शनिवार 29 अक्टूबर 2022 की दैनिक मुरली

29-10-2022 praatahmurli om shanti "baapdaada"' madhuban

“meethe bachche - heere jaisa jeevan banaane vaale baap ko bahut khushi-khushi se yaad karo to junk nikal jaayegi''

prashn:- maala ka daana kaun banenge, uska purushaartha kya hai?

uttar:- maala ka daana vahi banenge jise ant mein kuchh bhi yaad na pade। aise bachche jo karmaateet avastha ko paayenge vahi maala ka daana banenge। koi bahut dhanvaan hain, anek kaarkhaane aadi hain… to woh sab bhoolna pade। kisi mein bhi mamatva na rahe। mera-mera na ho। bas yeh bhaai (aatma) hai, yahi roohaani connection hai aur koi connection nahin। aise roohaani connection rakhne vaale, sab kuchh bhoolne vaale bachche hi maala mein aa sakte hain।

om shanti। roohaani baap roohaani bachchon ko samjhaate hain, yeh to zaroor pakka nishchay ho gaya hoga ki ham aatma hain aur paramatma baap ke bachche hain, to sabhi brothers hi hain। brothers ko baap ne direction diya hai ki mujh patit-paavan baap ko yaad karo। to yaad karte ho ya buddhi ka yog kahaan aur jagah bhatakta hai? maaya bhatkaayegi zaroor, na chaahte hue bhi tumhaari buddhi kahaan na kahaan bhaagti rahegi। bachchon ke andar chalna chaahiye ki baba ne hamko srishti chakra ka gyaan diya hai, 84 janmon ki kahaani padhaai hai। yeh 84 ka chakra poora hua hai। ham phir se ghar jaate hain, anek baar ham yaad ki yaatra se pavitra ban karke ghar gaye hain। tumhaari buddhi mein aata hai ki ham sab bhaai-bhaai hain, ismen jisma ki koi baat hi nahin hai। tum jisma ko yaad nahin karo। sirf ham aatma hain - ham hi paavan, satopradhaan the, ab patit bane hain to heere jaisa jeevan banaane vaale baap ko khushi se yaad karna hai, jisse junk nikal jaaye। to baap samjhaate hain bachche pahle-pahle apne ko aatma samjho, yeh bhi gyaan hai phir baap ko yaad karo - yeh hai vigyaan kyonki aatma ko gyaan se pare vigyaan mein, shant ghar mein jaana hai। aatma ka svadharma bhi shant hai aur ghar bhi shant hai। to pahle hamko vahaan pahunchne ka hai। baba bhi vahaan se aaye hue hain। parantu manushyon ko in sab baaton ka pata nahin hai।

yeh paarlaukik baap sanmukh baith karke samjhaate hain, bachchon main paramdham se tum bachchon ke paas aaya hua hoon, drama ke plan anusaar। kyon aaya hoon? tumko vaapas le jaane ke liye। abhi tum patit vikaari ho gaye ho। janma-janmaantar vikaar se hi paida hue ho isliye bhrashtaachaari kaha jaata hai। to ham bhrashtaachaari se shreshthaachaari kaise banen - yeh baap samjhaate hain, bachche mujhe yaad karo to pavitra shreshthaachaari ban jaayenge। is yaad mein tum sabkuchh kar sakte ho। aise nahin ki dhandhaadhori nahin kar sakte ho।

