शुक्रवार 11 नवंबर 2022 की दैनिक मुरली

11-11-2022 praatahmurli om shanti "baapdaada"' madhuban

“meethe bachche - baap jo sada sukh dete hain, roz padhaate hain, gyaan khajaana dete hain, aise baap ko tum bhoolo mat, shreemat par sada chalte raho''

prashn:- baap ki jaadoogri kaun si hai jo manushya nahin kar sakte hain?

uttar:- kaanton ke is jangal ko badalkar sundar phoolon ka bageecha bana dena, patit manushyon ko paavan devta bana dena - yeh jaadoogri baap ki hai। kisi manushya ki nahin। baap hi sabse bada social worker hai jo patit shareer, patit duniya mein aakar saari patit duniya ko paavan banaate hain।

geet:- bachpan ke din bhula na dena…

om shanti। bachchon ne apne liye geet suna। tum ho maat-pita ke ksheer (meethe) bachche। baap ksheer bachchon ko kehte hain ki mama baba kahkar kal bhool na jaana। agar bhoole to varsa ganva denge। parantu bachche sunte hue bhi bhool jaate hain। to bhi baap sahaj raasta bataate hain। gharbaar, grihastha-vyavhaar aadi kuchh bhi chhudaate nahin hain। kehte hain grihasthi ho, chaahe bachelor (kumaar) ho sirf shreemat par chalne ka purushaartha karo। aise baap ko kabhi bhool na jaao। baap ulhana dete hain ki koi-koi bachche mama baba kahkar phir kabhi apna samaachaar bhi nahin dete hain। baap se svarga ki baadshaahi lete hain phir unko bhool jaate hain aur narka ki jaaydaad dene vaale baap ko bahut khushi se chitthi likhte hain, chitthi na aaye to maa baap bhi moonjh jaate hain, sochte hain pata nahin beemaar hai kya? to behad ka baap bhi aise samajhte hain ki pata nahin bachchon ka kya haal hai? intazaar hota hai na। vo laukik bachche to duhkh dene vaale bhi nikal padte hain, to bhi unse moh nahin jaata। yahaan phir wonder dekho jis baap ko kehte hain tum maat-pita... saamne bhi baithe hain। yoon to sab bachche murli dvaara bhi sunenge। baap jaante hain nambarvaar purushaartha anusaar kitne sapoot hain, kitne kapoot hain। baba mama kahkar phir bhi chhod dete hain। geet bhi kehta hai aise baap ko kyon bhool jaate ho? aise baap ko roz chitthi likhni chaahiye। baap bhi roz khazaana dete hain। roz padhaate bhi hain, pyaar bhi dete hain। baap, teacher, satguru teenon hi hain। laukik baap ko to bachche chitthi likhte hain। guru ko bhi yaad karte hain। parantu jo sada sukh dene vaala, sachkhanda ka maalik banaane vaala baap hai unko bhool jaate hain। chitthi bhi nahin likhte hain। baap ko phikar rehta hai ki kya hua? maaya ne maar daala va vikaar mein dhakel diya। baba to murli mein hi bachchon ko saavdhaan karenge na। baba raay denge ki aise-aise apne ko bachaate raho kyonki yeh hai baap ka sabse bada bachcha। sabse aage chal raha hai। inke paas sab prakaar ke toofaan aadi aate hain। mahaaveer, hanoomaan inko hi kahenge। aage roostam hone ke kaaran maaya bhi roostam ho pahle inse hi ladegi। baba kehte hain tumko jo toofaan aate hain woh pahle mujhe aayenge। jo baba anubhav bhi bataate hain। tum kahenge baba aapko toofaan kaise aayenge? aap to bujurga ho। baba kehte hain hamaare paas sab aate hain। nahin to ham tumko saavdhaan kaise karen? parantu bachche baba ko bataate hi nahin hain। toofaan mein ghutka khaakar doob mar jaate hain। apna pad bhrashta kar dete hain isliye baap kehte hain ek do ko yaad dilaate raho - baba ko patra to likho। har baat mein ek do ko saavdhaan karo। maaya badi teekhi hai। ghoosa maar deti hai।

tum bachche saari duniya ke sachche social workers ho। woh had ke social worker had ki seva karte hain, yeh baap to saari duniya ka social worker hai। saari patit duniya ko paavan banaana yeh baap ke oopar hai। baap ko hi bulaate hain। aise baap ko baap kah phir bachche bhool jaate hain। yeh geet bhi koi ka touch kiya hua hai। jaise koi-koi shaastra bhi achhe bane hue hain jo manushya apne paas rakhte hain। yahaan to shaastra, chitra aadi kuchh bhi nahin hain। yeh chitra bhi apne hi banaaye hue hain। woh sab chitra hain sanshaybuddhi banaane vaale। yeh chitra hain nishchaybuddhi banaane vaale।

