गुरुवार 26 मई 2022 की दैनिक मुरली

26-05-2022 praatahmurli om shanti "baapdaada"' madhuban

“meethe bachche - vijay maala mein aana hai to nishchaybuddhi bano, niraakaar baap humein padhaate hain, woh saath le jaayenge, is nishchay mein kabhi sanshay na aaye''

prashn:- vijayi ratna banne vaalon ki mukhya nishaani kya hogi?

uttar:- unhein kabhi kisi baat mein sanshay nahin aayega। woh nishchaybuddhi honge। unhein nishchay hoga ki yeh sangam ka samay hai। ab duhkhadhaam poora ho sukhdhaam aana hai। 2- baap hi raajayog sikhla rahe hain, woh dehi-abhimaani banaakar saath le jaayenge। woh abhi ham aatmaon se baat karte hain। ham unke sammukh baithe hain। 3- paramatma hamaara baap bhi hai, raajayog ki shiksha dete hain isliye shikshak bhi hai aur shantidham mein le jaayenge isliye satguru bhi hai। aise nishchaybuddhi har baat mein vijayi honge।

geet:- tumhein paake hamne…

om shanti। baap ne bachchon ko om shanti ka arth to samjhaaya hai। har ek baat second mein samajhne ki hai। jaise bachche bhi kehte hain om arthaat aham aatma mam shareer। vaise baap bhi kehte aham aatma paramdham mein rahne vaali। woh ho jaata hai paramatma। om.... yeh baap bhi kah sakte hain to bachche bhi kah sakte hain। aham aatma va paramatma donon ka svadharma hai shant। tum jaante ho aatma shantidham mein nivaas karne vaali hai। vahaan se is karmakshetra par part bajaane aai hai। yeh bhi jaante ho ham aatma ka roop kya hai aur baap ka roop kya hai? jo koi bhi manushya srishti mein nahin jaante hain। baap hi aakar samjhaate hain। bachche bhi samjhaate hain hamaara baap parampita paramatma hai, woh shikshak bhi hai to hamaara sat supreme guru bhi hai jo hamko saath le jaayenge। guru to bahut karte hain। abhi bachche nishchay karte hain ki parampita paramatma baap bhi hai, sahaj raajayog aur gyaan ki shiksha bhi de rahe hain aur phir saath bhi le jaayenge। is nishchay mein hi tum bachchon ki vijay hai। vijay maala mein piroye jaayenge। roodra maala va vishnu ki maala। bhagvaanuvaach - main tum bachchon ko raajayog sikhlaata hoon। to teacher bhi ho gaya। mat to milni chaahiye na। baap ki alag mat, teacher ki alag, guru ki alag hoti hai। bhinna-bhinna mat milti hain। yeh phir sabhi ka ek hi hai, ismen sanshay aadi ki koi baat nahin। jaante ho ham eeshvar ki family athva vanshaavli hain। god father is creator। gaate bhi hain tum maat-pita ham baalak tere। to zaroor family ho gai। bhaarat mein hi gaate hain। woh hai past ki baat। abhi present mein tum unke bachche bane ho। uske liye hi shiksha lete hain। baba aapki shreemat par ham chalte hain to jo paap hain woh yogbal se kat jaayenge। baap ko hi patit-paavan sarvashaktimaan kehte hain। baap to ek hi hai। barobar mama baba bhi kehte hain, unse raajayog seekh rahe ho। aadhaakalpa tum aisa varsa paate ho jo vahaan duhkh ka naam nahin rehta। woh hai hi sukhdhaam। jab duhkhadhaam ka ant hoga tab to baap aayenge na। woh bhi sangam ka samay ho gaya। tum jaante ho baba hamko raajayog bhi sikhlaate hain। dehi-abhimaani banaakar saath bhi le jaate hain। tumko koi manushya nahin padhaate hain। yeh to niraakaar baap padhaate hain। tum aatmaon se baat ho rahi hai। ismen sanshay ki va moonjhane ki koi baat nahin। saamne baithe hain। yeh bhi jaante ho ham hi devta the to pavitra pravritti maarga ke the। 84 janmon ka part poora kiya hai। tumne 84 janma liye hain। gaate bhi hain aatmaayen aur paramatma alag rahe bahukaal.. satayug aadi mein pahle-pahle devi-devtaayen hi hote hain, jo phir kaliyug ant mein patit bante hain। poore 84 janma lete hain। baap hisaab bhi batlaate hain। sannyaasiyon ka dharma hi alag hai। jhaad mein anek prakaar ke dharma hain। pahle-pahle foundation hai devi-devta dharma। koi manushya woh devi-devta dharma sthaapan nahin kar sakte। devi-devta dharma praayah lop hai, phir se abhi sthaapna ho rahi hai। phir satayug mein tum apni praalabdha bhogenge। badi jabardasta kamaai hai।

