बुधवार 11 जनवरी 2023 की दैनिक मुरली

11-01-2023 praatahmurli om shanti "baapdaada"' madhuban

“meethe bachche - buddhi ka yog baap se lagaate raho to lambi musaaphiri ko sahaj hi paar kar lenge''

prashn:- baap par kurbaan jaane ke liye kis baat ka tyaag zaroori hai?

uttar:- deh-abhimaan ka। deh-abhimaan aaya to mara, vyabhichaari hua isliye kurbaan hone mein bachchon ka hriday videeran hota hai। jab kurbaan ho gaye to us ek ki hi yaad rahe। un par hi balihaar jaana hai, unki hi shreemat par chalna hai।

geet:- raat ke raahi…

om shanti। bhagvaanuvaach - bhagwan apne bachchon ko raajayog aur gyaan sikhla rahe hain। yeh koi manushya nahin। geeta mein likha hua hai shreekrishna bhagvaanuvaach। ab shreekrishna saari duniya ko maaya se liberate kare, yeh to sambhav nahin hai। baap hi aakar bachchon prati samjhaate hain। jinhone baap ko apna banaaya hai aur baap ke sammukh baithe hain। shreekrishna ko baap nahin kaha ja sakta। baap ko kaha jaata hai parampita, paramdham mein rahne vaala। aatma is shareer dvaara bhagwan ko yaad karti hai। baap baith samjhaate hain ki main tumhaara baap paramdham mein rahne vaala hoon। main sabhi aatmaon ka baap hoon। mainne hi kalpa pahle bhi bachchon ko aakar sikhaaya tha ki buddhi ka yog mujh parampita se lagaao। aatmaon se baat ki jaati hai। aatma jab tak shareer mein na aaye to aankhon dvaara dekh na sake। kaanon dvaara sun na sake। aatma bina shareer ke jad ho jaata hai। aatma chaitanya hai। garbha mein bachcha hai, parantu jab tak usmein aatma ne pravesh nahin kiya hai tab tak churpur nahin hoti। to aisi chaitanya aatmaon se baap baat karte hain। kehte hain mainne yeh shareer loan par liya hai। main aakar sabhi aatmaon ko vaapis le jaata hoon। phir jo aatmaayen sammukh hoti hain unhon ko raajayog sikhaata hoon। raajayog saari duniya nahin seekhegi। kalpa pahle vaale hi raajayog seekh rahe hain।

ab baba samjhaate hain buddhi ka yog baap ke saath ant tak lagaate rehna hai, ismen atakna nahin hai। stri purush hote hain to pahle ek do ko jaante bhi nahin hain। phir jab donon ki sagaai hoti hai phir koi 60-70 varsha bhi ikatthe rehte hain, to saari jeevan jisma, jisma ko yaad karte rehte hain। woh kahegi yeh mera pati hai, woh kahega yeh meri patni hai। ab tumhaari sagaai hui hai niraakaar se। niraakaar baap ne hi aakar sagaai karaai hai। kehte hain kalpa pahle muaaphik tum bachchon ki apne saath sagaai karaata hoon। main niraakaar is manushya srishti ka beejroop hoon। sabhi kahenge yeh manushya srishti god father ne rachi hai। to tumhaara baap sadaiv paramdham mein rehte hain। abhi kehte hain mujhe yaad karo। musaaphiri lambi hone kaaran bahut bachche thak padte hain। buddhi ka yog poora laga nahin sakte। maaya ki bahut thokren khaane se thak padte hain, mar bhi padte hain। phir haath chhod dete hain। kalpa pahle bhi aise hi hua tha। yahaan to jab tak jeena hai, tab tak yaad karna hai। stri ka pati mar jaata hai to bhi yaad karti rehti hai। yeh baap va pati aise chhodkar jaane vaala to nahin hai। kehte hain main tum sajniyon ko saath le jaaoonga। parantu ismen samay lagta hai, thakna nahin hai। paapon ka bojha sir par bahut hai, vo yog mein rahne se hi utrega। yog aisa ho jo ant mein baap va saajan ke sivaae aur koi yaad na pade। agar aur kuchh yaad pada to vyabhichaari ho gaya, phir paapon ka danda bhogna pade isliye baap kehte hain paramdham ke raahi thak mat jaana।