duniya ko to yeh maaloom hi nahin ki bhaarat svarga tha। bhaarat ka kitna maan hai। yahaan hi shivbaaba aate hain। shiv ko baba kehte hain phir hai brahma baba। vishnu ko baba nahin kahenge। yeh bhi tum bachche jaante ho। duniya ke manushya to kehte hain he patit-paavan aao, ham patit hain aakar paavan banaao। parantu yeh nahin jaante ki woh patit se paavan kaise banaayenge। kahaan le jaayenge? bas tote ke muaaphik bolte hain। bigar arth kuchh bhi nahin jaante। are god father kehte ho, father maana property aur kisko father nahin kaha jaata। vishnu aur shankar ko bhi father nahin kah sakte, to aur kisi ko kaise kahenge। sab samajhte hain ki god father niraakaar hi hai। aatma is deh mein aakar pukaarti hai O god father। baap aakar dehi-abhimaani banaate hain। tum baap ko kehte ho baba hamko paavan banaao aur paavan duniya mein le chalo। shivbaaba aate hain - bhaarat mein pavitra pravritti maarga banaane।

baap kehte hain tum pravritti maarga vaale paavan the। tum hi chaahte ho ham paavan banen। svarga ko yaad karte ho। vaikuntha kahne se shreekrishna yaad aata hai। yeh nahin samajhte ki pravritti maarga ke mahaaraaja-mahaaraani, lakshmi-naaraayan ko yaad karen। ab manushya chaahte hain shanti। yeh saari duniya ka question hai। uski javaabdaari baap ke oopar hai। jab bhaarat narka ho jaata hai to usko svarga banaane baap hi aate hain। narka phir kaun banaate, kab banaate hain? yeh koi nahin jaante hain। baap kehte hain main tumko svargavaasi banaata hoon। sweet world mein le jaae phir tumko sweet baadshaahi mein bhej denge। aise baap se to raat din padhkar poora varsa lena chaahiye। vaastav mein raat din koi padhaaya nahin jaata hai। baba kehte hain savere aur raat ko ek ghanta regular padho। savere ka samay to sabko milta hai। ek second ki baat hai। sirf baba aur varse ko yaad karna hai। phir bhi tum bhool jaate ho। phir kehte ho baba ham kya karen - yaad bhi badi sahaj hai। srishti chakra ka gyaan bhi bada sahaj hai। yeh hai paap aatmaon ki duniya, tumko punya ki duniya mein jaana hai। shivbaaba ko yaad karo। grihastha vyavhaar mein rahne vaalon ke liye bhi bahut sahaj hai। to baap bachchon ko zaroor yaad karte hain। phalaane ki kabhi chitthi nahin aati hai, kya ho gaya hai? va jab saamne aate hain to poochhta hoon - kya behosh to nahin ho gaye the? baap ke saath itna lav nahin, paai paisa kamaane vaale mein lav chala jaata hai। baba ko samaachaar dena chaahiye, baba ham jeete hain, khush hain। auron ko bhi parichay dete rehte hain। baba to roz murli mein yaad-pyaar bhejte hain। baaki ek-ek ka naam to nahin likh sakte hain, to bachchon ko bhi apna samaachaar dena chaahiye।

