शनिवार 14 मई 2022 की दैनिक मुरली

14-05-2022 praatahmurli om shanti "baapdaada"' madhuban

“meethe bachche - shareer nirvaah arth karma bhal karo lekin kam se kam 8 ghanta baap ko yaad kar saare vishwa ko shanti ka daan do, aapasmaan banaane ki seva karo''

prashn:- sooryavanshi gharaane mein oonch pad paane ka purushaartha kya hai?

uttar:- sooryavanshi gharaane mein oonch pad paana hai to baap ko yaad karo aur doosron ko karaao। jitna-jitna svadarshan chakradhaari banenge aur banaayenge utna oonch pad paayenge। 2- purushaartha kar paas with honour bano। aisa koi karma na ho jo saja khaani pade। saja khaane vaalon ka pad bhrashta ho jaata hai।

geet:- is paap ki duniya se…

om shanti। yeh hai bachchon ki praarthana। kin bachchon ki? jinhonne ab tak nahin jaana hai। tum bachche jaan gaye ho ki is paap ki duniya se baba hamko punya ki duniya mein le ja rahe hain। vahaan sadaiv aaraam hi aaraam hai। duhkh ka naam nahin। ab apni dil se prashn poochha jaata hai ki ham us sukhdhaam se phir is duhkhadhaam mein kaise aa gaye। yeh to sabhi jaante hain ki bhaarat praacheen desh hai। bhaarat hi sukhdhaam tha। ek hi bhagwan bhagavti ka raajya tha। god krishna, goddess raadhe athva god naaraayan, goddess lakshmi raajya karte the। sabhi jaante hain ab phir bhaaratvaasi hi apne ko patit bhrashtaachaari kyon kehte hain? jaante bhi hain bhaarat sone ki chidiya tha, paarasnaath, paarasnaathini ka raajya tha phir is bhrashtaachaari avastha ko kaise paaya? baba baith samjhaate hain - mera bhi yahaan hi janma hai। parantu mera janma divya hai। tum jaante ho ham shiv vanshi hain aur prajaapita brahmaakumaar kumaariyaan hain isliye baba ne samjhaaya hai pahle-pahle yeh poochho - god father ko jaante ho? kahenge father hai na phir sambandh kya poochhte hain? pita to ho hi gaya। shiv vanshi to sabhi aatmaayen hain to sab brothers hain। phir saakaar prajaapita brahma se kya sambandh hai? to sabhi kahenge pita hai na। jinko aadi dev bhi kehte hain। shiv ho gaya niraakaar baap, woh immortal thahra। aatmaayen bhi immortal hain। baaki saakaar ek shareer chhod doosra lete hain। niraakaar shiv vanshi hain। usmein phir kumaar kumaariyaan nahin kahenge। aatmaon mein kumaar kumaareepna nahin hota। prajaapita brahma ke bachche hain to usmein kumaar kumaariyaan hain। shiv vanshi to pahle se hi hain। shivbaaba punarjanma mein nahin aate hain। ham aatmaayen punarjanma mein aati hain। achha tum jo punya aatmaayen thi phir paap aatmaayen kaise baneen? baap kehte hain tum bhaaratvaasiyon ne apne aapko chamaat lagaai hai। kehte bhi ho parampita phir unko sarvavyaapi kah dete ho। punya aatma banaane vaale baap ko tumne kutte billi, patthar thikkar sabmen thok diya hai। woh behad ka baap hai jisko tum yaad karte ho। vahi prajaapita brahma ke mukh dvaara brahman rachte hain। tum brahman phir devta bante ho। patit se paavan banaane vaala ek hi baap thahra। unko sabse jaasti tumne defame kiya hai isliye tumhaare par dharmaraaj dvaara case chalega। tumhaara sabse bada dushman hai - 5 vikaaron roopi raavan। tumhaari hai raam buddhi, baaki sabki hai raavan buddhi। raamraajya mein tum kitne sukhi the। raavan raajya mein tum kitne duhkhi ho। vahaan hai paavan dynasty। yahaan hai patit dynasty। ab kiski mat par chalna hai? patit-paavan to ek hi niraakaar hai। eeshvar sarvavyaapi hai, eeshvar haazira-hazoor hai, kasam bhi aisi uthvaate hain। yeh sirf tum bachche hi jaante ho ki baap is samay haazira-hazoor hai। ham aankhon se dekhte hain। aatma ko pata pada hai parampita paramatma is shareer mein aaya hua hai। ham jaante, pahchaante hain। shivbaaba phir se brahma mein pravesh ho hamko vedon shaastron ka saar aur srishti ke aadi madhya ant ka raaz batlaae trikaaldarshi bana rahe hain। svadarshan chakradhaari ko hi trikaaldarshi kaha jaata hai। vishnu ko yeh chakra dete hain। tum brahman hi phir so devta bante ho। devtaaon ki aatma aur shareer donon pavitra hain। tumhaara shareer to vikaar se bana hua hai na। bhal tumhaari aatma ant mein pavitra ho jaati hai, parantu shareer to patit hai na isliye tumko svadarshan chakra nahin de sakte hain। tum sampoorn bante ho phir vishnu ki vijay maala bante ho। roodra maala aur phir vishnu ki maala। roodra maala hai niraakaari aur woh jab saakaar mein raajya karte hain to maala ban jaati hai। to in sab baaton ko tum abhi jaante ho, gaate bhi hain - patit-paavan aao to zaroor ek hua na। sarva patiton ko paavan banaane vaala ek hi baap hai, to patit-paavan, most beloved incorporeal god father thahra। woh hai bada baabul। chhote baba ko to sab baba-baba kehte rehte hain। jab duhkh hota hai tab parampita paramatma ko yaad karte hain। yeh badi samajhne ki baaten hain। pahle-pahle yeh baat samjhaani hai। parampita paramatma se aapka kya sambandh hai? shiv jayanti to manaate hain। niraakaar parampita paramatma ki mahima badi bhaari hai। jitna bada imtihaan utna bada title milta hai na। baba ka title to bahut bada hai। devtaaon ki mahima to common hai। sarvagun sampanna, 16 kala sampoorn.... badi hinsa hai kaam kataari chalaae ek do ko aadi-madhya-ant duhkh dete hain। yeh hai badi bhaari hinsa। abhi tumko double ahink banna hai।

