaan va paramdham ki vaasi hain। is karmakshetra par ham shareer ka aadhaar le part bajaate hain। shanti ka haar gale mein pada hai aur dhakka khaate rehte hain baahar। poochhte rehte man ko shanti kaise mile? unko yeh pata nahin hai ki aatma man - buddhi sahit hai। aatma parampita paramatma ki santaan hai। woh shanti ka saagar hai, ham unki santaan hain। ab ashaanti to saari duniya ko hai na। sab kehte hain pees ho। ab saari duniya ka maalik to ek hai jisko shivaae namah kehte hain। oonch te oonch bhagwan, shiv kaun hai? yeh bhi koi manushya nahin jaante hain। pooja bhi karte hain, kai to phir apne ko shivoham kah dete hain। are shiv to ek hi baap hai na। manushya apne ko shiv kahlaayen, yeh to bada paap ho gaya। shiv ko hi patit-paavan kaha jaata hai। brahma vishnu shankar ko athva koi manushya ko patit-paavan nahin kah sakte। patit-paavan sadgati daata hai hi ek। manushya, manushya ko paavan bana na saken kyonki saari duniya ka prashn hai na। baap samjhaate hain jab satayug tha - bhaarat paavan tha, ab patit hai। to jo saari srishti ko paavan banaane vaala hai unko hi yaad karna chaahiye। baaki yeh to hai hi patit duniya। yeh jo kehte hain mahaan aatma, yeh koi hai nahin। paarlaukik baap ko hi jaante nahin hain। bhaarat mein shiv jayanti gaai jaati hai to zaroor bhaarat mein aaya hoga - patiton ko paavan banaane। kehte hain main sangam par aata hoon, jisko kumbha kaha jaata hai। woh paani ke saagar aur nadiyon ka kumbha nahin। kumbha inko kaha jaata hai jabki gyaan saagar patit-paavan baap aakar sabhi aatmaon ko paavan banaate hain। yeh bhi jaante ho bhaarat jab svarga tha to ek hi dharma tha। satayug mein sooryavanshi raajya tha phir treta mein chandravanshi, jiski mahima hai - raam raaja, raam praja.. treta ki itni mahima hai to satayug ki usse bhi jaasti hogi। bhaarat hi svarga tha, pavitra jeev aatmaayen theen baaki aur sabhi dharma ki aatmaayen nirvaandhaam mein thi। aatma kya hai, paramatma kya hai - yeh bhi koi manushya maatra nahin jaante। aatma itni chhoti si bindi hai, unmein 84 janmon ka part bhara hua hai। 84 laakh janma to ho na sake। 84 laakh janmon mein kalpa - kalpaantar phirte rahen, yeh to ho nahin sakta। hai hi 84 janmon ka chakra, so bhi sabhi ka nahin hai। jo pahle the woh ab peechhe pad gaye hain, phir woh pahle jaayenge। peechhe aane vaali sabhi aatmaayen nirvaandhaam mein rehti hain। yeh sab baaten baap samjhaate hain। unko hi world almighty authority kaha jaata hai।

