गुरुवार 10 नवंबर 2022 की दैनिक मुरली

10-11-2022 praatahmurli om shanti "baapdaada"' madhuban

“meethe bachche - tumhein is rudra gyaan yagya ka bada kadar hona chaahiye kyonki is yagya se hi bhaarat svarga banta hai, tum is yagya ke rakshak ho''

prashn:- bachche, baap va teacher ko talaak athva phaarakti kaise aur kab dete hain?

uttar:- jab baap athva teacher ko bhool jaate hain, murli miss karte hain, padhte va sunte nahin hain to goya baap ko phaarakti va talaak de dete hain। baba kehte bachche tum mujhe talaak kabhi nahin dena।

prashn:- tumhaara satya gyaan manushyon ko mushkil samajh mein aata hai, kyon?

uttar:- kyonki yeh gyaan parampara nahin chalta hai। abhi hi praayahlop ho jaata hai। is gyaan ka kisko pata hi nahin hai। yeh naya gyaan hai isliye unhein samajhne mein mushkil lagta hai।

geet:- pitu maat sahaayak…

om shanti। jiske saath bachchon ka abhi yog hai unki baahar manushya mahima gaate rehte hain। tum unki yaad mein baithe ho। apne ko aatma samajh deh ka abhimaan chhod ek ki hi yaad mein rehna hai। abhi tum aatma-abhimaani bane ho। pahle the deh-abhimaani। satayug mein tum baap ko nahin jaante kyonki sukh mein hote ho to baap yaad nahin rehta। yahaan duhkhon mein ho tab pukaarte ho। gaayan bhi hai duhkh harta - sukhkarta। vaastav mein sachcha-sachcha haridvaar yeh hai। manushya hari kehte hain shreekrishna ko, baikuntha ko shreekrishna ka hari dvaar kehte hain। tum jaante ho vaastav mein hari shreekrishna ko nahin kahenge। duhkh harne vaale ko hari kahenge। tum jaante ho shivbaaba, shreekrishna ka dvaar athva baikuntha, satayug ka dvaar kholne aaya hai। koi makaan banaate hain to koi opening ceremony karte hain na। to baba aaya hai hari dvaar ki ceremony karne। krishna ki raajdhaani mein kans to hota nahin hai। baap dvaara ham svarga ka varsa le rahe hain। baap hi aakar svarga ke sthaapna ki ceremony kar rahe hain। sthaapna ko ceremony kaha jaata hai। makaan ka pahla foundation lagaaya jaata hai phir makaan bankar poora hota hai phir ceremony ki jaati hai। to baap foundation lagaane aaya hai। 1937 mein foundation lagaaya, ab phir tum sthaapna kar rahe ho। tumko khushi hai ki baba aaya hai nai duniya sthaapan karne aur ham nai duniya mein ja rahe hain। is prithvi par svarga tha, ab phir sthaapan kar rahe hain। har ek ko paigaam de rahe hain। dharma sthaapak ko paigambar kaha jaata hai na। sachcha-sachcha paigaam main hi deta hoon। main hi raajayog sikhla kar svarga ki sthaapna kara raha hoon। baap samjhaate hain ki main ved-shaastron se nahin milta hoon। yeh sab bhakti maarga ke shaastra hain। bhaktimaarga ki bahut saamagri hai। janma-janmaantar se tum bhakti karte aaye ho। ab gyaan suno phir satayug mein gyaan nahin sunenge। kaha jaata hai gyaan anjan satguru diya। satayug mein andhakaar hai nahin jo bhakti karen। baap se gyaan lo phir bhakti nahin rahegi।

