मंगलवार 17 जनवरी 2023 की दैनिक मुरली

17-01-2023 praatahmurli om shanti "baapdaada"' madhuban

“meethe bachche - tum is paathshaala mein aaye ho apni oonchi takdeer banaane, tumhein niraakaar baap se padhkar raajaaon ka raaja banna hai''

prashn:- kai bachche hain bhaagyashaali lekin ban jaate hain durbhaagyashaali kaise?

uttar:- woh bachche bhaagyashaali hain - jinhen koi bhi karmabandhan nahin hai arthaat karma bandhanmukta hain। parantu phir bhi yadi padhaai mein attention nahin dete, buddhi idhar udhar bhatakti rehti hai, ek baap jisse itna bhaari varsa milta, use yaad nahin karte hain to bhaagyashaali hote bhi durbhaagyashaali hi kahenge।

prashn:- shreemat mein kaun-kaun se ras bhare hue hain?

uttar:- shreemat hi hai - jismen maat-pita, teacher, guru sabki mat ikatthi hai। shreemat jaise saccharin hai, jismen yeh sab ras bhare hue hain।

geet:- takdeer jagaakar aai hoon…

om shanti। shiv bhagvaanuvaach, manushya jab geeta sunaate hain to shreekrishna ka naam lekar sunaate hain। yahaan to jo sunaate hain kehte hain shiv bhagvaanuvaach। khud bhi kah sakte hain shiv bhagvaanuvaach, kyonki shivbaaba svayan hi bolte hain। donon iktthe bhi bol sakte hain। bachche to donon ke hain। bachche aur bachchiyaan donon baithe hue hain। to kehte hain bachche samajhte ho ki kaun padhaate hain? kahenge baapdaada padhaate hain। baap bade ko, daada chhote ko arthaat bhaai ko kaha jaata hai। to baapdaada ikttha kaha jaata hai। ab bachche bhi jaante hain ki ham student hain, school mein student baithe hi hain takdeer banaane ke liye ki ham padhkar phalaana imtahaan paas karenge। woh jismaani imtahaan to bahut hote hain। yahaan tum bachchon ki dil mein hai ki hamko behad ka baap parampita paramatma padhaate hain। baap is (brahma) ko nahin kehte ho। niraakaar baap samjhaate hain, tum jaante ho ham baap se raajayog seekh raajaaon ka raaja bante hain। raajaayen bhi hote hain aur phir raajaaon ke raajaayen bhi hote hain। jo raajaaon ke raajaayen hain, unhon ko raajaayen bhi poojte hain। yeh rivaaj bhaarat khanda mein hi hai। patit raajaayen paavan raajaaon ko poojte hain। baap ne samjhaaya hai mahaaraaja badi property vaale ko kaha jaata hai। raaje log chhote hote hain। aajkal to koi-koi raajaaon ki mahaaraajaaon se bhi jaasti property hoti hai। koi-koi saahookaaron ko raajaaon se bhi jaasti property hoti hai। vahaan aise unlawful nahin hota। vahaan to sab kuchh kaayde anusaar hoga। bade mahaaraaja paas badi property hogi। to tum bachche jaante ho hamko behad ka baap baith padhaate hain। paramatma bigar raajaaon ka raaja, svarga ka maalik koi bana nahin sakta। svarga ka rachayita hai hi niraakaar baap। unka naam bhi gaate hain heavenly god father। baap saaph samjhaate hain main tum bachchon ko phir se svaraajya dekar raajaaon ka raaja banaata hoon। ab tum jaante ho ham takdeer banaakar aaye hain, behad ke baap se raajaaon ka raaja banne। kitni khushi ki baat hai। bada bhaari imtahaan hai। baba kehte hain shreemat par chalo, ismen maat-pita, teacher, guru aadi sabki mat ikatthi hai। sabki saccharin bani hui hai। sabhi ka ras ek mein bhara hua hai। sabka saajan ek hai। patit se paavan banaane vaala woh baap thahra। guroonaanak ne bhi unki mahima ki hai to zaroor unko yaad karna pade। pahle woh apne paas le jaayega phir paavan duniya mein bhej dega। koi bhi aaye to unko samjhaana hai - yeh godly college hai। bhagvaanuvaach, aur school mein to kabhi bhagvaanuvaach nahin kahenge। bhagwan hai hi niraakaar gyaan ka saagar, manushya srishti ka beejroop.. tum bachchon ko baith padhaata hoon। yeh godly knowledge hai। sarasvati ko goddess aaph knowledge kehte hain। to zaroor godly knowledge se god-goddess hi bante honge। bairistari knowledge se barrister hi banenge। yeh hai godly knowledge। sarasvati ko god ne knowledge di hai। to jaise sarasvati goddess aaph knowledge hai, vaise tum bachche ho। sarasvati ko bahut bachche hain na। parantu har ek goddess aaph knowledge kahlaaye jaayen, yeh nahin ho sakta। is samay apne ko goddess nahin kah sakte। vahaan bhi to devi-devtaayen hi kahenge। god knowledge barobar dete hain। lesson aise dhaaran karaate hain। yeh martaba dete hain bada। baaki devtaayen god goddess to ho nahin sakte। yeh maat-pita to jaise ki god goddess ho jaate। parantu hain to nahin na। niraakaar baap ko god father kahenge। in (saakaar) ko god thode hi kahenge। yeh badi guhya baaten hain। aatma aur paramatma ka roop aur phir sambandh kitni guhya baaten hain। woh jismaani sambandh kaaka, chaacha, maama aadi to common hain। yeh to hai roohaani sambandh। samjhaane ki badi yukti chaahiye। maat-pita akshar gaate hain to zaroor koi arth hai na। woh akshar avinaashi ban jaata hai। bhaktimaarga mein bhi chala aata hai।

