रविवार 30 अक्टूबर 2022 की दैनिक मुरली

30-10-22 praatahmurli om shanti ''avyakt-baapdaada'' revise 21-11-92 madhuban

karmon ki guhya gati ke gyaata bano

aaj sarva khajaanon ke dene vaale baap sarva bachchon ke jama ka khaata dekh rahe the। khajaane to sarva bachchon ko akhut mile hain aur sarva ko ek jaisa, ek dvaara sarva khajaane mile hain। ek khajaana nahin lekin anek khajaane praapta hue hain। phir bhi jama ka khaata har ek ka alag-alag hai। koi ne sarva khajaane achhi reeti jama kiye hain aur kaiyon ne yatha shakti jama kiya hai। aur jitna jama kiya hai utna hi chalan aur chehre mein woh roohaani nasha dikhaai deta hai, jama karne ka roohaani phakhur anubhav hota hai। roohaani phakhur ki pahli nishaani yahi hai ki jitna phakhur hai utna bephikra baadshaah ki jhalak unke har karma mein dikhaai deti hai kyonki jahaan roohaani phakhur hai vahaan koi phikra nahin rah sakta। yeh phakhur aur phikra donon ek samay, ek saath nahin rah sakte hain। jaise roshni aur andhakaar saath nahin rah sakte hain।

bephikra baadshaah ki visheshta woh sada prashnachitta ke bajaae prasannachitta rehte hain। har karma mein sva ke sambandh mein va sarva ke sambandh mein va prakriti ke bhi sambandh mein kisi bhi samay, kisi bhi baat mein sankalp-maatra bhi question mark nahin hoga ki ‘yeh aisa kyon' va ‘yeh kya ho raha hai', ‘aisa bhi hota hai kya'? prasannachitta aatma ke sankalp mein har karma ko karte, dekhte, sunte, sochte yahi rehta hai ki jo ho raha hai woh mere liye achha hai aur sada achha hi hona hai। prashnachitta aatma ‘kya', ‘kyon', ‘aisa', ‘vaisa' is uljhan mein svayan ko bephikra se phikra mein le aati hai। aur bephikra aatma buraai ko bhi achchhaai mein parivartan kar leti, isliye woh sada prasanna rehti।

aajkal ke science ke saadhan se bhi jo vesta-kharaab maal hota hai, usko parivartan kar achhi cheez bana dete hain। to prasannachitta aatma silence ki shakti se chaahe baat buri ho, sambandh bure anubhav hote hon, lekin woh buraai ko achchhaai mein parivartan kar svayan mein bhi dhaaran karegi aur doosre ko bhi apni shubh bhaavna ke shreshtha sankalp se buraai ko badal achchhaai dhaaran karne ki shakti degi। kai bachche sochte hain, kehte hain ki “jab hai hi buri va galat baat, to galat ko galat to kehna hi padega na! va galat ko galat to samajhna hi padega na!'' lekin galat ko galat samajhna yeh samajhne ke hisaab se samjha। woh right aur wrong samajhna, jaanna alag baat hai lekin knowledgeful roop se jaanne vaale samajhne ke baad svayan mein kisi bhi aatma ki buraai ko buraai ke roop mein apni buddhi mein dhaaran nahin karenge। to samajhna alag cheej hai, samajhne tak right hai। lekin svayan mein va apne chit par, apni buddhi mein, apni vritti mein, apni vaani mein doosre ki buraai ko buraai ke roop mein dhaaran nahin karna hai, samaana nahin hai। to samajhna aur dhaaran karna ismen antar hai।