tum jaante ho main brahma dvaara aadi sanaatan devi-devta dharma ki sthaapna kar raha hoon aur shankar dvaara sabhi dharmon ka vinaash karaata hoon। abhi conference karte rehte hain to sabhi dharma milkar ek kaise ho jaaen, sabhi shant mein kaise rahen, uska raasta nikaalen। ab anek dharmon ki ek mat to ho nahin sakti। ek mat se to ek dharma ki sthaapna hoti hai। woh sabhi dharma sarvagun sampanna, sampoorn nirvikaari ho tab aapas mein ksheerkhanda ho sakte hain। raamraajya mein sabhi ksheerkhanda the। jaanvar bhi ladte nahin the। yahaan to ghar-ghar mein jhagda hai। ladte tab hain jab unka koi dhani-dhoni nahin hai। apne maat-pita ko nahin jaante hain। gaate bhi hain tum maat-pita ham baalak tere.. tumhaari kripa se sukh ghanere.. sukh ghanere to abhi hain nahin। to kahenge maat-pita ki kripa nahin hai। baap ko jaante hi nahin, to baap kripa kaise kare? phir teacher ke direction par chalen tab kripa ho। woh to kah dete sarvavyaapi hai, to kaun kripa kare aur kis par kare? kripa lene vaala aur karne vaala donon chaahiye। student pahle to aakar teacher ke paas padhe। yeh kripa apne oopar kare। phir teacher ke direction par chale। purushaartha karaane vaala bhi chaahiye। yeh baap bhi hai, teacher bhi hai to satguru bhi hai, unko param-pita, paramshikshak, param satguru bhi kaha jaata hai। baap kehte hain main kalpa-kalpa yeh sthaapna ka kaarya karaata hoon। patit duniya ko paavan duniya banaata hoon। world almighty authority hai na। to world authority ka raajya kaayam karte hain। saari srishti par ek hi lakshmi-naaraayan ka raajya tha। unhon ki almighty authority thi। vahaan koi ladaai jhagda kar na sake। vahaan maaya hai hi nahin। hai hi golden ej, silver ej। satayug treta donon ko svarga athva vaikuntha kahenge। sabhi gaate bhi hain chalo vrindaavan bhajo raadhe gobinda.. jaate to koi hain nahin। sirf yaad zaroor karte hain। ab to maaya ka raajya hai। sabhi raavan ki mat par hain। dekhne mein to bade-bade manushya achhe aate hain। bade-bade title milte hain। thodi jismaani himmat dikhaate hain va achha karma karte hain to title milte hain। koi ko doctor oph philosophy, koi ko kya.. aise-aise title dete rehte hain। abhi tum to ho brahman। barobar bhaarat ki service mein ho। tum daivi raajdhaani sthaapan kar rahe ho। jab sthaapna ho jaayegi tab tumko titles milenge। sooryavanshi raaja raani, chandra-vanshi raaja raani... phir tumhaara raajya chalega। vahaan koi ko title nahin milta। vahaan duhkh ki koi baat hi nahin, jo koi ka duhkh door kare va bahaaduri dikhaaye.. jo title mile। jo rasam-rivaaj yahaan hoti hai woh vahaan nahin hoti। na lakshmi-naaraayan is patit duniya mein aa sakte hain, is samay koi bhi paavan devta nahin hai। yeh hai hi patit aasuri duniya। anek mat-mataantar mein moonjh gaye hain। yahaan to ek hi shreemat hai, jisse raajdhaani sthaapan ho rahi hai। haan chalte-chalte koi ko maaya ka kaanta lag jaata hai to langadaate rehte hain isliye baap kehte hain sadaiv shreemat par chalo। apni manmat par chalne se dhokha khaayenge। sachchi kamaai hoti hai sachche baap ki mat par chalne se। apni mat se beda garka ho jaayega। kitne mahaaveer shreemat par na chalne kaaran adhogti ko pahunch gaye।