bachche, baap se poochhte hain baba maala ke daane kaun banenge? bachche, maala ka daana vahi banenge jo karmaateet avastha ko paayenge। jisko ant mein kuchh bhi yaad na pade। koi bahut dhanvaan hain, anek kaarkhaane aadi hain... to woh sab bhoolna pade। tumhaare paas to kuchh bhi nahin hai। tum jaante ho ham baap ke bachche hain, bhaai hain। hamaara kisi mein bhi mamatva nahin hai। mera-mera to nahin hai na! bas yeh bhaai hai, yahi connection hai aur koi connection nahin। ise kaha jaata hai roohaani connection। itni saari aayu to deh hi yaad aai, aatma to kisko yaad hi nahin aai। yeh bhi drama bana hua hai, to yeh baaten baap samjhaate hain aur paavan banne ke liye purushaartha karaate hain। baba tum bachchon ko time to dete hain sirf 8 ghanta mujhe yaad karo। woh hai had ki service, yeh hai saare world ki service। zaroor khaayenge, piyenge, soyenge, ghoomenge.... saara din to koi yaad bhi nahin kar sakte। tum barobar abhi behad ki service karte ho। jaise baap vichaar saagar manthan karte hain, aise tum bachchon ko bhi manthan karna sikhlaate hain, karan-karaavanhaar hai na, to tumko karke hi sikhlaate hain। purushaartha karte-karte tumhaari vijayi maala ban jaayegi। satayug treta mein jo bhi aate hain woh vijayi hote hain। phir sab actors is naatak mein part bajaane ke liye nambarvaar aate hain। sab ikatthe to nahin aa jaayenge। tum sabhi actors ke rahne ka sthaan brahm lok hai, vahaan se yahaan aa karke shareer lete ho। yeh sab baaten bahut sahaj hain, jo tum bachchon ko hi yaad rehti hain। tumhaara ghar sweet hom, silence hom hai। doosra koi bhi apne ghar ko nahin jaanta hai। woh to kah dete hain ham leen ho jaayenge। jaise saagar se budbuda nikalta hai phir usi mein sama jaata hai, aise ham bhi us brahm mein leen ho jaate hain.. phir kah dete hain jahaan dekho vahaan brahm hi brahm hai। vo brahm ko hi eeshvar samajhte hain isliye tumhaari baaten unki buddhi mein baithti nahin hain। tum unko ulta samjhenge vo tumko ulta samjhenge kyonki unka dharma hi apna hai। parantu tum jaante ho sabhi aatmaayen shantidham mein zaroor jaayengi। baaki har ek aatma ko apna-apna part mila hua hai। isko hi to wonder kehte hain। tum bachche abhi kitni maheenta mein jaate ho, aatma kitni chhoti hai, kaise part bajaati hai। to yeh gyaan jaise baap ke paas hai, woh gyaan ka saagar hai, aise tum bachchon ke paas bhi hai, tum abhi aise gyaanvaan bante jaate ho। woh hain bhaktivaan, tum ho gyaanvaan। bhaktivaan maana raat ke rahne vaale aur gyaanvaan maana din ke rahne vaale। aadhaakalpa tum sukhdhaam mein rehte ho, aadhaakalpa duhkhadhaam mein rehte ho, isko kaha jaata hai dooraandeshi, tumhaari buddhi abhi bahut door-door jaati hai - ham aatma sweet hom, brahmaanda ke rahne vaale hain। baap is manushya srishti ka beejroop hai, kyonki woh knowledgeful hai, unko jhaad ki knowledge hai। tum abhi shareer ka bhaan mitaane ke liye apne ko aatma samajhte ho। doosri koi bhi cheez yaad na aaye। poora aatma-abhimaani ban jaana hai। main aatma hoon, main aatma hoon, mere paas kuchh hai hi nahin jo aatma ko yaad pade। gaaya jaata hai antakaal jo jo simre, to agar koi bhi cheez hogi to zaroor woh yaad aayegi। yeh vichaar karne ki baat hai। agar kuchh bhi hai, koi mitra sambandhi aadi bhi hain to yaad aayega zaroor। tumne to apna sab kuchh shivbaaba ko de diya, phir aise nahin samjho ki yeh meri cheez hai। jab baba ko de diya phir tumko yaad hi kyon aaye, tum bhool jaao। agar woh yaad padta rehta hai to vo bhi pichhaadi mein nuksaan kar dega। abhi tumko yeh sab nai-nai baaten milti hain। puraani koi bhi cheez tumhaare paas nahin hai। jaise puraani cheejen sab karneeghor ko de dete hain na। aise tum bhi apna sab kuchh de dete ho phir yaad nahin aani chaahiye। bas yahi yaad rahe ki main bhaai (aatma) hoon, baba ka bachcha hoon, mere paas kuchh bhi hai hi nahin। shareer bhi nahin hai। phir nai duniya mein sab nai cheezen milengi। vahaan to heere javaahraat ke mahlon mein jaayenge। to woh bhavishya ki baat hui। baba poochhte hain bachche tum kya banenge, to bachche kehte hain baba ham to naaraayan banenge। yeh to khushi ki baat hui na। parantu abhi jab koi bhi puraani cheez yaad na aaye tab maala ka daana banenge। 108 ki maala to raajaai ki hai। mandiron mein phir 16108 ki bhi maala rakhi hoti hai। to maala ke daane bahut hi banenge। jitna jaldi aayenge utna sukh paayenge। jo peechhe aate hain unhonne itna sukh nahin paaya hai, unke liye thoda time sukh hai to duhkh bhi kam hi paayenge।