tum jaante ho raavan raajya kisko kaha jaata hai, raamraajya kisko kaha jaata hai। tumko saari roshni mili hai kyonki baap jagaate hain। ab dekho deepaavli manaate hain, usmein deepak koi chhote, koi bade banaate hain। ab yeh chhote bade deepak jag rahe hain na, gyaan ka ghrit mil raha hai। manushya marte hain to deepak mein ghrit daalte rehte hain ki praani andhiyaare mein thokre na khaaye। woh hain had ki baaten, tumhaari hain behad ki baaten। jab raavanraajya shuru hota hai to thokren khaana shuru hoti hain। abhi din pratidin adhik hi thokren khaate rehte hain। pahle ek ki bhakti karte ab to manushyon ki, tivaate ki bhakti karte hain। bhakti ki bahut saamagri hai, jitni vriksha ki saamagri hai। beej se kitna bada vriksha nikalta hai, bhakti bhi itni hai। gyaan hai beej, yeh srishti to anaadi avinaashi hai। inka kab vinaash nahin hota। yeh srishti chakra lagaati rehti hai। beej bhi ek hai to jhaad bhi ek hai। aise nahin aakaash mein, paataal mein, soorya mein, chaand mein duniya hai। yeh to science vaale chandrama mein jaakar rahne ki koshish karte hain। parantu yeh nahin jaante ki science se saari duniya ka vinaash hona hai aur raajya tum le lenge। tum kahenge yeh bhi drama mein noondh hai। doosre in baaton ko samjhenge nahin। raajaai tumko milni hai kyonki connection hai krishnapuri aur krishchiyanpuri ka। inhonne bhaaratvaasiyon ko aapas mein ladaakar krishnapuri ko krishchiyanpuri banaaya। ab baap kehte hain hisaab lena hai, inko aapas mein ladaakar maakhan tumko dete hain athva tumko vishwa ka maalik banaate hain। yeh aapas mein ladenge zaroor। woh samajhte hain ham pahalvaan, woh kehte hain ham pahalvaan, ham jeetenge lekin sabse pahalvaan to tum nikal pade ho। jeet tumhaari honi hai। mahaaveer aur mahaaveerni kaha jaata hai। baap kehte hain maaya ke toofaan to aayenge parantu karma mein nahin aana। yogbal se sthaapna ho rahi hai aur baahubal se vinaash ho raha hai। uthte-baithte, chalte-phirte baap ko yaad karna hai, isko kaha jaata hai yogbal। phir gyaan bal kaha jaata hai। gyaan bal kyon kaha jaata hai? kyonki shaastron mein bal nahin hain। unse koi ko mukti-jeevan-mukti nahin mil sakti, isliye unko gyaan nahin kaha jaata। bhakti ke shaastra kahenge। gyaan ka koi shaastra hota nahin। ab jo raam ke pustak bane hain va jo bhi shaastra aadi hain, sab ladaai mein khatma ho jaayenge। jhoothi geeta, sachchi geeta sab khatma ho jaayegi kyonki sadgati mil jaati hai। sab kaamnaayen poori ho jaati hain। koi kaamna rahegi nahin। ab tum 84 ke chakra ko jaante ho। tum abhi beanta nahin kahenge। beanta kehte hain naastik। kehte hain god father parantu naam roop desh kaal kartavya ko nahin jaante। tum unke nai duniya ki sthaapna, patiton ko paavan karne ke kartavya ko jaan gaye ho। manushya to raavan ko jalaate hain। tumko to ab hansi aati hai। janma-janmaantar tum bhi raavan ko jalaate the। abhi to raavanraajya ka vinaash hona hai phir aati hai deepaavli। vahaan ghor sojhra hai, usko raamraajya kehte hain। kehte to sab hain ki raamraajya chaahiye। parantu raamraajya ko jaante nahin। abhi tumko gyaan mil raha hai aur raavan-raajya transfer hona hai raamraajya mein। usse pahle tum jaayenge roodramaala mein। aur yeh jo islaami, bauddhiyon ki aatmaayen hain, woh aadhaakalpa mukti mein rahengi। jab hamaari satayug ki praalabdha poori hogi tab bhakti shuru hogi। phir dvaapar ko raavanraajya kaha jaata hai kyonki apne devta dharma ko bhool gaye hain। yeh hona hai zaroor। misaal bad ke jhaad ka dete hain। bachche jaante hain ki aadi sanaatan devi-devta dharma ka foundation praayahlop ho chuka hai। sab dharma bhrashta, karma bhrashta ho gaye hain। jab devi devta dharma sthaapan ho tab yeh sab dharma vinaash ho jaaen। kehte bhi hain anek adharma vinaash, ek sat dharma ki sthaapna ho। yahaan varsa paane ka tum purooshaartha kar rahe ho। jo dhaarna karenge karaayenge, woh oonch pad paayenge। baap kehte hain mukhya baat zaroor dhaaran karo ki hamko niraakaar baap padhaate hain। shreekrishna nahin padhaate hain। chitra bhi banaaya hai - ek taraph shreekrishna ka chitra, doosre taraph shiv ka। poochhna hai ab bataao geeta ka bhagwan kaun? judge karo tumko samjhaane mein bahut sahaj hoga ki geeta ka bhagwan shreekrishna nahin shiv hai। tumko maaloom hai geeta ka gyaan phir se baap de rahe hain। geet mein bhi hai geeta ka gyaan phir se sunaana pade। geet to tumne nahin banaaye hain। banaane vaale to manushya hi hain, parantu arth ko nahin jaante। kehte hain geeta ke bhagwan ne gyaan ghode gaadi mein baithkar diya। shreekrishna ke liye koi ghode gaadi thode hi aayegi। agar shreekrishna hota to unke liye achhe se achhi gaadi le aayen। bade-bade dhanvaan aa jaayen। yahaan to dekho apni motor (shareer) bhi nahin hai। aata hi hoon patit shareer mein। to gupta hai na। shreekrishna ki to baat nahin। phir tum bhakti maarga mein mera kitna maan rakhte ho। somnaath ka mandir banaate ho। koi ek mandir thode hi hoga, anek honge phir unhein loota bhi hoga। to saari behad ki history-geography ko tum jaan gaye ho। baap ko kehte hain knowledgeful। to yahaan gyaan bhi diya jaata hai, padhaai bhi padhaai jaati hai। gyaan hai manamnaabhav, isse sadgati hoti hai। phir madhyaajeebhav ki padhaai padhaate hain। teacher aur guru ka part ikattha chalta hai। saare world ki history-geography tumko padhaate hain।

