सोमवार 5 दिसंबर 2022 की दैनिक मुरली

05-12-2022 praatahmurli om shanti "baapdaada"' madhuban

“meethe bachche - jitna gyaan ratnon ka daan karenge utna khajaana bharta jaayega, vichaar saagar manthan chalta rahega, dhaarna achhi hogi''

prashn:- jin aatmaon ke bhaagya mein behad ka sukh nahin hai, unki nishaani kya hogi?

uttar:- woh gyaan ko sunenge lekin aise jaise ulta ghada। buddhi mein kuchh bhi baithega nahin। achha-achha karenge, mahima karenge। kahenge haan, sabko yeh sunaana chaahiye, maarga bahut achha hai। parantu khud us par nahin chalenge। baba kehte yeh bhi takdeer। tum bachchon ka farja hai service karna। hajaaron ko sunaate raho। praja to banti hai। maa-baap misal behad ke baap se varsa lene ka purushaartha karo। knowledge ko dhaaran kar aap samaan banaate raho।

geet:- takdeer jagaakar aai hoon…

om shanti। takdeer sadaiv do prakaar ki hoti hai। ek achhi doosri buri। ek sukh ki doosri duhkh ki। bhaarat ke sukh ki takdeer bhi hai, to duhkh ki takdeer bhi hai। bhaarat hi sukhdhaam tha, bhaarat hi duhkhadhaam hai। makaan naya hai to achhi takdeer hai। puraana hai to buri takdeer। bhaarat hi pahle naya tha, ab phir puraana hua hai। in baaton ko bhi tum bachche hi samajh sakte ho, duniya nahin jaanti। tumhaara dhyaan in baaton taraph khinchavaaya jaata hai ki bachche tum kitne takdeervaan the। devi-devta vishwa ke maalik the, abhi nahin hain। achhi takdeer badal ab buri ho gai hai। achhi takdeer kaise aur kab hoti hai, yeh samajhne ki baat hai। samjhaane vaala ek hi behad ka baap hai। bhaarat ki oonchi takdeer kab thi? jab svarga tha। buri takdeer ab hai। gaate bhi hain he patit-paavan aakar hamaari paavan takdeer banaao। bhaarat paavan tha to jabardasta takdeer thi। abhi vahi bhaarat patit hai kyonki vikaari hain। vikaari aur nirvikaari donon hote hain। ham agar is samay nirvikaari banenge to devta banenge। ab baap ko bulaate rehte hain। kumbha ke mele par bhi zaroor gaate honge - patit-paavan seetaaraam...। patit-paavni nadi to hai nahin। manushyon ki jab takdeer buri hoti hai to kitne pattharbuddhi ho jaate hain। duhkh aur sukh ka yeh khel hai। duhkh kaun dete hain? sukh kaun dete hain? donon ke chitra bahut naami-graami hain। sukh ke liye parampita paramatma ko yaad karte hain। he duhkh harta sukhkarta। to isse siddha hai ki baap kabhi duhkh nahin dete। vo log samajhte hain bhagwan hi duhkh sukh donon dete hain। paai-paise ki baat bhi koi samajhte nahin hain। abhi tumko baap ne paarasbuddhi banaaya hai। buddhi ka taala khola hai। tum jaante ho srishti ka chakra phirta rehta hai। srishti puraani hoti hai to usmein duhkh hai। abhi tumko 3 okhen mili hain। tum sabko samjha sakte ho jabki gaate ho patit-paavan aao, phir nadi par kyon aakar baithe ho? yeh yagya tap aadi karna, ved shaastra aadi padhna sab bhakti maarga hai। baap kehte hain - main inse nahin milta hoon। jab tumhaari bhakti poori hoti hai tab main aakar sadgati deta hoon। yog ka bhi gyaan chaahiye। paavan banne ke liye bhi gyaan chaahiye। shaastra padhne se to paavan banne ki koi baat nahin। vivek kehta hai bhaarat jab paavan tha, sampoorn nirvikaari tha tab dhanvaan bhi bahut the। aisa dhanvaan aur pavitra kisne banaaya? kya ganga snaan karne se banen ya shaastron ko padhne se banen? yeh to tum karte hi aaye ho phir bhi pukaarte hain ki he patit-paavan aao। jab patit duniya ka samay poora hoga tab hi patit-paavan baap aakar svarga ki sthaapna karenge। paavan duniya hai satayug, patit duniya hai kaliyug। yeh koi samajhte nahin hain ki patit-paavan ek hi paramatma hai। gaate hain patit-paavan seeta-raam... uska arth bhi baap hi samjhaate hain ki sabhi seetaaon ka raam ek hi paramatma hai। kehte hain sabka daata raam। daata kya? yeh bhi nahin samajhte hain। baap samjhaate hain sabka daata raam to ek niraakaar hi hai। buddhi ko bilkul taala laga hua hai। buddhi mein baithta hi nahin hai। satayug mein sab paarasbuddhi hain, naam hi hai paarasnaath, paaraspuri। tum bachche bhi is samay paarasnaath bante ho। aatma golden ej banti hai। abhi iron ej buddhi hai। golden ej buddhi sukh uthaate hain, iron ej buddhi duhkh uthaate hain। manushya vish ke peechhe hairaan hote hain। pavitra banne mein dekho kitna hangaama karte hain। gaaya bhi hua hai kans, jaraasandhi, duhshaasan, pootna, soopankha.... yeh sab past ki baaton ka gaayan hai। zaroor sangamayug ka hi gaayan hai। har baat sangam ki hi gaai jaati hai। baap kehte hain - main bhi patiton ko paavan banaane ek hi baar aata hoon। tum jaante ho ki baba ka dhandha hi hai patiton ko paavan banaana। baap rachayita hai to zaroor nai rachna hi rachenge। raavan hai patit banaane vaala। baap hai paavan banaane vaala। uska yathaartha naam shiv hai। shivraatri bhi manaate hain। raatri ka bhi arth tum samajhte ho। baap aayega tab jab bhakti arthaat raat poori ho din hoga।