to baba kehte hain bachche yeh khyaal rakho ki pichhaadi mein kuchh bhi yaad na aaye। jo arpan kiya hua hai woh bhi yaad nahin aana chaahiye। baap kehte hain main aisi koi cheez nahin leta hoon jo rah jaave aur uska vahaan bharkar dena pade, kyonki main gareeb nivaaz hoon। kai hain jo dekarke phir jab koi kaaran se bhaaganti ho jaate hain to maangane lag padte hain। maaya unko ekdam das leti hai। nahin to kehte hain chaahe maaro chaahe pyaar karo, yeh mastaana tumhaara dar kabhi nahin chhodega। kabhi nahin bhoolega। tum bachche yahaan nar se naaraayan banne ke liye aaye ho, tumhein kitna bada varsa milta hai, phir yeh kyon kehte ho ki ham dete hain। tum to lete ho na। kaun kehta hai tum kuchh do। baaki koi ek paisa bhi denge to vahaan unke liye mahal ban jaayega। jaise sudaama ne chaaval mutthi di। to bachche sudaama misal daal chaaval le aate hain, samajhte hain ki hamko mahal mil jaayenge। aise bachchon par baap bahut khush hote hain vaah! inke nai duniya mein mahal banne vaale hain kyonki bahut pyaar aur sadbhaavna se le aate hain। aho bhaagya aise bachchon ka, bahut ooncha pad paayenge।

abhi drama ke plan anusaar baba aur tum bachchon ki kadam-kadam vahi chaal chalti hai jo kalpa-kalpa chali hai। tumhaare kadam-kadam mein padam hain। devtaaon ke pair mein padam dikhaate hain to iska bhi koi arth hoga na। abhi tumhaari padmon ki aamadni hoti rehti hai। tum baba ke paas padmaapadmapti banne ke liye aate ho। to tum itne mahaan, mahaan, mahaan bhaagyashaali ho parantu usmein bhi phir nambarvaar purushaartha anusaar hain। tumhaara purushaartha kalpa-kalpa vahi drama ke plan anusaar chalta hai, jaise ki drama tumko purushaartha karaata rehta hai। eeshvar bhi drama ke anusaar tumhein mat dete hain। to drama ke vash hue na। phir yeh drama kiske vash hai? bachche, drama anaadi bana hua hai, yeh koi nahin kah sakta hai ki drama kab bana? yeh to chalta hi rehta hai। drama mein number one mat milti hai eeshvar ki isliye usko kaha jaata hai - eeshvareey mat, jo tumhein devta banaati hai aur manushya ki mat chhi-chhi banaati hai। eeshvareey mat se tum manushya se devta bante ho। phir 21 janmon ke baad manushya mat par manushya ban jaate ho। abhi yeh geeta ka episode sangamayug hai jabki duniya badalti hai। to yeh bachchon ki buddhi mein hona chaahiye aur bachchon ko bahut-bahut meetha banna chaahiye। pyaar se chalna hota hai। jo bachche shant aur meethe hain, unka pad bhi ooncha hoga। abhi tumhein eeshvareey buddhi mili hai, tum samajhte ho ki ham behad ke baba ki santaan bane hain, baba se varsa le rahe hain। to athaah khushi honi chaahiye। baap kehte hain bachche svarga se bhi yahaan tumhaara bahut-bahut oonch pad hai। baap sirf tumko padhaate hain। bhagvaanuvaach, main tumko double sirtaaj raajaaon ka raaja banaata hoon, to apni takdeer par tumko bahut khush rehna chaahiye। vaah! baba aa karke kya hamaari takdeer banaate hain, jo patthar jaise jeevan ko heere jaisa bana dete hain! achha!

meethe meethe sikeeldhe roohaani bachchon prati roohaani baap va daada ka yaad pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) oonch pad paane ke liye bahut-bahut shaantachitta rehna hai, meetha banna hai, sabke saath pyaar se chalna hai।

2) jo kuchh baba ko arpan kar diya, use bhool jaana hai, uski yaad bhi na aaye। kabhi yeh sankalp bhi na aaye ki ham baba ko dete hain।

vardaan:- brahman jeevan mein kaam mahaashatru ke saath uske sarva saathiyon ko bhi vidaai dene vaale sampoorn pavitra bhav

brahman jeevan mein jaise kaam mahaashatru ko jeetne ke liye vishesh attention rakhte ho, aise uske sabhi saathiyon ko bhi vidaai do। kai bachche krodh mahaabhoot ko to bhagaate hain lekin krodh ke baal-bachchon se thodi preet rakhte hain। jaise chhote bachche achhe lagte hain aise is krodh ke bhi chhote bachche kabhi-kabhi pyaare lagte hain, lekin sampoorn pavitra tab kahenge jab koi bhi vikaar ka ansh na rahe। aisa pakka vrat lo tab kahenge sachche brahman।

slogan:- sangamayug ki mauj ka anubhav karna hai to maaya ki adheenta se svatantra raho।