tum bachche abhi baap se sachchi kamaai karte ho, jisse tum sachkhanda mein sada sukhi bante ho। to attention dena pade। baap aise nahin kehte ghar-baar chhodo। woh to sannyaasiyon ko vairaagya aata hai। baap kehte hain woh wrong hai, isse koi srishti ka kalyaan nahin hoga। phir bhi bhaarat mein in sannyaasiyon ka dharma achha hai। bhaarat ko thamaane ke liye sannyaas dharma sthaapan hota hai kyonki devtaayen vaam maarga mein chale jaate hain। makaan aadha samay poora hota hai to thodi marammat karaai jaati hai। ek do varsha mein potaai aadi hoti hai। koi to samajhte hain lakshmi ka aahvaan karenge parantu woh to tab aayegi jab shuddh honge। bhakti maarga mein maha-lakshmi ki pooja karte hain, unse paisa lene ke liye। jagat amba ke paas kabhi paisa nahin maangenge। paise ke liye lakshmi ke paas jaate hain। deepmaala par vyaapaari log bhi roopaye pooja mein rakhte hain। samajhte hain vriddhi hogi। manokaamna poori hoti hai। jagat amba ka sirf mela lagta hai। mela to hai hi - yeh jagatpita jagat-amba se milne ka mela। yeh hai sachcha mela, jisse phaayda hota hai। un melon par bhi bahut bhatakte hain। kahaan naanv doob padti hai। kahaan bas accident ho padti। bahut dhakke khaane padte hain। bhakti ke mele ka bahut shauk rehta hai kyonki suna hai na - aatmaon aur paramatma ka mela lagta hai। yeh mela mashhoor hai, jo phir bhakti maarga mein manaate hain। competition hai raam aur raavan ki। to baap achhi reeti samjhaate hain - moorchhit nahin hona hai। raam aur raavan donon sarvashaktivaan hain। tum ho yuddha ke maidaan mein। kai to ghadi-ghadi maaya se haarte hain। baap kehte hain tum mujh ustaad ko yaad karte rahenge to kabhi haarenge nahin। baap ki yaad se hi vijay paate jaayenge। gyaan to second ka hai। baap vistaar se samjhaate hain, yeh srishti chakra kaise phirta hai। nutshell mein tum bachche beej aur jhaad ko jaante ho। inka naam bhi hai kalpa vriksha। inki aayu laakhon varsha to ho nahin sakti। yeh hai variety dharmo ka jhaad, ek dharma ki shakla na mile doosre se। bilkul hi bhinna hain। islaami aadi kitne kaale hain, vahaan bhi dhan bahut hai। dhan ke pichhaadi to sab hain। bhaaratvaasiyon ke features bilkul alag-alag hain। bhinna variety dharmo ka jhaad hai। tum samajh gaye ho kaise vriddhi hoti hai, inki bhent banyan tree se ki jaati hai। abhi practical mein tum dekhte ho inka foundation khatma ho gaya hai। baaki dharma kaayam hain। devi-devta dharma koi nahin hai। kalkatte mein tum dekhenge saara jhaad hara bhara khada hai। foundation hai nahin। inka bhi foundation hai nahin, jo sthaapan ho raha hai।