ab baap kehte hain bachche paavan bano। ab vaapis jaane ka hai। satayug tha ab phir chakra repeat hoga। tum bachchon ko manushya se devta bana raha hoon। devtaayen bhi manushya hi the aur koi farka nahin hai। sirf woh gore arthaat paavan hain aur abhi ke manushya saanvare arthaat patit hain। bhaarat golden aged tha, abhi iron aged hai। aatma mein khaad pad gai hai - woh niklegi yog agni se। aage manamnaabhav akshar padhte the। arth kuchh bhi nahin samajhte the। parampita paramatma ke saath buddhiyog lagaana hai, parantu unke roop ka hi kisko pata nahin hai to yog kaise lag sakta hai। kehte hain paramatma naam roop se nyaara hai to yog kisse lagaayen? bhagvaanuvaach - manamnaabhav। deh ka abhimaan chhodo, apne ko aatma samjho। aatma ka roop kya hai? kehte hain aatma star hai, bhrakuti ke beech mein rehti hai। to aatmaon ka baap bhi aisa hi hoga। unko phir naam roop se nyaara kehte hain। baap ke liye kehte hain brahm hai, akhanda jyoti tatva hai। brahm to beanta ho gaya। jaise aakaash ka ant nahin pa sakte। achha koi karke ant pa bhi leve। parantu usse mukti jeevanmukti to koi ko milti nahin hai। mukti jeevanmukti ka arth bhi tum bachche hi samajhte ho। duniya to kuchh bhi nahin jaanti। gaate bhi hain gyaan ka saagar, manushya srishti ka beejroop hai। sat hai, chaitanya hai, patit-paavan hai to zaroor patit duniya mein aayenge। tum samjhaate ho jab gyaan hai to bhakti ho na sake। gyaan hai din satayug treta। bhakti hai raat। gyaan ka saagar parampita paramatma hai na ki paani - yeh sabko samjhaana hai। saare bhaarat ko kaise paigaam dena hai unke liye baba achhi-achhi yuktiyaan samjhaate rehte hain। mela to vaastav mein aatma aur paramatma ka hi gaaya hua hai। paramatma to ek thahra। paramatma sarvavyaapi hai - yeh koi hisaab nahin banta hai। baap hi aakar sabko duhkh se chhudaate hain। duhkh mein simran sab karte hain। kitni radiyaan maarte hain। poochho yeh kab se karte aaye ho? kehte hain parampara se। phir paavan to koi hue nahin aur patit hote gaye।

