सोमवार 28 नवंबर 2022 की दैनिक मुरली

28-11-2022 praatahmurli om shanti "baapdaada"' madhuban

meethe bachche - padhaai achhi reeti padhkar uska saboot do, service kar auron ko bhi laayak banaao tab oonch pad ke adhikaari banenge

prashn:- is behad ke school mein vaah-vaah kinhon ki hoti hai?

uttar:- jo khud achhi reeti padhte hain aur doosron ko aap samaan banaane ki seva karte hain। roohaani kamaai mein busy rehte hain। sirf doosron ko dekh khush nahin hote lekin maat-pita samaan seva kar unke takhta par baithte hain unki vaah-vaah maat-pita va ananya bachche karte hain। jo apna time vesta karte, padhaai par dhyaan nahin dete, maat-pita ko follow nahin karte un par taras padta hai। woh oonch pad pa nahin sakte। unki sada complain rehti ki hamaara yog nahin lagta।

geet:- dheeraj dhar manua…

om shanti। baap baith bachchon ko samjhaate hain ki sukh ke din aayenge agar shreemat par chalenge to। phir jitna shreemat par chalenge utna hi shreshtha banenge kyonki shreshtha arthaat shreshthaachaari to sab banenge parantu jo achhi reeti shreemat par chalenge woh achha shreshthaachaari banenge। padhaai mein bhi koi achhi reeti padhte hain, koi kam padhte hain athva nahin padhte hain। na padhne vaalon ko bura maana jaata hai। yeh padhaai bhi koi achhi reeti padhte hain to auron ko padhaane laayak bhi bante hai। koi to dhyaan hi nahin dete। yeh bhi bachche samajhte hain ki agar ham koi bhi vidya achhi reeti padhenge to aisa hi laayak banenge, nahin to naalaayak banenge। laayak ko zaroor achha darja milega। tum abhi sukhdhaam ke liye padhte ho phir usmein bhi nambarvaar martabe hain। manushya martabe ke liye kitna maatha maarte hain। woh hai alpakaal ka sukh, kaag vishta samaan sukh। yeh to athaah sukh hai। jo bachche shreemat par chalenge, vahi athaah sukh pa sakenge aur woh brahman kul mein bhi apna naam nikaalenge। baap ka bachchon ko pharmaan hai - service kar auron ko bhi oonche te ooncha pad dilaao to tumhaara bhi pad ooncha ho jaayega। achhi reeti padhkar phir baap ko saboot dena hai। baba hamne itnon ko baba ka parichay diya। pradarshani mein bhi pahle-pahle baap ka parichay dete ho। parichay dekar phir likhva lo। samjhaana bahut sahaj hai। baap do hote hain laukik aur paarlaukik। laukik se had ka varsa milta hai, jisko kaag vishta samaan sukh kaha jaata hai। behad ka baap behad ka sukh dete, svarga ka maalik banaate hain। to bachchon ko service kar aap samaan banaana hai। baap ko sirf yaad nahin karna hai, lekin un jaisi service bhi karna hai। shreekrishna athva kisko bhi yaad karna, unke gun dhaaran na karna, woh kya kaam ke! unse phal kuchh nahin milta। bhakti maarga mein bhi devtaaon ko yaad karte-karte neeche utarte jaate hain। ab mama baba bhi sadgati karne ki service mein lage hue hain। jo mo baap muaaphik service karte hain, vahi sachche maa baap ke bachche hain। nahin to kachche kaha jaata hai। baap bhi khush tab ho jab dekhe ki mere laadle bachche mere samaan service karte hain। laukik reeti mein bhi jo bachche achhi reeti padhte hain woh baap ke dil par chadhte hain। achhi kamaai karte hain। yeh bhi tumko roohaani kamaai karni hai, sirf doosron ko dekh khush nahin hona hai। padhaai padhkar aur padhaakar oonch pad paana hai, tab maa baap, ananya bachche unki vaah-vaah karenge।