apne ko bachaane ke liye yeh kah dete hain ki yeh hai hi wrong, wrong ko to wrong kehna padega na। lekin samajhdaar ka kaam kya hota hai? samajhdaar agar samajhta hai ki yeh buri cheez hai, to kya buri samajhte hue apne paas jama karega? apne paas achhi reeti sambhaal kar rakhega? chhod dega na। ya jama karna hi samajhdaari hai? yeh samajhdaari hai? aur socho, agar buri baat va buri chalan ko svayan mein dhaaran kar liya, to kya aapki buddhi, vritti, vaani sada sampoorn svachchha maani jaayegi? agar jara bhi koi defect va daag rah jaata hai, kichda rah jaata hai to defect vaala kabhi perfect nahin kahla sakta, prasannachitta nahin rah sakta। agar koi ki buraai chitta par hai, to uska chitta sada prasannachitta nahin rah sakta aur chitta par dhaaran ki hui baaten vaani mein zaroor aayengi, chaahe ek ke aage varnan kare, chaahe anek ke aage varnan kare। lekin karmon ki gati ka guhya rahasya sada saamne rakho। agar kisi ki bhi buraai va galat baat chitta par rakhne ke saath varnan karte ho, to yeh vyartha varnan aisa hi hai jaise koi gumbaz mein aavaaz karta hai to woh apna hi aavaaz aur hi bade roop mein badal apne paas hi aata hai। gumbaz mein aavaaj karke dekha hai? to agar kisi ki buraai karne ke, galat ko galat phailaane ke sanskaar hain, jisko aap log aadat kehte ho, to aaj aap kiski glaani karte ho aur apne ko bada samajhdaar, galti se door samajhkar varnan karte ho, lekin yeh pakka niyam hai athva karmon ki philosophy hai ki aaj aapne kiski glaani ki aur kal aapki koi duguni glaani karega kyonki yeh galat baaten itni fast gati se phailti hain jaise koi vishesh beemaari ke germs (jeevaanu) bahut jaldi phailte hain aur phailte hue germs jiski glaani ki vahaan tak pahunchte zaroor hain। aapne ek glaani ki hogi aur woh aapko galat siddha karne ke liye aapki das glaani karenge। to result kya hui? karmon ki gati kya hui? laut kar kahaan aai? agar aapko shubh bhaavna hai us aatma ko theek karne ki, to galat baat shubh bhaavna ke swaroop mein vishesh nimitta sthaan par de sakte ho, phailaana wrong hai। kai kehte hain hamne kisko kaha nahin, lekin vo kah rahe the to mainne bhi haan mein haan kar diya, bola nahin। aapke bhakti-maarga ke shaastron mein bhi varnan hai ki bura kaam kiya nahin lekin dekha bhi, saath bhi diya to woh paap hai। ‘haan' mein ‘haan' milaana, yeh bhi karmon ki gati ke pramaan paap mein bhaagi banna hai।

vartamaan samay karmon ki gati ke gyaan mein bahut easy ho gaye hain। lekin yeh chhote-chhote sookshm paap shreshtha sampoorn sthiti mein vighna roop bante hain। easy banne ki nishaaniyaan kya hain? woh sada aisa hi sochte-samajhte ki yeh to aur bhi karte hain, yeh to aajkal chalta hi hai। ya to apne aapko halka karne ke liye yahi kahenge ki mainne hansi mein kaha, mera bhaav nahin tha, aise hi bol diya। yeh vidhi sampoorn siddhi ko praapta hone mein sookshm vighna ban jaata hai isliye gyaan to bahut mil gaya hai, rachta aur rachna ke gyaan ko sunna, varnan karna bahut spashta ho gaya hai। lekin karmon ki guhya gati ka gyaan buddhi mein sada spashta nahin rehta, isliye easy ho jaate hain। kai bachchon ki apne prati bhi complain hoti hai ki jaise baap kehte hain, baap bachchon mein jo shreshtha aashaaen rakhte hain, jo chaahte hain, jitna chaahte hain utna nahin hai। iska kaaran kya hai? ye ati sookshm vyartha karma buddhi ko, man ko ooncha anubhav karne nahin dete। yog lagaane baithte hain lekin kaaphi samay yuddha mein chala jaata, vyartha ko mitaae samartha banne mein samay chala jaata hai isliye kya karna chaahiye? jitna ooncha bante hain, to oonchaai mein attention bhi ooncha rakhna padta hai।