baap kehte hain main aakar brahma dvaara sabhi vedon shaastron geeta aadi ka saar samjhaata hoon। yeh sab bhakti maarga ke karmakaanda ke shaastra banaaye hue hain। mainne aakar kaise yagya racha, yeh baaten to shaastron mein hain nahin। inka naam hi hai raajasva ashvamedh roodra gyaan yagya। roodra hai shiv, ismen sabko svaaha hona hai। baap kehte hain deh sahit jo bhi mitra-sambandhi aadi hain, un sabko bhool jaao। ek hi baap ko yaad karo। main sannyaasi, udaasi hoon, Christian hoon... yeh sab deh ke dharma hain inko chhod maamekam yaad karo। niraakaar aayenge to zaroor shareer mein na। kehte hain mujhe prakriti ka aadhaar lena padta hai। main hi aakar is tan dvaara nai duniya sthaapan karta hoon। puraani duniya ka vinaash saamne khada hai। gaaya bhi jaata hai prajaapita brahma dvaara sthaapna, sookshm vatan hai hi pharishton ki duniya। vahaan haddi maans nahin hota hai। vahaan sookshm shareer hota hai saphed-saphed jaise ghost hote hain na। aatma, jisko shareer nahin milta hai, to woh bhatakti rehti hai। chhaaya roopi shareer dikhaai padta hai, unko pakad nahin sakte hain। ab baap kehte hain bachche yaad karo to yaad se tumhaare vikarma vinaash honge। gaaya bhi jaata hai bahut gai, thodi rahi.. ab baaki thoda samay hai। jitna ho sake baap ko yaad karo to ant mati so gati ho jaayegi। geeta mein koi ek do akshar right likhe hain। jaise aate mein loon (namak) koi-koi akshar sahi hain। pahle to bhagwan niraakaar hai yeh maaloom hona chaahiye। woh niraakaar bhagwan phir vaach kaise karte hain? kehte hain saadhaaran brahma tan mein pravesh kar raajayog sikhlaata hoon। bachche mujhe yaad karo। main aata hi hoon ek dharma ki sthaapna kar baaki sab dharmo ka vinaash karaane। abhi to anek dharma hain। aaj se 5 hajaar varsha pahle satayug mein ek hi aadi sanaatan devi-devta dharma tha। sabhi aatmaayen apna-apna hisaab-kitaab chuktu kar jaati hain, unko kayaamat ka samay kaha jaata hai। sabhi ke duhkhon ka hisaab-kitaab chuktu hota hai। duhkh milta hi hai paapon ke kaaran। paap ka hisaab chuktu hone ke baad phir punya ka shuru ho jaata hai। harek cheez shuddh banaane ke liye aag jalaai jaati hai। yagya rachte hain, usmein bhi aag jalaate hain। yeh to material yagya nahin hai। yeh hai roodra gyaan yagya। aise nahin kehte krishna gyaan yagya। krishna ne koi yagya nahin racha, krishna to prince tha। yagya racha jaata hai aaphton ke samay। is samay sab taraph aaphten hain na, bahut manushya roodra yagya bhi rachte hain। roodra gyaan yagya nahin rachte hain। woh to roodra parampita paramatma hi aakar rachte hain। kehte hain yeh jo roodra gyaan yagya hai, ismen sabki aahuti ho jaayegi। baba aaya hua hai - yagya bhi racha hua hai। jab tak raajaai sthaapan ho jaae aur sab paavan ban jaaen। phat se sab to paavan nahin bante। yog lagaate raho ant tak। yeh hai hi yog ki race। baap ko jitna jaasti yaad karte hain, utna daudi lagaakar jaae roodra ke gale ka haar bante hain। phir vishnu ke gale ki maala banenge। pahle roodra ki maala phir vishnu ki maala। pahle baap sabko ghar le jaate hain, jo jitna purooshaartha karenge vahi nar se naaraayan, naari se lakshmi ban raajya karte hain। goya yeh aadi sanaatan devi-devta dharma sthaapan ho raha hai। tumko baap raajayog sikhla rahe hain। jaise 5 hajaar varsha pahle sikhlaaya tha phir kalpa baad sikhlaane aaye hain। shiv jayanti athva shivraatri bhi manaate hain। raat arthaat kaliyugi puraani duniya ka ant, nai duniya ka aadi। satayug treta hai din, dvaapar kaliyug hai raat। behad ka din brahma ka, phir behad ki raat brahma ki। krishna ka din - raat nahin gaaya jaata hai। krishna ko gyaan hi nahin rehta। brahma ko gyaan milta hai shivbaaba se। phir tum bachchon ko milta hai inse। goya shivbaaba tumko brahma tan se gyaan de raha hai। tumko trikaaldarshi banaate hain। manushya srishti mein ek bhi trikaaldarshi koi ho na sake। agar hove to knowledge de na। yeh srishti chakra kaise phirta hai? kabhi bhi koi knowledge de na sake।