tum bachche jaante ho ham school mein baithe hain। padhaane vaala gyaan saagar hai। inki aatma bhi padhti hai। is aatma ka baap woh paramatma hai, jo sabhi ka baap hai, woh padhaate hain। unko garbha mein to aana nahin hai, to knowledge kaise padhaayen। woh aate hain brahma ke tan mein। unhonne phir brahma ke badle shreekrishna ka naam daal diya hai। yeh bhi drama mein hain। kuchh bhool ho tab to baap aakar is bhool ko correct kar abhul banaaye। niraakaar ko na jaanne kaaran hi moonjh gaye hain। baap samjhaate hain main tumhaara behad ka baap behad ka varsa dene vaala hoon। lakshmi-naaraayan svarga ke maalik kaise bane, yeh koi bhi nahin jaante। zaroor koi ne to karma sikhaaye honge na aur woh bhi zaroor bada hoga, jo itna oonch pad praapta karaaya। manushya kuchh bhi nahin jaante। baap kitna pyaar se samjhaate hain, kitni badi authority hai। saari duniya ko patit se paavan banaane vaala maalik hai। samjhaate hain yeh bana-banaaya drama hai। tumko chakra lagaana hota hai। is banaavat ko koi bhi jaante nahin। drama mein kaise ham actors hain, yeh chakra kaise phirta hai, duhkhadhaam se sukhdhaam kaun banaate hain, yeh tum jaante ho। tumko sukhdhaam ke liye padhaata hoon। tum hi 21 janmon ke liye sada sukhi bante ho aur koi vahaan ja na sake। sukhdhaam mein zaroor thode manushya honge। samjhaane liye points bahut achhi chaahiye। kehte to hain baba ham aapke hain, parantu poora banne mein time lagta hai। koi ka karmabandhan jhat chhoot jaata hai, koi ko time lagta hai। kai to aise bhaagyashaali bhi hain jinka karmabandhan toota hua hai, parantu padhaai mein attention nahin dete hain to unko kaha jaata hai durbhaagyashaali। putra, potre, dhotre aadi mein buddhi chali jaati hai। yahaan to ek ko hi yaad karna hai। bahut bhaari varsa milta hai। tum jaante ho ham raajaaon ke raaja bante hain। patit raajaayen kaise bante hain aur paavan raajaaon ke raaja kaise bante hain, woh bhi baap tumko samjhaate hain। main svayan aakar raajaaon ka raaja svarga ka maalik banaata hoon - is raajayog se। woh patit raajaayen to daan karne se bante hain। unhon ko main thode hi aakar banaata hoon। woh bahut daani hote hain। daan karne se raajaai kul mein janma lete hain। main to 21 janmon ke liye tumko sukh deta hoon। woh to ek janma ke liye bante so bhi patit duhkhi rehte hain। main to aakar bachchon ko paavan banaata hoon। manushya samajhte hain sirf ganga snaan karne se paavan bante hain, kitne dhakke khaate hain। ganga jamuna aadi ki kitni mahima karte hain। ab ismen mahima ki to baat hi nahin। paani saagar se aata hai। aise to bahut nadiyaan hain। vilaayat mein bhi badi-badi nadiyaan khodkar banaate hain, ismen kya badi baat hai। gyaan saagar aur gyaan gangaayen kaun