yeh behad ka school hai। hajaaron yahaan padhte hain। jo achhi reeti nahin padhte woh khud bhi samajhte honge ki hamaara yog poora nahin lagta hai। woh bachche baap ki dil par chadh nahin sakte। bachche bane hain to maa baap paalna to karte hain na। phir bhi baap samjhaate hain maat-pita aur ananya bachchon ko follow karo। service to bahut karni hai। woh social worker karodon ki andaaj mein honge। tumko roohaani social worker banna hai। agar gyaan hai to। nahin to samjhenge poora gyaan nahin hai। gyaan ke badle agyaan jaasti hai jis kaaran pad bhrashta ho jaayega, oonch pad pa nahin sakenge। baap ko taras padta hai। har padhaai mein purushaartha zaroor chaahiye। purushaartha bigar paas ho nahin sakenge। koi do teen baari fail hote hain to apna time vesta ganvaate hain। to kam padhne vaalon ko jo achhi reeti padhte hain unka regard rakhna chaahiye kyonki woh bade bhaai behen ho jaate hain। mama baba misal service karte hain। achhi service karne vaalon ko jahaan tahaan bulaate hain। to samajhna chaahiye kyon na ham purushaartha kar aisa banen। auron ko aap samaan banaaven। behad ke baap ka parichay dena hai ki unse kaise behad ka varsa milta hai। woh behad ka baap janma-maran rahit sada sukh dene vaala hai। baap do hain ek aatmaon ka baap, doosra alaukik, tab tum baapdaada kehte ho। laukik sambandh mein bhi baap daada hota hai। yeh hai phir paarlaukik baapdaada। paarlaukik baap se tum bhavishya 21 peedhi ki praalabdha paate ho। laukik baap se alpakaal sukh ka varsa janma by janma milta hai। janma lete jaao doosra baap milta jaaye। satayug treta mein yahaan ka varsa 21 janma chalta hai। bhal baap doosre-doosre milte jaayenge parantu ham sukhdhaam mein hi rehte hain। phir dvaapar se maaya ka raajya shuru hota hai phir hamaari dheere-dheere utarti kala hoti hai। yeh buddhi mein rehna chaahiye। jab utarte hain to jaldi-jaldi janma lete jaate hain। aadhaakalpa mein 21 janma lete hain baaki aadhaakalpa mein 63 janma kyon? patit hone se jaldi-jaldi utarte jaate hain। jab baap aaye to ham ekdam utar gaye the। abhi tum sangamayugi brahman bane ho। bhal tumhaara kaliyug ke saath connection hai। parantu apne ko sangamayugi samajhte ho। jaante ho baba hamko paramdham ka maalik bana rahe hain। grihastha vyavhaar mein rehte hue tum samajhte ho woh kaliyug mein rahne vaale hain, ham sangamayug mein rahne vaale hain। woh vikaari bagule hain, ham nirvikaari hans hain। sirf baahar se nahin dikhaana hai। antaryaami baba andar se jaante hain।