bhagwan to sabhi ka ek hi hai। krishna ko thode hi sab bhagwan maanenge। woh to raajkumaar hai। raajkumaar bhagwan hota hai kya? agar woh raajya kare to phir ganvaana bhi pade। baap kehte hain tumko vishwa ka maalik banaae main phir nirvaandhaam mein jaakar rehta hoon। phir jab duhkh shuru hota hai tab mera part bhi shuru hota hai। main sunvaai karta hoon, mujhe kehte bhi hain he merciful। bhakti bhi pahle avyabhichaari arthaat ek shiv ki karte hain phir devtaaon ki shuru karte hain। abhi to vyabhichaari bhakti ban gai hai। pujaari bhi yeh nahin jaante ki kab se pooja shuru hoti hai। shiv va somnaath ek hi baat hai। shiv hai niraakaar। somnaath kyon kehte hain? kyonki somnaath baap ne bachchon ko gyaan-amrit pilaaya hai। naam to dher hain babulnaath bhi kehte hain kyonki babul ke jo kaante the unko phool banaane vaala, sarva ka sadgati daata baap hai। unko phir sarvavyaapi kehna.. yeh to glaani hui na। baap kehte hain jab sangam ka samay hota hai tab ek hi baar main aata hoon, jab bhakti poori hoti hai tab hi main aata hoon। yeh niyam hai। main aata hi ek baar hoon। baap ek hai, avtaar bhi ek hai। ek hi baar aakar sabko pavitra raajayogi banaata hoon। tumhaara raajayog hai, sannyaasiyon ka hai hathayog, raajayog sikhla na saken। yeh hathayogiyon ka bhi ek dharma hai bhaarat ko thamaane ke liye। pavitrata to chaahiye na। bhaarat 100 percent paavan tha, abhi patit hai, tab kehte hain aakar paavan banaao। satayug hai paavan jeev aatmaon ki duniya। abhi to grihastha dharma patit hai। satayug mein grihastha dharma paavan tha। ab phir se vahi paavan grihastha dharma ki sthaapna ho rahi hai। ek baap hi sarva ka mukti, jeevanmukti daata hai। manushya, manushya ko mukti, jeevanmukti de na sake।

tum ho gyaan saagar baap ke bachche। tum brahman sachchi-sachchi yaatra karaayenge। baaki sab hain jhoothi yaatra karaane vaale। tum ho double ahinsak। koi hinsa nahin karte ho - na ladte ho, na kaam kataari chalaate ho। kaam par jeet paane mein mehnat lagti hai। vikaaron ko jeetna hai, tum brahmaakumaar kumaariyaan shivbaaba se varsa lete ho, tum aapas mein bhaai-behen thahre। ham abhi niraakaar bhagwan ke bachche aapas mein bhaai-bhaai hain phir brahma baba ke bachche hain - to zaroor nirvikaari banna chaahiye na arthaat vishwa ki baadshaahi tumko milti hai। yeh hai bahut janmon ke ant ka janma। kamal phool samaan pavitra bano, tab oonch pad milta hai। abhi baap dvaara tum bahut samajhdaar bante ho। srishti ki knowledge tumhaari buddhi mein hai। tum ho gaye svadarshan chakradhaari। sva aatma ko darshan hota hai arthaat knowledge milti hai parampita paramatma se, jisko hi knowledgeful kehte hain। manushya srishti ka beejroop hai, chaitanya hai। ab aaye hain knowledge dene। ek hi beej hai, yeh bhi jaante hain। beej se jhaad kaise nikalta hai, yeh ulta vriksha hai। beej oopar hai। pahle-pahle nikalta hai daivi jhaad, phir islaami, bauddhi.. vriddhi hoti jaati hai। yeh gyaan abhi tumko mila hai aur koi bhi de na sake। tum jo sunte ho, woh tumhaari hi buddhi mein raha। satayug aadi mein to shaastra hote nahin। kitni sahaj 5 hajaar varsha ki kahaani hai na। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) samay kam hai, bahut gai thodi rahi.. isliye jo bhi shvaans bachi hai - baap ki yaad mein saphal karna hai। puraane paap ke hisaab-kitaab ko chuktu karna hai।

2) shanti svadharma mein sthit hone ke liye pavitra zaroor banna hai। jahaan pavitrata hai vahaan shanti hai। mera svadharma hi shanti hai, main shanti ke saagar baap ki santaan hoon.. yeh anubhav karna hai।

vardaan:- nirmaanta ki visheshta dvaara sahaj saphalta praapta karne vaale sarva ke maanneey bhav

sarva dvaara maan praapta karne ka sahaj saadhan hai - nirmaan banna। jo aatmaayen svayan ko sada nirmaanchit ki visheshta se chalaati rehti hain woh sahaj saphalta ko paati hain। nirmaan banna hi svamaan hai। nirmaan banna jhukna nahin hai lekin sarva ko apni visheshta aur pyaar se jhukaana hai। vartamaan samay ke pramaan sada aur sahaj saphalta praapta karne ka yahi mool aadhaar hai। har karma, sambandh aur samparka mein nirmaan banne vaale hi vijayi-ratna bante hain।

slogan:- knowledge ki shakti dhaaran kar lo to vighna vaar karne ke bajaae haar kha lenge।