bachche samajhte hain ab naatak poora hota hai। ab vaapis chalna hai baba ke paas। tum mere paas aa jaayenge। yeh bhi jaante hain sivaae bhaarat ke aur koi khanda svarga ban nahin sakta। gaate bhi hain praacheen bhaarat। parantu geeta mein krishna ka naam daal diya hai। baap kehte hain shreekrishna ko to patit-paavan koi kahenge nahin, niraakaar ko maanenge। krishna to satayug ka prince hai। us naam, roop, desh mein phir krishna svarga mein hi aayega। vahi features phir thode hi ho sakte। ek-ek ke features alag-alag hain। karma bhi sabke alag-alag hain। yeh anaadi drama bana hua hai। har ek aatma ko part mila hua hai। aatma avinaashi hai। baaki yeh shareer vinaashi hai। main aatma ek shareer chhod doosra leta hoon। parantu yeh aatma ka gyaan bhi koi ko nahin hai। baap aakar nai baaten sunaate hain, mere sikeeldhe bachche। bachche bhi kehte hain baba 5 hajaar varsha hue hain aap se mile। yogbal se tum saare vishwa ke maalik bante ho। pahli hinsa hai ek do par kaam kataari chalaana। yeh bhi samjhaaya gaya hai - baahubal ki ladaai se kabhi bhi koi vishwa ke maalik ban nahin sakte। jabki yogbal se banne vaale hain। parantu shaastron mein phir devtaaon aur daityon ki yuddha dikhaai hai। woh baat hi nahin। yahaan tum yogbal se jeet paate ho baap dvaara। baap hai vishwa ka rachayita, so zaroor nai vishwa hi rachte hain। lakshmi-naaraayan nai duniya svarga ke maalik the। ham hi svarga ke maalik the phir 84 janma le patit worth not A penny ban pade hain। ab tumko hi paavan banna hai। bhagat to bahut hain। parantu jaasti bhakti kisne ki hai? jo aakar brahman bante hain unhonne hi shuru se lekar bhakti ki hai। vahi aakar brahman banenge। prajaapita sookshm vatan mein to nahin hai। brahma to yahaan chaahiye na, jismen pravesh karte hain। tum jaante ho jo baba mama yahaan hain, woh vahaan hain। yeh baaten badi achhi samajhne ki hain। direction baba dete rehte hain, aise-aise tum service karo। bachche nai-nai invention nikaalte hain। koi cheez ki koi invention karte to kahenge ki kalpa pahle bhi yeh invention nikaali thi phir unko improvement kiya jaata hai। svarga aur narka ka gola jo banaaya hai yeh bahut achha hai। krishna sabhi ko bahut pyaara lagta hai। parantu unhon ko yeh pata nahin ki yahi naaraayan banta hai, ab yeh yukti se samjhaana hai। tumhaara yeh gola to bahut bada hona chaahiye। ekdam chhat jitna bada ho, jismen naaraayan ka chitra ho, krishna ka bhi ho। badi cheez manushya achhi reeti dekh sakte hain। jaise paandavon ke kitne bade-bade chitra banaaye hain। paandav to tum ho na। yahaan bade to koi hain nahin। jaise manushya hote hain 6 foot vaale, aise hi hain। aise mat samjho satayug mein badi aayu hoti hai isliye lambe shareer vaale honge। jaasti lamba manushya to shobhta nahin। to samjhaane ke liye bade-bade chitra chaahiye। satayug ka chitra bhi first class banaana hai। ismen lakshmi-naaraayan ka, neeche raadhe krishna ka bhi dena hai। yeh hai prince princess। yeh chakra phirta rehta hai। brahma sarasvati phir lakshmi-naaraayan bante hain। ham brahman so phir devta bante hain। yeh abhi jaante hain ham so lakshmi-naaraayan bante hain, phir ham so raam seeta banenge। aisi raajaai karenge। bachche aise chitron par baith kisko samjhaayenge to bada maja aayega। kahenge yeh to bada first class gyaan hai। barobar hathayogi to yeh gyaan de na saken। satayug mein pavitra pravritti maarga tha। abhi hai apvitra। baap bigar behad ka varsa koi de na sake। jaante ho baba hamko vishwa ka maalik banaane ki shiksha de rahe hain। woh achhi reeti dhaaran karna chaahiye। padhaai se manushya bahut oonch ban jaate hain। tum bhi abhi ahilya, kubja aadi ho। baap baith padhaate hain, jis padhaai se phir tum vishwa ke maalik bante ho। gyaan ka saagar bhi woh hai। ab baap kehte hain apne ko ashareeri samjho। nange aaye the phir nange jaana hai।

tum jaante ho yeh hamaara 84 ka chakra ab poora hona hai। yeh to bada wonderful hai। itni chhoti aatma mein kitna bada bhaari part bhara hua hai, jo kabhi mitne ka nahin hai। inki na aadi hai, na ant hai। kitni wonderful baaten hain। ham aatma 84 ka chakra lagaate hain, inka kabhi ant nahin hota। ab ham purushaartha kar rahe hain। usmein saari knowledge hai। star ki hi value hoti hai। star jitna teekha utna daam jaasti। ab is ek star mein kitna saara gyaan hai। gaate bhi hain bhrakuti ke beech mein chamakta hai ajab sitaara। is wonder ko tum jaante ho। baap kehte hain main bhi star hoon, jiska saakshaatkaar bhi ho sakta hai। parantu suna hai na ki woh bahut tejomay, akhanda jyoti hai। soorya misal hai। to baba agar star roop dikhaaye to maanen nahin। aise bahut dhyaan mein jaate the to tejomay jo kehte woh saakshaatkaar ho jaata tha। abhi tum samajhte ho ki paramatma star misal hai। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachcho ko namaste।

dhaarna ke liye mukhya saar:-

1) sachkhanda ka maalik banne ke liye baap se sachchi kamaai karni hai। baap jo ustaad hai uski yaad mein rah maayaajeet banna hai।

2) baap se behad ka varsa lene ke liye baap ki jo bhi shikshaayen milti hain un par poora dhyaan dena hai। un shikshaaon ko achhi reeti dhaaran karna hai।

vardaan:- sada oonchi sthiti ke shreshtha aasan par sthit rahne vaali maayaajeet mahaan aatma bhav

jo mahaan aatmaayen hain woh sadaiv oonchi sthiti mein rehti hain। oonchi sthiti hi ooncha aasan hai। jab oonchi sthiti ke aasan par rehte ho to maaya aa nahin sakti। vo aapko mahaan samajhkar aapke aage jhukegi, vaar nahin karengi, haar maanengi। jab oonche aasan se neeche aate ho tab maaya vaar karti hai। aap sada oonche aasan par raho to maaya ke aane ki taakat nahin। woh oonche chadh nahin sakti।

slogan:- shanti ka doot ban sabko shanti ka daan do - yahi aapka occupation hai।