hain, yeh to jaante hi nahin। shaktiyon ne kya kiya, kuchh bhi jaante nahin। vaastav mein gyaan ganga athva gyaan sarasvati yeh jagdamba hai। manushya to jaante hi nahin, jaise bheel hain। bilkul hi buddhu, besmajh hain। baap aakar besmajh ko kitna samajhdaar banaate hain। tum bata sakte ho inhon ko raajaaon ka raaja kisne banaaya। geeta mein bhi hai main raajaaon ka raaja banaata hoon। manushya to yeh jaante nahin। ham khud bhi nahin jaante the। yeh jo khud bana tha, ab nahin hai, vahi nahin jaanta to aur phir kaise jaan sakte। sarvavyaapi ke gyaan mein kuchh bhi hai nahin, yog kiske saath lagaayen, pukaare kisko? khud hi khuda hain phir praarthana kiski karenge! bada wonder hai। bahut bhakti jo karte hain unka maan hota hai। bhakta maala bhi hai na। gyaan maala hai roodra maala। yeh phir bhakta maala। woh hai niraakaari maala। sabhi aatmaayen vahaan rehti hain। unmein bhi pahla number aatma kiski hai? jo number one mein jaate hain, sarasvati ki aatma va brahma ki aatma number one padhti hai। yeh aatma ki baat hai। bhakti maarga mein to sab jismaani baaten hain - phalaana bhakta aisa tha, unke shareer ka naam lenge। tum manushya ko nahin kahenge। tum jaante ho brahma ki aatma kya banti hai। woh jaakar shareer dhaaran kar raajaaon ka raaja bante hain। aatma shareer mein pravesh kar raajya karti hai। abhi to raaja nahin hai। raajya karti to aatma hai na। main raaja hoon, main aatma hoon, is shareer ka maalik hoon। aham aatma shareer ka naam shri naaraayan dharaae phir raajya karenge। aatma hi sunti aur dhaaran karti hai। aatma mein sanskaar rehte hain। ab tum jaante ho ham baap se raajaai lete hain shreemat par chalne se। baapdaada donon milkar kehte hain bachche, donon ko bachche kahne ka hak hai। aatma ko kehte hain niraakaari bachche, mujh baap ko yaad karo। aur koi kah na sake ki he niraakaari bachche, he aatmaayen mujh baap ko yaad karo। baap hi aatmaon se baat karte hain। aise to nahin kehte he paramatma mujh paramatma ko yaad karo। kehte hain, he aatmaayen mujh baap ko yaad karo to is yog agni se tumhaare vikarma vinaash honge। baaki ganga snaan se kabhi koi paap aatma se punya aatma nahin ban sakte। ganga snaan kar phir ghar mein aakar paap karte hain। in vikaaron ke kaaran hi paap aatma bante hain। yeh koi samajhte nahin। baap samjhaate hain ki ab tumko raahu ka kada grahan laga hua hai। pahle halka grahan hota hai। ab de daan to chhoote grahan। praapti bahut bhaari hai। to purushaartha bhi aise karna chaahiye na। baap kehte hain main tumko raajaaon ka raaja banaaoonga isliye mujhe aur varse ko yaad karo। apne 84 janmon ko yaad karo isliye baba ne naam hi rakha hai “svadarshan chakradhaari bachche।'' to svadarshan ka gyaan bhi chaahiye na।