is samay saari duniya ka munh kaala ho gaya hai। unko baba aakar gora banaate hain। baba bhaarat ka munh pher dete hain। kaanton ke jangal ko phoolon ka bageecha banaate hain। kaisa jaadoogar hai, svarga ke bageeche mein bhaarat hi hota hai। vahaan yeh pata nahin rehta ki hamaare peechhe aur kaun-kaun aane vaale hain। samajhte hain bas ham hi vishwa ke maalik hain। satayug ko kaha jaata hai garden oph allaah। phir jangal koi god nahin banaate। woh to raavan banaate hain। raavan puraana dushman hai, jisko koi nahin jaante hain। baba poochhte hain tum kiski santaan ho? baba ham brahma ke bachche hain, shivbaaba ke potre hain। shivbaaba brahma dvaara varsa dete hain। brahma dvaara svarga ki sthaapna kar rahe hain। tum baba ke bachche bane hi ho varsa lene ke liye। baba kehte hain yaad rakhna, bhoolna nahin। kehte hain baba ghadi-ghadi bhool jaate hain। are tumko jo narkavaasi banaate hain unko yaad karte ho aur svargavaasi banaane vaale baap ko bhool jaate ho? baap ko nahin bhoolenge to varse ko bhi nahin bhoolenge। is samay to baba haazir naazir hai। kehte bhi hain haaziraahzoor...woh bhi gupta hai। aise nahin kahenge ki ham unko dekhte hain। aatma gupta to baap bhi gupta। aatma shareer mein aakar bolti hai, mujhe bhi shareer chaahiye। nahin to aaoon kaise? garbha mein aaoon to garbha jel mein aana pade। main garbha jel mein kyon aaoon, mainne kaun sa gunaah kiya hai? garbha mahal to hota hai svarga mein। ham svarga mein aakar kya karenge? svarga ka maalik to tum bachchon ko hi banaata hoon। yahaan sammukh baith-kar sunne se sabko maja aata hai। yahaan se baahar jaane se sab kuchh bhool jaate hain। 21 janmon ki raajaai lena aur saadhaaran praja mein pad paana farka to bahut hai na। bheel log rotla khaate hain। saahookaar maal khaate hain। farka hai martabe ka। parantu duhkhi to donon hi hote hain। svarga mein phir sab sukhi hote hain, parantu martaba nambarvaar hai। hamko purushaartha karke oonch pad paana hai। mama-baba ko follow karna hai। is samay shreemat milti hai। to maat-pita ko follow karna pade। maat-pita to saakaar mein chaahiye। shivbaaba ko to purushaartha karna nahin hai। mama baba purushaartha kar 21 janmon ka raajya bhaagya lete hain। phir jo achha purushaartha karte hain, woh gaddi par baithte hain। 8 paas with honour hote hain। unmein aana chaahiye। unmein nahin to 108 mein aao। margin to 16108 ki bhi hai। 16108 ki bahut badi maala hoti hai। unko baith kheenchate hain। yahaan maala japne ki baat nahin hai। baap to kehte hain follow karo। yeh brahma boodha padhkar paas ho number one mein jaata hai। mama javaan bhi number one mein jaati hai। to tum purushaartha kyon nahin karte ho। gaphlat kyon karte ho? baap ko patra bhi nahin likhte, yaad bhi nahin karte hain। pran bhi kar jaate hain parantu baahar gaye khalaas। ham kah bhi dete hain - tum baahar jaane se bhool jaayenge। kehte hain baba ham nahin bhoolenge। phir bhool jaate hain। wonder hai na। yeh hai bilkul nai padhaai jo koi shaastra mein nahin hai। koi samajh nahin sakte। ab baba ne drishti di hai - is antim janma mein। baba sunaate hain - ham geeta bhi padhte the। naaraayan ka bhi poojan karte the। gaddi par bhi naaraayan ka chitra rakhte the (history sunaana) lakshmi ko kaise mukta kar diya। duniya vaalon se bada yukti se chalna padta hai। tum bhi gupta reeti baba ka parichay dete raho ki baap aur varse ko yaad karo। svarga ke hain devi-devta, isliye lakshmi-naaraayan ka chitra banaaya hai। pahle trimoorti nahin daala tha kyonki brahma ko dekh bigad jaate hain। parantu brahma bigar kaam kaise ho। bi.ke. baap ko nahin dekhenge to kaam kaise hoga? baap kehte hain geeta mein likha hua hai - manamnaabhav, madhyaaji bhav। chaahe mukti ka va jeevan mukti ka donon varsa main de sakta hoon aur koi nahin। bahut samajhne ki baaten hain। amritvele uthkar vichaar saagar manthan karna hai zaroor। din mein bhal kaam karo parantu amritvele 4 baje se 5 baje tak baithkar yaad karo to bahut sukh feel hoga। baba sweet hom se ham bachchon ko padhaane aate hain, phir chale jaate hain। kehte hain mujhe yaad karo to khaad niklegi। jab sachcha sona ban jaayenge tab paas with honour honge। agar oonch pad paana hai to purushaartha se kya nahin ho sakta hai? baap phir bhi kehte hain - is eeshvareey bachpan ko nahin bhoolna। aise baap ko ghadi-ghadi yaad karna chaahiye। yaad se tum kanchan bante ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) kisi bhi prakaar ki gaphlat nahin karni hai। ek do ko saavdhaan kar, baap ki yaad dilaae unnati ko paana hai। apne eeshvareey bachpan ko bhoolna nahin hai।

2) maat-pita ko follow karte rehna hai। maaya ke toofaanon se darna nahin hai। amritvele baap ki yaad mein baithkar sukh ka anubhav karna hai।

vardaan:- dridhta ki shakti se saphalta praapta karne vaale, prayogshaali, trikaaldarshi bhav

baapdaada ka vardaan hai-jahaan dridhta hai vahaan saphalta hai। to dridhta se koi bhi gun va shakti ke prayog ka programme banaao aur pahle svayan mein santushtata ka anubhav karo। dridh sankalp ho ki “mujhe karna hi hai''। doosron ke albelepan ka prabhaav nahin padna chaahiye। trikaaldarshi pan ki sthiti ke aasan par baith-kar jaisa samay vaisi vidhi se pahle svayan siddhi swaroop bano, tab prayogshaali aatmaon ka powerful sangathan taiyaar hoga aur us sangathan ki kirnen bahut kaarya karke dikhaayengi।

slogan:- sarva ki duaayen praapta karne vaale hi santushtamni hain।