tumhaari buddhi mein ab saara gyaan bhara hua hai। gyaan ko kaha jaata hai brahma ka din। vishnu ka din nahin kehte kyonki gyaan abhi hi milta hai। din-pratidin points refine nikalti jaati hain। jeevanmukti hai bhi second ki baat, phir kehte hain gyaan ka saagar hai, kitna bhi likhte jaao ant nahin aayega। baap jab samjhaakar poora karte hain to phir imtahaan bhi poora ho jaata hai। shuru se lekar kitna sunte aaye ho। geeta to bilkul chhoti bana di hai। kitni gyaan ki baaten hain। samjhaana bhi bahut sahaj hai। barobar satayug mein ek dharma tha। abhi to kitne dharma hain। kitna hangaama hai। aapas mein hi hangaama ho gaya hai। ek dharma tha to ladaai aadi ka naam nahin tha, sukh hi sukh tha। chakra ka raaz buddhi mein hai। bachchon ko samjhaaya hai tum 84 janma kaise lete ho। chakra repeat hota hai। abhi tum tamopradhaan se satopradhaan ban rahe ho, yogbal se। tum abhi aastik bane ho। trikaaldarshi bhi bane ho। duniya mein aur koi bhi rachta aur rachna ko nahin jaante hain। tum bachche hi jaante ho parantu dhaarna kar auron ko nahin samjhaate hain to points bhool jaati hain। ek maal buddhi mein nahin baithta hai to doosra kaise baithega। daan dete jaayenge to khajaana bharta jaayega। vichaar saagar manthan chalta rahega। kisko kaise samjhaayen। bhakti ki mahima tab hai jab gyaan nahin hai। jo service par hain unhon ki buddhi mein nasha rehta hai। nambarvaar to hain hi। mahaarthi woh jo doosron ko aap samaan banaate rehte hain। knowledge dhaaran karte hain। pad bhi unko aisa milta hai। yeh mehnat saari gupta hai। tum baap ke bane ho to samajhte ho baap se zaroor svarga ka varsa milega। vahaan raavan hota nahin। raavan ka raajya hi alag hai, raamraajya alag hai। tum bachche abhi samajhte ho ki raamaayan, bhaagvat aadi mein sab is samay ki baaten hain। gudiyon ka khel hai। baap samjhaate hain is samay saara jhaad tamopradhaan hai। khatma hone ka hai। tumhaari buddhi mein saara raaz hai। samjhaane liye kitni yuktiyaan bataate rehte hain। samjhenge phir bhi koton mein koi, sapling lag raha hai। jo aur dharmo mein convert ho gaye hain woh sab nikal aayenge। hindu vaastav mein hain asul devi-devta dharma ke। samjhaana hai tum bhaaratvaasi devi-devta nasal ke ho na। devi-devtaaon ko hi poojte ho। devta hi tumhaara dharma hai। pahle tum devta the phir tum kshatriy, vaishya, shoodra bane। ab phir tum brahman ban devta bano। ham samjhaayenge bhaaratvaasiyon ko। ab sapling lagta hai। baap baith samjhaate hain main kaise shoodra se convert karta hoon। brahman ban phir devta banenge। kitni samjhaani achhi hai। tumse koi poochhe shaastra padhe hue ho? bolo, bhakti maarga mein shaastra sab padhe hain, parantu sadgati to baap hi aakar karte hain, tab to tum unko bulaate ho na ki he patit-paavan aao। yukti se samjhaao to samjhenge zaroor। samjhaane ke liye bachchon mein himmat chaahiye। drama tumse service karaayega - aisa dekhne mein aata hai। kalpa pahle bhi isne itna purushaartha kar yeh pad paaya, baba se varsa paane ka purushaartha poora karna hai। jabki baap ka varsa milta hai to ham raavan ke varse ko haath kyon lagaayen? kyon na meethe ban jaayen। sarvagun sampanna banna hai। yeh hai raajayog - nar se naaraayan banne ka arthaat raajaai paane ka yog।

baap kehte hain main kalpa-kalpa, kalpa ke sangamayug par aata hoon। yeh hai chadhti kala ka yug। baaki sab hain utarti kala ke yug। utarti kala aur chadhti kala hoti hai। yeh chakra buddhi mein rehna chaahiye। baap baith aatmaon (bachchon) se baat karte hain ki mujhe yaad karo। yeh antim janma patit nahin bano to main tumko vishwa ka maalik banaaoonga। kya tum meri nahin maanenge? phir to behad ka sukh bhi tum pa nahin sakenge। tum yeh janma to pavitra bano। main guarantee karta hoon, tumko vishwa ka maalik banaaoonga। baap ki bhi nahin maanenge kya? jo phool banne vaala hoga unko jhat teer lagega। bhaagya mein nahin hoga to sunega aise jaise ulta ghada। pradarshani mein tum kitnon ko samjhaate ho, achha-achha karte hain। kahenge maarga bahut sahaj hai, parantu khud kuchh bhi karenge nahin। sirf mahima ki auron ko kaha achha hai, parantu khud chalna nahin hai, isse kya hua। kahenge takdeer mein nahin hai। aise-aise praja mein aa jaayenge। parantu bachchon mein service ka shauk hona chaahiye। hajaaron ko sunaana pade। behad ke baap se varsa lene ke liye maa-baap misal purushaartha karna chaahiye। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se poora varsa lene ke liye ati meetha, sarvagun sampanna banna hai। raavan ke varse ko haath nahin lagaana hai।

2) knowledge ko dhaaran kar roohaani nashe mein rah service karni hai। behad ka sukh paane ke liye baap ki har raay ko maankar us par chalna hai।

vardaan:- attention ki vidhi dvaara maaya ki chhaaya se svayan ko safe rakhne vaale halchal mein achal bhav

vartamaan samay prakriti ki tamoguni shakti aur maaya ki sookshm royal samajhdaari ki shakti apna kaarya teevragti se kar rahi hai। bachche prakriti ke vikraal roop ko jaan lete hain lekin maaya ke ati sookshm swaroop ko jaanne mein dhokha kha lete hain kyonki maaya wrong ko bhi right anubhav karaati hai, mahsoosta ki shakti ko samaapta kar deti hai, jhooth ko sach siddha karne mein hoshiyaar bana deti hai isliye “attention'' shabd ko underline kar maaya ki chhaaya se svayan ko safe rakho aur halchal mein bhi achal bano।

slogan:- har sankalp mein umang-utsaah ho to sankalpon ki siddhi hui padi hai।