bhagvaanuvaach - he bachche tum aatmaayen ho, ham paramatma hain। tum 63 janma vishay saagar mein rahe ho। ab ham tumko ksheersaagar mein le jaate hain। baaki pichhaadi ke thoda samay tum pavitrata ki pratigya karo। yeh to achhi mat hai na। kehte bhi hain hamko paavan banaao। paavan aatmaayen mukti mein rehti hain। satayug mein hai jeevanmukti। baap kehte hain agar sooryavanshi banna hai to poora purushaartha karo। mujhe yaad karo aur auron ko bhi yaad karaao। jitna-jitna svadarshan chakradhaari banenge aur banaayenge utna oonch pad paayenge। abhi dekho yeh prem bachchi dehraadoon mein rehti hai। itne sab dehraadoon nivaasi svadarshan chakradhaari to nahin the। yeh kaise bane? prem bachchi ne aap samaan banaaya। aise aap samaan banaate-banaate daivi jhaad ki vriddhi hoti hai। andhon ko sajja banaane ka purushaartha karna hai na। 8 ghanta to tumko chhoot hai। shareer nirvaah arth dhandha aadi karna hai। jahaan bhi jaao koshish karke mujhe yaad karo। jitna tum baba ko yaad karte ho goya tum shanti ka daan saari srishti ko dete ho। yog se shanti ka daan dena, koi difficult nahin hai। haan kabhi-kabhi yog mein bithaaya bhi jaata hai kyonki sangathan ka bal ikattha ho jaata hai। baba ne samjhaaya hai - shivbaaba ko yaad kar unko kaho - baba yeh hamaare kul vaale hain, inhon ki buddhi ka taala kholo। yeh bhi yaad karne ki yukti hai। apni practice to yeh rakhni hai, chalte-phirte shivbaaba ki yaad rahe। baba in par dua karo। dua karne vaala merciful to ek hi baba hai। he bhagwan is par raham karo। bhagwan ko hi kahenge na। vahi merciful, knowledgeful, blissful hain। pavitrata mein bhi full hai, pyaar mein bhi full hai। to brahman kul bhooshnon ka bhi aapas mein kitna pyaar hona chaahiye। kisko bhi duhkh nahin dena hai। vahaan jaanvar aadi bhi kisko duhkh nahin dete hain। tum bachche ghar mein rehte bhaai-bhaai aapas mein lad padte ho thodi baat mein। vahaan to jaanvar aadi bhi nahin ladte। tumko bhi seekhna hai। nahin seekhenge to baap kehte hain tum bahut sajaayen khaayenge। pad bhrashta ho jaayega। saja laayak ham kyon banen! paas with honour hona chaahiye na। aage chalkar baba sab saakshaatkaar karaate rahenge। abhi thoda samay hai isliye jaldi karte raho। beemaari mein bhi sabko kehte hain na raam-raam kaho। andar se bhi kehte hain। pichhaadi mein bhi koi-koi bahut teekhe jaate hain। mehnat kar aage badh jaate hain। tum bahut wonders dekhte rahenge। naatak ke pichhaadi mein wonderful part hota hai na। pichhaadi mein hi vaah-vaah hoti hai, usi samay to bahut khushi mein rahenge। jinmen gyaan nahin hai woh to vahaan hi behosh ho jaayenge। operation aadi ke samay doctor log kamjor ko khada nahin karte hain। partition mein kya hua, sabhi ne dekha na! yeh to bahut dardanaak samay hai। isko khoone naahek kaha jaata hai। inko dekhne ke liye bahut himmat chaahiye। tumhaari hai 84 janmon ki kahaani। ham so devi-devta raajya karte the। phir maaya ke vash ho vaam maarga mein gaye, phir ab devta bante hain। yeh simran karte raho to bhi beda paar hai। yahi svadarshan chakra hai na। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap samaan sarvagunon mein full banna hai। aapas mein bahut pyaar se rehna hai। kabhi kisi ko bhi duhkh nahin dena hai।