brahman jeevan ki mauj mein rehna hai। mauj mein rahne ka arth yeh nahin ki jo aaya woh kiya, masta raha। yeh alpakaal ke sukh ki mauj va alpakaal ke sambandh-samparka ki mauj sadaakaal ki prasannachitta sthiti se bhinna hai। isi ko mauj nahin samajhna। jo aaya woh bola, jo aaya woh kiya ham to mauj mein rehte hain। alpakaal ke manmauji nahin bano। sadaakaal ki roohaani mauj mein raho। yahi yathaartha brahman jeevan hai। mauj mein bhi raho aur karmon ki gati ke gyaata bhi raho। tab hi jo chaahte ho, jaise chaahte ho vaise anubhav karte rahenge। samjha? karmon ki guhya gati ke gyaata bano। phir khajaanon ke jama ki result sunaayenge। achha!

chaaron or ke phikra se phaarig bephikra baadshaah aatmaon ko, sada prasannachitta vishesh aatmaon ko, sada svayan prati aur sarva aatmaon prati shreshtha parivartan shakti ko karma mein laane vaale karmayogi aatmaon ko, sada rachta-rachna ke gyaata aur karma-philosophy ke bhi gyaata - aise gyaan-swaroop aatmaon ko baapdaada ka yaad, pyaar aur namaste।

daadiyon ke saath mulaakaat

vartamaan samay kis baat ki aavashyakta hai? karmon ki guhya gati ka gyaan merge ho gaya hai, isliye albelaapan hai। purushaarthi bhi hain lekin purushaartha mein albelaapan aa jaata hai isliye abhi iski aavashyakta hai। baapdaada sabhi ki result ko dekhte hain। jo chal raha hai vo achha hai। lekin abhi achhe te achha banna hi hai। busy rehna padta hai na। jyaada samay busy kismen rehna padta hai? kis baat mein jyaada samay dena padta hai? chaahe aap logon ki apni sthiti nyaari aur pyaari hai, lekin samay to dena padta hai। to yahi samay powerful shaktishaali light house, might house ban vibrations phailaane mein jaaye to kya ho jaayega? sangathit roop mein yahi vaataavran ho, aur koi baat hi nahin ho to kya vibration vishwa mein ya prakriti tak pahunchega? abhi to sabhi log intajaar kar rahe hain ki kab hamaare rachta va master rachta sampanna ya sampoorn ban ham logon se apni svaagat karaate। prakriti bhi to svaagat karegi na। to woh saphalta ki maala se svaagat kare vo din aana hi hai। jab saphalta ke baaje bajenge tab pratyakshata ke baaje bajenge। bajne to hain hi na। achha!

daadi chandramni ji seva par jaane ki chhutti le rahi hain

all-round banna hi shreshtha seva hai। achha hai, chakkar lagaate raho। chakkar lagaane ka part bachchon ka hi hai। baap to avyakt roop mein laga sakte hain। saakaar roop mein bhi chakkar lagaane ka part baap ka nahin raha, bachchon ka hi tha। achha!

avyakt baapdaada ki personal mulaakaat -vijayi maala mein aane ke liye teevra purushaarthi bano

sada teevra purushaarthi aatmaaen hain aise anubhav karte ho? jab brahman bane to purushaarthi to hain hi। teevra purushaarthi hain va sirf purushaarthi hain? sunne aur sunaane vaale ko purushaarthi kahenge ya teevra purushaarthi kahenge? sunna aur sunaana, uske baad kya hota hai? teevra purushaarthi kisko kahenge - sunne vaale ko ya banne vaale ko? jo maala ka 16108vaan number hai woh bhi sunta aur sunaata to hai hi। nahin to maala mein kaise aayega। lekin 108 ki maala mein kaun aayenge? 108 ki maala ka naam hai vijayi maala। 16000 vaali maala ka naam vijayi maala nahin hai। to sunna aur sunaana, yeh majority karte hain। lekin suna aur bana isko kaha jaata hai teevra purushaarthi। teevra purushaarthi 108 hain aur purushaarthi 16108 hain। to apne aapko check karo ki teevra purushaarthi hain ya purushaarthi hain? jo hain, jaisa hain woh majority apne aapko jaan sakte hain। koi thode aise hain jo apne ko nahin bhi jaante hain, wrong ko right samajhkar bhi chalte jaate hain। majority apne man mein apne aapko satya jaante hain ki main kaun hoon? isliye sada apne ko dekho, doosre ko nahin।