abhi tum bachchon ko sadgati ko paana hai। shreemat par na chala aur durgati ko paaya to phir bahut pashchaataap karna padega। phir dharmaraajpuri mein shivbaaba is tan mein baith samjhaayenge ki mainne tumko is brahma tan dvaara itna samjhaaya, padhaaya, kitni mehnat ki, tumne nishchay patra likhe ki shreemat par chalenge, parantu nahin chale। shreemat ko kabhi nahin chhodna chaahiye। kuchh bhi ho, baap ko bataane se saavdhaani milti rahegi। kaanta lagta hi tab hai jab baap ko bhoolte hain। bachche sadgati karne vaale baap se bhi 3 kos door bhaagte hain। gaate bhi hain vaari jaaoon, kurbaan jaaoon। parantu kis par? aise to nahin likha hai - sannyaasi par vaari jaaoon! va brahma vishnu shankar par vaari jaaoon! va shreekrishna par vaari jaaoon! kurbaan jaana hai parampita paramatma par। koi manushya par nahin। varsa milta hai baap se। baap bachchon par kurbaan hota hai। yeh behad ka baap bhi kehte hain, main kurbaan hone aaya hoon। parantu baap par kurbaan hone mein bachchon ka hriday kitna videeran hota hai। deh-abhimaan mein aaya to mara, vyabhichaari hua। yaad us ek ki rahni chaahiye। un par balihaar jaana chaahiye। ab naatak poora hota hai। ab hamko vaapis jaana hai। baaki mitra-sambandhi aadi to sab kabradaakhil hone hain। unko kya yaad karenge, ismen abhyaas bahut chaahiye। gaaya bhi hua hai chadhe to chaakhe amritras,... jor se girte hain to pad ganva dete hain। aise nahin svarga mein nahin aayenge। parantu raaja raani banne aur praja banne mein farka to hai na। yahaan ka bheel bhi dekho, minister bhi dekho। farka hai na isliye purushaartha poora karna hai। koi girte hain to ekdam patit ban jaate hain। shreemat par chal nahin paate to maaya naak se pakad ekdam gutter mein daal deti hai। baapdaada ka bankar phir traitor banna, goya unka saamna karna hai isliye baap kehte hain kadam-kadam sambhaal kar chalo। ab maaya ka ant hone vaala hai, to maaya bahuton ko giraati hai, isliye bachchon ko khabardaar rehna hai। raasta jara lamba hai, pad bhi bahut bhaari hai। agar traitor bana to saja bhi bhaari hai। jab dharmaraaj baba saja dete hain to bahut radiyaan maarte hain। jo kalpa-kalpa ke liye kaayam ho jaati hain। maaya badi prabal hai। thoda sa bhi baap ka disregard kiya to mara। gaaya hua hai satguru ka nindak thaur na paaye। kaam vash, krodh vash ulte kaam karte hain। goya baap ki ninda karaate hain aur danda ke nimitta ban jaate hain। agar kadam-kadam par padmon ki kamaai hai to padmon ka ghaata bhi hai। agar service se jama hota hai to ulte vikarma se na bhi hoti hai। baba ke paas saara hisaab rehta hai। ab sammukh padha rahe hain to saara hisaab jaise unki hatheli par hai। baap to kahenge shal koi bachcha shivbaaba ka disregard na kare, bahut vikarma bante hain। yagya seva mein haddi-haddi deni padti hai। dadheechi rishi ka misaal hai na! uska bhi pad banta hai। nahin to praja mein bhi bhinna-bhinna pad hain। praja mein bhi naukar chaakar sabhi chaahiye। bhal vahaan duhkh nahin hoga parantu nambarvaar pad to hain hi। achha।

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) yaad ki yaatra mein thakna nahin hai। aisi sachchi yaad ka abhyaas karna hai jo ant samay mein baap ke sivaae koi bhi yaad na aaye।

2) sachche baap ki mat par chal sachchi kamaai karni hai। apni manmat par nahin chalna hai। sadguru ki ninda kabhi bhi nahin karaani hai। kaam, krodh ke vash koi ulta kaam nahin karna hai।

vardaan:- sankalp shakti dvaara har kaarya mein saphal hone ki siddhi praapta karne vaale saphaltaamoorta bhav

sankalp shakti dvaara bahut se kaarya sahaj saphal hone ki siddhi ka anubhav hota hai। jaise sthool aakaash mein bhinna-bhinna sitaare dekhte ho aise vishwa ke vaayumandal ke aakaash mein chaaron or saphalta ke chamakte hue sitaare tab dikhaai denge jab aapke sankalp shreshtha aur shaktishaali honge, sada ek baap ke ant mein khoye rahenge, aapke yeh roohaani nayan, roohaani moorta divya darpan banenge। aise divya darpan hi anek aatmaon ko aatmik swaroop ka anubhav karaane vaale saphaltaamoorta hote hain।

slogan:- nirantar eeshvareey sukhon ka anubhav karne vaale hi bephikra baadshaah hain।