baap samjhaate rehte hain bachche koi paap karma nahin karo। kaha jaata hai kakh ka chor so lakh ka chor। ek baar chori karte hain phir ek do varsha shakya rehta hai। shak mushkil hi mitta hai। to aisa kaam karna hi kyon chaahiye। yeh sab kaam maaya karaati hai। jab maaya maatha mood leti hai tab smriti aati hai, hamne yeh kya kiya? phir baba se kshama maangate hain। baba kehte hain achha bachche harja nahin, phir nahin karna। achha hua jo bhool bataai। nahin to vriddhi ho jaati। baba ko likhte hain hamne krodh kiya, kaala munh kiya। apna bhi to stri ka bhi kiya। baba likhte hain baap ka bankar pratigya kar kaala munh kiya, brahman kul ko kalank lagaaya, saza ke adhikaari ban jaayenge। oonche te ooncha hai brahman kul, devtaaon se bhi ooncha hai। tum brahman bhaarat ko patit se paavan banaate ho। tumne satayug treta mein 21 janma raajya bhaagya kiya tab sundar the phir 63 janma kaam chita par baith kaale ho gaye, tab shyaam bane। kehte hain saagar ke bachche kaam chita par baith khatma ho gaye। phir saagar ne gyaan varsha ki to jaag pade। gore ho gaye। is shreekrishna ki aatma ko 84 janma zaroor lene hain। 21janma sundar, 63 janma shyaam। ab unki laat puraani duniya taraph hai, munh nai duniya taraph hai। jo number one poojya tha vahi pujaari ban ab last number mein hai। khud hi pujaari ban naaraayan ki pooja karte the। ab khud hi poojya naaraayan bante hain, inko hi first number mein jaana hai। brahma ka din svarga, brahma ki raat narka। shivbaaba aate hain raat ko din banaane। ab aadhaakalpa ki raat poori ho, din hota hai। shivraatri kehte hain parantu shiv ke badle shreekrishna ka naam kah diya hai ki shreekrishna ka janma raat ko hua। hai shivbaaba ki baat। shivbaaba ki tithi taareekh vela ka kuchh bhi pata nahin ki kis samay aaya। shreekrishna ki vela hai, woh punarjanma mein aane vaala hai। shivbaaba to jhat aakar parichay dene lag padte hain। kuchh samay to pata hi nahin pada ki yeh kaun aaya hai? kaun bol rahe hain? baad mein maaloom pada ki yeh to shivbaaba gyaan ka saagar hai। shivbaaba brahma dvaara vishnupuri ki sthaapna karte hain। brahma yahaan hai। krishnapuri bhi yahaan hai। lakshmi-naaraayan ke takhta pichhaadi vishnu ka chitra hota hai। parantu gyaan kuchh bhi nahin। jaise government ka trimoorti chitra hai। yeh samajhne ki baat hai। bachche jaasti nahin samajhte hain, bhala laukik paarlaukik baap ka contrast to samajhte ho na। yaad bhi karte hain he patit-paavan, he merciful, he duhkh harta sukh karta। satayug mein koi yaad nahin karte। baap yahaan hi sab manokaamna poori kar dete hain। satayug mein tumko itna athaah dhan milta hai jo vahaan maatha maarne ki darkaar hi nahin। tumko shreemat par chalna chaahiye। jo nahin chalte goya nidhanke hain, unko kaha jaata hai bagula। to hanson ko bagulon ke saath bhi rehna padta hai। grihastha vyavhaar mein to rehna hi hai isliye report aati hai bhaai jhagda karta, phalaana jhagda karta, duniya mein jhagda hi jhagda hai। pavitrata par bhi jhagda chalta hai। khaan-paan ki parhej rakhni hoti hai। to bahuton ke liye musheebat ho jaati hai। baap kitna samjhaate hain, yaad mein rahkar bhojan khaao। direction amal mein nahin laate hain। practice karni chaahiye। tum ho patit duniya ko paavan banaane vaali shaktiyaan। yaad se paap bhasma ho jaate hain। mehnat hai bahut isliye koton mein koi nikalta hai। purushaartha karte bhi fail ho jaate hain। aashcharyavat baba ka bananti, baba baba kahanti। phir bhi shreemat par nahin chalte, to giranti, bhaaganti। maaya kheenchati hai to baap ko phaarakti de dete hain। kalpa pahle jo hua hai vahi repeat hona hai, ismen mehnat chaahiye। jo shreemat par chalte vahi dhaarna kar sakte hain। mama baba kahkar follow nahin karenge to durgati ko paayenge arthaat kam pad paayenge। anapdhe, padhe ke aage bhari dhoyenge। naukar chaakar banenge। jo brahman nahin bante woh praja mein paai paise ka pad paayenge। aur koi dharma sthaapan karne vaala raajaai nahin sthaapan karte। behad ka baap hi bhavishya ke liye raajaai sthaapan karte hain। pavitra banne ke liye purushaartha karna pade। tum phool bante ho, jo vikaar mein jaate hain woh kaante bante hain। ek do ko aadi-madhya-ant duhkh dete hain। yeh hai kaanton ki duniya। ab tum sangam par phool ban rahe ho। satayug hai phoolon ka bageecha। sangam par jangal se bageecha banta hai। yeh hai kalyaankaari sangam athva kumbha। aatma paramatma ka milan hota hai। abhi tum jaante ho ham parampita paramatma se 21 janma ka varsa le rahe hain। raajaai paane mein maza hai। baaki yeh kehna ki takdeer mein hoga to milega, isse kya hoga। behad baap ka parichay dena hai। tum anubhvi ho, service to karni hai। dil se poochhna hai ki hamne kitnon ki service ki। gyaan hai to service mein lag jaana hai। no gyaan to no service, to no oonch pad। takdeer mein nahin hai to purushaartha bhi nahin karte। achha।

meethe-meethe sikeeldhe roohaani serviceable bachchon prati roohaani baap va daada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap ke direction ko amal mein laana hai। khaan-paan ki poori parhej rakhni hai। yaad mein rahkar bhojan khaane ka abhyaas karna hai।

2) maat-pita ki tarah seva karni hai। apne badon ka regard zaroor rakhna hai। roohaani social worker ban sabko baap ka parichay dena hai।

vardaan:- kalyaankaari samay ki smriti se apne bhavishya ko jaanne vaale master trikaaldarshi bhav

yadi aapse koi poochhe ki aapka bhavishya kya hai? to bolo hamko pata hai - bahut achha hai kyonki ham jaante hain ki kal jo hoga woh bahut achha hoga। jo ho gaya vo bhi achha, jo ho raha hai woh aur achha aur jo hone vaala hai woh aur bahut achha। jo master trikaaldarshi bachche hain unhein nishchay rehta ki kalyaankaari samay hai, baap hamaara kalyaankaari hai aur ham vishwa kalyaankaari hain to hamaara akalyaan ho nahin sakta।

slogan:- samaapti ke samay ko sameep laana hai to sampoorn banne ka purooshaartha karo।