apne purushaartha ko check karo aur teevra purushaartha mein change karo। nahin to final samay aane par change nahin kar sakenge। us samay padhaai ka samay samaapta hone par, imtahaan ke samay padhaai ka chance nahin milta। agar koi student samjhe - ek prashn ka uttar nahin aata hai, kitaab se padhkar uttar de den to right hoga ya wrong hoga? to us samay apne ko change nahin kar sakenge। jo hai, jaisa hai, vaise hi praalabdha praapta kar lenge। lekin abhi chance hai। abhi tu let ka board nahin laga hai, let ka laga hai। let ho gaye lekin tu let nahin isliye phir bhi margin hai। kai student 6 maas mein bhi paas with honour ho jaate hain agar sahi purushaartha karte hain to। lekin samay samaapta hone ke baad kuchh nahin kar sakte। baap bhi raham karna chaahe to bhi nahin kar sakte। chalo, yeh achha hai, isko marks de do yeh baap kar sakta hai? isliye abhi se check karo aur change karo।

albelaapan chhod do। theek hain, chal rahe hain, pahunch jaayenge yeh albelaapan hai। albele ko is samay to mauj lagti hai। jo albela hota hai use koi phikra nahin hota hai, woh aaraam ko hi sabkuchh samajhta hai। to albelaapan nahin rakhna। sada alert! paandav sena ho na। sena albeli rehti hai ya alert rehti hai? sena maana alert, saavdhaan, khabardaar rahne vaale। albela rahne vaale ko sena ka sainik nahin kaha jaayega। to albelaapan nahin, attention! lekin attention bhi natural vidhi ban jaaye। kai attention ka bhi tension rakhte hain। tension ki life sada to nahin chal sakti। tension ki life thoda samay chalegi, natural nahin chalegi। to attention rakhna hai lekin ‘natural attention' aadat ban jaaye। jaise vismriti ki aadat ban gai thi na। nahin chaahte bhi ho jaata hai। to yeh aadat ban gai na, natural ho gai na। aise smritisvaroop rahne ki aadat ho jaaye, attention ki aadat ho jaaye isliye kaha jaata hai aadat se manushyaatma majboor ho jaati hai। na chaahte bhi ho jaata hai isko kehte hain majboor। to aise teevra purushaarthi bane ho? teevra purushaarthi arthaat vijayi। tabhi maala mein aa sakte hain।

bahutkaal ka abhyaas chaahiye। sadaiv alert maana sada ever ready! aapko kya nishchay hai vinaash ke samay tak rahenge ya pahle bhi ja sakte hain? pahle bhi ja sakte hain na isliye ever ready। vinaash aapka intajaar kare, aap vinaash ka intajaar nahin karo। woh rachna hai, aap rachta ho। sada ever ready। kya samjha? attention rakhna। jo bhi kami mahsoos ho use bahut jaldi se jaldi samaapta karo। sampanna banna arthaat kamjori ko khatma karna। aise nahin yahaan aaye to yahaan ke, vahaan gaye to vahaan ke। sabhi teevra purushaarthi bankar jaana। achha!

vardaan:- vishwa se andhakaar ko mitaakar roshni dene vaale master gyaan soorya bhav

master gyaan soorya woh hain jo vishwa se andhakaar ko mitaakar roshni dene vaale hain। woh svayan bhi prakaash swaroop, light-might roop hain aur doosron ko bhi light-might dene vaale hain। jahaan sada roshni hoti hai vahaan andhakaar ka savaal hi nahin, andhakaar ho hi nahin sakta। jo vishwa ko roshni dene vaale hain woh svayan andhakaar mein nahin rah sakte। sampoorn pavitrata arthaat roshni। unke paas andhakaar arthaat vikaaron ka ansh bhi nahin rah sakta।

slogan:- svabhaav, sanskaar, sambandh-samparka mein light rehna hi milansaar banna hai।