2) chalte-phirte baap ko yaad karne ka abhyaas karna hai। yaad mein rah saare vishwa ko shanti ka daan dena hai।

vardaan:- gyaan ke raazon ko samajh sada achal rahne vaale nishchaybuddhi, vighna-vinaashak bhav

vighna-vinaashak sthiti mein sthit rahne se kitna bhi bada vighna khel anubhav hoga। khel samajhne ke kaaran vighnon se kabhi ghabraayenge nahin lekin khushi-khushi se vijayi banenge aur double light rahenge। drama ke gyaan ki smriti se har vighna nothing new lagta hai। nai baat nahin lagegi, bahut puraani baat hai। anek baar vijayi banen hain - aise nishchaybuddhi, gyaan ke raaz ko samajhne vaale bachchon ka hi yaadgaar achalghar hai।

slogan:- dridhta ki shakti saath ho to saphalta gale ka haar ban jaayegi।

maateshvari ji ke anmol mahaavaakya

ham jo bhi achhe va bure karma karte hain unka phal avashya milta hai। jaise koi daan punya karte hain, yagya havan karte hain, pooja-paath karte hain to woh samajhte hain ki hamne eeshvar ke arth jo bhi daan kiya vo paramatma ke darbaar mein daakhil ho jaata hai। jab ham marenge to vo phal avashya milega aur hamaari mukti ho jaayegi, parantu yeh to ham jaan chuke hain ki is karne se koi sadaakaal ke liye phaayda nahin hota। yeh to jaise karma ham karenge usse alpakaal kshanbhangur sukh ki praapti avashya hoti hai। magar jab tak yeh practical jeevan sada sukhi nahin bani hai tab tak uska return nahin mil sakta। bhal ham kisse bhi poochhenge yeh jo bhi tum karte aaye ho, woh karne se tumhein poora laabh mila hai? to unke paas iska koi javaab nahin hota। ab paramatma ke paas daakhil hua ya nahin hua, vo humein kya maaloom? jab tak apni practical jeevan mein karma shreshtha nahin bane hain tab tak kitni bhi mehnat karenge to bhi mukti jeevanmukti praapta nahin hogi। achha, daan punya kiya lekin us karne se koi vikarma to bhasma nahin hue, phir mukti jeevanmukti kaise praapta hogi। bhale itne sant mahaatmaayen hain, jab tak unhon ko karmon ki knowledge nahin hai tab tak vo karma akarma nahin ho sakte, na woh mukti jeevanmukti ko praapta karenge। unhon ko bhi yeh maaloom nahin hai ki sat-dharma kya hai aur sat-karma kya hai, sirf mukh se raam raam kehna, isse koi mukti nahin hogi। baaki aise samajh baithna ki marne ke baad hamaari mukti hogi। unhon ko yeh pata hi nahin ki marne ke baad kya phaayda milega? kuchh bhi nahin। baaki to manushya apne jeevan mein chaahe bure karma kare, chaahe achhe karma kare vo bhi is hi jeevan mein bhogna hai। ab yeh saari knowledge humein paramatma teacher dvaara mil rahi hai ki kaise shuddh karma karke apni practical jeevan banaani hai। achha। om shanti।