baap samjhaate hain - yeh puraani duniya khatma honi hai। tumko main nai duniya mein le chalta hoon। sannyaasi sirf gharbaar ko bhoolte hain, tum saari duniya ko bhoolte ho। yeh baap hi kehte hain ki ashareeri bano। main tumko nai duniya mein le chalta hoon isliye puraani duniya se, puraane shareer se mamatva todo। phir nai duniya mein tumko naya shareer milega। dekho, shreekrishna ko shyaam-sundar kehte hain। satayug mein woh gora tha ab antim janma mein kaala ho gaya hai। to kahenge na shyaam hi sundar banta hai, phir sundar se shyaam banta hai। to naam rakh diya hai shyaam sundar। kaala banaate hain 5 vikaar raavan aur phir gora banaate hain parampita paramatma। chitra mein bhi dikhaaya hai ki main puraani duniya ko laat maar gora ban raha hoon। gori aatma svarga ki maalik banti hai। kaali aatma narka ki maalik banti hai। aatma hi gori aur kaali banti hai। ab baap kehte hain tumko pavitra banna hai। woh hathayogi pavitra banne ke liye bahut hath karte hain। parantu yog bigar to pavitra ban na sake, ya to sajaayen khaakar pavitra banna pade isliye baap ko kyon na yaad karen aur 5 vikaaron ko bhi jeetna hai। baap kehte hain yeh kaam vikaar hi aadi-madhya-ant duhkh dene vaala hai। jo vikaaron ko nahin jeet sakte woh vaikuntha ke raaja thode hi ban sakte hain isliye baap kehte hain dekho main tumko kitne achhe karma sikhaata hoon - baap, teacher, satguru roop mein। yogbal se vikarma vinaash karaae vikarmaajeet raaja banaata hoon। vaastav mein satayug ke devi-devtaaon ko hi vikarmaajeet kaha jaata hai। vahaan vikarma to hote nahin। vikarmaajeet sanvat aur vikram sanvat alag-alag hai। ek raaja vikram bhi hokar gaya hai aur vikarmaajeet raaja bhi ho gaya hai। ham abhi vikarmon ko jeet rahe hain। phir dvaapar se naye-sir vikarma shuru hote hain। to naam rakh diya hai raaja vikram। devtaayen hain vikarmaajeet। abhi ham woh bante hain phir jab vaam maarga mein aate hain to vikarmon ka khaata shuru ho jaata hai। yahaan vikarmo ka khaata chuktu kar phir ham vikarmaajeet bante hain। vahaan koi vikarma hote nahin। to bachchon ko yeh nasha hona chaahiye ki ham yahaan oonch takdeer banaate hain। yeh hai bade te badi takdeer banaane ki paathshaala। satsang mein takdeer banne ki baat nahin rehti। paathshaala mein hamesha takdeer banti hai। tum jaante ho ham nar se naaraayan athva raajaaon ka raaja banenge। barobar patit raajaayen, paavan raajaaon ko poojte hain। main tumko paavan banaata hoon। patit duniya mein to raajya nahin karenge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhi mein svadarshan chakra ka gyaan rakh, raahu ke grahan se mukta hona hai। shreshtha karma aur yogbal se vikarmon ka khaata chuktu kar vikarmaajeet banna hai।

2) apni oonchi takdeer banaane ke liye padhaai par poora-poora dhyaan dena hai।

vardaan:- baahyamukhta ke rason ki aakarshan ke bandhan se mukta rahne vaale jeevanmukta bhav

baahaymukhta arthaat vyakti ke bhaav-svabhaav aur vyakta bhaav ke vibration, sankalp, bol aur sambandh, samparka dvaara ek do ko vyartha ki taraph uksaane vaale, sada kisi na kisi prakaar ke vyartha chintan mein rahne vaale, aantarik sukh, shanti aur shakti se door.....yeh baahyamukhta ke ras bhi baahar se bahut aakarshit karte hain, isliye pahle isko kainchi lagaao। yeh ras hi sookshm bandhan ban saphalta ki manzil se door kar dete hain, jab in bandhanon se mukta bano tab kahenge jeevanmukta।

slogan:- jo achhe bure karma karne vaalon ke prabhaav ke bandhan se mukta saakshi va merciful hai vahi tapasvi hai।