sachchi-sachchi nuns tum ho kyonki tum ek ko yaad karti ho। nuns ko gale mein cross pada rehta hai। Christ ko yaad karti hain, samajhti hain Christ god ka bachcha tha। tum jaante ho ki Christ koi god ka bachcha nahin tha, Christ ki aatma god ka bachcha thi। aise to ham sabhi hain। baap aakar 3 dharma sthaapan karte hain। tum oonche te oonchi choti brahman ho kyonki tum oonch te oonch vishwa ki seva karte ho। manushya ko aatma ka gyaan dete ho। tum aatma ko baap se varsa milta hai। barobar baap kalpa-kalpa ke sangamayuge varsa dene aate hain। shaastron mein to yuge-yuge likh diya hai। kalpa akshar beech se nikaal diya hai। unka naam hi hai patit-paavan। to yuge-yuge aakar kya karenge। kalpa mein ek baar aakar paavan banaakar chale jaate hain। to baap kehte hain mujhe talaak mat dena। aajkal striyaan pati ko talaak de deti hain vaise hindu naari pati ko kabhi talaak nahin deti thi। tumko murli sunni hai zaroor। murli nahin sunte ho to goya baap teacher ko bhool jaate ho, yeh bhi jaise talaak ho gaya। tumko bhi kitna attention dena hai। ab naapaas honge to kalpa-kalpaantar naapaas honge। ant mein sabko maaloom pad jaayega ki kis-kis ne kitni padhaai padhi thi। sab kehte hain ki shanti chaahiye। goya mukti chaahte hain। kehte hain ki duhkh mein simran sab karen... to aadhaakalpa sukh aur aadhaakalpa duhkh hai। sukh duhkh ka khel bhaarat par hi hai। tum to kahenge ham hi devta, ham hi kshatriy..... to ham so ka arth bhi to koi nahin jaante hain। to baap kehte hain manamnaabhav, madhyaajeebhav। khud dhaaran kar auron ko dhaaran karaayen to aho saubhaagya। yaad se hi vikarma vinaash honge। kahaan ganga mein snaan karna, kahaan yog mein rah paavan banna।

bachchon ko yagya ke paise ki bahut kadar honi chaahiye kyonki isse bhaarat svarga banta hai। baap hai gareeb nivaaj। gareebon ki paai-paai padegi tab woh saahookaar banenge। svarga mein health, wealth, happiness hai। agar health wealth hai to happiness bhi hai। agar health ho wealth na ho to happiness ho nahin sakti। satayug mein health wealth hai to sadaiv happy rehte hain। vahaan kabhi rote nahin hain। to tumko bhi yahaan rona nahin hai। parantu maaya ke toofaan murjha dete hain। health milti hai hospital se aur wealth milti hai padhaai se। to dekho mere bachche kitne gareeb hain। teen pair prithvi mein hospital khol dete hain। jahaan se hi sabko health wealth milti hai। achha।

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) maaya ke toofaanon mein kabhi murjhaana nahin hai। sadaiv khushi mein rehna hai।

2) hamko niraakaar baap padhaate hain, is nashe mein rehna hai। is jhoothi duniya mein koi bhi kaamna nahin rakhni hai।

vardaan:- har roz ki murli ke saadhan dvaara vyartha ko khatma karne vaale paas with honour bhav

har roz ki murli man ko busy rakhne ka saadhan hai, murli ki koi bhi point par manan karte raho to man busy rahega aur vyartha svatah khatma ho jaayega। man ko mansa-vaacha aur karmana seva mein itna busy kar do jo vyartha sankalp aave hi nahin, tabhi final paper mein paas with honour ho sakenge। agar vyartha sankalp chalne ka abhyaas hoga to samay par dhokha kha lenge।

slogan:- plan ko practical mein laane ke liye baalak aur maalikpan ka balance rakho।